மாந்தை கிழக்கு! பின்தங்கிய முல்லைத்தீவில் பின்தங்கிய பிரதேசம்!!

 

மாந்தை கிழக்கு பிரதேசமே முல்லைத்தீவு மாவட்டத்திலேயே பின்தங்கிய பகுதி. மல்லாவியிலிருந்து சுமார் பதினொரு கிலோமீற்றர் தொலைவில் இருக்கிறது மாந்தை கிழக்கு. இந்தப் பிரதேசத்தில் சுமார் மூவாயிரம் குடும்பங்கள் வசித்து வருகின்றனர். இவர்கள் கடந்த 2009இல் மீள்குடியேற்றப்பட்டனர். யுத்தம் முடிந்தவுடன், முதன் முதலில் இந்த மக்கள் மீள்குடியேற்றப்பட்டனர். 

 

15 கிராம சேவகர் பிரிவுகளை உள்ளடக்கிய இந்தப் பிரதேசம் மிக நீண்டகாலமாகவே அடிப்படைவசதிகளற்ற நிலையில் காணப்படுகின்றது. குறிப்பாக போக்குவரத்து வசதி என்பது இந்தக் கிராமத்தை உலுக்கிப் போடும் ஒரு பிரச்சினையாக காணப்படுகின்றது. மாங்குளம் சந்தியிலிருந்து மல்லாவி, துணுக்காய் செல்வதே பெரும்பாடு. மல்லாவியில் இருந்து மாந்தை கிழக்கு செல்வது என்பது பெரும் சவால் நிறைந்தது. 

 

காலையில் ஒரு பேருந்து. மாலையில் ஒரு பேருந்து. இவைகளை விட்டால் கிராமத்திலிருந்து எந்த போக்குவரத்தும் இடம்பெறாது. துண்டிக்கப்பட்ட பகுதியைப்போல முடங்க நேரிடும். கடுமையான வெப்பம், செப்பனிடப்படாத வீதிகள். அச்சுறுத்தலான காட்டுப் பாதை நடந்தும் செல்ல முடியாத நிலையே காணப்படுகின்றது. இப்படி, போக்குவரத்துக்கு முற்றிலும் பொருத்தமற்ற ஒரு சூழலிலேயே மாந்தை கிழக்கு வீதிகள் காணப்படுகின்றன.  

 

இதனால் மிக முக்கியமாக பாதிக்கப்படுவது பாடசாலை மாணவர்கள்தான். மாந்தை கிழக்கு அம்பாள்புரம், கொல்லவிளான்குளம் ஆகிய கிராமங்களுக்கான போக்குவரத்து வசதிகள் மிகவும் பாதிக்கப்பட்ட நிலையிலுள்ளன. கொல்லவிளான்குளம் ஒட்டறுத்தகுளம் முதலிய பகுதிகளுக்கான போக்குவரத்து வசதியும் பிரச்சினையே. இதனால் அப் பகுதிகளில் உள்ள மாணவர்களுக்குப் பெரும் சிரமம். இதனால் அவர்களின் கல்வியும் எதிர்காலமும் பாதிக்கப்படுகின்றன. 

 

காலை ஏழு மணி முதல் ஏழரை மணிவரை பாலிநகர் மகா வித்தியாலயத்திற்கோ, மல்லாவி யோகபுரம் மகாவித்தியாலயத்திற்கோ செல்ல முடியாத நிலையில் மாணவர்கள் பெரும் சிரமத்திற்கு ஆளாகின்றனர். பாண்டியன்குளம், பனங்காமம், பாலிநகர் முதலிய பகுதிகளின் ஊடாகவும் போக்குவரத்து வசதிகள் இல்லை. இதனால் தொழிலாளிகள், அரச உத்தியோகத்தர்கள் என அனைவரும் சிரமங்களின் மத்தியிலேயே பயணங்களை மேற்கொள்ளுகின்றனர். 

 

முல்லைத்தீவு மாவட்டத்தில் ஐயாயிரத்து 612 பெண் தலைமைத்துவக் குடும்பங்கள் வசித்து வருகின்றன. இதில் 433 குடும்பங்கள் மாந்தை கிழக்கில் வசித்து வருகின்றனர். இவர்களின் நிலைமையோ பெரும் அவலமானது. வாழ்வாதார உதவிகள் எதுவுமின்றி தமது குடும்பங்களை பெரும் நெருக்கடியின் மத்தியில் இந்தப் பெண்தலைமைகள் தாங்குகின்றன. 

 

இவர்களது பிள்ளைகளின் கல்வி, போசாக்கு என்பன கேள்விக்குறியான நிலையில் காணப்படுகின்றன. இதேவேளை முழுக்க முழுக்க விவசாயத்தை நம்பி வாழும் இந்தப் பிரதேசத்தில் உரமானியத்தைப் பெற்றுக்கொள்வதிலிருந்து நெல்லை சந்தைப்படுத்துவது, களஞ்சியப்படுத்துவதுவரை எல்லாமே பெரும் சிக்கல் நிறைந்ததாகவே காணப்படுகின்றது. அடிப்படைத் தொழிலான விவசாயத்தை முன்னெடுப்பதிலும் பெரும் சிக்கல்கள் நிலவுகின்றன. 

 

மின்சார வசதியின்மை, யானைகளின் தொல்லை, சட்டவிரோத மரக் கடத்தல்கள் என்று பல்வேறு நெருக்கடிகள் இந்தக் கிராமத்திற்கு. மிகவும் பூர்வீகமான பிரதேசமே மாந்தை கிழக்கு. அதன் பெயர்கள் ஒவ்வொன்றும் தமிழின், தமிழரின் அடையாளமும் வரலாறும். யுத்தம் முதலில் தொடங்கிய பிரதேசங்களில் மாந்தை கிழக்குப் பிரதேசமும் ஒன்று. இந்தப் பிரதேச மக்கள் நீண்ட இடப்பெயர்வுக்கு முகம் கொடுத்தவர்கள். பெரும் அவலத்தை சந்தித்தவர்கள். 

 

அவ்வாறான ஒரு கிராமம் இன்று அடிப்படைவசதிகள் பூர்த்தி செய்யப்படாத நிலையில் காணப்படுகிறது. போராலும் இயற்கையினாலும் கைவிடப் படுதல்களாலும் கண்காணிப்புகளற்றும் பின்தங்கிய நிலைக்கு தள்ளப்பட்ட ஒரு மாவட்டத்தின் பின்தங்கிய ஒரு நிலைக்கு தள்ளப்பட்ட ஒரு பிரதேசத்தின் வாழ்வு என்பது அவ்வளவு எளிதானதல்ல. இந்தப் பிரதேசத்தில் வாழும் ஒருவரின் வாழ்வு நிலையை வெறும் வார்த்தைகளால் விபரித்து விட முடியாது. 

 

இந்தப் பிரதேசத்தில் வாழும் ஒவ்வொருவரும் பெரும் போராட்டத்திலேயே தமது அன்றாட நடவடிக்கைகளை முன்னெடுக்கின்றனர். உரிய தரப்பினர் கண்டுகொள்வார்களா? உரிய நடவடிக்கைகளை முன்னெடுப்பார்களா? 

 

குளோபல் தமிழ் விசேட செய்தியாளர்

 

http://www.globaltamilnews.net/GTMNEditorial/tabid/71/articleType/ArticleView/articleId/131077/language/ta-IN/article.aspx