நடிகர்களின் பாணியை நடிப்புக் கோட்பாடுகளை முன்வைத்து அனுமானிப்பது ஒரு வகை. பிறிதொரு முறை வேறுபட்ட நடிகர்களின் நடைமுறை நடிப்பை முன்வைத்துப் பேசுவது. இரண்டாவது அணுகுமுறையை முன்வைத்து ரகுவரன் எனும் நடிகரை அணுக விரும்புகிறேன்.

அமெரிக்க சினிமாவில் மட்டுமல்ல உலக சினிமாவிலும் கொடுமுடிகளைத் தொட்ட ஒரு நடிகன் மார்லோ பிராண்டோ. தேசிய விடுதலை யுகமான அறுபதுகளின் உச்சநிலை படைப்புகளின் பின் ஓரநிலையில் இருந்த இலத்தீனமெரிக்க சினிமாவை மீளவும் உலகின் உச்சநிலைக்குக் கொண்டு வந்து நிறுத்திய நடிகன் கேயல் கார்சியா பெர்னல். வேறு வேறு காரணங்களை முன்வைத்து இந்த இருவருடனும் ரகுவரனை ஒப்பிட்டுப்பேச விழைகிறேன்.

மார்லன் பிரான்டோ-ரோபர்ட் டி நீரோ-அல் பாச்சினோ மூவரிடமும் வெளிப்படுவது ஒரே வித நடிப்புப் பாணி. ஏற்கும் பாத்திரமாகிவிடுவது, அந்தப் பாத்திர நடத்தைக்கு உடல்மொழி மற்றும் குரல்தொனி போன்றவற்றைத் தகவமைத்து, உடல் அதிர பதட்டத்தை வெளியிடுவது இவர்களது நடிப்புப் பாணி. இதனை ஆர்ப்பாட்டமில்லாமல், தேவைக்கேற்றபடி, ஆன்றமைந்த வகையில், இவர்கள் வெளியிடுவார்கள். ரகுவரனுக்கு இத்தகைய பாணி இயல்பாகவே இருந்தது. நிதானமான குரல்தொனியில் தேவையான அளவு உடல் பதட்டத்துடன் அவர் குணச்சித்திரத்தை அவர் வெளிப்படுத்துவார்.

அவரது நீண்ட கைகளும் கைவிரல்களும் இந்த உணர்வின் வெளிப்பாட்டுக்கு தோதாக இருந்தது.

கேயல் கார்சியா பேர்னலிடம் வருவோம். அமரோஸ் பெரோஸ், பேபல், மோட்டார் சைக்கிள் டயரி, கியூபா லிபர், பிளட் வெட்டிங் போன்ற லத்தீனமெரிக்கப் படங்கள் லத்தீனமெரிக்க சினிமாவில் புதிய தலைமுறை இயக்குனர்கள், லத்தீனமெரிக்க சினிமாவில் அறுபதுகளின் பின் கோபம்கொண்ட விளிம்புநிலைக் கதைகளையும் அரசியல் பண்பு கொண்ட படங்களையும், கார்சியா கேயா பார்னலை வைத்தே உருவாக்கினார்கள். ஓரு தலைமுறையின் குணச்சித்திரங்களுக்கு உருவம் கொடுத்த கூட்டுமனசாட்சியின் வடிவமாகக் கார்சியா கேயல் பார்னலின் பாத்திரப் படைப்புகள் அமைந்தன.

லத்தீனமெரிக்க சினிமாவில் கோபம் கொண்ட, கலகக் குணம் கொண்ட ஒரு தலைமுறையின் நடிகன் பெர்னல்.

தமிழ்ச் சினிமாவில் ரகுவரன் கதாநாயகனாக நடித்த படம் ஏழாவது மனிதன். தொடர்ந்து அவர் நடித்த முக்கியமான படங்கள் கூட்டுப்புழக்கள், கவிதை பாட நேரமில்லை போன்றன. அவர் குணச்சித்திரப் பாத்திரங்கள் ஏற்று நடித்த படங்கள் சம்சாரம் அது மின்சாரம் மற்றும் கண்டு கொண்டேன் கண்டு கொண்டேன் போன்ற படங்கள். பாட்ஷா முதல் முதல்வன் ஈரான படங்கள் ஒரு அற்புதமான நடிகரான அவரைச் வில்லன் நடிகராகச் அவரைச் சீரழித்த ஒற்றைத்தன்மை கொண்ட படங்கள் என்று சொல்வேன்.

ஏழாவது மனிதனில் எழுபதுகளின் கோபக்கார இளைஞன். கூட்டுப்புழுக்களிலும் சம்சாரம் அது மின்சாரம் படத்திலும் நடுத்தரவர்க்க இளைஞனின் கையறுநிலைப் பாத்திரம். கவிதை பாட நேரமில்லை வேலையற்ற இளைஞர்களின் பாடுகளைச் சொன்ன படம். எத்தனை அற்புதமாக இந்தப் படங்களின் பாத்திரப் படைப்புகளில் ரகுவரன் பொருந்திப் போனார் எனப் பாருங்கள். ரகுவரனை முன்வைத்தே ஒரு பொற்காலம் தமிழ் சினிமாவில் உருவாகியிருக்க முடியும்.

