நூறு கதை நூறு படம்

[கிருபன்]

நூறு கதை நூறு சினிமா: 73 – பதினாறு வயதினிலே (15.09.1977)

August 19, 2019 - ஆத்மார்த்தி · இலக்கியம் சினிமா தொடர்கள்

 

திரைப்பட இயக்குனராவதற்கு நீங்கள் தலைமையேற்று பிறரை வழி நடத்த வேண்டும்.உங்கள விருப்பத்தினை உளவெறியுடன் முயல வேண்டும் பெரும்பாலான மக்கள் எப்போதும் எளிய வழிகளையே விரும்புகிறார்கள் நீங்கள் மிகுந்த பிரயத்தனத்தை செலவழித்தே வித்யாசமான மற்றும் அபூர்வமானவற்றை அடைய வேண்டியிருக்கிறது

-டேனி போயல்

நாடறிந்த மயிலின் காவியக் கதைதான் பதினாறு வயதினிலே ஸ்ரீதர், பாலச்சந்தர் இருவருக்கும் அப்பால் விளைந்த இயக்கப் பேருரு பாரதிராஜா திரைப்படம் எனும் கலையின் வாயிலாக மண்ணையும் மக்களையும் பிரதிபலித்ததோடு அல்லாமல் மண்ணை நோக்கிப் படமாக்கலைத் திருப்பிய இயக்குனர். அதுவரைக்கும் ஏற்படுத்தப்பட்டு புனைந்துருவாக்கப்பட்ட கிராமம் எனும் நிலத்தை ஸெட் ப்ராபர்டிகளின் போலிப் பதாகைகளை அகற்றி எறிந்து விட்டு நிசமான கிராமத்துக்குக் கேமிராவைக் கொண்டு சென்றவர் பாரதிராஜா.

அவரது மனிதர்கள் எளிமையின் சாட்சியத்தை பறைசாற்றினார்கள் எல்லாருக்கும் எல்லா இடங்களிலும் காண வாய்த்தார்கள் நிகழ்ந்த கதைகளைக் கலந்து பிசைந்து தன் திரைக்கதையை உருவாக்கினார் பாரதி ராஜா. தமிழ் சினிமாவில் அதிகக் கிளைத்தலைத் தன்னகத்தே கொண்ட மாபெரிய இயக்குனர் அவர். அதிகம் அடுத்தவர்களின் கதை திரைக்கதை வசனம் ஆகியவற்றைப் பயன்படுத்திய இயக்குனர் அவர். இயக்கம் என்பது தனது திரைமொழி என்பதை உரக்கச் சொன்ன படைப்பாளி அவர். பல்வேறு வகைப்பாடுகளிலான படங்களை உருவாக்கிய பாரதிராஜா பெருவெற்றியையும் உலர்தோல்விகளையும் ஒன்றெனப் பாவித்து அடுத்தடுத்த படங்களுக்குள் நகர்ந்தவர். தன் படைப்பின் பெருமையைப் பாத்திரமாக்கலின் கனத்தை முந்தைய வெற்றிகளின் இனிப்பைத் தனக்குள் ஏற்றிக்கொள்ளாமல் அவர் உருவாக்கிய பல படங்கள் இந்தியத் திரைவரிசையில் முக்கிய இடம் பிடிக்கின்றன. பாரதிராஜா இந்தியாவின் மாபெரும் திரைமனிதர்களின் ஒருவர். தமிழின் முதன்மைக் கலைமுகம்.

பாரதிராஜாவின் படங்கள் தைரியமான முடிவுகளைக் கொண்டிருந்தன. தீர்க்கமான வெட்டுக்களையே தன் படமுடிவுகளாக அவர் முன்வைத்தார் மெல்லிய சலனங்களையும் ஊடாட்டங்களையும் மனித மனதில் எளிதாக உருவாக வாய்ப்புள்ள மனக்குழப்பங்களையும் கதாமுடிவுகளாக அவர் ஒருபோதும் முன்வைக்கவில்லை. மாறாக மரணம் பிரிவாற்றாமை களப்பலி களவுமணமேகி ஊர்தாண்டுதல் சிறைவாசம் என்று மிகவும் ஆணித்தரமான தீர்மானங்களைத் தன் படமுடிவுகளாக முன்வைத்தார். அவருடைய திரைப்படங்களில் மனிதர்கள் வாழ்ந்தார்கள், மடிந்தார்கள் கலைந்தும் தனித்தும் தெரிந்தார்கள். நிசம் என்பதன் புகைப்பட ஆல்பங்களைப் போலத் தன் படங்களாய் உண்டாக்கினார் பாரதிராஜா.

பாரதிராஜாவின் திரைப்பரம்பரை பெரியது. மாபெரிய கூட்டுக்குடித்தனத்தின் கர்த்தாவைப் போல அவரை வழிபடுகிறவர்கள் சினிமாவெங்கும் நிரம்பி இருக்கின்றனர். கிழக்கே போகும் ரயில், நிழல்கள், சிகப்புரோஜாக்கள், ஒரு கைதியின் டைரி, அலைகள் ஓய்வதில்லை, முதல்மரியாதை, கடல்பூக்கள், கிழக்குச்சீமையிலே, கடலோரக்கவிதைகள் போன்ற பல படங்கள் காலம் கடந்து ரசிக்கப்படுபவை.

பதினாறு வயதினிலே பாரதிராஜாவின் முதல் படம். முதல் படத்தின் மூலமாய்க் கவனம் ஈர்த்தவர்களில் பாரதிராஜாவுக்குத் தான் முதலிடம். தன் படத்திற்கு முன்பின்னாய் அவர் தமிழ் சினிமாவின் போக்கையே இரண்டாய்ப் பகுத்தார். இளையராஜாவுடைய இசை பாரதிராஜாவுக்கு விடாமழையாக உதவிற்று. பாடல்களைக் கொண்டே தன் பாதித் தோரணத்தை மெய்ப்பித்து விடுகிற மாயவாதியாகவே பாரதிராஜா திகழ்ந்தார். வைரமுத்துவை திரைக்கு எழுதச் செய்தவர் பாரதிராஜா.

பொம்மலாட்டம் என்ற படம் இருபத்தி ஓராம் நூற்றாண்டில் வெளியான பாரதிராஜா படம் புதியவர்களுக்கு சவால் விடும் அளவுக்கு இருந்தது அவரது திரைவசீகரத்தை எடுத்துக்காட்டியது.

நாடறிந்த மயிலின் கதை 16 வயதினிலே

குருவம்மாளின் மகள் மயில். வயது பதினாறு. குருவம்மாளின் பராமரிப்பை எப்போதும் அண்டிப்பிழைக்கும் ஆதரவற்ற சப்பாணி ஒரு வெள்ளந்தி. அவனது சின்னஞ்சிறிய உலகத்தின் மகாதேவி மயில்தான். அவள் மீது காதல் என்று வகைப்படுத்தி அறியமுடியாத பேரன்பை கொண்டவனாக வாழ்பவன் கோபால். நிறைய படிக்க வேண்டும் என்பதும் ஆசிரியைக்கான பயிற்சியை வெற்றிகரமாகத் தேறி வேலையை அடைந்து ஒரு பண்பட்ட படித்த நளினமான மனிதனுக்கு மனைவியாக வேண்டும் என்பதுதான் மயில் தன் மனதில் கொண்டிருக்கும் கனவு.

பரட்டை அதே ஊரைச் சேர்ந்த போக்கிரி. தன் போக்கில் வாழ்பவன் எல்லோரையும் வம்பிழுப்பவன் பொறுக்கி என்று பெயர் பெற்றவன். அவனுக்கு மயில் மீது ஒரு கண் அந்த ஊருக்கு வரும் பிராணிகள் நல மருத்துவர் சத்யஜித் மயில் மீது ஆர்வம் காட்டுகிறார். மயில் அவரது நாட்டத்தைக் காதலென்று நம்புகிறாள். அவளுக்கு டாக்டரை மிகவும் பிடிக்கிறது. அவரோடு சென்னை செல்ல வாய்க்கிறது. மயிலுக்கு திருமணத்துக்கு முன் தன்னை தொட அனுமதிக்காத மயில் மீது அதிருப்தி கொள்ளும் சத்யஜித் அதிலிருந்து மெல்ல அவளிடம் இருந்து விலகி விடுகிறார். தன் சொந்த ஊருக்குச் சென்று வேறொரு பெண்ணைத் திருமணம் செய்ய ஏற்பாடுகளை முன்னெடுக்கிறார் சத்யஜித். தன் காதலை கைவிட வேண்டாம் என்று மயில் அவரிடம் கெஞ்சுகிறாள் மயில். உன்னை எப்போதும் நான் காதலித்ததே இல்லை உன் உடல் மீதுதான் எனக்கு நாட்டம் என்று அவளை புறக்கணித்துவிட்டு செல்லுகிறார் டாக்டர்.

எதுவும் செய்ய முயலாத ஏழை தாயான குருவம்மா மயிலுக்குத் திருமண ஏற்பாடுகளைச் செய்ய ஆரம்பிக்கிறார். மயிலால் அவமானப்படுத்தப்பட்ட பரட்டை மயிலைப் பற்றிப் பல கட்டுக்கதைகளைக் கிளப்பி விடுகிறான். திருமண ஏற்பாடுகள் நிற்கின்றன. தங்கள் குடும்பம் மீது சுமத்தப்படும் அவமானத்தை தாங்க இயலாமல் குருவம்மா மரணிக்கிறாள்.

கோபால் மயில் மீது கரிசனம் காட்டுகிறான். அவளைத் துக்கத்திலிருந்து மாற்றி எப்படியாவது பழைய மலர்ச்சிக்கு கொண்டுவர முயலுகிறான். மெல்லமெல்ல கோபாலை ஒரு மனிதனாக உருவாக்க முனைகிறாள் மயில். அவனுடைய பழக்கவழக்கங்களை உடல்மொழியை பேச்சை எனப் பலவற்றையும் மாற்றுகிறாள். யாராவது உன்னை சப்பாணி என்று கூப்பிட்டால் அடி, உன் பெயர் கோபாலகிருஷ்ணன் இனி அப்படித்தான் உன்னை யாராயிருந்தாலும் அழைக்க வேண்டும்என்கிறாள். பரட்டை சப்பாணி என்று அழைக்கும்போது அதேபோல சொல்லுகிறான் கோபால் ஆத்திரத்தில் பரட்டை கோபாலகிருஷ்ணனைத் தாக்குகிறான் மயில் அவனைக் காப்பாற்றி பரட்டையைக் காறி உமிழ்கிறாள்.

