வெளிநாடுகளின் சதி---ஜேவீபி

நாட்டை பிரிக்க சர்வதேச மட்டத்தில் சதி அரசு கவனம் கொள்ளாமை ஆச்சரியம்

வீரகேசரி நாளேடு

எமது நாட்டை பிரிப்பதற்கும் நாட்டின் எண்ணெய் வளத்தை சூறையாடுவதற்கும் சர்வதேச மட்டத்தில் பாரிய சதித்திட்டம் மேற்கொள்ளப்பட்டுவருகின்றது. ஆனால் சர்வதேசத்தின் இந்த சதித்திட்டம் குறித்து அரசாங்கம் கவனத்தில்கொள்ளாமல் இருப்பது ஆச்சரியமளிக்கின்றது. இலங்கையில்

சர்வதேச கண்காணிப்புகுழுவொன்று செயற்படுவதற்கு ஒருபோதும் அனுமதி அளிக்கமாட்டோம் என்று ஜே.வி.பி. யின் குருணாகல் மாவட்ட பாராளுமன்ற உறுப்பினர் அநுர குமார திஸாநாயக்க தெரிவித்தார்.

அரசாங்கம் தற்போதைய நிலையில் மஹிந்த சிந்தனை கொள்கைத் திட்டத்தை மீறி செயற்படுகின்றது. அந்த வகையிலேயே ஐக்கிய தேசிய கட்சியின் எம். பி. மார்களை அரசாங்கம் இணைத்துக்கொண்டது. எதிர்வரும் மே மாதம் முதலாம் திகதி ஸ்ரீலங்கா சுதந்திரக் கட்சி முன்வைக்கும் அரசியல் தீர்வு மஹிந்த சிந்தனையை மீறுமானால் ஜே.வி.பி. பாரிய எதிர்ப்பு நடவடிக்கைகளை மேற்கொள்ளும் என்று அவர் கூறினார்.

நாட்டின் தற்போதைய அரசியல் நிலைமைகள் குறித்து கேட்டபோதே அவர் மேற்கண்டவாறு அவர் கூறினார்.

இவ்விடயம் தொடர்பாக அவர் மேலும் கூறியதாவது:

இலங்கையில் மனித உரிமைகள்

மீறப்படுவதாக காரணம் காட்டி சர்வதேச கண்காணிப்புக்குழுவொன்றை இலங்கைக்கு வரவழைக்க முயற்சிக்கப்படுவதாக தெரிகின்றது. ஆனால் ஜே.வி.பி. அதற்கு ஒருபோதும் இடமளிக்காது. எந்தவொரு சர்வதேச கண்காணிப்புக்குழுவும் எமது நாட்டுக்கு தேவையில்லை. ஏற்கனவே பெயரளவில் நாட்டில் செயற்பட்டுக்கொண்டிருக்கும் போர்நிறுத்தக் கண்காணிப்புக்குழுவையும் நாட்டிலிருந்து வெளியேற்றவேண்டும் என்ற நிலைப்பாட்டில் எமது கட்சி இருக்கின்றது. இலங்கையில் மனித உரிமை மீறல்கள் தொடர்பாக ஆராய சர்வதேச கண்காணிப்புகுழு அமைக்கப்படவேண்டும் என்று அமெரிக்கா கூறவேண்டிய அவசியமில்லை. முதலில் ஈராக்கில் என்ன நடக்கின்றது என்று அமெரிக்கா புரிந்துகொள்ளவேண்டும். அமெரிக்கா தனது வேலையை மட்டும் பார்த்துக்கொள்ளவேண்டும்.

இதேவேளை இந்த நாட்டை இரண்டாகப்பிரிப்பதற்கு சர்வதேச மட்டத்தில் பாரிய சதி முயற்சி மேற்கொள்ளப்படுகின்றது. நாட்டை பிரிப்பதன் மூலம் தமது நோக்கங்களை நிறைவேற்றிக்கொள்ள சர்வதேசம் முயற்சிக்கின்றது. தற்போது உலகில் எரிபொருட்களுக்கான போட்டி ஏற்பட்டுள்ளது. இதன்காரணமாகவே உலகில் யுத்தங்களும் இடம்பெறுகின்றன. ஈராக் யுத்தம் இதற்கு சிறந்த உதாரணமாகும். தற்போது இலங்கையில் எண்ணெய் வளம் இருப்பதாக கண்டுபிடிக்கப்பட்டுள்ளது.