'கங்குலி என்னிடம் ஒரு கேள்வி கூட கேட்கவில்லை!'- குமுறும் ரவி சாஸ்திரி

இந்திய அணியின் பயிற்சியாளர் பதவி கிடைக்காததால், தான் மிகுந்த ஏமாற்றத்திற்குள்ளாகியிருப்பதாக ரவி சாஸ்திரி வேதனை தெரிவித்துள்ளார்.  அத்துடன் கங்குலி, நேர்காணலின்போது ஸ்கைப்பில் வந்து கூட தன்னிடம் கேள்வி கேட்வில்லையென்று குற்றஞ்சாட்டியுள்ளார்.

இந்திய அணியின் பயிற்சியாளரை தேர்வு செய்யும் பணியில் கங்குலி, சச்சின், வி.வி.எஸ். லக்ஷ்மண் ஆகியோருடன், பிசிசிஐ ஒருங்கிணைப்பாளர் சஞ்சய் ஜக்தாலேவும் இடம் பெற்றிருதார்

பயிற்சியாளருக்கான நேர்காணல், கொல்கத்தா தாஜ் பெங்கால் ஹோட்டலில் நடந்துள்ளது. மாலை 5 மணி முதல் 6 மணி வரை நடந்த பயிற்சியாளருக்கான நேர்காணலில், ரவி சாஸ்திரி பங்கேற்றார். ஆனால் நேர்காணலின் போது கங்குலி அந்த இடத்திலேயே இல்லையாம். சஞ்சய் ஜக்தாலேவும் லக்ஷ்மணும்தான் அங்கிருந்துள்ளனர். லண்டனில் இருந்து சச்சின், ஸ்கைப் வழியாக நேர்காணலில் பங்கேற்றுள்ளார். ஆனால் ரவிசாஸ்திரிக்கு நேர்காணல் நடந்தபோது, பெங்கால் கிரிக்கெட் சங்கத்தில் செயற்குழுக் கூட்டத்தில் பங்கேற்ற கங்குலி, நேர்காணலில் எந்த வகையிலும் பங்கேற்கவில்லை.

இது குறித்து ரவிசாஸ்திரி அளித்துள்ள பேட்டியில், '' இந்திய அணி பயிற்சியாளராக வாய்ப்பு கிடைக்காதது  உண்மையிலேயே என்னை மிகுந்த வருத்தத்திற்குள்ளாக்கியுள்ளது. கடந்த 18 மாத காலமாக இந்திய அணிக்காக கடுமையாக உழைத்துள்ளேன். டெஸ்ட் போட்டியில்  நம்பர் ஒன், டி20யிலும் நம்பர் ஒன். ஒருநாள் போட்டியில் 2வது இடத்தில் அணி இருக்கிறது. இளம் அணியிடம் இத்தகைய முன்னேற்றத்தை எதிர்பார்க்கவில்லை. நேர்மையாகவும் கடுமையாகவும் அணிக்காக நான் உழைத்துள்ளேன். சப்போர்ட்டிங் ஸ்டாப்புகளும் மிகுந்த ஒத்துழைப்பு அளித்தனர். இத்தனைக்கும் கிரிக்கெட் வாரியத்தை உச்ச நீதிமன்றம் பலமாக  தலையில் கொட்டிக் கொண்டிருந்த காலக்கட்டம் அது. அந்த சமயத்தில் கூட கிரிக்கெட் விளையாட்டு, மக்களிடம் வெறுப்பை சம்பாதிக்காமல் இருக்கும் வகையில், அணி தொடர்ந்து வெற்றியை பெற்றுக் கொண்டிருந்தது. 

