புல்லர் தூக்கு தண்டனையை நிறைவேற்ற மாட்டோம் என உச்ச நீதிமன்றத்தில் மத்திய அரசு உறுதி!

புதுடெல்லி: டெல்லியில் 1993 ஆம் ஆண்டு நிகழ்ந்த கார் குண்டுவெடிப்பு வழக்கு குற்றவாளியான தேவிந்தர் பால் சிங் புல்லரை தூக்கிலிட மாட்டோம் என உச்ச நீதிமன்றத்தில் மத்திய அரசு உறுதியளித்துள்ளது.

காலிஸ்தான் தீவிரவாத இயக்கத்தை சேர்ந்த புல்லரின் தூக்குத்தண்டனையை எதிர்த்து அவரது மனைவி, உச்ச நீதிமன்றத்தில் மனு தாக்கல் செய்திருந்தார்.

தீர்ப்பை மறு ஆய்வு செய்யக்கோரியும், அவரது மருத்துவ அறிக்கையை வழங்கக் கோரியும் கேட்டிருந்தார்.

இந்த மனுவை விசாரித்த உச்ச நீதிமன்றம், புல்லருக்கு தூக்குத் தண்டனை நிறைவேற்ற தடைவிதித்து கடந்த ஜனவரி 31 ஆம் தேதியன்று உத்தரவிட்டிருந்தது.

இந்நிலையில், இம்மனு இன்று விசாரணைக்கு வந்தபோது, புல்லரின் மனைவி அளித்துள்ள கருணை மனு பரிசீலனையில் உள்ளதாகவும், டெல்லி ஆளுநர் நஜீப் ஜங்கும் புல்லரின் தூக்குத் தண்டனையை குறைக்க பரிந்துரைத்துள்ளதாகவும், இது தவிர புல்லரின் உடல் நிலையையும் ( மனம் நலம் சரியில்லை) கருத்தில்கொண்டு அவரது தூக்குத் தண்டனையை நிறைவேற்ற மாட்டோம் என்றும் மத்திய அரசு தரப்பில் ஆஜரான வழக்கறிஞர் தெரிவித்தார்.

மேலும் புல்லரின் கருணை மனு மீது முடிவெடுக்க 2 வார காலம் அவகாசம் அளிக்க வேண்டும் என மத்திய அரசு வழக்கறிஞர் கேட்டபோது, இது தொடர்பாக முடிவெடுப்பதில் மத்திய அரசின் காலதாமதத்தை குறை கூறிய நீதிபதிகள், கவர்னர் ஜனவரி 6 ஆம் தேதியன்றே தனது தண்டனை குறைப்பு பரிந்துரையை தெரிவித்துவிட்டபோதிலும், இதுவரை மத்திய அரசு முடிவெடுக்காமல் இருப்பதாகவும், இனியும் தாமதிக்காமல் முடிவெடுக்க வேண்டும் என்று கண்டிப்புடன் கூறியதோடு, இது உண்மையிலேயே மிகவும் கொடுமையானது என்று கூறினர்.

முன்னதாக கடந்த 2 வாரங்களுக்கு முன்னர் புல்லர் மனம் நலம் இல்லாத நிலையில் இருப்பதால், அவருக்கான தூக்குத்தண்டனையை ஆயுள் தண்டனையாக குறைக்குமாறு டெல்லி மாநில அரசு கேட்டுக்கொண்டது. அதற்கு முன்னதாகவே, அதாவது கடந்த வாரம் கருணை மனுக்கள் மீது காட்டப்பட்ட அசாதாரணமான காலதாமதத்தின் அடிப்படையில் 15 குற்றவாளிகளின் தூக்குத்தண்டனையை ஆயுள் தண்டனையாக குறைத்து உத்தரவிட்டது குறிப்பிடத்தக்கது. 

http://news.vikatan.com/article.php?module=news&aid=25062