பாலு மகேந்திரா- பாரதிராஜா-மகேந்திரா உருவாக்கிய ஒரு புதிய பிரக்ஞை கமல்ஹாசனின் சகலகலா வல்லவனால் நாசமாகியதைப் போலவே ரகுவரனை வைத்து உருவாகி வந்த நல்ல இளைஞர் சினிமாவை அவரை வில்லனாக்கிச் சீரழித்தன் மூலம் அழித்தார்கள். அவரது நிதானமான குரல்தொனிக்கும், பதட்டமான உடல்மொழிக்குமான லயம் அழிந்து, பதட்டமான, நியோராடிக்கான வில்லன் பாத்திரமாக நிரந்தரமாக ஆகிவிட அவரைத் தமிழ் சினிமா நிரப்பந்தித்தது.

53 வயது என்பது அவரைப் போன்ற ஆற்றல் கொண்ட ஒருவர் மரணமுறுவதற்கான வயது அல்ல. அவரது போதை மருந்து பாவனைக்கும் உடல் பதட்டம் கொண்ட, தலையும் விரல்களும் நிலைகொள்ளாத மனிதனாக நிரந்தரமாக அவரை வார்த்த தமிழ்ச் சினிமாச் சட்டகத்திற்கும் இருந்த தொடர்பை ஒரு தேர்ந்த உளவியல் பகுப்பாளர் நிறுவமுடியும் எனவே நினைக்கிறேன்.

இந்தத் தருணத்தில் மார்லன் பிராண்டோவை முன்வைத்து ஒரு ஒப்பீட்டை நிகழ்த்த முனைகிறேன்.

பெர்னார்டோ பெர்ட்டுலூசியின் த லாஸ்ட் டாங்கோ இன் பாரிஸ் படத்தில் மனைவியை இழந்த ஒரு மத்தியதரவயது மனிதன் தான் சந்திக்கும் ஒரு இளவயது அந்நியப் பெண்ணிடம் காமுறும் பாத்திரத்தில் நடித்திருந்தார் பிராண்டோ. உன்மத்த நிலையில் இளவயதுப் பெண்ணுடன் பல்வேறு நிர்வாண நிலைகளில் உடலுறவு கொள்ளும் அவர், அவளது நிராகரிப்பின் பின் தற்கொலை செய்து கொள்ளும் நிலைக்குச் செல்கிறார். இந்தக் குணச்சித்திரத்தை பிராண்டோவிடம் கொண்டு வருவதற்காக பெர்ட்டுலலாசி, பிராண்டோ தமது சொந்த வாழ்வில் சந்தித்த மரணம், காமுறதல், உடலுறவு போன்றவற்றை மறுபடி நிகழ்த்திக் காட்டுதலை நடிப்பாக்கி வெளிப்படுத்துமாறு செய்திருக்கிறார். தனது ஆன்மாவை பெர்ட்டுலாசி வல்லுறவுக்கு உள்ளாக்கிவிட்டார் என இதனைப் பின்னாளில்  நினைவு கூர்ந்த பிராண்டோ தனது மரணத்திற்குச் சில காலம் முன்பு வரை பெர்ட்டுலூசியுடன் பேசுவதையே துண்டித்துக் கொண்டிருந்தார்.

மனநோயாளியை ஒத்த உடல் மொழியும் நரம்புத் தளர்ச்சியாளன் போன்ற மனநிலையும்  கொண்ட பாத்திரங்களையே தன் பின்நாளில் ஏற்ற ரகுவரன் மனதளவில் போதை மருந்து உட்கொண்ட மனிதன் போலவே வாழ்ந்திருப்பார் எனவே கருதுகிறேன். மரணமுற்ற படத் தொகுப்பாளர் கிஷோர் தனது தொழில்சார்ந்து இத்தகையதொரு உன்மத்த நிலையையே அவர் கொண்டிருந்தார். தூக்கமற்று ஓய்வற்று ஒரு மனிதனாகத் தனது கலைச் செயல்பாட்டிலிருந்து தன்னைச் சில பொழுதெனும் துண்டித்து நிறுத்திக் கொள்வது எவருக்கும் இன்றியமையாததாகும். தனது ஆற்றலைச் சமன்படுத்திக் கொள்ள, மீளமைத்துக் கொள்ள கலைஞர்களுக்கு இந்த விடுபடுதல் என்பது இன்றியமையாததாகும். திழ் சினிமா இந்த மீட்சியை தன்னைத் தனது ஆளுமையை மீளவும் இனம் கண்டு கொள்வதற்கான வாய்ப்பை ரகுவரனுக்குத் தரவில்லை.

கண்டுகொண்டேன் கண்டு கொண்டேன் படத்தில் கணணி அலுவலகம் ஒன்றின் மேலாளராக அவர் நடித்த இயல்பான, நிதானமான, பதட்டம் நிறைந்த, லயம்கொண்ட அவரது நடிப்பு இன்னும் கண்ணில் நிற்கிறது. ஏழாவது மனிதன் படத்தில் தான் மேலதிகாரியாகச் செயலாற்றும் தொழிற்சாலையில் தொழிலாளர்களுக்கு உத்வேகமூட்ட ‘வேலைநிறுத்தம்‘ எனும் செய்தியை எழுதி மேசை மீது அவர் ஏறி நிற்கும் அவரது கனிந்த நெடிய உருவமும் இப்போதும் மனதில் நிழலாடுகிறது.

தமிழ் சினிமா திட்டமிட்டக் கொன்றொழித்த ஒரு அபூர்வமான, இயல்பான ஆற்றல் கொண்ட நடிகன் ரகுவரன். தமிழ் சினிமாவில் நிகழ மறுக்கப்பட்ட அற்புதம் அவர்..

*

நன்றி : நடிப்பு/இதழ்1/2015