யாழ்ப்பாணத்தில் சட்டவிரோதமாக கேபிள் ரீவி இணைப்பை வழங்குகின்றது என்று கூறப்படும் நிறுவனத்துக்கு எதிராக தொலைத் தொடர்பு ஒழுங்குபடுத்தல் ஆணைக்குழுவால் முன்னெடுக்கப்பட்டும் நடவடிக்கைக்கு யாழ்ப்பாணம் நீதிவான் மன்றில் இன்று (25) கடும் ஆட்சேபனை தெரிவிக்கப்பட்டது.

நிறுவனத்தின் மீது தொழில் போட்டி காரணமாக நடவடிக்கை எடுப்பது சட்ட ஆட்சியை கேள்விக்கு உள்ளாக்கும் செயலாகும் என்று அந்த நிறுவனத்தின் சார்பில் மன்றில் முன்னிலான சட்டத்தரணி சமர்ப்பணம் செய்தார்.

ஆணைக்குழுவின் குற்றச்சாட்டையும் கேபிள் வழங்கும் நிறுவனத்தின் ஆட்சேபனையும் ஆராய்ந்து வரும் 5ஆம் திகதி கட்டளை வழங்கப்படும் என யாழ்ப்பாணம் நீதிவான் நீதிமன்றம் இன்று அறிவித்தது.

யாழ்ப்பாணம் நீதிமன்ற நியாயாதிக்க எல்லையில் சட்டவிரோதமாக கேபிள் ரீவி இணைப்புகளை வழங்கிவருவோர் மீது நடவடிக்கை எடுக்க தொலைத்தொடர்பு ஒழுங்குபடுத்தல் ஆணைக்குழுவால் நீதிவான் நீதிமன்றில் நேற்றுமுன்தினம் அனுமதி பெறப்பட்டது.

இதனை அடுத்து யாழ். நகரில் இயங்கும் கேபிள் வழங்கும் நிறுவனம் தொடர்பில் தேடுதலில் ஈடுபட்ட தொலைத்தொடர்பு ஒழுங்குபடுத்தல் ஆணைக்குழு கேபிள் வயர்களை மட்டும் மீட்டது.

அந்த வயர்களுடன் தமது சோதனை நடவடிக்கை தொடர்பான அறிக்கையை முன்வைக்க தொலைத் தொடர்பு ஆணைக்குழு அதிகாரிகள் யாழ்ப்பாணம் நீதிவான் நீதிமன்றில் இன்று முன்னிலையாகினர்.

குற்றச்சாட்டுக்கு இலக்கான நிறுவனமும் நீதிமன்றில் இன்று முன்னிலையாகியது

கேபிள் ரீவி இணைப்பை வழங்குவதற்கான அனுமதிப் பத்திரம் என செய்மதி ஊடான (செட்ட பொக்ஸ்) அலைவரிசை சேவையை வழங்கும் ஆவணங்கள் உள்ளிட்டவையை அந்தப நிறுவனத்தின் சார்பில் முன்னிலையான சட்டத்தரணிகள் மன்றில் முன்வைத்தனர்.

எமது கட்சிக்காரருக்கு கேபிள் ரீவி சேவை உரிமம் கிடைத்துவிடும் என்ற தொழில் போட்டி காரணமாக போட்டியாளர்கள் தொலைத் தொடர்பு ஒழுங்குபடுத்தல் ஆணைக்குழு ஊடாக இந்த நடவடிக்கை முன்னெடுக்கின்றனர். இவ்வாறு நீதிமன்றின் ஊடாக நடவடிக்கை எடுக்கப்படும் போது, எமது கட்சிக் காரருக்கு வழங்கப்படவுள்ள உரிமத்துக்கு பாதிப்பு ஏற்படும் என்று அந்த நிறுவனத்தின் சட்டத்தரணிகள் சமர்ப்பணம் செய்தனர்.

எமது சட்ட ஆலோசகர் சார்பில் மன்றில் அறிக்கை முன்வைக்க கால அவகாசம் வழங்கப்படவேண்டும் தொலைத் தொடர்பு ஒழுங்குபடுத்தல் ஆணைக்குழுவின் அதிகாரிகள் மன்றில் கோரினர்.

குற்றச்சாட்டப்படும் தரப்பு சமர்ப்பணம் மற்றும் முறைப்பாட்டாளரின் விண்ணப்பம் என்பவை தொடர்பில் ஆராய்ந்த மன்று, வழக்கு மீதான கட்டளை வரும் 5ஆம் திகதி வழங்கப்படும் என அறிவித்து வழக்கை ஒத்திவைத்தது.

தொழில் போட்டிக்காக நீதிமன்றின் நியாயாதிக்கத்தை பயன்படுத்துவது சட்டத்துக்கு முரணானது. எனவே வழக்கை தள்ளுபடி செய்யவேண்டும் என மன்றில் சமர்ப்பணம் செய்துள்ளோம் என்று அந்த நிறுவனத்தின் சார்பில் முன்னிலையான சட்டத்தரணி கருத்துத் தெரிவித்தார்.