ஜே.வி.பி. வழியைப் பின்பற்றினால் மேலும் பல பிரபாகரன்கள் பிறப்

ஜே.வி.பி. வழியைப் பின்பற்றினால் மேலும் பல பிரபாகரன்கள் பிறப்பெடுப்பார்கள்: மைத்திரிபால சிறிசேன

இலங்கையில் பயங்கரவாதத்துக்கு துப்பாக்கிமுனைகளின் மூலமாக பதில் சொல்ல வேண்டும் என்ற ஜே.வி.பி.யின் வழியைப் பின்பற்றினால் மேலும் பல பிரபாகரன்கள்தான் பிறப்பெடுப்பார்கள் என்று சிறிலங்கா சுதந்திரக் கட்சியின் பொதுச்செயலாளர் மைத்திரிபால சிறிசேன எச்சரித்துள்ளார்.

பொலநறுவையில் கடந்த திங்கட்கிழமை நடைபெற்ற சுதந்திரக் கட்சிக் கூட்டத்தில் அவர் பேசியதாவது:

வாழ்க்கைச் செலவின உயர்வு, வேலையில்லாத் திண்டாட்டம் என பல்வேறு பிரச்சனைகளுடன் நாம் உள்ளோம். இவற்றிற்கு அப்பால் இனப்பிரச்சனைக்குத் தீர்வு காண்பதற்கு நாம் முன்னுரிமை கொடுக்கிறோம்.

இனப்பிரச்சனைக்குத் தீர்வு காண்பதற்காக அரசாங்கத்தில் இணையுமாறு ஐக்கிய தேசியக் கட்சிக்கு மகிந்த ராஜபக்ச அழைப்பு விடுத்துள்ளார். இலங்கை தொழிலாளர் காங்கிரஸ், மலையக மக்கள் முன்னணி ஆகியவை அரசாங்கத்தில் ஏற்கனவே இணைந்துள்ளது.

தமிழ்த் தேசியக் கூட்டமைப்பும் அரசாங்கத்தில் இணைந்து இனப்பிரச்சனைக்குத் தீர்வு காண உறுதியான முயற்சிகளை மேற்கொள்ள வேண்டும். இனப்பிரச்சனைக்குத் தீர்வு காணும்போது தேசத்தின் ஐக்கியம் பாதுகாக்கப்படும். ஒருமித்த கருத்தின் மூலமே தேசியக் கொள்கை வகுக்கப்படும்.

இனப்பிரச்சனைக்குத் தீர்வு காண்பதிலாவது நாம் ஒருங்கிணைய வேண்டும்.

இங்கே இனப்பிரச்சனை இல்லை- பயங்கரவாதத்துக்குத்தான் முகம் கொடுப்பதாக சிலர் கூறிவருகின்றனர். பயங்கரவாதத்துக்கு துப்பாக்கி முனைகளுடாகாத்தான் பதிலளிக்க வேண்டும் என்றும் கூறுகின்ரனர்.

ஆனால் அந்த வழிமுறையில் நமக்கு நம்பிக்கை இல்லை. அத்தகைய வழிமுறையை நாம் பின்பற்றி பிரபாகரனையும் அவரது இராணுவத்தையும் முற்றாக அழித்தாலும் மேலும் பல பிரபாகரன்கள்தான் பிறப்பெடுப்பார்கள்.

ஆகையால் பயங்கரவாதத்தை முடிவுக்கு கொண்டுவர அரசியல் தீர்வுதான் ஒரே வழியாகும் என்றார் மைத்திரிபால சிறிசேன.

http://www.eelampage.com/?cn=28534