ஜெயலலிதா மீதான சொத்துக்குவிப்பு வழக்கு: இறுதி வாதம் தொடங்கியது!

பெங்களூரு: பெங்களூரு சிறப்பு நீதிமன்றத்தில் நடந்து வரும் சொத்துக்குவிப்பு வழக்கில் முதல்வர் ஜெயலலிதா தரப்பில் இறுதி வாதம் இன்று தொடங்கியது. 

முதல்வர் ஜெயலலிதா, அவரது தோழி சசிகலா மற்றும் இளவரசி, சுதாகரன் ஆகியோர் மீதான சொத்துக்குவிப்பு வழக்கு பெங்களூரு சிறப்பு நீதிமன்றத்தில் நடந்து வருகிறது.

இந்த வழக்கில் அரசு தரப்பு வாதம் முடிவடைந்ததைத் தொடர்ந்து, ஜெயலலிதா தரப்பின் இறுதி வாதம் இன்று தொடங்கியது. ஜெயலலிதா தரப்பில் ஆஜரான வழக்கறிஞர் குமார், அரசியல் காழ்ப்புணர்ச்சியால் வழக்கில் கூடுதல் சொத்துக்கள் சேர்க்கப்பட்டுள்ளதாக வாதிட்டார்.

இதைத் தொடர்ந்து, சொத்துக்குவிப்பு வழக்கில் தொடர்புடைய 5 நிறுவனங்களின் இயக்குநர் சுரேஷ்குமார் நீதிமன்றத்தில் ஆஜரானார். அப்போது, 5 நிறுவனங்களின் இயக்குனர்கள், பங்குதாரர்கள் பதவி வகித்த காலம் பற்றி நீதிபதி ஜான் மைக்கேல் குன்ஹா கேள்வி எழுப்பினார்.

இதற்கு பதில் அளித்த சுரேஷ்குமார், 5 நிறுவனங்களில் சசிகலா மற்றும் இளவரசி ஆகியோர் பங்குதாரர்கள் என்று கூறினார்.

இதையடுத்து, பங்குதாரர்களின் சொத்து ஆவணங்கள், வங்கி பண பரிமாற்ற பட்டியலை தாக்கல் செய்ய சுரேஷ்குமாருக்கு நீதிபதி உத்தரவிட்டார்.

ஜெயலலிதா தரப்பு வழக்கறிஞர் குமார் 2 மாதங்கள் இறுதிவாதத்தை நடத்துவார் என எதிர்பார்க்கப்படுகிறது.

இந்த வழக்கில் முதல் குற்றவாளி என்பதால் ஜெயலலிதா தரப்பின் இறுதிவாதம் முதலில் தொடங்கியது. ஜெயலலிதா தரப்புக்கு பிறகு சசிகலா, இளவரசி, சுதாகரன் தரப்பின் இறுதி வாதம் நடைபெறவுள்ளது.

குற்றம் சாட்டப்பட்டோரின் இறுதி வாதத்துடன் சொத்துக் குவிப்பு வழக்கு முடிவுக்கு வருகிறது. தடை ஏதுமின்றி இறுதி வாதம் நடைபெற்றால் ஆகஸ்ட் இறுதியில் தீர்ப்புக் கூறப்படலாம் என்று எதிர்பார்க்கப்படுகிறது.

http://news.vikatan.com/article.php?module=news&aid=29182