ஆட்சி மீது ஏற்பட்டுள்ள விமர்சனம், கட்சிக்குள் உருவாகும் பூசல் என அ.தி.மு.க-வின் முகாம் ஆட்டம் கண்டு வரும் நேரத்தில், பொதுச்செயலாளர் பதவியைக் கைப்பற்ற அ தி மு க பொதுக்குழுவை கூட்டும் முடிவுக்கு கார்டன் தரப்பு வந்து விட்டது.

அ.தி.மு.க.வின் அதிகாரம்மிக்க பதவி பொதுச்செயலாளர் பதவிதான். இந்தப் பதவியைக் கைப்பற்ற சசிகலா தரப்பில் கடுமையாக முயற்சி எடுக்கப்பட்டு, கட்சியின் முக்கிய நிர்வாகிகளும் அதை வலியுறுத்தத் துவங்கி விட்டார்கள். இந்நிலையில் ஜெயலலிதாவின் அண்ணன் மகள் தீபாவிற்கு ஆதரவாக அங்காங்கே பேனர்கள் வைப்பதும், போஸ்டர்கள் ஒட்டுவதும் என ஒருபுறம் களேபரங்கள் நடந்து வருகின்றன. சசிகலாவை கட்சியின் பொதுச் செயலாளர் ஆக்குவதற்கு கீழ்மட்ட அளவில் பெரும் எதிர்ப்பு உள்ளது என்ற தகவல் உளவுத்துறை மூலம் கார்டனுக்கு கிடைத்துள்ளது. சசிகலாவின் உறவினர்கள் மீது இருக்கக்கூடிய குற்றசாட்டுகள் மக்கள் மத்தியில் சசிகலாவின் பெயர் எடுபடாது என்ற தகவலும் அதில் நோட் செய்யபட்டிருந்தது. இவையெல்லாம் சசிகலா தரப்பை கொஞ்சம் யோசிக்க வைத்துள்ளது. 

இந்தநிலையில், தமிழகத்தின் தலைமைச் செயலாளர் வீட்டில் நடைபெற்ற வருமான வரித்துறை சோதனையை சசிகலா தரப்பு, தங்களுக்கு வைக்கும் செக் என்ற கோணத்தில்தான் பார்க்கிறார்கள். முதல்வர் ஓ.பன்னீர் செல்வம், கடந்த திங்கள்கிழமை டெல்லி சென்று வந்த இருதினங்களில் இந்த ரெய்டு நடைபெற்று இருப்பது, மன்னார்குடி குடும்பத்திற்கே கொஞ்சம் பீதியை ஏற்படுத்தி விட்டது. “கட்சியில் நேரடியாக பதவியில் இல்லாமல், கட்சியை நம் கட்டுப்பாட்டில் வைத்துக் கொள்ளுவது கடினம். சசியை உடனடியாக பதவிக்கு வரச் சொல்லுங்கள்” என்று நடராஜன் குடும்ப உறவுகள் மூலம் சசிகலாவிடம் வலியுறுத்தியுள்ளார். அதை ஒட்டுமொத்தக் குடும்பமும் ஆமோதித்துள்ளார்கள். 

சசிகலாவின் அண்ணன் மகன் டாக்டர். வெங்கடேஷ் மூலம் கட்சியில் சசிகலா மீது அதிருப்தியில் இருந்தவர்களை ஏற்கெனவே சரிக்கட்டி வந்தார்கள். அதன் பிறகு கட்சி நிர்வாகிகள் போயஸ்தோட்ட வீட்டில் சசிகலாவைச் சந்தித்து ஆதரவு தெரிவித்ததும், சசிகலா சற்றே உற்சாகமாக இருந்தார். ஆனால் மத்திய அரசு, தமிழக அரசுக்கு எதிராக நெருக்கடி அளித்து வருவதால், இனியும் அமைதியாக இருந்தால் சிக்கலாகி விடும் என்ற நிலைக்கு சசிகலா தரப்பு வந்து விட்டது. அதனால் அரியணையில் ஏறுவதற்கு சசிகலா தயாராகி விட்டார் என்பதுதான் அ.தி.மு.க-வின் லேட்டஸ்ட் தகவல்.

இது குறித்து அ.தி.மு.க நிர்வாகி ஒருவர், “வரும் வெள்ளி மற்றும் சனிக்கிழமை அன்று அனைத்து மாவட்டச் செயலாளர்களையும் சென்னை வர உத்தரவிட்டுள்ளார்கள். அவர்களிடம் முதலில் பேசிவிட்டு, அந்தந்த மாவட்டங்களில் இருக்கும் பொதுக்குழு உறுப்பினர்களுக்கான கடிதத்தை அவர்களிடமே கொடுத்தனுப்ப திட்டமிட்டுள்ளனர். பொதுக்குழு உறுப்பினர்கள் யாரெல்லாம் சசிகலாவிற்கு ஆதரவாக உள்ளார்களோ, அவர்களிடம் மட்டும் கடிதம் கொடுக்கவும், பிரச்னை செய்பவர்களாக இருந்தால் அவர்களுக்கு பொதுக்குழு அனுமதி கடிதத்தை வழங்க வேண்டாம் என்று மாவட்டச் செயலாளர்கள் அறிவுறுத்தப்பட உள்ளனர். பொதுக்குழுவில் எந்தப் பிரச்னையும் இல்லாமல் ஏக மனதாக பொதுச்செயலாளராக தேர்வாக வேண்டும் என்பதே சசிகலாவின் திட்டம்” என்றவர், தொடர்ந்து “பொதுக்குழு சென்னையில் உள்ள வானகரம் ஶ்ரீவாரு திருமண மண்டபத்தில்தான் நடக்க உள்ளது. வரும் 29-ம் தேதி அன்று பொதுக்குழுவை நடத்துவதற்கு, மண்டபம் புக் செய்யப்பட்டு விட்டது” என்ற தகவலையும் தெரிவித்தார்.