தமிழகம், எப்போதையும்விட அதிகமாகவே சத்தமாக இருக்கிறது. பிப்ரவரி 7 - ம் நாள் முன்னிரவு மெல்லிய குரலில் பன்னீர்செல்வம் பேசியது இப்போது எங்கும் எதிலும் எதிரொலித்து பெருஞ்சத்தமாக மாறி இருக்கிறது. கட்சி அரசியலை விரும்பாத, எப்போதும் இந்தக் களேபரங்களிலிருந்து விலகி நிற்க விரும்புபவர்கள்கூட இந்தச் சத்தத்திலிருந்து தப்பவில்லை. ஒன்று இந்தச் சத்தத்தின் குரலாக இருக்கிறார்கள்... இல்லையென்றால், செவியாக இருக்கிறார்கள். சரி... இவ்வளவு சத்தத்துக்கு நெருக்கமானவர், இந்தச் சத்தம் ஜனிக்கும் மூலத்தின் ஒருவர்... இப்போது எப்படி இருக்கிறார்... என்ன செய்துகொண்டிருக்கிறார்...? 

கால்நூற்றாண்டு காலமாகத் தமிழக அரசியலின் தவிர்க்க முடியாத சக்தியாக இருக்கும் ம.நடராசனைத்தான் சொல்கிறேன். இவர் வேடிக்கை மட்டும்தான் பார்க்கிறாரா... இல்லை, இவர்தான் எல்லாவற்றையும் இயக்குகிறாரா என எப்போதும் திரைக்குப்பின்னால் இயங்கும் நடராசனின் பெசன்ட்  நகர் இல்லம் எப்படி இருக்கிறது...?  

“ஏதாவது நியூஸ் சேனல் போடுங்கப்பா...”

அரசியலில் அதிர்வுகளை உண்டாக்கும் க்ரீன்வேஸ் சாலையிலிருந்து ஏறத்தாழ ஐந்து கிலோமீட்டர் தொலைவில்தான்  ம.நடராஜனின் வீடு  இருக்கும் பெசன்ட் நகர் பாரிவீதி இருக்கிறது. ஞாயிறு மாலைப் பொழுதில் அங்கே சென்றபோது, நாம் பார்த்த விஷயங்கள் நம்மை வியப்பில் ஆழ்த்தின. ஆம், கிரீன்வேஸின் பரபரப்பு எதும் தன்னை ஆட்கொள்ளாமல் ஏதோ, ஜென் துறவிகள் தியானிக்கும் இடம்போல அமைதி ததும்புகிறது. வீட்டுக்கு வெளியேயும் எந்தப் பரப்பரப்பும் இல்லை.... க்ரீன்வேஸ் செல்லும்  தலைவர்கள், வழிதவறி இங்கே வரலாம் என்று நடராஜன் நம்புகிறாரா என்று தெரியவில்லை... வீட்டின் ஏழு அடி உயர மெயின் கேட் திறந்தே இருக்கிறது...!

கேட்டின் அருகே நின்றுகொண்டிருந்த ஒரு மன்னை நபரிடம் பேச்சுக் கொடுத்தோம். “நண்பா... உள்ளே என்னதான் நடக்குது...?”. அவர் படுசாவகாசமாக, “எல்லாரும் ’பாலிமர் டி.வி’-யில் ஓடுற ‘எத்தன்’ படம் பார்த்துக்கிட்டு இருக்காங்க. “ஏங்க என்னங்க சொல்றீங்க...” என்று நாம் அதிர்ச்சியுடன் கேட்க... “அட... ஆமாங்க... எல்லாச் செய்திச் சேனல்களிலும் ஒரே செய்தியை ஒன்பது தடவை போட்டா... அதையேவா பார்த்துக்கிட்டு இருப்பாங்க...” என்கிறார் அசால்டாக. 

கிளீன் சேவ் முகத்துடன் மஞ்சள் சட்டை அணிந்த நபர் உள்ளிருந்து நம் சத்தம் கேட்டு வெளியே வருகிறார். நம்மை அறிமுகம் செய்துகொண்ட பிறகு, ஒரு தயக்கத்துக்குப்பின் பேசுகிறார், “நேற்று காலையில் பெசன்ட் நகரில் இருக்கும் மயிலாப்பூர் சட்டமன்ற உறுப்பினர் ஆர். நடராஜ் இல்லத்துக்கு மாஃபா பாண்டியராஜன் வந்தார்.  உடனே,  ம.நடராஜனை சந்திக்க மாஃபா விரைந்தார் என ஒரு செய்தி உலாவுகிறது. அதாவது பரவாயில்லை, எனக்கே வாட்ஸ்அப்பில், ‘பரபரப்பு : நடராஜனை சந்தித்தார் மாஃபா...  மீண்டும் சசி அணிக்கே திரும்பினார். டெல்லி அழுத்தங்களை எப்படி எதிர்கொள்வது என்று ஆலோசனை” என ஒரு செய்திவருகிறது. என்னத்த சொல்ல...சமூக ஊடகங்களில்தான் அரசியல் நடக்கின்றன... நாங்கள் நடக்கும் விஷயங்களை ஒரு பார்வையாளனாக வேடிக்கை மட்டும்தான் பார்த்துக்கொண்டிருக்கிறோம்.”

“ஆளுநர்கிட்ட கேளுங்க?”

’’சரி... நடராஜன்  உடல்நிலை இப்ப எப்படி இருக்கு... என்ன முடிவு பண்ணி இருக்காரு...’’   என்று நாம் கேட்க. அவர், “தலைவர் இப்ப நல்லா இருக்காரு... சாதாரண செக்அப்தான்” என்றவர்... குறும்பாக, “அவர் ட்ரீட்மென்ட் எடுத்துக்கிட்ட படத்தையெல்லாம் வெளியிடச் சொல்ல மாட்டீங்கள்ல” என்றவர் அழுத்துக்கொண்டு, “என்ன கேட்டீங்க.... என்ன முடிவு பண்ணி இருக்கார்ன்னா... முடிவு பண்ண நாங்க யாருங்க... இதை நீங்க ஆளுநர்கிட்டத்தான் கேட்கணும். அவர்தான் இப்ப ஒரு முடிவும் பண்ணாம இருக்காரு... அவரை ஏதாவது முடிவு பண்ணச் சொல்லுங்க” என்கிறார் கோபமாக.  

நாம் பேசிக் கொண்டிருந்தபோது, உள்ளே தொலைக்காட்சி சேனலை மாற்றி இருப்பார்கள்போல... ஒரு குரல், “சீக்கிரம் வாங்க... சீக்கிரம் வாங்க... நடிகர் திலகத்தை காட்டுறாங்க” என்று ஒரு சத்தம். நாம் விநோதமாகப் பார்க்க... “பன்னீசெல்வம் பேசுறத காட்டுறாங்கபோல...” என்றவர் உள்ளே நகர்ந்தார்.