ரிசார்ட்டில் தங்கி உள்ள எம்.எல்.ஏ.க்களின் எண்ணிக்கை குறைந்துள்ளதால் சசிகலா மற்றும் அவரது தரப்பினர் கடும் அதிர்ச்சி அடைந்துள்ளனர். அவர்களை ரிசார்ட் முழுவதும் சசிகலாவின் ஆதரவாளர்கள் தேடியது பெரும் பரபரப்பை ஏற்படுத்தி உள்ளது. 

அ.தி.மு.க.வில் ஏற்பட்டுள்ள உள்கட்சி பூசலால் பொதுச் செயலாளர் சசிகலா, முதல்வர் ஓ.பன்னீர்செல்வம் ஆகிய இருஅதிகார மையங்கள் உருவாகின. இதனால் அ.தி.மு.க. எம்.எல்.ஏ.க்கள் கூட்டம் நடத்தப்பட்டது. இதன்பிறகு கூட்டத்தில் பங்கேற்ற எம்.எல்.ஏ.க்கள், கூவத்தூரில் உள்ள ரிசார்ட்டில் தங்க வைக்கப்பட்டனர். அவர்களிடம் சசிகலா, ஆலோசனையில் ஈடுபட்டு வந்தார். இந்த சூழ்நிலையில் சசிகலா முகாமிலிருந்த எம்.எல்.ஏ.க்களில் சிலர் பன்னீர்செல்வம் அணிக்குத் தாவினர். இது சசிகலா தரப்புக்கு கடும் வருத்தத்தை ஏற்படுத்தியது. பன்னீர்செல்வத்தின் ஆதரவு பெருகிவதைப் பார்த்த சசிகலா, ரிசார்ட்டிலிருந்து இனி எந்த எம்.எல்.ஏவும் பன்னீர்செல்வத்தின் அணிக்கு செல்லக் கூடாது என்பதற்காக பல்வேறு வகையில் வியூகம் அமைத்தார். 

 இந்நிலையில் சொத்துக்குவிப்பு வழக்கில் சசிகலா, இளவரசி, சுதாகரன் ஆகியோர் குற்றவாளி என்று தீர்ப்பு வெளியானதும் சசிகலா தரப்பு அதிர்ச்சிக்குள்ளாகியது. ரிசார்ட்டில் உள்ள எம்.எல்.ஏ.க்களும் அணித்தாவ முடிவு செய்தனர். அதைத்தடுக்க உடனடியாக சசிகலா, அங்குள்ள எம்.எல்.ஏ.க்களிடம் ஆலோசனை நடத்தினார். இதன்பிறகு அ.தி.மு.க. சட்டப்பேரவைக் குழுவின் புதிய தலைவராக எடப்பாடி பழனிச்சாமி தேர்வு செய்யப்பட்டதாக சசிகலா அறிவித்தார்.  இந்தக்கூட்டத்தில் எம்.எல்.ஏ.க்கள் சிலர் மாயமாகியிருப்பதாக நம்பத்தகுந்த வட்டாரங்கள் தெரிவித்தன. 

இதுகுறித்து ரிசார்ட்டிலிருக்கும் எம்.எல்.ஏ. ஒருவர் கூறுகையில், "ரிசார்ட்டில் எம்.எல்.ஏ.க்களின் எண்ணிக்கை குறைந்துள்ளது உண்மைதான். எடப்பாடி பழனிச்சாமியை தேர்வு செய்தது அவர்களுக்குப் பிடிக்கவில்லை. இதனால் அவர்கள் ஆலோசனை கூட்டத்துக்கு வராமல் ரிசார்ட்டிலிருந்து மாயமாகி விட்டனர். அவர்கள் எங்கு இருக்கிறார்கள் என்ற விவரம் தெரியவில்லை. அவர்களை ரிசார்ட்டில் தேடிப்பார்த்தோம். இந்த தகவல் வெளியில் தெரிந்தால் சிக்கல் என்று கருதி அதை மூடிமறைத்து விட்டனர்" என்றார். 

 ரிசார்ட்டில் தற்போது ஆட்சி அமைக்கும் அளவைவிட குறைவான எண்ணிக்கையிலேயே எம்.எல்.ஏ.க்கள் இருப்பதாகவும் ஒரு தகவல் வெளியாகி உள்ளது. அந்த தகவல் உறுதிப்படுத்தப்படவில்லை.

 இதுகுறித்து சசிகலா ஆதரவாளர்கள் கூறுகையில், "ரிசார்ட்டில் எம்.எல்.ஏ.க்கள் இருப்பதை ஆரம்பத்திலிருந்தே எங்களது எதிரணியினருக்குப் பிடிக்கவில்லை. இதனால் கிருஷ்ணராயபுரம் தொகுதி எம்.எல்.ஏ. கீதாவை காணவில்லை என்று உயர் நீதிமன்றத்தில் ஆட்கொணர்வு மனு தாக்கல் செய்தனர். அதற்கும் விளக்கம் அளித்து விட்டோம். அடுத்து ரிசார்ட்டில் எம்.எல்.ஏ.க்கள் உண்ணாவிரதம் இருப்பதாகவும் வழக்கு தொடரப்பட்டது. இதன்பிறகு காஞ்சிபுரம் மாவட்ட நிர்வாகமும் போலீஸாரும் நேரில் வந்து விசாரித்து நீதிமன்றத்தில் அறிக்கை சமர்பித்துள்ளனர். சொத்துக்குவிப்பு வழக்கு தீர்ப்பு எங்களுக்கு பாதகமாக வந்ததால் எங்கள் அணியில் உள்ள எம்.எல்.ஏ.க்கள் அனைவரும் தங்களுக்கு ஆதரவு தெரிவித்து விடுவார்கள் என்று தப்பு கணக்கு போட்டுள்ளார் பன்னீர்செல்வம். ஆனால் சின்னம்மா, அதிரடியாக முடிவெடுத்து எடப்பாடி பழனிச்சாமியை தேர்வு செய்துள்ளார். சின்னம்மாவின் வழிகாட்டுதலின் பேரில் செயல்படுவோம். பன்னீர்செல்வம் மற்றும் அவரை ஆதரித்தவர்களை சின்னம்மா கட்சியிலிருந்தே நீக்கி விட்டார். அவர் ரிசார்ட்டுக்கு வந்தாலும் ஏமாற்றத்துடன்தான் செல்வார். சசிகலாவை ஆதரிக்கும் யாரும் கட்சிக்குத் துரோகம் செய்த பன்னீர்செல்வத்துக்கு ஆதரவு தெரிவிக்க மாட்டார்கள்" என்றனர்.