“பாப்பாவுக்கு ஒரு ஜிகர்தண்டா போடு” இது காதல் படத்தில் தண்டபாணி பேசும் வசனம். அதுவரை ஜிகர்தண்டா, மதுரையைத் தாண்டி பெரிதாக யாருக்கும் தெரியாது. அந்தப் படத்தின் வெற்றிக்குப் பிறகு ஜிகர்தண்டா தமிழ்நாட்டின் பட்டிதொட்டிகளில் எல்லாம் பரவியது எனச் சொல்லப்படுகிறது. சின்னச் சின்ன ஊர்களிலும் திருநெல்வேலி அல்வா மாதிரி ‘மதுரை ஜிகர்தண்டா’ எனக் கடை போடத் தொடங்கினர். இன்றைக்குச் சென்னை போன்ற முக்கிய நகரங்களிலும் கிடைக்கும் ஜிகர்தண்டாவின் சுவைக்குப் பலரும் அடிமையாகி விட்டனர்.

பேரிலேயே குளுமையை வைத்திருக்கும் ஜிகர்தண்டா மதுரை யில் குடியேறியது சுல்தான்களின் ஆட்சிக்காலத்தில் தான். பாண்டியர்களின் வீழ்ச்சிக்குப் பிறகு 14-ம் நூற்றாண்டில் மதுரையைச் சுல்தான்கள் சில காலம் ஆண்டனர். இந்தக் காலகட்டத்தில்தான் ஜிகர்தண்டா மதுரைக்கு வந்திருக்க வேண்டும் எனச் சொல்லப்படுகிறது.

இதில் உள்ள ஜிகர் என்ற சொல்லுக்குத் தைரியம் எனப் பொருள். தண்டா என்னும் சொல்லுக்கு படகுக்குத் துடுப்புப் போடுபவன் என்னும் பொருள். அதாவது ஒரு படகை, கப்பலைச் செலுத்திச் செல்லும் ஆற்றல் படைத்தவன் எனப் பொருள். இவை இரண்டும் அராபியச் சொற்கள்தாம். இந்த அடிப்படையில் இதன் அராபியத் தொடர்பை நிரூபிக்கிறார் வரலாற்றாசிரியர் ஆர். வெங்கட்ராமன். அதுபோல மதுரையில் பிரசித்திபெற்ற ஜிகர்தண்டா கடைகள் வைத்திருப்பவர்கள் பெரும்பாலும் இசுலாமியர்களே.

இதுவும் வெங்கட்ராமனின் கூற்றுக்கு வலுச்சேர்க்கிறது. ஆனால் இதற்கு மாற்றான கருத்துகளும் இங்கு நிலவுகிறது. தண்டா என்றால் இந்தியில் குளிர் என அர்த்தம். அதிலிருந்தும் இப்பெயர் வந்திருக்கலாம் எனச் சொல்லப்படுகிறது.

ஜிகர்தண்டாவின் சொந்த ஊர், ஜாதகம் பார்த்துக்கொண்டிருப்பது ஆய்வாளர்களின் வேலை என்றால் அதை விட்டுவிடுவோம். எந்த ஊராக இருந்தால் என்ன, வந்தோரை வாழவைக்கும் நாடு அல்லவா? ஜிகர்தண்டா இன்று மதுரையின் பெருமைக்குரிய ஓர் அடையாளமாக மாறியிருக்கிறது. பணக்காரர்களில் இருந்து, ஏழைகள் எல்லோருக்கும் பிடித்தமான பானமாக ஆகியிருக்கிறது ஜிகர்தண்டா.

காலத்திற்கு ஏற்ப ஜிகர்தண்டா தயாரிப்பு முறையிலும் பல மாற்றங்கள் வந்திருக்கின்றன. பாரம்பரிய முறையுடன் இப்போது சுவைக்காகச் சில பொருட்களும் சேர்க்கிறார்கள். சிலர் பாசந்தி போன்ற இனிப்புப் பொருட்களைச் சேர்க்கிறார்கள். சிலர் பால்கோவாவைச் சேர்க்கிறார்கள்.

முதலில் பாதாம் பிசினை சுத்தமாகக் கழுவி, சில மணி நேரம் தண்ணீரில் ஊற வைக்க வேண்டும். அதன் பிறகு பாலை நன்றாகக் காய்ச்ச வேண்டும். அதனுடன் வேண்டிய அளவு சர்க்கரையைச் சேர்ந்துக் குளிரவிட வேண்டும். ஜவ்வரிசியைப் பாலில் வேகவைத்து ஆறவைக்க வேண்டும்.

ஒரு குவளையில் குளிர்ந்த பாதாம் பிசினை சிறிதளவு இட்டு, ஜவ்வரிசியையும், பாலையும், நன்னாரியையும் கலந்து கூடவே ஜஸ் கீரீமையும் சேர்த்தால் குளிர்ச்சியான ஜிகர்தண்டா தயார். பாதாம் பிசினுக்குப் பதிலாகக் கடற்பாசியையும் பயன்படுத்தலாம்.

http://tamil.thehindu.com/society/lifestyle/மதுரை-ஜிகர்தண்டா/article5995808.ece

 

ஜிகா்தண்டா எப்படி ‘ஃபேமஸா’னது?!

