படகுமூலம் தமிழகத்திற்கு அகதிகளாக சென்ற 4 பேர் கைது!

இலங்கையில் இருந்து ஒரு வயது குழந்தையுடன் படகு மூலம் தமிழகத்திற்கு அகதிகளாக சென்ற 4 பேர் இந்திய கடற்படையினரிடம் பிடிபட்டனர். இராமேஸ்வரம் முகாமில் இருந்து இந்திய கடற்படையினர் இன்று அதிகாலை ரோந்து சென்றனர். இராமேஸ்வரம் சேரான்கோட்டை கடல் பகுதியில் ரோந்து சென்ற போது அப்பகுதியில் பிளாஸ்டிக் படகு ஒன்றை கண்டனர். அந்த படகின் அருகில் சென்று பார்த்த போது அதில் இலங்கையை சேர்ந்த ஒரு வயது குழந்தை உட்பட 4 பேர் இருந்துள்ளனர்.

இதையடுத்து அவர்களை கடற்படை முகாமிற்கு அழைத்து வந்து விசாரணை நடத்தினர். விசாரணையில் இலங்கை யாழ்ப்பாணம் பகுதியை சேர்ந்த நிர்மலன் (24), இவரது மனைவி நிஷாந்தினி (23), இவர்களது ஒரு வயது குழந்தை மற்றும் நிர்மலனின் நண்பர் கலையரசன் (31) என தெரியவந்தது. மேலும் நிஷாந்தினியை காதல் திருமணம் செய்து கொண்டதால் தனது தந்தை, தன்னுடன் அடிக்கடி தகராறு செய்து வந்ததாகவும், தன்னை இராணுவத்தினரிடம் பிடித்து கொடுத்து விடுவதாக மிரட்டியதால் தனது குடும்பத்தினருடன் அகதியாக வந்ததாக நிர்மலன் கூறியுள்ளார்.

நேற்று இரவு 9 மணிக்கு தலைமன்னாரில் இருந்து பிளாஸ்டிக் படகில் கிளம்பிய இவர்கள் இன்று அதிகாலை இராமேஸ்வரம் சேரான்கோட்டை கடற்பகுதிக்கு வந்துள்ளனர். அப்போது ரோந்து சென்ற இந்திய கடற்படையினரிடம் இவர்கள் பிடிபட்டனர். இராமேஸ்வரத்தில் உள்ள இந்திய கடற்படை முகாமிற்கு விசாரணைக்காக அழைத்து வரப்பட்ட இவர்கள் பின்னர் பொலிஸாரிடம் ஒப்படைக்கப்பட்டனர்.

http://www.seithy.com/breifNews.php?newsID=100382&category=TamilNews&language=tamil