உயர் பாதுகாப்பு வலயப் பிரதேசத்தில் மீளக் குடியமர்த்தப்படுத்தக்கோரின் பட்டியலை உடன் சமர்ப்பிக்க உத்தரவு யாழ். அரச அதிபருக்கு உயர் நீதிமன்றம் நேற்று விடுத்தது

வடக்கில் உயர் பாதுகாப்பு வலயப் பிரதேசத்தில் மக்களை மீளக் குடியமர்த்துவது தொடர்பாக, மீளக் குடியமர்த்தக்கூடியோரின் விவரங்கள் அடங்கிய பட்டியலை விரைந்து உடனடியாக சமர்ப்பிக்கும்படி யாழ்ப்பாணம் அரச அதிபருக்கு உயர் நீதிமன்றம் நேற்று உத்தரவிட்டது.

யாழ். மாவட்ட நாடாளுமன்ற உறுப்பினர் மாவை சேனாதிராஜா மற்றும் வலிகாமம் வடக்குப் பிரதேச விவசாயிகள் இருவர் தாக்கல் செய்திருந்த அடிப்படை உரிமை மீறல் மனுக்கள் நேற்று நீதிமன்றத்தில் எடுத்துக்கொள்ளப்பட்டபோதே நீதிமன்றம் இப்படி உத்தரவு பிறப்பித்தது.

வலிகாமம் வடக்கில் பெரும் நிலப்பிரதேசம் உயர் பாதுகாப்பு வலயம் என்ற பெயரில் இராணுவத்தினரால் ஆக்கிரமிக்கப்பட்டு இருப்பதால், பல்லாயிரக்கணக்கான குடும்பங்கள் தங்கள் பாரம்பரிய பூமியிலிருந்து விரட்டப்பட்டுள்ளன என்று தெரிவித்து, தங்களை மீளக் குடியமர உத்தரவிடுமாறு கோரி இந்த மனுக்களை மனுதாரர்கள் தாக்கல் செய்திருந்தனர். இராணுவத் தளபதி, யாழ்.மாவட்ட இராணுவத் தளபதி, யாழ். அரச அதிபர், சட்டமா அதிபர் உட்படப் பலர் எதிர்மனுதாரர்களாக இந்த மனுக்களில் குறிப்பிடப்பட்டிருந்தனர்.

இந்த மனுக்களை விசாரித்த உயர் நீதிமன்றம் அப்பிரதேசத்தில் மீளக் குடியமரக் கூடியோரின் பட்டியல் ஒன்றைத் தயார்செய்து சமர்ப்பிக்கும்படி ஏற்கனவே யாழ். அரச அதிபரைப் பணித்திருந்தது. நேற்று மீண்டும் இந்த மனுக்கள் உயர்நீதிமன்றில் பிரதம நீதியரசர் சரத் என்.சில்வா, நீதியரசர்கள் ராஜா பெர்னாண்டோ, அன்ட்ரூ சோமவன்ஸ ஆகியோர் முன்னிலையில் எடுத்துக் கொள்ளப்பட்டன. அப்போது, மேற்படி பட்டியல் இன்னும் தாக்கல் செய்யப்படாதமையை நீதிமன்றம் கவனத்தில் எடுத்தது.

உயர்பாதுகாப்பு வலயப் பிரச்சினை காரணமாக இடம்பெயர்ந்தோருக்கு நிவாரணம் மற்றும் அடிப்படை வசதிகளை வழங்குவதற்காக அரசு மாதாந்தம் 3 கோடி 60 லட்சம் ரூபாவைச் செலவிட்டு வரும் நிலைமை இருப்பதால் இப்பிரச்சினைக்கு விரைந்து தீர்வு காணப்பட வேண்டும் என பிரதம நீதியரசர் சுட்டிக்காட்டினார்.

எனவே, இச்சிக்கல்களுக்கு துரித கதியில் தீர்வுகண்டு, மக்களின் இக்கட்டை நிவிர்த்தி செய்வதாயின் உயர் பாதுகாப்பு வலயப் பிரதேசத்தில் மீளக் குடியமரக்கூடியோரின் பட்டியல் அவசியம். ஆகவே, அதனை உடன் சமர்ப்பிக்குமாறு யாழ். அரச அதிபருக்கு பணிப்புரை விடுக்க உத்தரவிடுகிறேன் என்றார் பிரதம நீதியரசர். இந்த மனுக்கள் மீண்டும் ஏப்ரல் 14ஆம் திகதி உயர் நீதிமன்றத்தில் எடுத்துக் கொள்ளப்படும்.

நன்றி : உதயன்