உலகக்கிண்ண தொடரில் எங்களை வீழ்த்தவே முடியாது: பங்களாதேஷிற்கு உணர்த்தியது நியூஸிலாந்து!

உலகக்கிண்ண கிரிக்கெட் தொடரில், பங்களாதேஷ் அணியால், தம்மை வீழ்த்தவே முடியாது என்பதை மீண்டுமொரு முறை நிரூபித்துள்ளது நியூஸிலாந்து அணி.

உலகக்கிண்ண தொடரில் நியூஸிலாந்தை வீழ்த்தி, வரலாற்று பதிவை மாற்றியமைப்போம் என்ற நம்பிக்கையுடன் நேற்று, கெனிங்டன் ஓவல் மைதானத்தில் நியூஸிலாந்து அணியை பங்களாதேஷ் அணி எதிர்கொண்டது.

எதிர்பார்ப்புக்கு மத்தியில் ஆரம்பமான இப்போட்டியில், நாணய சுழற்சியில் வெற்றிபெற்ற நியூஸிலாந்து அணி, ஆடுகளத்திற்கு சாதகமான, இரண்டாவது துடுப்பாட்டதை தெரிவுசெய்தது.

இதற்கமைய முதலில் களமிறங்கிய பங்களாதேஷ் அணி, ஆரம்பமே சற்று தடுமாற்றத்தை எதிர்கொண்டிருந்தாலும் அதனை திறம்பட சமாளித்து முதல் விக்கெட்டுக்காக 40 ஓட்டங்களை, பெற்றுக்கொண்டது.

8.3ஆவது ஓவரில் சௌமியா சர்கார், 25 ஓட்டங்களுடன் ஆட்டமிழந்து வெளியேற, மற்றொரு துடுப்பாட்ட வீரரான டமீம் இக்பால் 13.2ஆவது ஓவரில் 24 ஓட்டங்களுடன் ஆட்டமிழந்தார்.

இதனையடுத்து களமிறங்கிய சகலதுறை வீரர் சகிப் ஹல் ஹசன், முஸ்பிகுர் ரஷீமுடன் இணைந்து அணிக்காக 50 ஓட்டங்களை இணைப்பாட்டமாக பெற்றுக்கொடுத்தார்.

இந்தநிலையில் முஸ்பிகுர் ரஷீம், 19 ஓட்டங்கள் பெற்றிருந்த வேளை, துரதிஷ்டவசமாக ஆட்டமிழந்து வெளியேற, மறுமுனையில் அணியின் ஓட்ட எண்ணிக்கையை அதிகரித்துவந்த சகிப் ஹல் ஹசன், 30.2ஆவது ஓவரில் 64 ஓட்டங்கள் பெற்றிருந்த வேளை ஆட்டமிழந்து வெளியேறினார்.

இதனை அடுத்து களமிறங்கிய வீரர்கள், அணிக்கு பெரிதளவான பங்களிப்பை வழங்காவிட்டாலும், 30இற்கும் குறைவான ஓட்டங்களை அணிக்காக பெற்றுக்கொடுத்தனர்.

இதற்கமைய, மொஹமட் மிதுன் 26 ஓட்டங்களையும், மொஹமதுல்லா 20 ஓட்டங்களையும், மொசெடக் ஹூசைன் 11 ஓட்டங்களையும், மொஹமட் சய்ப்பூதின் 29 ஓட்டங்களையும், மெயிடி ஹசன் 7 ஓட்டங்களையும், மோர்டாசா 1 ஓட்டத்தினையும் அணிக்காக பெற்றுக்கொடுத்தனர்.

இதன்படி, பங்களாதேஷ் அணி, 49.2 ஓவர்கள் நிறைவில் அனைத்து விக்கெட்டுகளையும் இழந்து 244 ஓட்டங்களை பெற்றுக்கொண்டது.

இதன்போது, நியூஸிலாந்து அணியின் பந்துவீச்சு சார்பில், மெட் ஹென்ரி 4 விக்கெட்டுகளையும், ட்ரென்ட் போல்ட் 2 விக்கெட்டுளையும், லொக்கி பெர்குசன், கொலின் டி கிராண்ட்ஹோம் மற்றும் மிட்செல் சான்ட்சனர் ஆகியோர் தலா 1 விக்கெட்டினையும் வீழ்த்தினர்.

