பிரதமர் நரேந்திர மோடி, நவராத்திரி பூஜையின் போது  வெறும் தண்ணீர்  மட்டுமே அருந்துவார். சில சமயங்களில் ஜூஸ் அருந்துவார்.  கடந்த ஆண்டு நவராத்திரி பண்டிகையின் போது பிரதமர் அமெரிக்காவில் சுற்றுப்பயணம் மேற்கொண்டிருந்தார். 

அப்போது அமெரிக்க அதிபர் ஒபாமா அளித்த விருந்தில் பங்கேற்ற பிரதமர் மோடி, எந்த உணவையும் சாப்பிடாமல் தண்ணீர் மட்டும் குடித்து விருந்தை முடித்துக் கொண்டார். இந்நிலையில் டெல்லியை சேர்ந்த' ஜுன்தா கா ரிப்போர்ட்டர் ' என்ற பத்திரிகை, மோடி தலைமையிலான பா,.ஜனதா அரசு மத்தியில் ஆட்சிக்கு வந்ததிலிருந்து நவராத்திரி காலங்களில் பிரதமர் மோடிக்காக மினரல் வாட்டர் மற்றும் ஜூஸ் வாங்குவதற்கு எவ்வளவு தொகை செலவிடப்பட்டது என தகவல் அறியும் உரிமை சட்டத்தின் கீழ், விளக்கம் கேட்டிருந்தது.

அதற்கு பிரதமர் அலுவலகம் அளித்த பதில் அதிர்ச்சி ரகம். அதாவது மோடி மத்தியில் ஆட்சிக்கு வந்ததிலிருந்து நவராத்திரி காலத்தில், அவருக்காக வாங்கப்பட்ட மினரல் வாட்டர் மற்றும் ஜூஸ் ஆகியவற்றுக்காக 10 கோடியே 9 லட்சத்து 28 ஆயிரத்து 45 ரூபாயை செலவழிக்கப்பட்டுள்ளது என தெரிவித்துள்ளது. இதனை ஜுன்தா கா ரிப்போர்ட்டர் செய்தியாக வெளியிட்டுள்ளது. 

பிரதமர் அலுவலகத்தின் இந்த பதில் குறித்து டெல்லி முதல்வர் அரவிந்த் கெஜ்ரிவால் கடும் அதிர்ச்சி வெளியிட்டுள்ளார். '' டெல்லியில் எங்கள் அரசு தண்ணீரை இலவசமாக வழங்குகிறது. ஆனால் பிரதமர் தண்ணீருக்கு கோடிக்கணக்கான ரூபாயை செலவழிக்கிறார். டெல்லி மக்கள் பாரதிய ஜனதா அரசுக்கு தகுந்த தண்டனை அளிப்பார்கள்'' எனக் கூறியுள்ளார்.

பிரதமர் மோடி , தனது உடைகளுக்காக மட்டும் ரூ.70 கோடி  செலவழித்துள்ளதாக அண்மையில் அரவிந்த் கெஜ்ரிவால் குற்றம் சாட்டியிருந்தார் என்பது குறிப்பிடத்தக்கது.