கோபாலைக் கல்யாணம் செய்துகொள்ள மயில் முடிவெடுக்கிறாள். திருமணத்துக்குத் தேவையான பொருட்களை வாங்கி வர கோபாலை அருகில் அமைந்த நகரத்துக்கு அனுப்புகிறாள். அந்தச் சந்தர்ப்பத்தைப் பயன்படுத்திக் கொண்டு மயில் வீட்டுக்குச் செல்லும் பரட்டை அவளை உடல்ரீதியாகத் துன்புறுத்தி வீழ்த்த முயலுகிறான். வீடு திரும்புகிற கோபால் விட்டுவிடும்படி பரட்டையைக் கெஞ்சுகிறான். அதனை பொருட்படுத்தாத பரட்டையை ஆத்திரம் தீரக் கல்லால் தாக்கிக் கொல்கிறான். கோபாலன் சிறையிலிருந்து வரும் நாளுக்காகக் காத்திருக்கிறாள் மயில்.

ஸ்ரீதேவி மறக்க முடியாத பூமுகமயிலாளாக தோன்றினார். ரஜினி மனக்குரலற்ற பரட்டையாக வந்தார். கமல் சப்பாணி என்று ஆரம்பத்தில் அழைக்கப்பட்டு அதை ஆட்சேபித்துத் தன்னை கோபாலகிருஷ்ணனாக நிலை நிறுத்திக்கொண்ட கதாபாத்திரத்தை வாழ்ந்து காட்டினார். குருவம்மாவாக காந்திமதியும் பரட்டையின் உடனாளியாக கவுண்டமணியும் டாக்டராக சத்யஜித்தும் கச்சிதமாய் தோன்றியபடம் 16 வயதினிலே. செந்தூரப் பூவே செந்தூரப்பூவே சில்லென்ற காற்றேதமிழரின் மனமன்றத் தென்றல்கானமாயிற்று. ஆட்டுக்குட்டி முட்டையிட்டு, செவ்வந்திப் பூமுடிச்ச சின்னக்கா, மஞ்சக்குளிச்சி அள்ளிமுடிச்சி பாடல்கள் எல்லாமே சூப்பர்ஹிட் வகையறாக்களாகின. பின்னணி இசையும் முன்பிலா உக்கிரத்தோடு நிகழ்ந்தது.

இந்தப் படம் முன்வைத்த பேரன்பும் புரிதலும் காதலுக்கான புதிய இலக்கணத்தை வகுத்தன. இன்றளவும் ஒரு கலாச்சாரச் செவ்வியல் பிம்பமாகக் கொண்டாடப் படுகிறது

பதினாறு வயதினிலே: பேரன்பின் பெருமொழி
 

https://uyirmmai.com/literature/நூறு-கதை-நூறு-சினிமா-73-பதின/

[கிருபன்]

நூறு கதை நூறு சினிமா: 74 – உலகம் சுற்றும் வாலிபன் (11.05.1973)

August 20, 2019 - ஆத்மார்த்தி · இலக்கியம் சினிமா தொடர்கள்

 

“எனக்குத் திரைப்படம் என்பது மக்களை விடவும் முக்கியமானதல்ல.”

-ஜான் கெஸாவெட்ஸ் அமெரிக்க நடிகர் திரைக்கதாசிரியர் மற்றும் இயக்குனர்

திரைப்பட நடிகர் அரசியல்வாதி என்ற இரு பதங்களையும் தனித்தனியே பிரித்துப் பார்க்க இயலாத மனிதர் எம்ஜி.ஆர். திரை நாயகனாக அவரது எழுச்சியின் காலமெங்கும் அவரது அரசியல் ஈடுபாடும் குன்றாமல் தொடர்ந்து வந்தது. தன் படங்களைத் தான் சார்ந்திருந்த கட்சி அதன் கொள்கை ஆகியவற்றை மக்கள் மனங்களில் கொண்டு சேர்க்கும் பணியை மிகுந்த ஆர்வத்தோடு அவர் செய்தார். திரை ஊடகத்தின் மக்கள் செல்வாக்கை ஆழ்ந்த கவனத்தோடு கையாண்டவர் எம்ஜி.ஆர். திராவிட முன்னேற்றக் கழகத்திலிருந்து வெளியேறி தனிக்கட்சி கண்டு ஆட்சியைப் பிடித்து அதன் பின்னரும் திரைப்படங்களில் நடிப்பதை விடுவதற்கு விருப்பமின்றித்தான் இருந்தார். வேறு வழியின்றி நடிப்பிலிருந்து விலக நேர்ந்த எம்ஜி.ஆர் 1972 முதல் 1977இல் ஆட்சியைப் பிடிக்கும் வரையிலான காலகட்டம் அவரது வாழ்வின் சவால் மிகுந்த காலம் என்று கூறத்தக்க அளவில் அமைந்தது.

எம்.ஜி.ஆர். திரைப்படங்களில் நடிக்கத் தொடங்கிய காலம் முதற்கொண்டு தானுண்டு தன் நடிப்புண்டு என இருந்தவரில்லை. தணியாத ஆர்வமும் கற்றுக்கொள்ளத் துடிக்கும் மனமும் அவருடைய பலங்கள்தான் விரும்பிக் கலந்த சினிமாவின் சகல துறைகளைப் பற்றியும் தொடர்ந்து தன் ஞானத்தை வளர்த்துக் கொண்டவர் எம்ஜி.ஆர் முதல் இடம் வகித்துப் பேரும் புகழும் கொட்டுகிற பணமும் சர்வகாலமும் பார்க்க வாய்த்த போதும் அவர் ஓய்வறியாமல் தன் ஈடுபாட்டை அணையாவிளக்கெனவே வளர்த்தார். எம்ஜி.ஆர் ஒரு முழுமையான திரை ஆளுமை. அவர் வெறும் நடிகர் அல்ல. திரைப்பட உருவாக்கத்தின் பல நுட்பங்களை ஆழ்ந்து கற்றுத் தேர்ந்தவர். தன் திரைவரிசையில் மொத்தம் 3 படங்களை அவர் இயக்கி இருக்கிறார். அவை மூன்றுமே பெரு வெற்றிப் படங்கள். அவற்றில் இரண்டு அரசகாலக் கதைகளைக் கையாண்டவை. உலகம் சுற்றும் வாலிபன் சமகாலப் பிரதிபலிப்பைக் கொண்டிருந்தது. பல நாடுகளில் படமாக்கப்பட்டது. முதல் அறிவிக்கையிலிருந்து வெளியீடு வரைக்கும் பற்பல இன்னல்களைச் சந்தித்த படமாக இருந்தது. எம்.ஜி.ஆரின் முந்தைய வசூல் சாதனைகள் அனைத்தையும் முறியடித்து வெற்றி பெற்றது.

விஞ்ஞானி முருகன், தன் ஆராய்ச்சி முடிவில் வெற்றி அடைந்தாலும் அது தீய நோக்கங்களுக்குப் பயன்படலாம் என்ற அச்சம் கொள்கிறார். அவர் பொய் சொல்வதாக எள்ளும் போட்டி விஞ்ஞானி பைரவன் என்ன செய்தாவது முருகனின் ஆராய்ச்சி முடிவை விலைக்கு வாங்க முயன்று தோற்கிறார். அவற்றை அழித்துவிட ஆவேசம் கொள்கிறார். தன் காதலி விமலாவோடு உலக நாடுகளுக்கு சுற்றுலா கிளம்பிச் செல்லும் முருகன் தன் ஆய்வுகள் ரகசிய இடத்தில் பத்திரமாக இருப்பதை சொல்ல அதைக் கேட்கும் பைரவன் அதைத்தான் அடைய சூழ்ச்சி செய்கிறார். முருகன் தன் நினைவை இழக்கிறார். ரகசியத்தை அறிய முருகன் நினைவு மீள்வதற்காக பைரவன் காத்திருக்கிறார். சி.ஐ.டி. அதிகாரி ராஜூ தன் அண்ணன் முருகனைத் தேடி சிங்கப்பூர் வருகிறார், சகோதர்கள் எப்படி சூழ்ச்சிகளை வெல்கிறார்கள் என்பதே உலகம் சுற்றிய வாலிபக் கதை.

அசோகன் அழகான தமிழைப் பேசி நடித்த வில்லன். வித்யாசமான குரலும் முகமொழியும் தனித்துவமான மானரிசங்களும் கொண்டவர். அசோகன் நடிப்பில் உலகம் சுற்றும் வாலிபன் மிளிர்ந்தது.

அப்படியா? ராஜூவா? முருகனுடைய தம்பியா? வந்திட்டானா?” என்பார் ஜானி வேட ஆர்.எஸ்.மனோகரிடம்

எஸ் மாஸ்டர் நானே அவனைப் பார்த்தேன்

“ஜானி அவனொரு போலீஸ் சீ.ஐடி தகுந்த பாதுகாப்போட தான் வந்திருப்பான்
அவன் இருக்கிற ஒவ்வொரு நிமிஷமும் நமக்கு ஆபத்து தான்.” என்றதும்

அவனை ஒரேயடியா க்ளோஸ் பண்ணட்டுமா மாஸ்டர்

பண்ணிட்டு வந்திருந்தா பரிசு குடுத்திருப்பேன் என்பார் ஜானியிடம் சீக்கிரமா அவன் பிணத்தோட வர்றேன் எனக் கிளம்பும் ஜானியைப் பார்த்து நான் பணத்தோட காத்திட்டிருக்கேன் எனச்சொல்லும் போது அசோகனின் கண்கள் மின்னும். இன்னொரு காட்சியில் மிஸ்டர் முருகன் நீங்க கண்டுபிடிச்ச ஆராய்ச்சிக் குறிப்பை எனக்குக் குடுத்திருங்க. உங்களைக் கோடீஸ்வரன் ஆக்குறேன் என்று அழாக்குறையாகக் கெஞ்சுவார் விஞ்ஞானி பைரவன். பெரிய புத்தர் சிலைதான் ஷூட்டிங் ஸ்பாட். அதை எப்படிக் கதைக்குள் கொண்டுவருவது என்று எம்.ஜி.ஆருக்கா தெரியாது..?

“விமலா ஏன் பேசாம நிக்கிறே அவங்கிட்ட ஏதாவது பேசு அவன் புத்தியை எப்பிடியாவது ஸ்வாதீனத்துக்கு கொண்ட்டு வா என்று கட்டளையிடுவார்.பைரவன் அடுத்த கணமே என்னாங்க இது யாருன்னு உங்களுக்குத் தெரியுதா எனக் கேட்பாள் விமலா. உடனே இது யாருன்னு சொன்னாத் தானே அவனுக்கு ஞாபகம் வருதா இல்லையான்னு பார்க்கலாம் என்று ஆல்ட்ரேசன் தீர்மானமாக பைரவனே பேசத்தொடங்குவார் “முருகன் இவருதான் புத்தர் உலகத்துக்கே வழிகாட்ட நம்ம நாட்டுல பிறந்தவர்” என்றதும் பெரிய புத்தர் சிலையை ஒருமுறை உற்று நோக்குவார் “முருகன். அன்பை மறக்காதே ஆசைக்கு அடிபணியாதே உயிரை வதைக்காதேன்னு தத்துவம் சொன்ன மகாமேதை” என்று தொடர்வார் பைரவன் உடனே நன்றாகப் பார்த்துக் கொண்டிருந்த முருகன் திடீரென்று தலையைப் பிடித்துக் கொண்டு அய்யோ அம்மா என்று அலறுவார்.கொஞ்சம் அமைதியா இருங்க என்று முருகனை ஆசுவாசப் படுத்தும் விமலா சட்டென பைரவன் பக்கம் திரும்பி “பார்த்தீங்களா இவரை ஏன் இப்படி சித்ரவதை பண்றீங்க” என்று அதட்டுவார்.

