'சென்னையில் 20-ம் திகதி மீனவர் சந்திப்பு நடப்பது சாத்தியமில்லை'- இலங்கை

தமிழக- இலங்கை மீனவர்கள் இடையே சென்னையில் வரும் 20-ம் திகதி பேச்சுவார்த்தை நடக்கும் என்று தமிழக முதலமைச்சர் ஜெயலலிதா அறிவித்துள்ள போதிலும், அந்தக் கூட்டம் சாத்தியப்படாது என்று இலங்கை மீன்பிடித்துறை அமைச்சர் ராஜித்த சேனாரத்ன பிபிசி தமிழோசையிடம் சற்றுமுன்னர் உறுதிப்படுத்தினார்.

சிறையில் தடுத்துவைக்கப்பட்டுள்ள இலங்கை மீனவர்கள் 179 பேரை விடுதலை செய்யவுள்ளதாக தமிழக முதலமைச்சர் ஜெயலலிதா அறிவித்துள்ளார்.

அதேநேரம் இலங்கைச் சிறைகளில் உள்ள இந்திய மீனவர்கள் 275 பேரையும் இலங்கை அரசு ஓரிரு நாட்களில் விடுவிக்கும் என்றும் ஜெயலலிதா நேற்றிரவு அறிக்கை வெளியிட்டுள்ளார்.

எனினும், தமிழகத்தில் மட்டுமன்றி ஆந்திராவிலும் இலங்கை மீனவர்கள் தடுத்துவைக்கப்பட்டுள்ளதாக சுட்டிக்காட்டிய இலங்கை அமைச்சர், எல்லா இலங்கை மீனவர்களும் விடுவிக்கப்பட வேண்டும் என்றும் நிபந்தனை விதித்தார்.

இந்திய மீனவர்களை விடுவிப்பதற்கான எந்தவொரு நடவடிக்கையையும் இலங்கை அரசு இன்னும் எடுக்கவில்லை என்றும் அமைச்சர் சேனாரத்ன உறுதிப்படுத்தினார்.

தலைநகர் தில்லியில் எதிர்வரும் 15-ம் திகதி மத்திய அரசுடன் பேச்சுவார்த்தை நடத்துவதற்காகச் செல்லவுள்ள இலங்கை அமைச்சர், அங்கு தமிழக மீனவர் பிரதிநிதிகளையும் சந்தித்துப் பேசவுள்ளார்.

மேலதிக விபரங்களை எமது இன்றைய செய்தியரங்கத்தில் எதிர்பாருங்கள்.

http://www.bbc.co.uk/tamil/india/2014/01/140112_srilankaminister.shtml