பயம்!

பு றப்படும்போதுதான் கடிகாரத்தைப் பார்த்தேன். இரவு மணி பத்தே முக்கால்! 17 கிலோ மீட்டர் போயாகவேண்டும். போகும் வழியை நினைத்தாலே பகீரென்றது!

வழியில், குயிலாங்குப்பம் ஏரியாவில் அலைந்து கொண்டு இருக்கும் நாய்களிடம் இருந்து தப்பிப்பது முதல் பிரச்னை. பகலில் போகிறவர்களே கடி வாங்குவது உண்டு. பீதியோடு, ஆக்ஸிலேட்டரை முறுக்கினேன்.

தவிர, இன்று முதல் தேதி. கையில் சம்பளப் பணம் சுளையாக இருபதாயிரத்துச் சொச்சம் இருந்தது. டீக் காசுக்காகக்கூட கத்தியைத் தூக்கும் ரவுடிக் கும்பல் அலையும் ஏரியாவில், இத்தனைப் பணத்துடன் இவ்வளவு இருட்டில் நான் செல்வது இதுதான் முதல் தடவை! மனசுக்குள் சஷ்டி கவசம் ஜெபித்துக்கொண்டு, இதயம் திக்திக்கென்று அடித் துக்கொள்ள, வண்டியை ஓட்டிக்கொண்டு ஒரு வழியாக வீடு வந்து சேர்ந்து, பெருமூச்சுவிட்டேன்.

‘‘ஹைய்யா... அப்பா வந்தாச்சு! வீட்டுல கரன்ட் இல்லைனு பயந்துட்டிருந்தியே அம்மா! அப்பா வந்தாச்சு. இனிமே பயம் இல்லை!’’ என்றபடி ஓடி வந்தான் என் மகன்.

சி.முருகேஷ் பாபு

குபேர மூலை!

பு திதாகக் குடிவந்திருக்கும் பத்ம நாபனால் பொறுக்கமுடியவில்லை, அப்பகுதியில் உள்ளோர் அவரது வீட்டுக்கு அருகிலுள்ள முச்சந்தியில் குப்பைகளைக் கொட்டுவதாலும், உணவுக் கழிவுகளைக் கொட்டுவ தாலும் உண்டாகும் மூக்கைத் துளைக்கும் நாற்றமும், ரத்தத்தை உரியும் கொசுக்களும் பெரிய சங்கடமாக இருந்தன. இதற்காக யாரையென்று போய்க் கடிந்து கொள்வது என்று அவருக்குத் தோன்றவில்லை. ராத்திரி பூரா மண்டையை உடைத்துக்கொண்டு யோசித்தார்.

என்ன ஆச்சர்யம்..! மறு நாளி லிருந்து அங்கே குப்பை எதுவும் கொட்டப்படவில்லை. காரணம், ராவோடு ராவாக அங்கே இப்படி ஒரு பலகை எழுதி வைத்திருந்தார் பத்மநாபன்.

‘‘வாஸ்துப்படி இங்கே குபேர மூலை உள்ளதால், இங்கே குப்பை கொட்டுவோரின் வீட்டில் லட்சுமி கடாட்சம் உண்டாகாது!”

- பி.ஹரிகிருஷ்ணன்

கல்யாணத்தில் இஷ்டம் இல்லை!

‘‘ஏ ண்டி மாலு, கல்யாணத்தை எங்கே வெச்சுக்கலாம்... சேஷாத்ரி மஹாலா, சங்கர மஹாலா?’’ - வெற்றிலையைக் குதப்பியபடி கேட்டார் சீனிவாசன்.

‘‘சேஷாத்ரி மஹால்தான் சரிவரும்... எல்லா சொந்த பந்தங்களையும் கூப்பிட ணுமே! இடப் பற்றாக்குறை வந்துடக் கூடாது!’’

‘‘நீ சொல்றது சரிதான்! ஒரு ஐந்நூறு பத்திரிகையாவது அடிச்சுத் தடபுடல் பண்ணி டணும். அது சரி, காயத்ரி எங்கே?’’

‘‘அதையேன் கேக்கறீங்க... கட்டில்ல படுத்து, அழுதிட்டிருக்கா!’’

‘‘ஏன்... இந்தக் கல்யாணத்துல அவளுக்கு இஷ்டம் இல்லையாமா?’’

‘‘வீட்டுல நான் ஒருத்தி முதிர்கன்னியா உட்கார்ந்திட்டிருக்கும்போது உங்க 60-ம் கல்யாணம் இப்போ ரொம்ப அவசியமானு கேக்கறா!’’

சீனிவாசனின் உற்சாகம் பொசுக்கென்று காணாமல் போனது!

- எம்.பி.தினேஷ்

அட்வைஸ்!

‘‘எ ங்க செக்ஷன் சீஃப் பொற்கொடி மேடம் இருக்காங்களே, அவங்க காரணமே இல்லாம கன்னா பின்னானு திட்டுறாங்க மேடம்! ஜி.எம். கிட்ட கம்ப்ளெயிண்ட் பண்ண லாமா, வேலையை விடலாமானு தோணுது. நீங்க என் அக்கா மாதிரி. எனக்கு நல்ல அட்வைஸ் சொல்லுங்க மேடம்!’’ என்று அம்சாவின் முன் வந்து நின்றான் பாபு.

பொற்கொடி எப்போதும் சிடுசிடுதான்! கடந்த வாரம், ஒரு அற்ப விஷயத்துக்காக தன்னிடம்கூட அவள் சண்டை போட்டது நினைவுக்கு வந்தது அம்சாவுக்கு.

‘‘பாபு, வேலையை விடறது புத்திசாலித் தனம் இல்லே! அதே சமயம், நீ இப்ப புகார் கொடுத்தால், அவங்க உன் மேல விரோதம் பாராட்டுவாங்க. உன் வளர்ச்சியைத் தடுக்கவும் அவங்களால முடியும். அதனால, நீ எது பத்தியும் கவலைப்படாம, உன் வேலையைப் பார். கோபத்தை அடக்கு. நமக்கு நம்ம முன்னேற்றம்தான் இலக்கு!’’ என்றாள் அம்சா.

’’சரிங்க மேடம்!’’ என்று ஒரு தெளிவு கிடைத்த உற்சாகத்தோடு பாபு கிளம்பிச் சென்ற பின், தனக்குமே தெளிவு கிடைத்த உணர்வில், பொற்கொடியைப் பற்றி எழுதி வைத்திருந்த புகார் கடிதத்தைக் கிழித்துப் போட்டாள் அம்சா!

- ஜே.வி.நாதன்