தற்போதைய காலங்களில் இங்கிலாந்து மக்கள் சகல தளங்களிலும் ஆபத்திருப்பது போன்ற பிரம்மையிற் பயந்து வாழ்வதாக கருத்துக் கணிப்பு ஒன்றில் குறிப்பிடப்பட்டுள்ளது. புகையிரதத்திற்காகக் காத்திருக்கும் சந்தர்ப்பங்களிலும், பயணங்களின் போதும், தான் இயங்கிப் படிக்கட்டுகளில் செல்லும் சமயங்களிலும், இனம் தெரியாத பய உணர்வு மக்கள் மத்தியிற் காணப்படுவதாக அந்தக் கருத்துக் கணிப்பில்   கூறப்பட்டுள்ளது.

வேலைவாய்ப்புச் சந்தை நடைமுறைகளிலும், வேலை இடங்களுக்கான உத்தரவாதத்திலும் தேவையற்றுக் காணப்படும் சந்தேகம், பய உணர்வைத் தோற்றி நிற்பதாகச் சுட்டிக்காட்டப்பட்டுள்ளது. இங்கிலாந்து மக்கள், உணராத வகையில் பய உணர்வு அவர்கள் மனங்களில் ரகசியமாக குடியேற்றப்பட்டுள்ளதாகக் குறிப்பிடப்பட்டுள்ளது.

அரசியல் வாதிகள் மிகவும் சுதந்திரமாகவும், இலகுவாகவும் தம் காரியங்களைச் சாதித்துக் கொள்ளக் கூடிய வகையில், சகல தளங்களிலும் பிரச்சனைகளும், ஆபத்துக்களும் இருப்பது போன்ற மாயையைத் தோன்றச் செய்துள்ளதாக எண்ணப்படுகிறது. பல சமயங்களில் மிகவும் சிறிதளவிற் காணப்படும் பிரச்சனைகளை பிரசாரம் செய்வதன் மூலம் பூதாகரமாக்கும் அரசியலும் நிகழ்வதாகச் சுட்டிக்காட்டப்பட்டுள்ளது.

மக்கள் மத்தியில் காணப்படும் தேவையற்ற பய உணர்வைப் பயன் படுத்தி, ஐக்கிய ராஜ்யத்தின் சுதந்திரக் கட்சியான UK Independence Party, இவ் வருடம் May மாதம் இருபத்திரண்டிலிருந்து, இருபத்தைந்தாம் தேதி வரை இடம் பெற விருக்கும் ஐரோப்பிய ஒன்றிய அரசிற்கான தேர்தலில், தன் வாக்காளர் வேட்டையை நடாத்துவதாகக் குறிப்பிடப்பட்டுள்ளது.

எவர் உண்மையாக இந்த நாட்டை நடாத்திச் செல்கிறார்கள், மீண்டும் எங்கள் நாட்டின் அதிகாரத்தைத் திருப்பிப் பெறு, எனும் வாசகங்கள் அடங்கிய பதாதைகள் UKIP கட்சியின் தலைவரான நைகெல் வ(f)றேஜ் என்பவரால் தேர்தல் களத்தில் பார்வைக்கு வைக்கப்பட்டுள்ளது.

இங்கிலாந்து மக்களின் வரிப் பணம் ஊதாரித்தனமாக ஐரோப்பிய ஒன்றியத்தால் செலவு செய்யப்படுவதாகவும், வேலை வாய்ப்புகள் தேவையற்ற முறையில் பறி போவதாகவும் அக்கட்சியின் தேர்தல் பிரசாரம் மூச்சுப் பெற்றுள்ளது.

Feb 1992 இல் நெதர்லாந்திலுள்ள மாஸ்றிக்ற் நகரில் ஐரோப்பிய ஒருங்கிணைவின் ஆரம்பமாகக் கைச்சாத்திடப்பட்ட ஒப்பந்தத்திலிருந்து வெளிவரின், இங்கிலாந்து சகலதிலும் தன் நிறைவு காணுமென UK சுதந்திரக் கட்சியின் தேர்தல் விஞ்ஞாபனத்தில் கூறப்பட்டுள்ளது. காலணித்துவ அதிகாரத்தை இழந்த வலி, தற்போதும் கற்பனை வலியாக (Phantom Pain) இங்கிலாந்து அரசியலில் காணப்படுவதாக, ஐரோப்பிய ஒன்றிய சிதைவை விரும்பாத  ஆங்கிலப் பத்திரிகைகள் விமர்சித்துள்ளன.

 

 

 

ஐரோப்பியசெய்தியாளர் மகேந்தி

 

http://globaltamilnews.net/GTMNEditorial/tabid/71/articleType/ArticleView/articleId/106107/language/ta-IN/article.aspx

இதை பற்றி இரண்டு படங்கள் பார்த்தேன். மிகவும் தத்ரூபமாக ஏன், எப்படி இந்த பயம் உருவாக்கபடுவதை பார்க்கலாம்.

படங்கள்: 1984, வி ஃபோர் வென்டெட்டா

புத்தகம்: நோம் சோம்ஸ்கியின் மீடியா கொன்றோல்