இதனைதொடர்ந்து, 245 என்ற வெற்றி இலக்கை நோக்கி பதிலுக்கு களமிறங்கிய நியூஸிலாந்து அணி, அணியின் ஆரம்ப விக்கெட்டுகளை, முறையே 35 மற்றும் 55 ஓட்டங்கள் பெற்றிருந்த போது இழந்தது.

இதன்போது, பங்களாதேஷ் அணியின் ஆரம்ப துடுப்பாட்ட வீரர்கள் போலவே, மார்டின் கப்டில் 25 ஓட்டங்களுடனும், கொலின் முன்ரோ 24 ஓட்டங்களுடனும், ஆட்டமிழந்து வெளியேறினார்.

இதனை அடுத்து ஜோடி சேர்ந்த கேன் வில்லியம்சனும், ரோஸ் டெய்லரும் களத்தில் நங்கூரமிட்டனர். இருவரும் இணைந்து அணிக்காக 105 ஓட்டங்களை இணைப்பாட்டமாக பகிர்ந்துக் கொண்டனர். இதில், 31.1ஆவது ஓவரில் அணி 160 ஓட்டங்களை பெற்றிருந்த போது, இந்த இணைப்பட்டம் பிரிந்தது. இதன்போது கேன் வில்லியம்சன் 40 ஓட்டங்களுடன் ஆட்டமிழந்தார்.

இதன்பிறகு களமிறங்கிய டொம் லதம் ஓட்டமெதுவும் பெறாத நிலையில் ஏமாற்ற, அடுத்து களமிறங்கிய ஜேம்ஸ் நீஸம் 25 என்ற கௌரவமான ஓட்டத்தினை அணிக்காக பெற்றுக்கொடுத்தார்.

இதனைதொடர்ந்து, அணியின் ஓட்ட எண்ணிக்கை அதிகரித்து வந்த ரோஸ் டெய்லர், 82 ஓட்டங்களுக்கு ஆட்டமிழக்க, அடுத்து களமிறங்கிய கிராண்ட்ஹோம் 15 ஓட்டங்களுடன் ஓய்வறை திரும்பினார்.

இதனையடுத்து, மிட்செல் சான்ட்னர் களத்தில் நிற்க, மெட் ஹென்ரி 6 ஓட்டங்களுடன் ஆட்டமிழந்தார்.
இதன்பிறகு, மிட்செல் சான்டனருடன், ஜோடி சேர்ந்த லொக்கி பெர்குசன் 47.1ஆவது ஓவரில் அணியை வெற்றிபெற செய்தனர். இதற்கமைய நியூஸிலாந்து அணி இறுதியில் 2 விக்கெட்டுகளால் வெற்றிபெற்றது.

இதன்போது, மிட்செல் சான்ட்னர் ஆட்டமிழக்காது 17 ஓட்டங்களையும், லொக்கி பெர்குசன் 4 ஓட்டங்களையும் பெற்றுக்கொண்டனர்.

பங்களாதேஷ் அணியின் பந்து வீச்சு சார்பில், மெயிடி ஹசன், சகிப் ஹல் ஹசன், மொஹமட் சய்ப்பூதின் மற்றும் மொசெடக் ஹூசைன் ஆகியோர் தலா 2 விக்கெட்டுகளை வீழ்த்தினார்.

இப்போட்டியின் ஆட்டநாயகனாக நியூஸிலாந்து அணி சார்பில், அதிகபட்ச ஓட்டங்களாக 91 பந்துகளில் 9 பவுண்ரிகள் அடங்களாக 82 ஓட்டங்களை பெற்றுக்கொண்டு அணியின் வெற்றிக்கு துணைநின்ற ரோஸ் டெய்லர் தெரிவுசெய்யப்பட்டார்.

உலகக்கிண்ண வரலாற்றில் இதுவரை, அதாவது இப்போட்டியுடன் சேர்த்து பங்களாதேஷ் அணி, ஐந்து முறை நியூஸிலாந்து அணியை எதிர்கொண்டுள்ளது. இந்த ஐந்து போட்டிகளிலுமே நியூஸிலாந்து அணி வெற்றிபெற்றுள்ளது என்பது குறிப்பிடத்தக்கது.