ஒட்டன்சத்திரம்: காட்டாற்று வெள்ளத்தில் சிக்கிய 21 பேர் ஹெலிகாப்டர் மூலம் மீட்பு!

திண்டுக்கல்: திண்டுக்கல் மாவட்டம் ஒட்டன்சத்திரம் அருகே தோட்டத்திற்குள் புகுந்த காட்டாற்று வெள்ளத்தில் சிக்கிய 21 பேர் ஹெலிகாப்டர் மூலம் மீட்கப்பட்டனர்.
 

வரதமா அணையில் ஏற்பட்ட வெள்ளப்பெருக்கு காரணமாக இன்று காலை முதலே கணக்கம்பட்டி கிராமத்தில் வெள்ளநீர் புகத்தொடங்கியது. இதனால், கிராம மக்களை பாதுகாப்பான பகுதியில் தங்கவைக்கும் நடவடிக்கைகளில் மாவட்ட நிர்வாகம் ஈடுபட தொடங்கியது.

ஊராட்சிமன்ற அலுவலக கட்டடத்தில் தங்க வைக்கப்பட்டுள்ள அவர்களுக்கு தேவையான அத்தியாவசியப் பொருட்களை வழங்க நடவடிக்கை எடுத்து வருவதாகவும் அதிகாரிகள் தெரிவித்துள்ளனர்.

இதற்கிடையில் ஒட்டன்சத்திரம் அருகேயுள்ள காளிப்பட்டியில் அமைந்துள்ள தோட்டம் ஒன்றை காட்டாற்று வெள்ளம் சூழ்ந்துள்ளது. அங்குள்ள தோட்டம் மற்றும் வீட்டில் இருந்த 21 பேர் சிக்கிக்கொண்டனர். அவர்களை மீட்கும் நடவடிக்கையில் தீயணைப்புத்துறையினர் ஈடுபட்டனர். பின்னர் ஹெலிகாப்டர் மூலம் அவர்கள் அனைவரும் பத்திரமாக மீட்கப்பட்டனர்.

மேலும், தாழ்வான பகுதியில் வசிக்கும் மக்களை பாதுகாப்பான இடங்களுக்குச் செல்லுமாறு மாவட்ட நிர்வாகம் அறிவுறுத்தியுள்ளது.

சென்னையில் மருத்துவமனையில் புகுந்த மழை நீர்!

சென்னை கே.கே.நகரில் உள்ள மாற்றுத்திறனாளிகளுக்கான அரசு புனர்வாழ்வு மருத்துவமனையில் நாள்தோறும் சுமார் 100 உள் நோயாளிகளும் ஏராளமான வெளிநோயாளிகளும் சிகிச்சை பெற்று வருகின்றனர்.

சென்னையில் கடந்த சில நாட்களாகப் பெய்துவரும் கனமழையால் இந்த மருத்துவமனை வளாகத்தில் குளம்போல மழைநீர் தேங்கியிருக்கிறது. இதனால், சக்கர நாற்காலிகள் மற்றும் ஸ்டெச்சர்களில் சிகிச்சைக்கு வரும் மாற்றுத் திறனாளிகள் மிகுந்த சிரமத்திற்கு ஆளாகின்றனர்.

ஆனால், மருத்துவமனை நிர்வாகமோ, பொதுப்பணித் துறைக்கு தகவல் தெரிவித்திருப்பதாகவும், அவர்கள் நடவடிக்கை எடுக்க தாமதம் ஆவதாகவும் தெரிவித்தனர்.

போடிமெட்டு மலைச்சாலையில் நிலச்சரிவு

தொடர் மழை காரணமாக தேனி மாவட்டம் போடிமெட்டு மலைச்சாலையில் 21 இடங்களில் நிலச்சரிவு மற்றும் பாறைகள் விழுந்ததால் ஆறாவது நாளாக இன்றும் போக்குவரத்து பாதிக்கப்பட்டுள்ளது. இந்த சாலையில் தேசிய நெடுஞ்சாலை துறையினர் விரிவாக்கப்பணியை மேற்கொண்டு வந்தனர். அவர்கள் தற்போது விடுமுறைக்காக சென்றுள்ளதால் இந்த சாலையில் போக்குவரத்து நிறுத்தப்பட்டு மாற்று பாதையில் வாகனங்கள் திருப்பிவிடப்பட்டுள்ளது.

நெல்லை அருகே 12 வீடுகள் இடிந்தது

நெல்லை மாவட்டத்தில் பெய்த தொடர் மழை காரணமாக மேற்கு தொடர்ச்சி மலைபகுதியில் வெள்ளப்பெருக்கு ஏற்பட்டுள்ளது. இதனால் குற்றாலம் மெயின் அருவியில் மூன்றாவது நாளாக இன்றும் குளிக்க தடைவிதிக்கப்பட்டுள்ளது. ஆலங்குளத்தில் 12 வீடுகள் இடிந்து விழுந்தது. அதிர்ஷ்டசமாக உயிர் தேசம் எதுவும் ஏற்படவில்லை. 

http://news.vikatan.com/article.php?module=news&aid=33807