“ஒண்ணுமில்லை விமலா ஏதோ குணமாயிடணுமேன்ற ஆசையால அப்டி பேசிட்டேன் என்னைய மன்னிச்சிடு இனிமே இங்க இருக்க வேண்டாம் வா போலாம் வா போலாம்” என்று குழைவார்.பைரவன் படம் பார்க்கும் யாவருக்குமே பைரவன் பாவம் ஒரே ஒரு ஃபார்முலாவுக்காக என்னவெல்லாம் கஷ்டப்படுகிறார் பாவம் என்று தோன்றுமளவுக்கு அவரது குரலும் குழைந்து குழைந்து அவர் பேசும் ஸ்டைலும் பைரவன் விஞ்ஞானியா அல்லது டூரிஸ்ட் கைடா என்று குழப்பும் அளவுக்கு தமிழில் அபூர்வமான தமாஷ் வில்லனாகத் தோன்றினார் அசோகன். எம்ஜி.ஆர் டபுள் ஆக்சன் படத்தில் வில்லனாக நடிப்பதெல்லாம் “ஒளதொளதாய்” தான் என்பது நன்றாகத் தெரிந்து கொண்டாற் போலவே ஜானி வேடத்தில் ஆர்.எஸ்.மனோகரும் நடித்திருந்தார்.

இந்தப் படத்தில் நாகேஷூம் உண்டு. எதைப் பார்த்தாலும் திருடும் ஓட்டல் ஊழியராக வரும் நாகேஷ் ஒரே ஒரு வசனத்தில் தனித்து மிளிர்வார். முருகனுடைய வாட்ச்சை ராஜூவிடம் தந்ததும், மகிழ்ந்து போய் இந்தப் பணமெல்லாம் உனக்குத் தான் என்று கத்தை டாலர்களை நாகேஷ் மீது பொழிந்து செல்வார் ராஜூ அடுத்த கணமே நாகேஷின் வசனம் எல்லாப் பயலுக்கும் அண்ணன் காணாமப் போயிட்டா எனக்கு எவ்வளவு தேறும்..?” அது தான் நாகேஷ்.

எம்.எஸ்.விஸ்வநாதன் இசையில் பத்துப் பாடல்கள் இரண்டு அயல்தேசமொழிப் பாடல்கள் மூன்று தீம் ம்யூசிக் விள்ளல்கள் என இசைமயமான படமாகவும் உலகம் சுற்றும் வாலிபன் படத்துக்கு ஒரு முகவரி இருக்கிறது. என்றும் அலுக்காத பாடல்கள் படம் வெளிவரும் முன்பு ரசிகர்களின் ஆவலைப் பெருமளவில் அதிகரித்து வைக்க உதவிற்று. பன்ஸாயீ சிரித்து வாழவேண்டும் உலகம் அழகுக் கலைகளின் சுரங்கம் அவளொரு நவரச நாடகம் நிலவு ஒரு பெண்ணாகி லில்லி மலருக்குக் கொண்டாட்டம் தங்கத் தோணியிலே பச்சைக்கிளி எனப் பாடலின் முதற்சொல் முழுப்பாடலையும் அழைத்து வந்துவிடும் அளவுக்கு மெகா ம்யூசிகல் ஹிட் ஆகத் திகழ்ந்தது. கண்ணதாசன் வாலி வேதா புலமைப்பித்தன் ஆகியோர் பாடல்களை எழுதினர்.

எல்லா தலங்களின் அனேக அழகான இடங்களையெல்லாம் பற்பல லாங்ஷாட்களில் படத்தில் அடிக்கடி தோன்றச்செய்து கொண்டே இருந்தார் எம்ஜி.ஆர் படம் எத்தனை முறை பார்த்தாலும் தீராத அழகோடு இன்றும் மின்னுகிறதன் காரணமும் அது தான். சண்டைக் காட்சிகள் எடிடிங் எனத் தமிழின் அந்தக் காலகட்டப் படங்களை அடுத்த திசை நோக்கி நகர்த்திய படமென்றே இதனைச் சொல்லலாம்.

இன்றும் பேசப்படுகிற படங்களில் ஒன்றெனவே தொடர்ந்தோடும் நில்லா நதி உலகம் சுற்றும் வாலிபன்.

ஒரே ஒரு எம்ஜி.ஆர்.
 

 

https://uyirmmai.com/literature/நூறு-கதை-நூறு-சினிமா-74-உலகம/

 

 

[கிருபன்]

நூறு கதை நூறு சினிமா: 75 – வசந்த மாளிகை (29.09.1972)

August 21, 2019 - ஆத்மார்த்தி · இலக்கியம் சினிமா தொடர்கள்

இஃதொன்றும் எளியது அல்ல. மிகவும் கடினமானது. தினந்தோறும் நாமிதில் இயங்கப் போகிறோம். ஆனால் நான் அதை செய்யவிரும்புகிறேன் ஏனெனில் நான் உன்னோடு எல்லாவற்றிலும் எப்போதும் என் எல்லா தினங்களிலும் இருக்கவே விரும்புகிறேன்.

-நோவா இன் தி நோட்புக்

காதல் படங்களுக்கென்று நிரந்தர மார்க்கெட் ஏன் உண்டானது. சண்டை காட்சிகளைப் போலத்தான் காதலும். இயல்பு வாழ்க்கையில் எப்படி டஹால் டுஹால் என்று சப்தமெழுப்பி சண்டைபோட முடியாதோ அப்படியே காதலும் எத்தனையோ பேரின் எட்டாக்கனி. காதலிக்கிற பலருக்கும் கூட சினிமாவில் காட்டுகிற காதலின் குளிர்தினங்கள் வாய்ப்பதில்லை. இன்றைக்கு வேண்டுமானால் காதலதன் அடுத்த கட்டத்தை சினிமாக்களில் தோன்ற செய்ய சிலபலர் முயன்று கொண்டிருக்கலாம். என்றென்றைக்கும் அது ஏட்டுச்சுரைதான். கவைக்குதவியதில்லை. இது நிதர்ஸனம் என்றாலும் காதல் என்ற வார்த்தையே தடைசெய்யப்பட்ட ஒன்றெனக் கருதிய காலங்களில் காதலைத் தொடர்ந்து சினிமாக்கள் ஆதரித்தும் போற்றியும் வந்தன. ஒருவகையில் மக்கள் மனங்களைக் கூட்டுக்காற்று ஒன்றின் வருடலாய் ஆற்றுப்படுத்துவதற்கான ஜரிகைப் பொய் முயல்வெனவே இத்தகைய படங்களைக் கொள்ளவும் சொல்லவும் முடியும் இன்னொரு பக்கம் சினிமா காதலைத் தன் கை கோர்த்து நடை போட்டதைப் பார்த்துத் தாமும் காதலிக்க வேண்டுமென்று விரும்பி அதனுட் புகுந்தவர்களும் இல்லாமல் இல்லை.

காதலில் வென்ற கதைகளைவிட தோற்ற கதைகள் புனிதங்கொண்டன. நிரந்தரமாய் அவை ஈரம் காயாமல் மனமலர்களைத் தூவிக் கொண்டாடப்பட்டன.அந்த வகையில் எத்தனை வேடங்களைத் தாங்கி ஓங்கிப் பேரெடுத்தாலும் எம்.ஜி.ஆர், சிவாஜி போன்ற பெரும் செல்வாக்குப் பெற்றவர்களுக்கும் கூட முழுக்க முழுக்க காதலில் முகிழ்ந்த படங்களும் உருவாக்கப்பட்டன. எப்போதாவது வருகிற பண்டிகைகளைப்போல அவற்றைப் போற்றி மகிழ்ந்தார்கள் ரசிகர்கள். ராமாநாயுடு தயாரிப்பில் டி.எஸ்.ப்ரகாஷ்ராவ் இயக்கிய வசந்தமாளிகை ஒரு கலைப்பேழை. காதலைத் தாங்கிப் பூத்த சிப்பி. அன்பென்னும் தடாகத்தின் ஆரவாரம். நெடுநேரத் தூறல்.

அழகாபுரி ஜமீனின் இளைய வாரிசு ஆனந்த். சிறுவயது முதலே அன்னை பாசம் என்னவென்றே அறியாமல் வளர்ந்தவன். செல்வத்துக்கு விலையாகத் தன்னை வளர்த்த ஆயா உயிரை விட்டதைக்கூட ஆட்சேபிக்க முடியாமல் மனம் புழுங்கியவன். அண்ணன் விஜய் ஒரு சுயநலமி. ஒரு விமானப் பயணத்தில் லதாவை சந்திக்கும் ஆனந்த் இன்னொரு சந்தர்ப்பத்தில் அவள் மானத்தைக் காப்பாற்றுகிறான். அவளைத் தன் பர்ஸனல் உதவியாளினியாக நியமிக்கிறான். ஆனந்தின் எஸ்டேட்டுக்கு வரும் லதா அவனொரு குடிகாரன் நிதமும் ஒரு பெண் துணையை விலை கொடுத்து வாங்குபவன் என்பதெல்லாம் அறிந்து அங்கே இருந்து நீங்கிவிட முயல அவளைத் தடுத்து அங்கே பலவருடமாக வேலைபார்க்கும் பொன்னையா வேண்டிக் கேட்டுக் கொள்வதற்கிணங்கி அங்கேயே தொடர்கிறாள். அவளை ஆனந்தின் அம்மாவுக்கோ மற்றவர்களுக்கோ பிடிக்கவில்லை. ஆனாலும் ஆனந்துக்காக அங்கே இருக்கிறாள். அவனைக் குடிக்கவிடாமல் தடுக்க முனையும் லதாவை அடித்து விடுகிறான் ஆனந்த். காயத்தோடு நிற்பவளிடம் தன் பால்யத்தின் கதையைச் சொல்கிறான்.

தனக்கென்று யாருமே இல்லை என்று ஏங்குபவனை லதா ஆற்றுப்படுத்துகிறாள். ஆனந்த் குடிகாரன் என்று அவனுக்குத் தன் தங்கையை திருமணம் செய்துதர மறுக்கிறாள் அவனது அண்ணி. அதே அண்ணி ஆனந்த் குடியை நிறுத்தியபிறகு தங்கை கவுரியை அவனுக்கு திருமணம் செய்துவைக்குமாறு கேட்கும்போது ஆனந்த் அதை மறுக்கிறான். தன் வருங்கால மனைவிக்காகக் கட்டிக் கொண்டிருக்கும் வசந்த மாளிகையைப் பார்ப்பதற்காக லதாவை அழைத்துச் சென்று தன் மனம் கவர்ந்தவளின் படத்தைச் சென்று பார்க்க சொல்கிறான். அங்கே சுற்றிச் சுற்றி கண்ணாடிகள் இருக்கின்றன. திரும்பும் பக்கமெல்லாம் தன் உருவமே தெரிவது கண்டு ஆனந்தக் கண்ணீரோடு ஆனந்தை ஆரத் தழுவுகிறாள் லதா.

