தேசிய மீனவர் இயக்கத்தின் ஏற்பாட்டில் நாளை நடக்கவிருந்த கண்டன ஆர்ப்பாட்டத்திற்கு நீதிமன்று தடை

குளோபல்தமிழ்;ச்செய்தியாளர்

தேசிய மீனவர் இயக்கத்தின் ஏற்பாட்டில் நாளை நடத்த திட்டமிடப்பட்டிருந்த  கண்டன ஆர்ப்பாட்டத்திற்கு நீதிமன்று தடைவிதித்துள்ளது. நாளை காலை பத்து அம்சக்கோரிக்கைகளினை முன்வைத்து யாழ் மத்திய பேரூந்து நிலையத்தில் மாபெரும் போராட்டம் ஒன்று முன்னெடுக்கவுள்ளதாக தேசிய மீனவர் இயக்கம் அறிவித்திருந்தது. இப்போராட்டத்தில் கலந்து கொண்டு தமது ஆதரவை தெரிவிக்க நூற்றுக்குமதிகமான பெரும்பான்மையின பிரதிநிதிகள் யாழ்ப்பாணம் வருகை தரவுள்ளதாக இன்று யாழ்.நகரில் அவ்வமைப்பு நடத்திய ஊடகவியலாளர் மாநாட்டில் தெரிவிக்கப்பட்டிருந்தது.இந்நிலையிலேயே காவல்துறையால் தாக்கல் செய்யப்பட்ட மனு ஒன்றின் அடிப்படையினில் இத்தடை விதிக்கப்பட்டுள்ளது.

இதனிடையே தமிழ் அரசியல் கட்சிகள், சர்வ மதத் தலைவர்கள், மக்கள் அமைப்புக்கள், பெண்கள் அமைப்புக்கள், வடகிழக்கு மற்றும் தென்பகுதி பொதுமக்கள் இணைந்து முன்னெடுக்கும் இப்போராட்டம் பேரூந்து நிலையத்தில் ஆரம்பித்து யாழ் மாவட்ட செயலகம் நோக்கி ஊர்வலமாக சென்று மகஜர் ஒன்றும் கையளிக்கப்படவுள்ளதாகவும் அறிவிக்கப்பட்டிருந்தது.

இடம் பெயர்ந்த மக்களை அவர்களின் சொந்த நிலத்தில் குடியேற்ற வேண்டும். 

அபிவிருத்தி என்ற போர்வையில் மேற்கொள்ளப்படும் காணிக் கொள்ளையை நிறுத்த வேண்டும். 

இலங்கை, இந்திய மீனவர் பிரச்சனைக்கு நிரந்தரத் தீர்வை ஏற்படுத்தித்தர வேண்டும்.

 வடகிழக்கில் சிவில் பாதுகாப்பை உறுதிப்படுத்த வேண்டும். 

காணாமல் போனோர் தொடர்பான இழுத்தடிப்புக்கள் வேண்டாம் உடன் பதில் கூறவும்.

போன்ற பல கோரிக்கைகளை முன்வைத்து இப்போராட்டம் முன்னெடுக்கப்படவுள்ளதாக அறிவிக்கப்பட்டிருந்தது. இப்போராட்டத்திற்கு ஆதரவு தெரிவித்து தமிழ் கட்சிகள் இணைந்து பத்திரிகையாளர் மாநாடொன்றை இன்று யாழ்.நகரில் நடத்தியிருந்தன. இம்மாநாட்டில் மாவை.சேனாதிராசா மற்றும் சரவணபவன் ஆகியோருடன் தமிழ் தேசிய மக்கள் முன்னணியின் தலைவர் பொன்னம்பலம் கஜேந்திரகுமாரும் கலந்து கொண்டு ஆதரவை தெரிவித்திருந்தனர்.

இந்நிலையில் நடந்து முடிந்த மாகாணசபை தேர்தலில் அரச தரப்பில் போட்டியிட்டு தோல்வியடைந்த மீனவ சங்க பிரமுகரான நாகநாதி பொன்னம்பலம் மற்றும் அவரோடிணைந்த அரச தரப்பு மீனவ அமைப்பை சேர்ந்த சிலர் செய்த முறைப்பாட்டின் அடிப்படையிலேயே போராட்டத்திற்கு தடைவிதிக்கப்பட்டுள்ளதாக தெரிவிக்கப்படுகின்றது.

நாளைய போராட்டத்திற்கு ஆதரவளித்து நூற்றுக்குமதிகமான பெரும்பான்மையின மீனவ பிரதிநிதிகள் யாழ்ப்பாணம் வருகை தரவுள்ளனர்.அதே வேளை உள்ளுர் மீனவர்கள் போராட்டத்திற்கு எதிர்ப்பு தெரிவிப்பதால் இருதரப்பினரிடையேயும் மோதல்கள் மூண்டு வன்முறை வெடிக்கலாமென பொலிஸார் தாக்கல் செய்த மனுவின் அடிப்படையிலேயே நாளைய போராட்டத்திற்கு தடைவிதிக்கப்பட்டுள்ளதாக தெரியவருகின்றது.