காதலர்க்கு ஓர் தினம் காதலோ தினந்தினம்

கனிவான செந்தமிழால் காதலர் தினந்தன்னை

கவியாலே கனிய வைக்க களமமைத்துத் தந்த

மொழிமேலே பற்றுவைத்து மின்னிணைய வசமாக்கி

அழியாத செந்தமிழை அனைத்துலகம் அறிவதற்கு

யாழிணையப் பெயர் தாங்கி மிளிர வைத்த எம்முறவே

காதலர்க்கு ஓர் தினம் காதலோ தினமென்று

விதவிதமாய் கவிதொடுப்போர் வரிசையிலே நானுமிங்கே

மின்னிணைய தொடர்பாலே மனத்தெழுந்த பாமாலை

கன்னித்தமிழ் கொண்டு சாற்றுகிறேன் காணீரோ!

ஆணினமும் பெண்ணினமும் அன்பாலே அருகிணைந்து

பேணிநிற்கும் புதுவுறவே காதலின் பிறப்பாகி

கண்களைத் தூதுவிட்டு துணையின்பக் கூடமைத்து

திண்மை நிலையினராய் உயர்புலத்து வாழ்வமைத்து

ஏமக் கிழத்தியவள் மென்மையுறு இதயத்தில்

தூமலரின் பண்பாகி ஞாலம் ஒருங்கறிய

தழைகாதல் வாலறிவன் ஆக்க வகையறிந்து

மழைகாணும் பயிரினம் போல் மகிழ்வுறு காதலது

அழுக்குடம்பு ஆனாலும் அன்பிற்குமுண்டோ அடைக்குந்தாளென

ஒழுக்கங் காத்திருந்து செறிகாமந் தனையடக்கி

மனவரசால் மையலுறும் மன்னவரும் பலருண்டு

இன்பரசத் தேன்பருகும் இளையோர்கள் மத்தியிலே

பொன்னின் அணிமலராய் பூத்திருக்கும் பூவையர்கள்

தன்மேனி முற்றமுன்னர் தனிமரமாய் ஆவதுண்டு

இனியர் இணைசேரார் ஈர்க்குங்கண் ஞாலத்தே

தனிமைக்கு அவரே கரியாகி நிற்பதுவும்

காமம் வீழின்பக் கடலான காதலுக்கே!!

சேமமுறு ஒளியூடல் சேர்ந்தங்கே மருவுவதால்

கூடியுணர்வாரே தாமிசைந்து பலகாலம்

ஈடில்ல தோரின்ப விருந்தாகும் காதலதை

தோற்றவரும் வெல்வாரே துணைபோவார் முயற்சியினால்

ஏற்றவர் கொடியிடையாள் இனிப்பான காதலுக்கு

அழகரிவை மனத்தகத்தே அளித்தழிக்கும் ஆடவரும்

உழல்கின்ற வையகத்தே காதலால் நோவதுண்டு

மனைக்கொளிசேர் மங்கையரை மன்னவராய் மனங்கனிந்து

தனக்குறவாய் கொண்டபின்பும் தினந்தோறுங் காதலிப்பர்

அரிவையர் ஆடவரேன் அகிலமும் வாழும்

விரிசடையோன் விரும்பியளித்த உயிரினம் யாவுமே

காதலில் துவன்று கண்ணினாற் பேசி

நோதலில்லா ஆசையொழிய மனமது ஒன்றி

பூவார் குழற் கூந்தல் மையலால் மயங்கி

பூவாலே தூதுவிடும் புனிதநாள் எண்ணியங்கே

தேன்கமழின்பக் காதலர்க்கோர்தினம் காதலோ தினமென்று

என்னரும் பேரன் புகட்டிய தமிழால்

அன்பொடு தொடுத்தேன் அனைவருங் காண

கண்டு மகிழ்ந்தவர் கருப்பிழை உணர்ந்தோர்

அரும்பிடு குறைகள் அருஞ்சொல் திருத்தி

தருநிழ லீய்வது தமிழ்த்தாய் இயல்பே!!

நன்றி வணக்கம்

அளவையூர் கவிக்குமரன் கலைஞானமணி லம்போ

Edited February 9, 200718 yr by alavaiyoor kavikumaran

காதல்க் கவியமைத்து-தமிழ்க்

கட்டழகைக் கட்டவிழ்த்து

நீங்கள் வடித்த கவி -ஐயா

நெஞ்சில் நிற்குதய்யா..

காதலெனும் பேரில்-இன்று

கழுசறைகள் போடும் கூத்து

நெஞ்சை உறுத்தையிலும்-ஓர்

மேன்மை கொண்ட பாவில்

காதல் கேட்டசுகம் பெரிதே ஐயா

நீவீர் வடித்த கவியதுவால்-ஏழை

நெஞ்சு வலி யாற்றியதால்

நன்றி சொன்னேன் வாயார-வாழ

வாழ்த்துகிறேன் மனமார

உங்கள் மரபுக் கவி பார்த்துக் மகிழ்ந்தது எங்கள் மனம்.

தங்கள் கவியாற்றல் கண்டு வியப்புற்றோம்...

இன்னும் கவி பல புனைந்து எமையெல்லாம்

இன்பத்தில் ஆற்றும் அளவைய+ர் கவி மணியே!

காவிய காதலதை

காவியே வந்திங்கு

கவியாக புணைந்திட்ட

பாவலா உந்தனுக்கு

பலகோடி வாழ்த்துக்கள்......

தொடரட்டும் உன் பணிகள்

மிளிரட்டும் உன் கவிகள்....

ஐயா உங்கள் கவிதை அழகாக உள்ளது. ஆனால் நமக்கு கவிதையின் கருத்துடன் உடன்பாடில்லை. மன்னிக்கவும்!

16 வயது ஆனது காதலும் வந்தது

காதலோடு காமமும் வந்தது

காதலுடன் காமமும் போராடியது

காமம் வென்றது காதல் தோற்றது

காதல் தோற்றது கண்ணீர் வந்தது.