ஈழத் தமிழர் பிரச்சனையும் தமிழகத் தமிழர்களும்: தினமணி

ஈழத் தமிழர் பிரச்சனை தொடர்பாக கடந்த 22 ஆம் நாள் தமிழ்நாட்டிலிருந்து வெளியாகும் தினமணி நாளேட்டில் பிரசுரிக்கப்பட்டிருந்த ஆசிரியர் தலையங்கம் குறித்த தமிழகத் தமிழர்களின் கருத்துகளின் தொகுப்பு:

"இலங்கைத் தமிழர் பிரச்சினை" - தலையங்கம் (22-08-06) படித்தேன்.

மிக நேர்மையாகவும், நியாயமாகவும், நடைமுறைக்கு உகந்த முறையிலும் எழுதப் பெற்றுள்ள இந்தத் தலையங்கத்தின் கருத்துகள், இன்றைய இலங்கை அரசின் இனவெறி மண்டையில் ஏறாது.

ஏனெனில், போர் நிறுத்தத்தை விரும்புவதுபோல் அது நாடகமாடுகிறது.

சர்வதேச சமுதாயத்தைக் குழப்பவும், ஏமாற்றவும் முயல்கிறது.

- தி.க.சி., நெல்லை.

இந்திய அரசு சாமர்த்தியமாகச் சர்க்காரியா கமிஷன் அறிக்கையை அனுப்பிவிட்டால், சமரச உடன்பாடு ஏற்பட்டு விடுமா?

இந்தியாவில் மாநிலங்கள் சுயாட்சி உரிமை பெறவில்லை. கூட்டரசு அமைப்பும் இல்லை. சர்வ அதிகாரம் படைத்த மைய அரசு கோலோச்சுகிறது.

அமைதி வழியில் தமிழரசுக் கட்சி கோரிய ஈழத் தமிழ் மாநிலம் (சுயாட்சி உரிமையுடன்) அன்றே இலங்கையில் அமைத்திருந்தால் இத்துணை இழப்பு, வன்முறைக் கொடுமைகளுக்கு இடமே இல்லை.

சிங்களவரின் ஆதிக்க மனப்பான்மை மாறப் போவதில்லை. அமைதியும் ஏற்படப் போவதில்லை.

- ஞானச்செல்வன், திருவல்லிக்கேணி.

கிளிண்டன் அமைச்சரவையில் வெளிவிவகாரத் துணை அமைச்சராக இருந்தவர் மேடலின் ஆல்ஃபிரைட் என்பவர்.

வாஷிங்டன் கிறிஸ்துவப் பல்கலைக்கழகப் பட்டமளிப்பு விழாவில் ஒருமுறை அவர் பேசும்போது,

"இலங்கைத் தீவில் இந்துத் தீவிரவாதிகள் பயங்கரவாதச் செயல்களில் ஈடுபடுவதாக'வும் "அது தடுத்து நிறுத்தப்பட வேண்டும்' என்றும் குறிப்பிட்டார்.

அமெரிக்க அமைச்சரின் இக் கருத்து மூலம் இலங்கைப் பிரச்சினை பற்றிய இலங்கை அரசின் பிரசாரத்தின் உண்மையை உணர்ந்து கொள்ளலாம்.

இந்தியாவில் உள்ள காஷ்மீர் மாநிலத்திற்கும் கூடுதலான அதிகாரத்தை, தமிழ் இந்து மக்களுக்கு, இலங்கை சிங்கள பௌத்த அரசு வழங்குவது ஒன்றே தீர்வுக்கு வழி வகுக்கும் எனலாம்.

- தி. அன்பழகன், திருச்சி.

இலங்கையின் ஒருமைப்பாட்டைக் காக்க வேண்டுமென மத்திய அரசு கூறலாம்.

இந்திய அரசு விரும்பினால் பாகிஸ்தானில் ஒருமைப்பாட்டைப் பற்றிக் கவலைப்படாமல் வங்காள தேசத்தை உருவாக்கித் தரும்.

ஆனால் இலங்கைத் தமிழர்களுக்குத் தனி நாடென்றால் இந்திய ஒருமைப்பாட்டுக்குப் பங்கம் ஏற்பட்டுவிடுமாம்.

புரட்சி என்பது ஏற்றுமதி செய்யக்கூடிய சரக்கல்ல. இலங்கைத் தமிழர்களின் எழுச்சி இந்தியத் தமிழர்கள் எழுதித் தந்த வீர வசனத்தால் உருவானதல்ல.

சிங்களவர்களின் அணுகுமுறையே தமிழர்களை ஆயுதமேந்த வைத்தது.

ஈழத் தமிழர்களுக்கு இந்தியத் தமிழர்கள் எந்த ஆதரவும் தெரிவிக்காமல் வாயை மூடிக் கொண்டிருந்தாலே போதும். பிறர் கேவலமாக நினைப்பார்களே என்று அடக்கமாக வசனம் பேசுவதோ, ஒப்பாரி வைப்பதோ தேவையில்லை.

- தெ. சுந்தரமகாலிங்கம், வத்திராயிருப்பு.

இலங்கைப் பிரச்சினை தீர முதலில் "ஒன்றுபட்ட இலங்கைக்குள் தீர்வு" என்ற மனநிலையிலிருந்து உலக நாடுகள் விடுபட வேண்டும்.

ஈழப் போராட்டத்தை விடுதலைப் போராட்டமாக அங்கீகரிக்க வேண்டும்.

இப் புவிப்பந்தில் புதிய புதிய நாடுகள் இன்றும் உருவாகிக் கொண்டுதான் இருக்கின்றன.

ஐ.நா. உறுப்பு நாடுகளின் எண்ணிக்கை உயர்ந்து கொண்டுதான் வருகிறது. இன்று பல்வேறு கட்டங்களைத் தாண்டி, தீர்க்க முடியாத முரண்பாடாக தமிழர் - சிங்களவர் பிரச்சினை வடிவெடுத்துள்ளது.

-மா.கோ. தேவராசன், சிதம்பரம்.

http://www.eelampage.com/?cn=28535