பொலிஸ் உத்தியோகத்தர் ஒருவர் செலுத்தி வந்த வாகனம் வீதியில் நடந்து வந்த இரு யுவதிகளின் மீது மோதியதில் ஒருவர் படுகாயமடைந்துள்ளதுடன் மற்றுமொருவர் காயமடைந்த நிலையில், மட்டக்களப்பு போதனா வைத்தியசாலையில் அனுமதிக்கப்பட்டுள்ளனர்.

குறித்த வாகன சாரதியான பொலிஸ் உத்தியோகத்தர் மட்டக்களப்பு பொலிஸாரால் கைது செய்யப்பட்டுள்ளார்.

இன்று முற்பகல் 11 மணியளவில் மட்டக்களப்பு திருமலை வீதியில் பொலிஸ் தலைமையக விடுதிக்கு முன்னால் இச்சம்பவம் இடம் பெற்றுள்ளது.

குறித்த வீதியின் வலது பக்கமாக நடந்து வந்து கொண்டிருந்த வவுணதீவைச் சேர்ந்த கந்தசாமி நிசாந்தினி (20) என்ற யுவதி படுகாயமடைந்துள்ளதுடன், இளையதம்பி மஞ்சு (19) என்ற யுவதி  காயமடைந்துள்ளார்.

பொலிஸ் விடுதிக்குள்ளிருந்து வெளியில் வந்த வாகனமே குறித்த யுவதிகள் மீது மோதியுள்ளது. வாகனம் மோதியதில் யுவதிகள் இருவரும் வீதியோரத்திலுள்ள வடிகானுள் விழுந்துள்ளனர்.

இந்நிலையில் ஸ்தலத்திற்கு விரைந்த மாவட்ட பொலிஸ் அத்தியட்சகர் கீர்த்தி ரத்னாயக்க விசாரணைகளை மேற்கொண்டார்.

சம்பவ இடத்திற்கு முன்னால் இருந்த வர்த்தக நிலையத்திலுள்ள சீ.சீ.ரீ.வி கமறாவில் குறித்த விபத்து பதிவாகியுள்ளதுடன் அதனடிப்படையில் பொலிஸார் விசாரணைகளை மேற்கொண்டுள்ளனர்.