வீரர்களின் காயத்தால் சிக்கலில் தவிக்கும் அணிகள்

வீரர்களின் காயத்தால் சிக்கலில் தவிக்கும் அணிகள்

உலகக் கிண்ண கிரிக்கெட் போட்டிகள் அண்மித்துள்ள நிலையில், கடைசி நேரத்தில் ஏற்பட்டுள்ள முன்னணி வீரர்களின் காயம் காரணமாக பல அணிகளும் சிக்கலுக்குள்ளாகியுள்ளதாக தெரியவருகிறது.

அதிலும் நடப்பு சாம்பியனான அவுஸ்திரேலிய அணி பல சிரமங்களுக்கு முகம்கொடுத்து வருகிறது.

9 ஆவது உலகக்கிண்ண கிரிக்கெட் போட்டி மேற்கிந்திய தீவுகளில் மார்ச் 13 ஆம் திகதி ஆரம்பமாகவுள்ளது. இந்நிலையில் அவுஸ்திரேலிய அணியின் சகலதுறை ஆட்டக்காரரான சைமன்ட்ஸுக்கு கொமன்வெல்த் முக்கோணத்தொடரின் போது தோள் பட்டையில் காயம் ஏற்பட்டது. இதனைத் தொடர்ந்து தசைநார் கிழிந்து விட்டதால் அவருக்கு உடனடியாக சத்திரசிகிச்சை மேற்கொள்ளப்பட்டது. இதனால் உலகக் கிண்ண தொடக்க போட்டிகளில் சைமன்ட்ஸால் விளையாட முடியாது என மருத்துவர்கள் தெரிவித்துள்ளனர். என்றாலும் அவர் "சுபர் 8' போட்டியில் கலந்துகொள்ளவார் என அவுஸ்திரேலிய அணித்தலைவர் ரிக்கி பொண்டிங் நம்பிக்கை தெரிவித்துள்ளார்.

இதேபோன்று அவுஸ்திரேலிய அணியின் வேகப்பந்து வீச்சாளரான பிரெட்லீ நியூசிலாந்துக்கு எதிரான போட்டியையொட்டி பயிற்சியில் ஈடுபட்டிருந்த போது கனுக்காலில் காயம் ஏற்பட்டது. காயம் கவலை தரும் விதத்தில் அமைந்துள்ளதால் அவர் உலகக் கிண்ணத்தில் ஆடுவது தொடர்பாக இன்னும் சில நாட்கள் கழித்தே உறுதியாக தெரியவரும் என ஆஸி. நிர்வாகத்தினர் அறிவித்துள்ளனர். இதற்கிடையில் கிளார்க், பொண்டிங் ஆகியோரும் இந்த பட்டியலில் உள்ளனர். என்றாலும் அவர்களது காயம் பெரிதாக இல்லை. இருவரும் ஓய்வு எடுத்தாலே போதுமானது என்று மருத்துவர்கள் கூறியுள்ளனர்.

அவுஸ்திரேலியாவை போன்றே பாகிஸ்தானும் இதே இக்கட்டான நிலையில் சிக்கியுள்ளது. முன்னணி வேகப்பந்து வீச்சாளர்களான சொஹைப் அக்தர், உமர் குல் ஆகியோர் காயத்தினால் அவதிப்பட்டு வருகின்றனர். உலகக் கிண்ணத்துக்கு முன்னர் இருவரும் முழுமையாக உடல் தகுதி பெற்று விடுவார்கள் என பாகிஸ்தான் கிரிக்கெட் சபை நம்பிக்கை தெரிவித்துள்ளது.

நியூசிலாந்து அணிக்கும் இதே சோதனை ஏற்பட்டுள்ளது. அணியின் முக்கிய வேகப்பந்து வீச்சாளரான கைல் மில்ஸ் காயம் காரணமாக உலகக் கிண்ணத்துக்கான நியுசிலாந்து அணியில் கடைசி நேரத்தில் இடம் பெறமுடியாமல் போனது. அவர் முழங்கால் பிரச்சினைக்கு உள்ளாகி இருப்பதால் 12 மாதங்கள் கிரிக்கெட்டில் இருந்து விலகி இருக்க அறிவுறுத்தப்பட்டுள்ளார். நியூசிலாந்து சகலதுறை ஆட்டக்காரரான ஜெகப் ஓரம் அவுஸ்திரேலியாவுக்கு எதிரான முதலாவது ஒருநாள்

போட்டியில் ஜோன்ஸன் அடித்த பந்தை பிடி எடுத்த போது இடதுகை எலும்பு முறிவு ஏற்பட்டது.

இதனால் உலகக் கிண்ண கிரிக்கெட் போட்டியில் இங்கிலாந்துக்கு எதிரான தொடக்க ஆட்டத்தில் அவர் கலந்து கொள்ள மாட்டார் என தெரிகிறது.

இந்திய அணியிலும் பல வீரர்கள் சிறிய காயங்களுக்கு உள்ளாகியுள்ளனர். டெண்டுல்கார், கங்குலி, பதான், முனாப் படேல் ஆகியோர் இவ்வாறு காயங்களுக்கு உள்ளாகியுள்ளனர். எனினும் இவர்களின் காயங்களுக்கு ஓய்வு எடுத்தால் போது என்பதால் அது பற்றி கவலைப்பட தேவையில்லை என இந்திய அணித்தலைவர் டிராவிட் குறிப்பிட்டுள்ளார். இதில் இலங்கை அணியை பொறுத்தவரை குறிப்பிடத்தக்க அளவில் எந்தவீரருக்கும் காயங்கள் ஏற்படவில்லை என்பது விசேட அம்சமாகும்.

உலகக் கிண்ணத்துக்கு முன்னர் தேர்ந்தெடுக்கப்பட்ட அணி வீரர்கள் உடல் தகுதி சோதனைக்கு உட்படுத்தப்படவுள்ளனர். இதில் வீரர்கள் தோல்வியடையும் பட்சத்தில் அவர்களுக்கு பதிலாக மாற்று வீரர்களை சேர்க்க ஐ.சி.சி. அனுமதி அளித்திருப்பதாலேயே காயத்துடனும் வீரர்கள் அணியில் இணைக்கப்பட்டுள்ளனர் என்பது குறிப்பிடத்தக்கது