அலுவலகத்தில் ஃபேஸ்புக் பார்த்துக்கொண்டு வேலை செய்பவர்களை வேலை நேரத்தில் எப்ப பாரு ஃபேஸ்புக் என்று கலாய்ப்பவது வழக்கம். அவர்கள் இனி கெத்தாக பெருமை கொள்ள வந்துவிட்டது ஃபேஸ்புக் வொர்க்ப்ளேஸ். இனி அலுவலக வேலைகளை ஃபேஸ்புக்கிலேயே செய்து கொள்ளலாம் என அதிரடியாக அறிவிப்பை வெளியிட்டுள்ளது ஃபேஸ்புக்.

ஃபேஸ்புக் ஒரு சமூக வலைதளம், வர்த்தக பக்கம் என்ற விஷயங்களை தாண்டி அலுவலகம் என்ற அடையாளத்தை பெற்றுள்ளது. அலுவலகத்தில் உள்ள அனைத்து பிரிவுகளையும் ஒரே பக்கத்தின் கீழ் இணைத்தும், அலுவலக வேலைகளை 100% வெளிப்படைத் தன்மையுடனும் செய்து முடிக்க இந்த பக்கம் எளிதாக இருக்கும். 

உதாரணமாக ஒரு அலுவலகத்தில் விற்பனை பிரிவு இருக்கிறது என்றால் அதன் பணியாளர்கள் அனைவரும் தங்களுக்குள் வேலைகளை பகிர்ந்து கொண்டு வேலைகளை முடிக்க முடியும்,  மற்ற பிரிவுகளில் உள்ள வர்களுடன் தனியாகவும், மற்ற குழுக்களுடனும் கருத்துக்களை புகைப்படங்களை, ஃபைல்களை பகிர்ந்து கொள்ள முடியும்.

கிட்டத்தட்ட மொத்த அலுவலகமும் ஃபேஸ்புக் பக்கத்துக்குள் சுருங்கிவிடும் என்பது தான் மார்க்கின் புதிய திட்டம்.  விர்ச்சுவல் அலுவலகங்கள் கான்செஃப்ட்டை நேரடி அலுவலகங்களுக்குள்ளும் கொண்டு வந்துள்ளது ஃபேஸ்புக். இதன் மூலம் பணியாளர்களின் வேலைத்திறன் கூடுவதுடன். அவர்கள் நிபுணத்துவம் பெறவும் இது உதவுகிறது.

வெளிப்படைத்தன்மையுடன் இயங்கும் நிறுவனங்களுக்கு இந்த அமைப்பு பெரிதும் உதவிகரமாக இருக்கும். துறைகளுக்கு இடையேயான தொடர்புக்கும், உயர் அதிகாரிகள் குறிபிட்ட நபருக்கு டாஸ்க் வழங்கவும் வொர்க் ப்ளேஸ் எளிமையான அமைப்பாக இருக்கும்.  இதில் விளம்பரங்கள் இருக்காது. மேலும் பர்சனல் ஃபேஸ்புக் பக்கத்திலிருந்து வேறுபட்டதாக இருக்கும். இதன் மூலம் உங்கள் அலுவலக பணியாளர்களோடு மட்டும் தொடர்பில் இருக்க முடியும். 

இதனை முதற்கட்டமாக 3 மாத இலவச சேவையாக ஃபேஸ்புக் வழங்கியுள்ளது. இதில் குறிபிட்ட அளவு உறுப்பினர்கள், குறிபிட்ட அளவு நினைவக வசதி என வழங்குகிறது. இந்த சேவை பிடித்து போனால் இதனை பிரீமியம் கணக்காக‌ இணைத்து கொள்ள முடியும். அதற்கு கட்டணத்தை நிர்ணயித்துள்ளது ஃபேஸ்புக். 

ஆயிரம் பணியாளர்கள் வரை மாதத்திற்கு ஒரு பணியாளருக்கு சுமார் 200 ரூபாயும் ($3), 1000 முதல் 10 ஆயிரம் பணியாளர்களுக்கு  ஒரு பணியாளருக்கு சுமார் 140 ரூபாயும் ($2), 10 ஆயிரம் பணியாளர்களுக்கு மேல் உள்ள நிறுவனத்தில்  ஒரு பணியாளருக்கு சுமார் 70 ரூபாயும் ($1), கட்டணமாக வசூலிக்கிறது. இவை அனைத்தும் ஆக்டிவ் யூசர் எனப்படும் பயன்படுத்தும் பணியாளர்களுக்கு மட்டுமே பொருந்தும், உதாரணமாக ஒரு பணியாளர் ஒரு மாதம் விடுப்பில் சென்றுள்ளார். அவரது கணக்கில் எந்த பதிவும் இல்லை என்றால் அவருக்கு கட்டணம் வசூலிக்கப்படமாட்டாது. மேலும் ஃபேஸ்புக்கில் உள்ள அனைத்து சேவைகளும் இதனுள்ளம் இருக்கும். இதனை ஆன்ட்ராய்ட் மற்றும் ஆப்பிள் ஆப்ஸ்கள் மூலம் அலுவலகத்துக்கு வெளியிலிருந்தும் அலுவலகத்தோடு தொடர்பில் இருக்க முடியும்.

இத்தனை நாட்கள் பர்சனல் பக்கமாக இருந்த ஃபேஸ்புக் இப்போது ப்ரோஃபஷனல் பக்கமாகவும் இருக்கும். இதுவரை இந்த வொர்க் ப்ளேஸ் பக்கத்தில் 1000 நிறுவனங்கள் இணைந்துள்ளதாம். யாருக்கு தெரியும் நாளைக்கு இங்கேயே வேலைக்கு ஆட்கள் எடுத்தாலும் ஆச்சர்யப்படுவதற்கில்லை. ஃபேஸ்புக் இந்த பக்கங்களை சிறப்பாக கையாளுவதாக இதனோடு தொடர்பில் இருக்கும் நிறுவனங்களின் ரிவியூக்கள் தெரிவிக்கின்றன. கமான் இனிமே 24*7 ஃபேஸ்புக்லயே இருங்க யாராவது கேட்டா வேலை பாக்குறத அங்க தான்னு கெத்தா சொல்லிக்கலாம்.