நேர்காணலின் போது,  சில கேள்விகளை சச்சினும், லக்ஷ்மணும் முன் வைத்தனர். ஜக்தாலேவும் என்னிடம் சில கேள்விகளைக் கேட்டார். எதிர்காலத்தில் இந்திய அணியை எப்படி வழிநடத்துவீர்கள்,  வேகப்பந்துவீச்சாளர்களை உருவாக்குவதில் உங்களது ஐடியா என்ன  என்பதெல்லாம் அவர்களது கேள்விகளாக இருந்தன. ஆனால் கங்குலி நேர்காணலில் பங்கற்கவில்லை, ஸ்கைப்பிலும் வரவில்லை. கும்ப்ளேவை பொறுத்த வரையில், எல்லாவிதமான திறமையும் நிறைந்த அனைத்து ஃபார்மெட்டுகளிலும் அசத்தும் அணி அவரிடம் ஒப்படைக்கப்பட்டிருக்கிறது. அந்த இடத்திற்கு கும்ப்ளே கொண்டு வரப்பட்டிருக்கிறார். நல்லதொரு திறமை வாய்ந்த அணியை வழி நடத்தும் வாய்ப்பு எனக்கு கிட்டவில்லை. அதனை நான் இழந்து விட்டேன். எனது சந்தோஷமே அந்த அணிதான். எனது இதயம் எப்போதும் அவர்களுடன் இருக்கும்.'' என்று கூறியுள்ளார்.

http://www.vikatan.com/news/sports/65542-ganguly-wasnt-there-when-interviewed-ravi-shastri.art

முட்டாள் உலகில் வாழ்கிறாரா ரவி சாஸ்திரி? - சவுரவ் கங்குலி காட்டமான பதிலடி

 

கோப்புப் படம்: வி.கணேசன்.

தன்னைப் பயிற்சியாளராக தேர்வு செய்யாதது குறித்து கடும் ஏமாற்றமடைந்துள்ள ரவி சாஸ்திரி, ஆலோசனைக் குழுவில் உள்ள சவுரவ் கங்குலி தன் மீது மரியாதை குறைவாக இருந்ததாக குற்றம் சாட்டினார்.

இதற்கு பதில் அளித்துள்ள கங்குலி, தன் மீது ரவி சாஸ்திரி வைப்பது தனிநபர் தாக்குதல் என்றார்.

அவர் இது பற்றி கூறியதாவது:

நான் மிகவும் வருந்துகிறேன், ஏமாற்றமடைகிறேன். அவர் (ரவி சாஸ்திரி) இன்னும் கொஞ்சம் முதிர்ச்சியுடன் பேசியிருக்கலாம். அவரது கருத்துகள் எல்லாம் தனிநபர் மீதான விமர்சனம்.

தலைமைப் பயிற்சியாளராக அவர் தேர்வு செய்யப்படாததற்கு நான் பொறுப்பு என்று அவர் நினைத்தாரென்றால் அவர் முட்டாள்களின் உலகில் வாழ்கிறார் என்றே நான் கூற வேண்டியுள்ளது.

இப்படிப்பட்ட குழுவில் அவரே 10 ஆண்டுகளாக இருந்திருக்கிறார் எனும்போது அவருக்கு தெரிந்திருக்கும் இதனால்தான் அவரது கருத்து ஏமாற்றமளிக்கிறது.

சாஸ்திரிக்கு நான் அறிவுரை ஒன்றை வழங்குகிறேன், இந்திய அணியின் பயிற்சியாளர் பொறுப்புக்கு தேர்வு நடைபெற்று கொண்டிருக்கும் போது, மிகவும் உயர்பதவிக்கான நேர்காணல் நடைபெறும் போது, அவர் நேரில் தனது நேர்காணலை அட்டெண்ட் செய்திருக்க வேண்டும். பாங்காக்கில் விடுமுறையைக் கழித்துக் கொண்டு கேமராவில் தனது நேர்காணலை செய்திருக்கக் கூடாது. குறிப்பாக இந்தியாவின் மிகச்சிறந்த கிரிக்கெட் வீரர் அனில் கும்ப்ளே கிட்டத்தட்ட இரண்டு மணி நேரங்கள் நேர்காணலில் இருந்தார் எனும்போது.

நான் அனில் கும்ப்ளேவுக்கு எனது வாழ்த்துக்களை தெரிவித்துக் கொள்கிறேன், உலகின் சிறந்த வீரர்களில் அவர் ஒருவர், கிரேட் கிரிக்கெட்டர்.

இவ்வாறு கூறினார் சவுரவ் கங்குலி.

http://tamil.thehindu.com/sports/முட்டாள்-உலகில்-வாழ்கிறாரா-ரவி-சாஸ்திரி-சவுரவ்-கங்குலி-காட்டமான-பதிலடி/article8788648.ece