 

ஜிகர்தண்டா என்றாலே ஜில்லென்று நம்முடைய உள்ளத்தில் குளுமை ஏறி நாவில் சுவை ஊறும். ஜிகர்தண்டாவுக்கு வேராக திகழும் ஊர் மதுரை. அதிலும் மதுரை விளக்குத்தூணில் உள்ள பேமஸ் ஜிகர்தண்டாவே ரொம்ப ஃபேமஸ். இன்றைக்குத் தமிழ்நாட்டில் பல பெயர்கள் கொண்ட
ஜிகர்தண்டா கடை கிளைகளுக்கெல்லாம் மதுரை ஃபேமஸ் ஜிகர்தண்டாவே மூலம். அது எப்படி ஃபேமஸ் ஆனது என்ற சரித்திர கேள்விக்கு அதன் உரிமையாளர் அமானுல்லாஹ் தரும் பதில் இதோ…

‘‘எங்களது சொந்த ஊா் தூத்துக்குடி மாவட்டம் ஆறாம்பண்ணை. 1977-ல் எனது தந்தை டி.எஸ்.ஷேக் மைதீன் மதுரைக்குக் குடியேறினார். ஆரம்பத்தில் சைக்கிளில் சுற்றிவந்து ஐஸ்கிரீம் விற்றுக் கொண்டிருந்தார். இப்போது நாங்கள் ஜிகா்தண்டா கடை வைத்திருக்கும் இடம்
அந்தக் காலத்தில் சைக்கிள் கடையாக இருந்தது. சில நாட்கள் கழித்து எனது தந்தை `அந்த சைக்கிள் கடைக்கு அருகே தள்ளுவண்டியில் ஜிகா்தண்டா கடை ஆரம்பித்தார். அந்த இடம் சாலையின் நெருக்கடிகளுக்குள் இருந்ததால் அடிக்கடி போலீஸ் தொல்லையும் வந்தது. நல்ல விற்பனையானதால் வேறு இடத்துக்குக் கடையை மாற்றுவதை அப்பா விரும்பவில்லை. அந்த சைக்கிள் கடையிலேயே ஜிகா்தண்டாவை வைத்து விற்க அதன் உரிமையாளா் ஒப்புக்கொண்டார். 1997-ஆம் ஆண்டு நான் இந்தக் கடைக்கு வரும்போது எனக்கு வயது 13. அப்போதிருந்து இந்தக் கடைக்கு இறைவன் அருளால் நல்ல வருமானம் கிடைக்கிறது”

ஃபேமஸ் என்ற பெயரை எப்படி தோ்ந்தெடுத்தீா்கள்?

நாங்கள் கடை ஆரம்பித்த போது கடைக்கு பெயர் எதுவும் வைக்கவில்லை. மதுரை மக்கள் தங்கள் உறவினா்களை அழைத்து வரும்போது ‘இங்க ஜிகா்தண்டா ரொம்ப ஃபேமஸ்’ என்பார்கள். இப்படி பலபோ் சொல்வதைக் கேட்டே 2002-ஆம் ஆண்டிலிருந்துதான் கடைக்கு ‘ஃபேமஸ் ஜிகா்தண்டா’ என்ற பெயரை வைத்தோம். எனவே இது மக்கள் கொடுத்த பெயரே.

உங்களுக்கு எத்தனை கிளைகள் உள்ளன?

ஃபேமஸ் ஜிகா்தண்டா என்ற பெயரில் நாங்கள் நடத்திவரும் கடைகளின் கிளைகள் மூன்று இடங்களில் உள்ளன. மதுரையில் மாட்டுத்தாவணி மற்றும் அண்ணாநகரிலும் திருச்சி சாரதாஸ் அருகிலும் உள்ளன. ஆனால் தமிழகத்தில் பல இடங்களில் ஃபேமஸ் என்ற பெயா் பயன்படுத்தப்படுகிறது. இதைப் பற்றி நாங்கள் தற்போது கண்டுகொள்வதில்லை.

எந்த காலங்களில் வியாபாரம் அதிகமாக இருக்கும்?

கல்யாண முகூா்த்த காலங்களிலும் வெயில் காலங்களிலும் வியாபாரம் அதிகமாக இருக்கும். இதுபோக பல ஊா்களிலிருந்தும் ஆா்டா்கள் வரும். நாங்கள் அங்கு சென்று ஜிகா்தண்டா செய்து கொடுப்போம்.

ஜிகா்தண்டா செய்வது எப்படி? தனிச்சுவைக்கு நீங்கள் வித்தியாசமாக ஏதேனும் சோ்க்கிறீா்களா?

தனிச்சுவைக்கென்று வித்தியாசமாக எதையும் கலப்பதில்லை. நன்றாகக் காய்ச்சிய பால், பாலாடை, நன்னாரி சா்பத், பாசந்தி, ஐஸ்கிரீம் ஆகியவைதான் ஜிகா்தண்டா கலப்பதற்கு தேவையான பொருள். நான் கூறிய இந்த வரிசைப்படியே தேவையான அளவு கலந்தோமென்றால் சுவையான ஜிகா்தண்டா தயார் பண்ணலாம்.

என்ன நீங்களும் செய்து சுவைக்கத் தயாரா?!

 

http://ippodhu.com/ஜிகா்தண்டா-எப்படி-ஃபேம/