காதல் நெடுங்காலம் நீடிப்பதற்குள் சதி செய்து விஜய் இருவரையும் பிரித்து விடுகிறான். அதற்கு ஆனந்தின் அம்மாவும் உடன் நிற்கிறாள் திருட்டுப் பட்டம் கட்டி லதாவை அவமதிக்கிறார்கள். ஆனந்தின் அம்மாவை சந்தித்துத் தன் குமுறல்களைக் கொட்டிவிட்டு ஆனந்தைவிட்டு நீங்கிச் செல்கிறாள் லதா. அதன் பிறகு லதாவுக்கு வேறொருவரொடு திருமணம் நிச்சயமாகிறது. அவள் நினைவாகவே மீண்டும் குடியை நாடி மதுவின் மடியில் தஞ்சம் புகும் ஆனந்தும் லதாவும் கடைசியில் ஒன்று சேர்வதோடு பூர்த்தியாகிறது வசந்த மாளிகை.

தெலுங்கிலிருந்து மறுவுருக் கண்டு தமிழில் கட்டப்பட்டது வசந்த மாளிகை. தமிழ் சினிமாவில் காதல் படங்களுக்கான தேவை எப்போதைக்குமானது. இன்றும் ஒரு அழுத்தந்திருத்தமான காதல் கதை படமானால் அதை வரவேற்பதற்கு மக்கள் தயார் என்பதே சூழல்., காதலைத் திரைப்படத்துக்கான முதன்மை கச்சாப் பொருள் எனவே கருதமுடிகிறது. காலம் சினிமாவின் ஆடைகளை அவ்வப்போது மாற்றுகிறதே தவிர அதன் ஆன்மாவைத் தொடுவதே இல்லை. சினிமாவின் ஆன்மா காதலைத் தன் விரலின் புனித மோதிரமெனவே அணிந்து கொண்டிருக்கிறது. ஏழை பணக்கார வித்யாசத்தை அற்றுப் போகச் செய்து காதலைப் போற்றிய பல படங்களை நம்மால் வரிசைப் படுத்த முடியும். அவற்றில் பலவும் வணிக வெற்றி அடைந்தவையே. ஆனாலும் தேவதாஸ் முதலிய படங்கள் காதலில் சேரவியலாத இணையின் தோல்வியைப் புனிதம் செய்தபடி ஓங்கி ஒலித்தவை. வசந்தமாளிகையும் அப்படியான முடிவை முன் வைத்திருக்க வேண்டிய படம்தான். விளிம்பி வரைக்கும் சென்று திரும்பிய மலைவாகனம் போலத் தான் கருதவேண்டி இருக்கிறது வசந்தமாளிகை படத்தின் கதையினை.

பணக்காரத் தனிமை என்பது பலவிதமான கதா இடுபொருளாகப் பயன் பட்டிருக்கிறது. எம்.ஜி.ஆர். நடித்த அன்பே வா ஒரு உதாரணம். இங்கே வசந்தமாளிகை படம் காதலின் குழப்பங்களை மட்டுமன்றி அதன் புறவய எதிர்ப்புக்களைத் தாண்டி வெற்றியடைவதைப் பேசிய படம். சிவாஜி கணேசன் தன் சின்னச்சின்ன அசைவுகளிலும் செல்வந்தத்தைப் பிரதிபலித்துத் தந்தார். அவரை விஞ்சுமளவுக்கு வாணிஸ்ரீயின் உணர்வுப்பூர்வ நடிப்பு அமைந்தது. நாகேஷ், செந்தாமரை, பாலாஜி, ரங்காராவ், சுகுமாரி, ஸ்ரீகாந்த் எனப் பக்கபலங்கள் கச்சிதம் செப்பின.

கனிவிட்ட மாமரம் அணிலுக்கு மாத்திரம் காதலிலே என்ன சாத்திரம்
கடலென்ன ஆழமா கருவிழி ஆழமா இறங்குங்கள் மயங்கி நாம் நீந்தலாம்
ஆயிரம் கண்களில் அடிக்கடி நீந்துவேன் ஆழத்தை இங்குதானே காணலாம்

இந்தக் கொக்குக்குத் தேவை கூரிய மூக்கினில் சிக்கிடும் மீன் மட்டுமே
இதன் தேவைகள் வாழட்டுமே

கண்களின் தண்டனை காட்சி வழி காட்சியின் தண்டனை காதல் வழி
காதலின் தண்டனை கடவுள் வழி கடவுளை தண்டிக்க என்ன வழி

அன்னத்தைத் தொட்ட கைகளினால் மது

கிண்ணத்தை இனிநான் தொடமாட்டேன்

காதல் படம் என்றாலே பாடல் படம் என்றாக வேண்டியது நியதி. வசந்தமாளிகை பாடல்களின் படம் கிடைத்த இடத்திலெல்லாம் அடித்தாடினார் கண்ணதாசன். கேவி.மகாதேவனின் உச்சபட்ச இசை இப்படத்தின் பாடல்களெங்கும் தளும்பியது. ஒரு கிண்ணத்தை ஏந்துகின்றேன் ஏன் ஏன் ஏன் பாடல் இன்றும் இளமை துள்ளுகிற உல்லாசப் பாடலாக விரும்பப் படுகிறது. கலைமகள் கைப்பொருளே பாடல் பிரார்த்தனைவழி மனிதநேயம். குடிமகனே பெருங்குடி மகனே என்ற பாடல் உற்சாகத்தின் ஊற்று. மயக்கமென்ன பாடல் காதலின் கூட்டுப் பிரார்த்தனை யாருக்காக இது யாருக்காக பாடலோ காதலின் மேல் முறையீடு. இரண்டுமனம் வேண்டும் படத்தைத் தாண்டிய இசைவழி முகவரி. மொத்தத்தில் மகாதேவனும் கண்ணதாசனும் சவுந்தரராஜனும் சுசீலாவும் எல்.ஆர்.ஈஸ்வரியும் சேர்ந்து நடத்திய இசை யாகம் இந்தப் படம்.

வசந்தமாளிகை காதல் பாடல் கோயில்
 

 

https://uyirmmai.com/literature/நூறு-கதை-நூறு-சினிமா-75-வசந்/

 

[கிருபன்]

நூறு கதை நூறு சினிமா: 76 – ஆடுகளம் (14.01.2011)

August 22, 2019 - ஆத்மார்த்தி · இலக்கியம் சினிமா தொடர்கள்

 

தனுஷ், தாப்ஸி பன்னு, நரேன், கிஷோர், வ.ஐ.ச ஜெயபாலன், முருகதாஸ் நடித்த ஆடுகளம் படத்தின் வசனத்தை வெற்றிமாறனுடன் இணைந்து எழுதியவர் விக்ரம் சுகுமாரன் கதை, திரைக்கதை, எழுதி இயக்கியவர் வெற்றிமாறன். ஒளிப்பதிவு வேல்ராஜ் இசை ஜீவீ ப்ரகாஷ் குமார் பாடல்களை எழுதியவர்கள் சினேகன், ஏகாதசி, யுகபாரதி, வ.ஐ.ச ஜெயபாலன், யோகிபி.

கதை நடக்கும் களம் மதுரை. திருப்பரங்குன்றம் ஊர் தொடர்ந்து நடக்கும் சேவற்சண்டை. இரண்டு டீம்கள். ஒன்று பேட்டைக்காரன் தலைமையிலான அணி. அடுத்தது இன்ஸ்பெக்டர் ரத்தினசாமி அணி. ரத்தினசாமியின் சேவல் பல வருசங்களாக முயற்சி செய்தும் வெற்றி பெற்றதே இல்லை.என்ன செய்தாவது வெற்றிக்கனியை அடைந்தே தீருவது என்று வெறியே கொள்கிறார் பதவியதிகாரமான ரத்தினசாமி. அவருடைய எதிரியான பேட்டைக்காரரின் சிஷ்யப்பிள்ளை கேபி கருப்பு. அவன் சிறுவனாயிருக்கும் போதிலிருந்தே பேட்டைக்காரரின் கண்பார்த்து வளர்ந்தவன். துரை அந்த ஊரில் ஒரு முக்கியஸ்தன். அவனும் பேட்டைக்காரரின் வழித்தோன்றியன் தான். ‘எத்தனை வருசமானாலும் பேட்டைக்காரரின் சேவலை ஒருதடவையாவது அடிக்காமல் என் கட்டை வேகக்கூடாது டா எலே ரத்தினசாமி’ என்று குரல் தருவது அவருடைய மனச்சாட்சி அல்ல எண்பது வயதான அவரது தாயின் நிசக்குரல்தான் அது.

தகப்பனை இழந்த பிள்ளை என்றாலும் தாய் தன் உயிரையே அவன் மீது வைத்திருக்கிறாள். அவனோ பொறுப்பில்லாமல் சேவல் சண்டை என ஊரைச் சுற்றி வருகிறான். அவனது பார்வையில் படுகிறாள் ஐரின் என்ற பேரிலான ஆங்கிலோ இந்தியப் பெண். ஒரு பக்கம் புதிய மலராய்க் காதல் பூக்கிறது. அவளோ அவனை ஏறேடுத்தும் பார்க்கவில்லை. மெல்ல அவளுடன் மோதல் காதலாய்க் கனிகிறது.

