பெண்களுக்கு சேமிப்புஅவசியம்!

 

சொத்தை உருவாக்குவதில், பெண்களின் பங்களிப்பு எப்படி இருக்க வேண்டும் என்பது குறித்து விளக்குகிறார், நிதி ஆலோசகர் சித்ரா நாகப்பன்: இன்றைய சூழ்நிலையில், சேமிப்புப் பழக்கம் நாளுக்கு நாள் குறைந்து வருகிறது. ஏனெனில், இருந்த இடத்தில், தேவையான பொருட்களை வாங்கும் வசதிகள் வந்து விட்டன. அதோடு, வாங்க நினைத்த பொருட்களை, உடனே வாங்க வேண்டும் என்ற மனநிலையில் பலரும் இருக்கின்றனர்.

 

செலவு அதிகமாக இருந்தாலும், சேமிப்பு என்பது, பெண்களிடம் கட்டாயம் இருக்கும். அந்தச் சேமிப்பை, எப்படி முதலீடாக மாற்றி, சொத்தை பெருக்குவது என்று தெரியாமலேயே, பல பெண்கள் இருக்கின்றனர்.பெண்களுக்கு அதிகம் தெரிந்த முதலீடு, சீட்டு தான். அதேபோல், சிறந்த முதலீடாக நினைப்பது, தங்கத்தைத் தான். இந்த இரண்டுமே தவறு. சீட்டு திட்டங்களில் பாதுகாப்பு இல்லை. அதேபோல் தங்கமும், வருமானம் தரக்கூடிய முதலீடு கிடையாது.

 

தங்கத்தின் மீதான அடமான கடனுக்கான விதிமுறைகள், மிகவும் குறைவு என்பதால், எளிதாக கிடைக்கும். ஆனால், அதற்கான வட்டி விகிதம், சற்று அதிமாக இருக்கும்.சொத்து சேர்ப்பதில், பெண்கள் எப்போதுமே, ஆண்களையோ அல்லது பிறரையோ சார்ந்தே இருக்கின்றனர். அதற்கு முக்கிய காரணம், 'ரிஸ்க்' எடுக்க தயங்குவது தான். தவறு நடந்து விடுமோ என்று அஞ்சுகின்றனர்.வீடு வாங்க முடியவில்லை எனில், குறைந்தபட்சம், நிலமாவது வாங்கி வைக்கலாம். நிலம் வாங்குவதற்கு, வங்கிக் கடன் கிடைக்க வாய்ப்பு குறைவு. எனவே, அதற்கு தேவையான பணத்தை முதலீடு செய்து வாங்குவது நல்லது.

 

சொத்து வாங்க வேண்டும் என்று முடிவு செய்த பின், மாதம் குறிப்பிட்ட தொகையை, முறையான முதலீட்டு திட்டமான, 'சிஸ்டமேட்டிக் இன்வெஸ்ட்மென்ட் பிளான்' - எஸ்.ஐ.பி., முறையில் முதலீடு செய்யலாம்.வருமானம் இல்லாத பெண்களும், சொத்து சேர்ப்பதற்கு உதவ முடியும். அதாவது, மாத பட்ஜெட்டில் குறிப்பிட்ட அளவு பணத்தை மிச்சம் பிடிக்கலாம். மிச்சமாகும் பணத்தை, எல்லாம் முதலீடாக மாற்றுவது நல்லது.சம்பளம் தவிர்த்து, கூடுதலாக கிடைக்கும் போனஸ், பரிசுத் தொகை, சம்பள உயர்வு, நிலுவைத் தொகை என, எந்த வகையில் கூடுதலாக பணம் கிடைத்தாலும், அதை உடனடியாக முதலீடாக மாற்றுவது முக்கியம். சொத்துகளை உருவாக்குவது என்பது, குறுகிய காலத்தில் எப்போதுமே நடக்காது.