தமிழ்த்தேசியம் ரணிலைப் புறக்கணித்தமையே மஹிந்தவின் ஆட்சிக்கும் யுத்தத்துக்கும் காரணம்!

தமிழ்த்தேசியம் ரணிலைப் புறக்கணித்தமையே மஹிந்தவின் ஆட்சிக்கும் யுத்தத்துக்கும் காரணம்!

"சுடர் ஒளி' ஆசிரியர் தலையங்கத்துக்கு பதிலளித்து சபையில் ஹக்கீம் உரை:

மஹிந்த ராஜபக்ஷவின் அரசில் இணைந்து நாம் அமைச்சுப் பதவிகள் பெற்றுக்கொண்டமை தொடர்பாக விமர்சிக்கும் பத்திரிகைகள், கடந்த ஜனாதிபதித் தேர்தலில் தற்போதைய எதிர்க்கட்சித் தலைவர் ரணில் விக்கிரமசிங்கவை ஜனாதிபதியாக்க நாம் எடுத்த முயற்சி தோல்வியடையத் தமிழ் தேசியம் தேர்தலைப் பகிஷ்கரித்தமையே காரணம் என்பதையும் அந்தப் பின்னணியிலேயே மஹிந்த ராஜபக்ஷ ஜனாதிபதியாகி யுத்தம் ஏற்பட்டது என்பதையும் புரிந்துகொள்ள வேண்டும்.

இவ்வாறு ஸ்ரீலங்கா முஸ்லிம் காங்கிரஸ் தலைவரும் அமைச்சருமான ரவூப் ஹக்கீம் நேற்று நாடாளுமன்றில் இடம்பெற்ற அமரரான நாடாளுமன்ற உறுப்பினர் ரவிராஜின் மறைவுக்கு அனுதாபம் தெரிவிக்கும் பிரேரணை மீதான விவாவதத்தில் கலந்துகொண்டு உரையாற்றுகையில் கூறினார்.

அவர் தொடர்ந்து உரையாற்றுகையில் கூறுயதாவது:

இன்றைய (அதாவது நேற்றைய) "சுடர் ஒளி'ப் பத்திரிகையின் ஆசிரியர் தலையங்கத்தில் அரசுடன் இணைந்து அமைச்சுப்பதவிகளைப் பெற்றவர்களை விமர்சித்து எழுதப்பட்டுள்ளது.

நூறுவீதம் அது என்னையே விமர்சித்து எழுதப்பட்டுள்ளது என்பதை வாசிப்பவர்கள் புரிந்துகொள்வர். இவ்வாறான விமர்சனங்களை நான் ஒருபோதும் எதிர்த்ததில்லை. ஊடகங்களையும் ஊடகவியலாளர்களையும் மதிக்கும் நான் இவ்வாறான விமர்சனங்களை மிகவும் சிநேகபூர்வத்துடன் ஏற்றுக்கொள்கிறேன்.

நாம் எந்தப்பக்கத்தில் இருந்தாலும் சிறுபான்மை இன மக்களுக்கு எதிராகவோ அல்லது மனிதாபிமானத்திற்கு எதிராகவோ ஒருபோதும் செயற்படமாட்டோம் என்பதை இச்சந்தர்ப்பத்தில் கூறிக்கொள்ள விரும்புகிறேன்.

கடந்த ஜனாதிபதித் தேர்தலில் தற்போதைய எதிர்க்கட்சித் தலைவர் ரணில் விக்கிரமசிங்கவை ஜனாதிபதியாக்க நாம் முயற்சி எடுத்தோம். தோற்றுப்போனோம். அந்தத் தேர்தலை தமிழ்த் தேசியம் புறக்கணித்து ரணில் விக்கிரமசிங்க தோற்றுப்போன நிலையில்தான் மஹிந்த ராஜபக்ஷ ஜனாதிபதியானார் என்பதையும் யுத்தம் ஏற்பட்டது என்பதையும் நாம் அமைச்சுப் பதவிகள் பெற்றமை தொடர்பாக விமர்சிக்கும் பத்திரிகைகள் விளங்கிக்கொள்ள வேண்டும்.

தமிழ்த் தேசியம் இத்தேர்தலைப் பகிஷ்கரித்தமைக்கும் இப்பத்திரிகைகள் பல காரணங்களைத் தெரிவித்திருந்தமையையும் நாம் மறந்துவிட முடியாது. என்றார்.

ரவிராஜ் தொடர்பாக அவர் தொடர்ந்து பேசுகையில் ரவிராஜ் எனது நீண்டகால நண்பர். நான் அவருடன் நெடுங்காலமாக நெருங்கிப்பழகினேன்.

சட்டக்கல்லூரியில் எனக்கு அடுத்தபடியாக அவர் வந்து சேர்ந்தார்.

சட்டக்கல்லூரியில் தமிழ் மன்றத்தின் தலைவராக இருந்தபோது அவர் எனக்கு மிகவும் உதவினார். அவரும் நானும் ஒருசில வழக்குகளில் நேர் எதிரே வழக்காடியுள்ளோம். அவரின் அரசியல் பிரவேசத்திற்குப் பிறகு கூட்டங்களில், விவாதங்களில் எங்கள் கட்சிகளைப் பிரதிநிதித்துவப்படுத்திக் கலந்திருந்தோம்.

இவ்வாறு பல செயற்பாடுகளில் நாம் இருவரும் ஒன்றாகச் செயற்பட்டிருந்தோம்.

பாதுகாப்புப்படையினர் நிறைந்திருந்த இடத்தில் வைத்துத்தான் அவர் சுட்டுக்கொல்லப்பட்டார். தான் சார்ந்த மக்களின் பிரச்சினைகளை எடுத்துக்கூறி தமிழ்த் தேசியப் போராட்டத்தை நியாயப்படுத்துவதற்காகத் தொலைக்காட்சி மூலம் துணிச்சலுடன் பேசிவந்தார். அவர் மிகவும் ஆளுமை மிக்கவர். அவர் இந்தச் சபையில் இன்று இல்லை. அந்தக் கவலை நம் எல்லோரையும் ஆட்கொண்டுள்ளது.

ரவிராஜின் மரணத்தால் அவரது மனைவியும் பிள்ளைகளும் கதறியழும் காட்சிகள் பத்திரிகைகளில் பிரசுரிக்கப்பட்டிருந்தன. அவை இந்த நாட்டு மக்களின் மனச்சாட்சியை உறுத்தின என்பது உண்மை.

அவரது கொலையைத் தொடர்ந்து ஜனாதிபதி தனது அதிர்ச்சியை வெளியிட்டார். அதிலே அவரது அனைத்து சக்திகளையும் பிரயோகித்து கொலைச் சூத்திரதாரிகளை நீதிமன்றின் முன் நிறுத்த நடவடிக்கை எடுப்பேன் என அவர் கூறியிருந்தார். அப்போது நான் அரசுடன் இருக்கவில்லை. என்றார்.

-Sudaroli-

Edited February 10, 200718 yr by யாழ்வினோ