பேட்டைக்காரரின் ஆணிவேர் போல இருக்கும் அயூபை விலைக்கு வாங்க முயலுகிறார் ரத்தினசாமி. அவரை ஏளனமாகப் பேசிவிட்டு மறுத்து திரும்பும் வழியில் அயூப் விபத்தில் மரணிக்கிறார். இதற்குக் காரணம் அந்த இன்ஸ்பெக்டர்தான் என வெறியாகும் தன் தரப்பாரை அடக்கி வைக்கும் பேட்டைக்காரர் அயூப் பெயரில் அவர் நினைவாக ஒரு மாபெரும் சேவற்சண்டை டோர்னமெண்டை அறிவிக்கிறார் ஒரு கட்டத்தில் ரத்தினசாமிக்கும் பேட்டைக்கும் நேரடி யுத்தமாகிறது. பேட்டைக்காரர் வேறொரு சேவலைத் தேர்வு செய்வதற்குள் கருப்பு தன் சேவலைக் களமிறக்குகிறான். அதற்கும் தனக்கும் எந்த சம்மந்தமும் இல்லை என்று மைக்கில் அறிவிக்கும் பேட்டைக்காரர் கருப்பு தோற்கப் போவதாக நம்புகிறார். மூன்று பந்தயங்களில் அடுத்தடுத்து ஜெயிக்கிறது கருப்பின் சேவல் சிறந்த பயிற்சியாளர் விருதை பெறுகிறான் கருப்பு. அவனுக்கு ஐரினிடம் பெற்ற கடனை திரும்ப செலுத்த தேவையான பணம் கிடைத்துவிட்டதாக மகிழ்கிறான். ஆரம்பத்தில் ரசிக்கிறாற் போலத் தெரிந்தாலும் பேட்டைக்காரர் பொறாமையாகிறார். அவருடைய அகங்காரம் அவரைத் துன்புறுத்துகிறது. தன் சொல்லை மீறி கருப்பு ஜெயித்தது அவரால் தாங்க முடியாததாகிறது

திட்டமிட்டு காய் நகர்த்துகிறார் பேட்டைக்காரர் அவரை முற்றிலுமாக சந்தேகத்திலிருந்து விலக்கியே பார்க்கும் கருப்பு கடைசி வரைக்கும் நம்புகிறான். துரைக்கும் அவனுக்கும் முட்டிக் கொள்கிறது. எல்லாமே பேட்டைக்காரரின் சூழ்ச்சிகளால் நடக்கிறது. துரையின் சேவலுக்கு பேட்டைக்காரர் வைத்த விஷத்துக்கு கருப்பு மீது சினம் கொள்கிறான் துரை. கருப்பின் அம்மா பணம் முழுவதும் இழந்த சோகத்தில் இறந்து விடுகிறாள். ஐரின் மனதில் நெருப்பை விதைக்கிறார். துரைக்கு துப்புத் தந்து விட்டு கருப்பை கோவிலுக்கு வரவழைக்கிறார் எல்லாவற்றுக்கும் அப்பால் அனைத்து சதிகளுக்கும் காரணம் பேட்டைக்காரர்தான் என்பதைக் கண்டுபிடிக்கிறான் கருப்பு. அவர் தன்னைத்தானே மாய்த்துக் கொள்கிறார். ஆனாலும் பேட்டைக்காரரைக் காட்டிக் கொடுக்க மனமின்றி ஐரினுடன் தொலைதூரத்தில் உள்ள ஊருக்குச் செல்கிறான் கருப்பு.

திருப்பரங்குன்றம் என்ற ஸ்தலம் முருகனின் அறுபடை வீடுகளில் ஒன்று என்ற பிரசித்தத்தைத் தாண்டி சேவற்சண்டை துவங்கி அந்தச் சிறிய பேரூரின் அசலான குண அதிசயங்களை அருகே சென்று படமாக்கித் தந்தார் வெற்றிமாறன். தனுஷ் முகமொழியாலும் நடிப்பாலும் மட்டுமன்றி நடனம் பேச்சு கண் புருவ அசைவுகள் வரை தெற்கத்திக்காரப் பயலாகவே மாறினார். இரண்டாம் பாதி முழுக்க இயலாமையும் கோபமும் யாரை நொந்துகொள்வதென்று தெரியாத அயர்ச்சியும் ததும்ப தனுஷின் நடிப்பு உக்கிரமாய்த் தோன்றியது. க்ளைமாக்ஸில் எல்லாம் நம்பிக்கைக்குப் பாத்திரமான பேட்டைக்காரர் செயல்தான் என்பதை அறிந்து நொறுங்கும் காட்சியில் தனுஷ் காண்போர் அனைவரையும் கலங்கடித்தார். அந்த வருடத்திற்கான சிறந்த நடிகருக்கான தேசிய விருதை மலையாள நடிகர் சலீமுடன் ஆடுகளம் படத்திற்காகப் பகிர்ந்து கண்டார் தனுஷ்.

இந்தப் படத்தில் இன்னொரு மனிதரின் பங்கேற்பும் பரிமளிப்பும் தனியே கூறவேண்டிய ஒன்று. வ.ஐ.ச ஜெயபாலன் பேட்டைக்காரர் வேடத்தில் நூறு சதவீதம் பொருந்தினார் என்றால் அதற்குப் பாதிக்கும் அதிகமான சதவீதக் காரணமாக விளங்கியவர் ராதாரவி. தன் முகம் தோன்றாத படத்தில் கூடக் குரல்வழியாகவும் தன்னால் நடிக்க முடியும் என்பதை நிரூபிக்கும் வண்ணம் அவருடைய பின் குரல் பேட்டைக்காரராகவே நம் மனங்களில் நிரம்பிற்று. இந்தப் படத்தைக் கண்களை மூடிப் பார்க்க விழைந்தால் இதன் நாயகர் தனுஷா அல்லது ராதாரவியா என்று தான் குழப்பம் ஏற்படும். அந்த அளவுக்குத் தன் குரலால் வாழ்ந்து காட்டினார் ராதாரவி.

நம்பிக்கை துரோகம் என்பதை எடுத்துச் சொல்ல விழையும் போதெல்லாம் சினிமா அதீதத்தின் பின்னே நின்றுகொள்ளும் அல்லது அதிகதிக உணர்வுகளை எழுப்புவதாக முயன்று சொல்ல வந்தவற்றை சிதறடிக்கும். வெகு சில படங்களே அப்படியான நம்பிக்கை துரோகம் எனும் தனி நபர் சீரழிவுக்குக் காரணவிஷமாய் இருப்பதை மிகச்சரியான விதத்தில் வெளிச்சொல்ல முயன்றிருக்கின்றன. அப்படியான படங்களில் ஒன்றுதான் ஆடுகளம். மதுரை என்றாலே ரத்தமும் குத்துவெட்டுக் கொலைகளும் என்று திரும்பத் திரும்ப காட்சிப்படுத்த முயன்றவர்களுக்கு மத்தியில் வேறொரு நிசமான மதுரையை அதன் மக்களின் வாழ்க்கைத் தருணங்களின் நகர்தலை முன்வைத்துக் காட்டிய படம் ஆடுகளம்.

ஆடுகளம்: மனிதச்சேவல்கள் மண்ணெங்கும் ரத்தம்.
 

 

https://uyirmmai.com/literature/நூறு-கதை-நூறு-சினிமா-76-ஆடுக/

[கிருபன்]

 

நூறு கதை நூறு சினிமா: 77 – வேலைக்காரி (25.02.1949)

August 24, 2019 - ஆத்மார்த்தி · இலக்கியம் சினிமா தொடர்கள்

 

எமைல் ஜோலா: ஏன் பிக்வார்ட் எதையுமே சொல்லவில்லை?

லூஸி ட்ரிஃபெஸ்: கர்னல் பிக்வார்ட் ஒரு நல்ல அதிகாரி. அவரது உயரதிகாரிகள் கேட்டுக்கொண்டதற்கிணங்க அவர் அமைதி காத்தார். 

எமைல் ஜோலா அதாவது அவர்களுக்கெல்லாம் உண்மை தெரியும், தெரிந்த உண்மையைச் சொல்லாமல் மறைக்குமாறு அவருக்கு உத்தரவிட்டார்கள் அப்படித்தானே?

(‘The Life of Emile Zola’ (1937) – பால்முனி ஜோலாவாகவும் கேல் சொண்டர்கார்ட் லூஸியாகவும் தோன்றிய படத்தின் வசனம்)

இஷ்டத்துக்குக் கதை பண்ணினார்கள். பலரும் ஆளுக்கொரு யோசனை சொல்ல அத்தனையையும் ஒரே படத்தில் எப்படியாவது கொண்டுவந்து விடுவதற்காக மாயம் மந்திரம் என கழற்றிய தலை உடைந்த கை எல்லாவற்றையும் பல தினங்கள் கழித்தெல்லாம் ஒட்டுகிறாற்போலவும் சாபம் பெற்று மானாக நரியாக கரடியாக மாற்றப் பட்டு பல காலம் கழித்து மறுபடி மனித உருவுக்குத் திரும்பினாற் போலெல்லாம் புராண காலக் கதைகளை மாவாய்ப் பிசைந்து அவரவர் மனவோட்டத்துக்கேற்ப படங்கள் வந்து கொண்டிருந்தன போதாக் குறைக்கு இருமினால் பாட்டு தும்மினால் கானம் நடுவே ரெண்டு சாங் அப்புறம் சிலபல டான்ஸ் ஒரு வித்யாசமான கோஷ்டிப்பாடல் எனக் குறைந்தது பாஞ்சு இருவது பாடல்கள் இல்லாமல் எப்படி ஸார் படம் என்று தமக்குத் தாமே கேட்டுக் கொண்டார்கள். எத்தைத் தின்றால் பித்தைத் தெளியும் என்று ஒவ்வொரு படத்திலும் கண்ணை மூடிக் கொண்டு அடுத்தவர் வழியிலேயே தாங்களும் செல்வதே ஸேஃப்டி என்று தமிழ்த் திரையுலகம் இருந்த காலத்தில் =தான் அது நிகழ்ந்தது.

திராவிட இயக்கத்தைச் சேர்ந்தவர்கள் வாழ்வாதாரத்துக்கு மட்டும் என்றோ அல்லது அரசியல் கொள்கைகளை விதந்தோதுவதற்கு மட்டும் என்றோ பிரித்தறியவில்லை என்றாலும் சினிமா என்னும் புதியகாற்று இனி நெடுங்காலத்துக்குச் செல்வாக்காய்த் திகழப் போகிறது என்பதை உணர்ந்தார்கள். பல ஆளுமைகள் நேரடி அரசியலை மக்களிடம் எடுத்துச் செல்வதை ஒருபுறம் நிகழ்த்திக் கொண்டே சினிமாவினுள்ளே என்ன செய்ய முடியுமோ அதை எல்லாம் செய்தார்கள். திருவாரூர் தங்கராசு துவங்கி அறிஞர் அண்ணா வரை அப்படிப் பலரும் தங்கள் கொள்கை முகத்தைத் தமிழ்ப்புலம் அறியச் செய்வதற்காகத் திரைப்பட ஊடகத்தைப் பற்றிக் கொண்டார்கள். அப்படியானவர்களில் கலைஞரின் பங்கும் புகழும் அளப்பரியது. கலைஞர் முழுமையான திரைப்பட ஆளுமை என்பதைத் தன் வாழ்காலமெங்கும் நிரூபணம் செய்தவர். அண்ணா அவரது பங்குக்குப் பல படங்களில் தானும் பணியேற்றவர்தான்.

