காவல்துறையின் கொலைவெறித் தாக்குதல்! திசம்பர் 9 அனைத்து அமைப்புகளையும் ஒருங்கிணைத்து சென்னையில் மாபெரும் ஆர்ப்பாட்டம்

நவம்பர் 26 அன்று தமிழீழத் தேசியத் தலைவர் மேதகு வே. பிரபாகரன் அவர்களது பிறந்த நாளும், நவம்பர் 27 அன்று, தமிழீழ விடுதலைப் போரில் உயிர் நீத்த ஈகியருக்கு அகவணக்கம் செலுத்தி 'மாவீரர் நாளும்', ஒவ்வொரு ஆண்டும் உலகெங்கும் வாழும் தமிழ் மக்களால் கடைபிடிக்கப்படுகின்றன. இவ்வாண்டும் அதேபோல கடைபிடிக்கப்பட்டன. அவ்வகையில், சென்னை மயிலாப்பூரில் மாவீரர் நாள் மற்றும் தேசியத் தலைவர் பிறந்தநாள் நிகழ்வுகளை முன்னிட்டு திராவிடர் விடுதலைக் கழகம் சார்பில் வைக்கப்பட்டிருந்த பதாகைகளைக் கிழித்தெறிந்த காவல்துறையினர், அவ்வமைப்பின் முன்னணிப் பொறுப்பாளரும், 'புரட்சிப் பெரியார் முழக்கம்' ஏட்டில் செய்தியாளருமான தோழர் உமாபதி மீது கொடுந்தாக்குதலை நடத்தினர்.

சென்னை E-4 அபிராமபுர காவல் நிலையத்தைச் சேர்ந்த உதவி ஆய்வாளர்கள் இளையராஜா, கலைச்செல்வி மற்றும் காவலர் வடிவேலு ஆகியோரே அத்தாக்குதலை முன்னின்று நடத்தியவர்கள். கடுமையாகக் காயம்பட்டுள்ள தோழர் உமாபதி, தற்போது, சென்னை அரசுப் பொது மருத்துவமனையில் சிகிச்சைக்காக அனுமதிக்கப்பட்டுள்ளார்.

இந்நிலையில், தோழர் உமாபதி மீதானத் தாக்குதலைக் கண்டித்தும், தமிழின உணர்வாளர்கள் மீது இது போல பல ஒடுக்குமுறை நிகழ்வுகளை நடத்தி வரும் காவல்துறையினரின் நடவடிக்கைகளைக் கண்டித்தும், இன்று(29.11.2014) காலை 12 மணியளவில், சென்னை சேப்பாக்கத்திலுள்ள 'சென்னை நிருபர்கள் சங்க'த்தில் கலந்தாய்வுக் கூட்டமும், செய்தியாளர் சந்திப்பும் நடைபெற்றது.

கூட்டத்தை, தமிழக வாழ்வுரிமைக் கூட்டமைப்பின் ஒருங்கிணைப்பாளர் திரு. தி. வேல்முருகன் ஒருங்கிணைத்தார். ம.தி.முக. துணைப் பொதுச் செயலாளர் தோழர் மல்லை சத்யா, விடுதலைச் சிறுத்தைகள் கட்சி செய்தித் தொடர்பாளர் தோழர் வன்னியரசு, திராவிடர் விடுதலைக் கழகப் பொதுச் செயலாளர் தோழர் விடுதலை இராசேந்திரன், விடுதலைத் தமிழ்ப்புலிகள் நிறுவனத் தலைவர் திரு. குடந்தை அரசன், மே பதினேழு இயக்க ஒருங்கிணைப்பாளர் தோழர் திருமுருகன், தமிழர் முன்னேற்றக் கழக நிறுவனத் தலைவர் தமிழின. கி. வீரலட்சுமி, தமிழ்நாடு மக்கள் கட்சி சென்னை மாவட்டச் செயலாளர் தோழர் அருண்சோரி, இந்திய தவ்கீத் ஜமாத் செயலாளர் திரு. எஸ்.எம்.பார்க்கர், இளந்தமிழகம் இயக்க ஒருங்கிணைப்பாளர் தோழர் செந்தில், தமிழ்த் தேசிய விடுதலை இயக்கப் பொதுச் செயலாளர் தோழர் தியாகு, ஓவியர் வீரசந்தானம் உள்ளிட்ட பல்வேறு அமைப்புத் தலைவர்கள் இதில் பங்கேற்றனர். தமிழ்த் தேசியப் பேரியக்கம் சார்பில் தலைவர் தோழர் பெ.மணியரசன், தமிழக இளைஞர் முன்னணிப் பொதுச் செயலாளர் தோழர் க.அருணபாரதி ஆகியோர் கலந்து கொண்டனர்.

கூட்டத்தின் முடிவில், இடமாறுதல் நடவடிக்கைகள் போதாது - தாக்குதல் நடத்திய காவல்துறையினர் மீது கொலை முயற்சி வழக்குப் பதிவு செய்து அவர்களைக் கைது செய்யும் வரை போராட வலியுறுத்தப்பட்டது. இக்கோரிக்கையை முன்வைத்து, வரும் திசம்பர் 9 அன்று அனைத்து அமைப்புகளையும் ஒருங்கிணைத்து, சென்னையில் மாபெரும் ஆர்ப்பாட்டத்தை நடத்த முடிவெடுக்கப்பட்டது.

கூட்டத்திற்குப் பின், சென்னை அரசுப் பொது மருத்துவமனையில் சிகிச்சைபெற்று வரும் தோழர் உமாபதி அவர்களை, தமிழ்த் தேசியப் பேரியக்கத் தலைவர் தோழர் பெ.மணியரசன், தமிழக இளைஞர் முன்னணிப் பொதுச் செயலாளர் தோழர் க.அருணபாரதி ஆகியோர் நேரில் சென்று சந்தித்து, உடல்நலம் விசாரித்தனர்.