1949 ஆம் ஆண்டு திராவிட முன்னேற்றக் கழகம் பிறந்த வருடம். அதே வருடம் வெளியான வேலைக்காரி திரைப்படம் அதன் வசனவீர்யங்களுக்காகப் பெயர் போன படம். சட்டம் ஒரு இருட்டறை அதில் வக்கீலின் வாதம் ஒரு விளக்கு அது ஏழைகளுக்குக் கிட்டாதது என்பது மிகவும் பிரபலமான வசனத்துளி இன்னொரு புகழேந்திச் சொல்லாடல் கத்தியைத் தீட்டாதே உன் புத்தியைத் தீட்டு என்பது. அண்ணா தன் தமிழாலும் அதன் சுவையாலும் எல்லோரையும் கவர்ந்தார். அடுக்குமொழி அண்ணாத்துரை என்று எங்கே பார்த்தாலும் பேச்சாக இருந்தது. இந்தப் படத்தின் மையக் கதை அதன் புதுமை என்பதை எல்லாம் விடவும் மொத்தப் படமுமே பகுத்தறிவின் பல அடுக்குகளை எடுத்து வைத்ததை மக்கள் வரவேற்று அது குறித்த கலந்துரையைத் திரையரங்கைத் தாண்டி நிகழ்த்தியது அண்ணா எனும் மந்திரப் பெயர் நிகழ்த்திக் காட்டிய மாயம்தான்.

எம்.என்.நம்பியார் இதில் மூர்த்தியாகவும் சாமியார் ஹரிஹரதாஸ் ஆகவும் நடித்தார். இரண்டு வேடங்களில் ஒன்று இன்னொன்றைக் கொலை செய்வதுபோல் அவர் நடித்தது கதாபாத்திரமாக்கலின் அரிய வகை முரண் அதை எல்லோரும் போற்றும் வண்ணம் நடித்திருந்தார் நம்பியார். இன்னொரு பேராளுமை டி.எஸ்.பாலையா தன் குரலாலும் முகமொழியாலும் நடை உடை பாவனைகளாலும் ஆனமட்டும் தன் பாத்திரத்துக்கு நியாயம் செய்யத் தெரிந்த பாலையா இந்தப் படத்தில் மணி எனும் நண்பன் கதாபாத்திரத்தில் வெளுத்து வாங்கினார்.கதையின் பெரும் போக்குகளை எல்லாம் நிகழ்த்துகிற ஆகவீரியமான பாத்திரம் அவருடையதாகவே இருந்தது.டி.பாலசுப்ரமணியம் வேதாசலமாக வந்தார்.வீஎன் ஜானகி சரசா வேடத்தில் நடித்தார். முஸ்தஃபா சுந்தரம்பிள்ளையாகத் தோன்றினார். புளிமூட்ட ராமசாமி பாலுமுதலியாக வந்திருந்தார்.

வேலைக்காரி படத்தின் கதை இதுதான்

பெரும் செல்வந்தரான வேதாச்சலம் முதலியாரிடம் வட்டிக்கு பணம் வாங்குகிறார் சுந்தரம்பிள்ளை. சொன்னபடி திருப்பித்தர முடியாமல் போகும் சுந்தரம்பிள்ளையை ஊர் மத்தியில் அசிங்கப்படுத்தி விடுகிறார். வேதாச்சலம் அவமானம் தாங்க முடியாமல் சுந்தரம் தன் வீட்டில் தூக்கிட்டு தற்கொலை செய்து கொள்கிறார். வெளியூரில் வேலை பார்த்துக்கொண்டிருக்கும் சுந்தரத்தின் மகன் ஆனந்தன் எப்படியாவது தன் அப்பா சாவுக்கு பழி வாங்கியே தீருவேன் என்று சபதம் எடுக்கிறான். பெரும் பணக்காரனுடன் நேருக்கு நேராய் எப்படி மோதுவது என்று சமயம் பார்க்கும் ஆனந்தனுக்கு நண்பன் மணி உதவுகிறான்.

மணியின் நட்பின் காரணமாகத் தானும் ஒரு பகுத்தறிவுவாதியாக மாறுகிறான் ஆனந்தன். தன் நிலைமைக்காக கடவுளை நிந்திக்கிறவனைக் கோயிலிலிருந்து ஊரார் துரத்துகிறார்கள் மணியின் யோசனையினால் ஒரு பாழடைந்த இடத்தில் ஒளிந்து கொள்கிறான் ஆனந்தன். அந்த இடத்தில் ஒரு சாக்கு மூட்டை அதில் ஒரு பிணம் மேவார் விலாசம் எனும் ஊரைச்சேர்ந்த பரமானந்தம் எனும் செல்வந்தன் உடையது அவன் பார்ப்பதற்கு ஆனந்தனை போலவே இருக்கிறான். அவனது டைரியிலிருந்து அத்தனை விபரமும் தெரிந்துகொள்கிறார்கள் மணியும் ஆனந்தும். அவர்களுக்கு சாதகமான முக்கிய விஷயம் எதுவென்றால் பரமானந்தத்தின் அம்மாவுக்கு கண் தெரியாது. ஆகவே பிணத்தை மறைத்து விட்டு மேவார் விலாசம் செல்லுகிறான் ஆனந்த் அங்கிருந்து பணக்கார பரமானந்தமாகத் திரும்பிவந்து ஒரு மாபெரும் டீபார்ட்டி கொடுக்கிறான். வேதாச்சலத்தின் ஒரே மகள் சரசாவை திருமணம் செய்து கொள்கிறான்.

வேதாசலத்தின் குடும்பத்தை மெல்லக் கையிலெடுக்கும் ஆனந்தன் அவரது மகன் மூர்த்தியை குடும்பத்தைவிட்டு வெளியேறச் செய்கிறான். வெளியேறும் மூர்த்தி அமிர்தத்தை விரும்புவது ஆனந்தனுக்குத் தெரியும்.வேதாசலத்திடம் பணிபுரிபவர் அமிர்தத்தின் தந்தை. தன் முதலாளிக்கு ஒவ்வாத திருமணத்தை செய்யவியலாமல் அவரோ அமிர்தத்தை வேறோரு கிழவனாருக்கு கல்யாணம் செய்து வைக்கப் பார்க்கிறார். சண்டை போட்டு வீட்டை விட்டு வெளியேறும் மூர்த்தியை அவனது நண்பர்கள் கைவிடுகின்றனர். அவனோ வேறுவழியின்றி சாமியார் ஹரிஹரதாஸின் ஆசிரமத்தில் அடைக்கலமாகிறான். அவர் ஒரு போலிச் சாமியார் என்பது பிறகுதான் தெரியவருகிறது மூர்த்திக்கு. அமிர்தம் தன் வீட்டை விட்டு வெளியேறுகிறாள். அவளைத் தன் மகள் என்று நினைக்கிறார் மகளை இழந்த கோடீசுவரர் ஒருவர். ஆசிரமத்தில் சாமியார் ஒரு தள்ளுமுள்ளில் கொல்லப்படுகிறார். மூர்த்தி கைதாகிறான். அமிர்தம் இறந்து விட்டதாகத் தனக்குக் கிடைத்த தகவலை உண்மையென நம்பி மனம் மருகிக் கொண்டிருக்கிறான் மூர்த்தி ஆனந்தனை வடநாட்டு வக்கீல் என மாறுபட்ட தோரணையில் அழைத்து வந்து வேதாசலத்துக்கு அறிமுகம் செய்கிறான் மணி.

ஆனந்தன் வழக்கை கோர்ட்டில் மூர்த்தி சார்பாக நடத்துகிறான். கொல்லப் பட்ட சாமியார் ஒரு நெடுங்காலக் குற்றவாளி போலீசாரால் தேடப்பட்டவன் என்பது தெரியவருகிறது. தற்காப்புக்காகத் தான் கொலை நிகழ்ந்ததென்று வலிமையாகத் தன் வாதங்களை எடுத்துவைக்கிறான் ஆனந்தன்.மூர்த்திக்கு சாமியாரைக் கொல்வதற்கென்று காரணமோ முகாந்திரமோ இல்லை என்று வழக்கிலிருந்து அவனை விடுவிக்கிறது நீதிமன்றம். மிகவும் மகிழ்வோடு தன் உயிரை மீட்டுக் கொடுத்த ஆனந்தனிடம் உனக்கு என்ன வேண்டுமோ கேள் என்னை விடுவித்ததற்கான ஊதியமாகத் தருகிறேன் என வாக்களிக்கிறான். பாலு முதலியாரின் மகளைத் திருமணம் செய்துகொள்ள வேண்டுமென அவனிடம் கேட்கிறான் ஆனந்தன்.அவனும் அதற்கு ஒப்புக் கொள்கிறான்.முதலில் அமிர்தத்தைக் கண்டு அதிர்ச்சியடைகிறான் மூர்த்தி திருமணம் நடந்த பிறகு முதலியாரிடம் உன் மகன் திருமணம் செய்திருப்பது ஒரு வேலைக்காரனின் மகளைத் தான். உன் மகளின் கணவனான நானும் சுந்தரம் பிள்ளையின் மகன் தான் தெரிந்து கொள் என்று ஆவேசமாக உண்மையை உடைக்கிறான்.சுந்தரம் பிள்ளைக்குத் தான் செய்த கொடுமைகளை ஒப்புக்கொண்டு மனம் வருந்தும் வேதாசலம் மனமுருகி மன்னிப்புக் கேட்கிறார். குடும்பம் ஒன்றாகி நன்றாகிறது

ஏ.எஸ்.ஏ சாமி இயக்கிய மாபெரும் வெற்றிப் படம் வேலைக்காரி எஸ்.எம்.சுப்பையா நாயுடு சி.ஆர்.சுப்பராமன் இசை இரட்டையரின் நல்லிசை படத்தைப் பேரானந்த அனுபவமாக நிகழ்த்திற்று. மேற்கத்திய வாத்திய இசைக்கோர்வைகள் பலவற்றைத் தொகுத்து மாலையாக்கித் தந்தனர். ஓரிடம் தனிலே – நிலை இல்லாதுலகினிலே உருண்டோடிடும் பணம் காசெனும் உருவமான பொருளே எனும் பாடல் வித்யாசமான இசையோடு குழைந்தொலித்தது.இது ஒரு ஃபாஸ்ட் பீட் ரகப் பாடல்.தொன்மமும் லேசான அயர்ச்சியும் கலந்தொலிக்கும் இசையுடன் வேறுபாடின்றிக் கலந்து நகர்ந்தது பிலீலாவுடன் கேவி.ஜானகி இணைந்து பாடிய இதனை உடுமலை நாராயண கவி எழுதினார்.லலிதா பத்மினி நாட்டியத்தோடு இதனைப் பார்த்து மெய் சிலிர்த்தவர் பலர். அந்தக் காலத்தின் ரேடியோ ஹிட் இந்தப் பாடல் ஒரு க்ளாசிக் முத்து

நாயகனாக நடித்த கே.ஆர்.ராமசாமியின் நீதிமன்றத் தோற்றம் சிகையலங்காரம் இன்னபிற இத்யாதிகள் அந்தக் காலகட்டத்தின் ஹாலிவுட் சூப்பர்ஹிட் படமான தி லைஃப் ஆஃப் எமைல் ஜோலா படத்தின் நாயகர் பால்முனியைப் போல அமைக்கப்பட்டிருந்ததாக அனேகர் கூறுவர்.வேலைக்காரி தமிழ்த் திரையுலகின் திரைக்கதை நகர்தலை வசனப்போக்கை கதாபாத்திரங்களின் கட்டுமானத்தை எல்லாம் மாற்றி அமைத்த முதல் கால ட்ரெண்ட் செட்டர் படமானது

வேலைக்காரி: மலைவனமழை

https://uyirmmai.com/literature/நூறு-கதை-நூறு-சினிமா-77-வேலை/

[கிருபன்]

நூறு கதை நூறு சினிமா:78 – நாம் இருவர் (12.01.1947)

August 26, 2019 - ஆத்மார்த்தி · இலக்கியம் சினிமா தொடர்கள்

 

பழிவாங்குவதலில் பெரும் பணம் இருப்பதில்லை 

-THE PRINCESS BRIDE படத்தில் நாயகன் இனிகோ மோண்டோயா (Mandy Patinkin)

அண்ணன், தம்பி இருவரின் கதை. நாம் இருவர் ராமசாமிக்கு ஜெயக்குமார், சுகுமார் இரண்டு மகன்கள். வாழ்வின் லட்சியமாக சினிமா எடுப்பதுதான் எனப் பெருங்காலத்தையும் நிறையப் பணத்தையும் இழந்து மனம் மாறித் திரும்புகிறான் சுகுமார். அவனைத் தாயன்போடு ஏற்கிறான் ஜெயக்குமார். பணம் கண்ணை மறைக்கத் தன் பேத்தி வயதில் இருக்கும் கண்ணம்மாவை இரண்டாவது கலியாணம் செய்துகொள்ளத் துடிக்கிறார் ராமசாமிப் பிள்ளை. பேங்கர் சண்முகம் பிள்ளையும் அவரும் கூட்டு சேர்ந்து கள்ளச் சந்தை வியாபாரத்தில் ஈடுபட்டுக் கோடிகளைக் குவித்துப் பணத்தைப் பதுக்குபவர்கள். கண்ணம்மாவைக் காதலிக்கிறான் சுகுமார். ஒரு நாள் ஒரு கொலை நடக்கிறது. அதற்கான சூழலை முதலில் பார்த்துவிடுவோம்.

சண்முகம் பிள்ளை தன் வீட்டுத் தோட்டத்தில் செய்தித்தாளைப் புரட்டிக் கொண்டிருக்கிறார். அதில் வந்திருக்கும் செய்தியை வாய்விட்டுப் படிக்கிறார். ஆயிரம் ரூபாய், ஐநூறு ரூபாய் நோட்டுக்கள் செல்லாது என்பதப் படித்ததும் அதிர்ச்சியின் உச்சத்துக்குச் செல்லும் அவர் என் பணமெல்லாம் போச்சே செல்லாதா பணம் என்றபடியே அங்கே இருக்கும் பெஞ்சியில் அமர்கிறார். நியாயப்படி அப்படியே விட்டிருந்தல் சற்றைக்கெல்லாம் அவரே நெஞ்சடைத்துச் செத்திருப்பார். ஆனால் கருப்புத் துணியைத் தன்மீது போர்த்திக் கொண்டு ஒரு உருவம் அவரைக் கத்தியால் குத்திக் கொலை செய்துவிட்டுத் தப்பும். பேங்கர் சண்முகம் பிள்ளையைக் குத்திக் கொன்றது யார்?

தன் மகள் கண்ணம்மாவோடு பேசியதற்காக சுகுமாரனைக் கன்னத்தில் அடித்து அவச்சொல் பேசி அவமதிக்கிறார் சண்முகம் பிள்ளை. சுகுமார்தான் அவரைக் கொன்றதாக வழக்குத் தொடங்குகிறது.

தன்னைத் தொழிலில் ஏமாற்றிப் பெருந்தொகையை அபகரித்துவிட்டதால் தானே சண்முகம் பிள்ளையைக் கொன்றதாக விளக்குகிறார் அவருடைய பார்ட்னர் ராமசாமிப் பிள்ளை.

தன் தம்பி சுகுமாரனுக்குப் பெண் கேட்டுச் சென்ற தன்னை அவமரியாதை செய்த ஆத்திரத்தில் அவரைக் கொன்றுவிட்டதாகச் சொல்கிறான் சுகுமாரனின் அண்ணன் ஜெயக்குமார்.

தன் காதலை நிராகரித்தபடியால் தந்தை என்றும் பாராமல் அவரைக் கொன்றதாகப் பழியேற்கிறாள் கண்ணம்மா.

கோர்ட் குழம்புகிறது முடிவில் ராமசாமிதான் அவரைக் கொன்றதாக நிரூபணமாகிறது. மற்றவர்கள் விடுதலை செய்யப்படுகின்றனர்.

தன் பெண் கண்ணம்மா மீது மையல் கொண்டிருக்கும் ராமசாமிப் பிள்ளையின் ஆசையை நெய் ஊற்றி வளர்த்தபடி ப்ளாக் மார்க்கெட் தொழிலில் அவருடைய பெரும்பணத்தை சேகரித்துக் கொண்டு கொழுத்த லாபம் அடைவார் சண்முகம். அவ்வப்போது வந்து நமக்குள்ள என்னங்க என்று குசலம் பேசிச் செல்லும் ராமசாமிப் பிள்ளை ஒரு கட்டத்தில் வந்து தன் பங்குப் பணத்தையும் லாபத்தையும் கேட்கும்போது இவ்ளோதான் கிடைச்சது என்று ஏய்த்து அவரிடம் பொய்க் கணக்கை நீட்டுவார். அதிர்ச்சியடைந்து என்னய்யா இது உம்மபொண்ணை எனக்கு கட்டி வைப்பீர்னுதானே இத்தனை நாளும் கணக்கு வழக்கெல்லாம் பாராம இருந்தேன் என்று அயர்வார் ராமசாமி.

‘அதற்கு போய்யா கட்டையில போறவயசுல கல்யாணம் என்ன வேண்டி கிடக்கு’ என்று நிசமுகம் காட்டுவார். இன்னும் அதிர்ந்து ஒழுங்காகத் தன் பாகப் பணத்தைத் தர வேண்டும் ராமசாமியிடம் நான் தர்ற பணத்தைப் பேசாம வாங்கிட்டு கெளம்புறதானா கெளம்பு இல்லாட்டி கோர்ட்ல பார்த்துக்க என்பார் ஈவிரக்கம் ஏதுமின்றி இன்னும் அதிர்ச்சியாகி, என்னய்யா இது ப்ளாக் மார்கெட் பஞ்சாயத்தை கோர்ட்டுக்கு எப்படி கொண்டுபோறது நான் சும்மா விடுவேன்னு நினைக்காதே உன்னைய கவனிச்சிக்குறேன் பார் என்று முகம் வெளிறி அங்கே இருந்து கிளம்புவார். உடனே தன் ஸீட்டிலிருந்து எழுந்திருக்கும் சண்முகம் பிள்ளை போடா. இவன் ஒரு திருட்டுப்பய நான் ஒரு திருட்டுப்பய இவன் என்ன என்னைக் கவனிக்கிறது?” என்பார் அஸால்டாக. தமிழ் சினிமாவின் ஆரம்ப காலத்தில் மிகையும் புனைவுமற்ற யதார்த்த பாணி நடிப்பையும் இயல்வழக்கு வசன உச்சரிப்பையும் கொண்டு அறிமுகமான படத்திலேயே எல்லோரின் கவனம் கவர்ந்தார் வீகே ராமசாமி. நெடுங்காலம் வற்றா நதியென்று ஆயிரத்துக்கும் மேற்பட்ட படங்களில் நடித்தவர் தமிழின் முதன்மையான குணச்சித்திர நடிகர்களில் ஒருவரெனப் போற்றப்படுபவர் வீ.கே.ஆர்.

ஆர் சுதர்ஸனம் இசை. மகாகவி பாரதியாரின் பாட்டுக்கள் தேசியவசம் ஆவதற்கு முன் ஏவி.எம் வசம் இருந்தபடியால் அனேக பாடல்கள் இந்தப் படத்தில் பயன்படுத்தப்பட்டிருந்தன. கேபி காமாட்சிசுந்தரமும் சில பாடல்களை எழுதினார். டி.ஆ.மகாலிங்கம் டி.எஸ்.பகவதி டிகே பட்டம்மாள் தேவநாராயணன் எம்.எஸ்.ராஜேஸ்வரி ஆகியோர் பாடியது மொத்தம் 15 பாடல்கள் இடம்பெற்றன.

ஏ.வி.மெய்யப்பன் இயக்கினார். ப.நீலகண்டனின் நாடகம் தியாக உள்ளம் நாம் இருவர் எனும் பெயரில் படமாக்கம் கண்டது. அவரே படத்தின் வசனத்தையும் எழுதினார். டி.ஆர் ராமச்சந்திரன், டி.கே ராமச்சந்திரன், பி.ஆர் பந்துலு, சாரங்கபாணி, குமாரி, கமலா ஆகியோருடன் வீகே ராமசாமி இதன் மூலம் அறிமுகமானார். அவருக்கு வயது வெறும் 21 ஆனால் சண்முகம் பிள்ளையாக ஜொலித்தார் வீகே.ஆர்

டி.ஆர் மகாலிங்கம் பெரும் புகழேந்திய படங்களில் ஒன்று நாம் இருவர்

சினிமா பேசத் தொடங்கிப் பாடல்களின் பிடியினின்று மெல்ல வெளியேறி வசனகாலத்தில் நுழையத் தலைப்பட்ட முற்பகுதியில் வெளியான சமூகப் படங்களில் மிக முக்கியமானது நாம் இருவர். கதாபாத்திரங்களின் வினோதமான பேராசைகள் கோபங்கள், இயலாமை, ஆத்திரம் ஆகியவற்றின் பின்னலாகவே கதையைப் பின்னியிருந்தது பெரிதும் ரசிக்கவைத்தது. நடிப்பில் நாடகமேடையில் முன்னின்றபடி நடிப்பதை நெருக்கமாய்ச் சென்று படமாக்கும் ஆதிகால யுத்தியைத் தாண்டி பலவிதமான ஷாட்களும் கேமிரா கோணங்களைக் கலைப்பதன் மூலமாகப் பார்ப்பவர் மனங்களைப் பலவித உணர்வுகளுக்குத் தயாரித்துவிடுகிற உத்திகளுக்காகவும் டி.முத்துச்சாமியின் ஒளிப்பதிவும் ராமனின் எடிட்டிங்கும் கவனிக்கத் தகுந்தவைகளாகின்றன. டாக்கி என்பதைப் பாடல்களின் பேர்சொல்லி வரவேற்றாக வேண்டிய காலகட்டத்தில் வீகேராமசாமியின் முழு போர்ஷனுமே இயல்காலப் பேச்சுவழக்கில் அமைக்கப்பட்டிருந்தது இன்றளவும் ரசிக்க வைக்கிறது

நாம் இருவர் அன்பின் கதையாடல்

 

https://uyirmmai.com/literature/நூறு-கதை-நூறு-சினிமா78-நாம்/

 

[கிருபன்]

நூறு கதை நூறு சினிமா: 79 – மெட்ராஸ் (26.09.2014)

August 27, 2019 - ஆத்மார்த்தி · இலக்கியம் சினிமா தொடர்கள்

 

அவர்கள் எங்களது உயிரைப் பறிக்கலாம். எங்கள் சுதந்திரத்தை ஒருபோதும் கைப்பற்றமுடியாது

 – (மெல்கிப்ஸன் – ப்ரேவ்ஹார்ட் படத்தில்)

முதலில் காளி என்று பெயரிடப்பட்டு அப்புறம் மெட்ராஸ் ஆனது. அட்டக்கத்தி மூலம் கவனம் ஈர்த்திருந்த பா.ரஞ்சித்தின் இரண்டாவது படம் மெட்ராஸ். சந்தோஷ் நாராயணனின் இசையும் ஜீ.முரளியின் ஒளிப்பதிவும் ப்ரவீனின் எடிட்டிங்கும் கானாபாலா கபிலன் உமாதேவி பாடல்களும் ஞானவேல்ராஜா தயாரிப்பும் பா.ரஞ்சித் இயக்கமும் மெட்ராஸின் உருவாக்கப் பின்புலங்கள்.

வெவ்வேறு கட்சிகள் ரெண்டைச் சேர்ந்த அபிமானிகள் அதிகம் வசிக்கும் குடியிருப்பு பகுதி அதன் முகப்பில் ஒரு மாபெரும் சுவர் அதில் வரையப்பட்டிருக்கும் கிருஷ்ணப்பனின் முகப் படம்தான் அவர் மகன் கண்ணன் உள்ளிட்டவர்களுக்கு கௌரவம் பெருமை எல்லாமே. அதே ஏரியாவைச் சேர்ந்த மாரி இன்னொரு கட்சியைச் சேர்ந்தவன். அவனைப் பெருமிதத்தோடு பின் பற்றுபவன் அன்பு காளியின் உயிர் நண்பன். அன்பு திருமணமானவன். காளிக்கு பெண் பார்த்துக் கொண்டிருக்கிறார்கள் இன்னும் அமையவில்லை என்றாற் போலக் கதையின் துவக்கம். கலையரசியை யதார்த்தமாகச் சந்திக்கிற காளி அவள் மீது காதலாகிறான். அன்புவை எப்படியாவது ஒழித்துக்கட்டவேண்டும் என்று ஸ்கெட்ச் போட்டு ஆட்களோடு அதை செயல்படுத்த முயலுகிறான் கண்ணனின் மகன் பெருமாள்.

அவனது ஆட்களிடமிருந்து தப்பியோடும் அன்புவும் காளியும் வேறோர் இடத்தில் ஆசுவாசம் கொள்கின்றனர். அங்கே தனியே சிக்கும் பெருமாளை வேறுவழியின்றிக் கொல்கிறான் காளி. அவனுக்கு அரசியல் பகையும் கொலைவழக்கும் வேண்டாத வேலை என்று அன்புதான் மட்டுமே பெருமாளைக் கொன்றதாக ஒப்புக்கொண்டு ரிமாண்ட் ஆகிறான். கோர்ட்டுக்கு கொண்டு வரப்படுகிற அன்புவை கண்ணனின் ஆட்கள் கோர்ட் வாசலில் வைத்தே கொல்கின்றனர். அன்பு கொலைக்கு பழி வாங்கியே தீருவேன் என்று கிளம்பும் காளியை கலையரசி ஆற்று படுத்துகிறாள். தன் கண்முன்னாலேயே அன்பு கொல்லப்பட்டதை நினைத்து மனம் நொந்து போகிறான் காளி. அவனை மெல்ல மெல்ல பழைய நிலைக்குக் கொண்டு வருகிறாள் கலையரசி.  வேலைக்குச் செல்ல ஆரம்பிக்கிறான் காளி.

பின் ஒரு தினம் கலையரசியுடன் சாப்பிட்டுக் கொண்டிருக்கும்போது ஓட்டலில் அடுத்த மேஜையில் மாரியின் ஆளான அணிலைக் கவனிக்கிறான் காளி. எதார்த்தமாக அங்கே வந்த காளியைப் பார்த்து பயந்து தனக்கு ஒன்றும் தெரியாது என்றும் எல்லாம் மாரிக்கு தான் தெரியும் என்றும் சொல்லிவிட்டு அந்த இடத்திலிருந்து ஓடுகிறான் அணில். மாரி விலைபோனது காட்டிக் கொடுத்தது கண்ணனிடம் காசு வாங்கிக்கொண்டது. அதன்பின்னரே அன்பு கொல்லப்பட்டது. அரசியல் லாபத்துக்காக நம்பி வந்தவர்களை கைவிடுவதற்கு என்றைக்குமே கலங்காத ஈரமற்ற நெஞ்சம் கொண்டவர்கள்தான் மாரி கண்ணன் எல்லாருமே ஒரே குட்டையில் ஊறிய மட்டைகள் என அறிந்து கொள்கிறான் காளி.

கலையரசியோடு திரும்பி வரும் வழியில் அந்தச் சுவருக்கு முன்னே எலெக்‌ஷனில் வேட்பாளராக போட்டி போட இருக்கிற  மாரிக்கு ஊரே கூடி நின்று பேண்ட் வாத்தியம் முழங்க ஆரத்தி எடுத்து மரியாதை செய்து மகிழ்ந்து கொண்டிருக்கும் காட்சியை பார்க்கிறான். அருகே சென்று நேருக்கு நேராய் “உனக்கு இப்படி செய்ய எப்படிடா மனசு வந்தது அண்ணே அண்ணே என்று உயிரைவிட  உன்ன பெருசா மதிச்சானேடா அன்பு” எனக்கேட்டு முகத்தில் குத்தி பல்லை உடைக்கிறான்.

முதலில் பசப்பு வார்த்தைகளைக் கூறி ஏமாற்றப் பார்க்கும் மாரி பிறகு தன் சுயரூபத்தை காட்டுகிறான். இன்னிக்கு இந்த மாரி நாளை இன்னொருவன் வருவான் நாம் தொடர்ந்து  வருபவர்களை நம்பி இனியும் மோசம் போகக் கூடாது. அதுக்கு முதல்ல இந்த சுவர்ல இந்தப்படம் இருக்கக்கூடாது என்று ஆவேசமாகி பெயிண்டைக் கொட்டி கிருஷ்ணப்பனின் முகத்தை அழிக்க ஆரம்பிக்க ஊரே அதில் இணைந்து கொள்கிறது. பேண்ட் வாத்தியம் முழங்க எல்லோரும் ஆடிப்பாடுகிறார்கள். மாரியின் முகத்தில் கரிய நிற பெயிண்ட் கரைசலை ஊற்றுகிறாள் அன்புவின் மனைவி மேரி உனக்கு எங்கையால தாண்டா சாவு என்று ஆவேசமாகும் மாரியை முடிஞ்சா பாத்துக்கடா போடா என்று விரட்டுகிறான் காளி. ஆனாலும் விடாமல் காளியை எப்படியாவது கொன்றுவிட வேண்டும் என முயலும் மாரி கடைசியில் விஜியால் கொல்லப்படுகிறான். அடுத்த அந்த ஏரியாவின் அரசியல் முகமாக விஜி முன் வருகிறான். அவனிடம் பணம் தந்து கண்ணன் எப்படியாவது நாம் சுவரை மீட்க வேண்டும் என்கிறான். நிறைகிறது மெட்ராஸ் படத்தின் கதை.

சாதி, மதம், செல்வந்தம் என எல்லாவற்றையும் தாண்டி அந்த ஏரியாவின் ஆதிக்கத்தின் குறியீடாகவே அந்தச் சுவர் விளங்குகிறது. சுவர் என்பது வெறும் சுவரல்ல. சுவரில் தொடங்கி சுவரிலேயே முடிகிறது படத்தின் கதை. ஆறுதலைத் தாண்டிய மாறுதலாக காளியும் கலையரசியும் அடுத்த தலைமுறையின் குழந்தைகளுக்கு அரசியலின் அடிப்படையை அறிமுகம் செய்து விளக்குவதாக காட்சியை அமைத்து படத்தை நிறைத்திருப்பது அர்த்தமுள்ளதாகிறது.

சென்னை என்பதன் வழக்கமான சித்திரத்தை மாற்றி எழுத முயற்சித்த படங்களின் வரிசையில் மெட்ராஸ் படத்துக்கும் முக்கிய  இடம் உண்டு. இது வரை காட்டப்பட்ட வட சென்னையின் அதீத சினிமா காட்சிகளுக்கு மாற்றாக அதன் ஈரமான மனிதர்களின் இயல்பான வாழ்வியலை ரஞ்சித் தன் இரண்டு படங்களிலும் முன் வைத்தார்.வட சென்னை என்றாலே வெளிப்படையாக ஒரு அச்சத்தை நிரந்தரமாக தோற்றுவித்துக் கொண்டிருந்த வழக்கமான படங்களிலிருந்து விலகி இதன் ஈரமான மனிதர்களும் இயல்பான உரையாடல்களும் படத்தின் பலங்களாகின.

கார்த்தி தொடர்பிம்பத்தை அகற்றிவிட்டு வேடத்துக்கேற்ற அளவுகளில் நடித்திருந்தது கூறத்தக்கது. பா.ரஞ்சித் தன் படங்களில் தொடர்ந்து இயல்பான காதலை அன்பின் நெருக்கத்தைக் காட்சிப்படுத்தி வருபவர். சினிமாவை அதன் அதீதங்களின் கரப்பிடிகளுக்குள் பாடலும் காதலுமாய் சிக்கிக் கொண்டிருக்கும் தொடர்ச்சியைத் தானும் பின்பற்றாமல் தான் எடுக்கிற எல்லாப் படங்களிலும் பா.ரஞ்சித் முன்வைத்து வருகிற காதல் அழகானது அவரது கதைகளின் காதலர்கள் மிகவும் உளப்பூர்வமாக காதலிப்பவர்கள். சரிகைத்தன்மையும் உண்மையற்ற பொய்மையும் தளும்புகிற வசனங்களைப் பேசுகிறவர்களில்லை மாறாக நம் வாழ்வெங்கும் எளிதாகக் காணக்கிடைப்பவர்கள். காதல் என்பது கண்ணாடி அல்லது தொப்பி போலத் தேவைக்கு அணியவேண்டிய ஒன்றுதானே தவிர அது வெகு சிலருக்கு மட்டுமேயான தவப்பலனோ அல்லது நிரூபித்துக் காட்டுகிற வித்தையோ அல்ல. அது யாவர்க்குமான எளிய உணர்தல் மட்டுமே

சினிமா என்பதன் ஊடக பலத்தை முற்றிலுமாக அறிந்த ஒரு படைப்பாளுமையாக பா.ரஞ்சித் தன் படைப்பு யாரிடம் என்ன பேசவேண்டும் என்பதில் தீர்மானமான கதைசொல்லியாக தோற்றம் கொள்கிறார். எளிதான வசனங்கள் உறுத்தாமல் நேர்மையாக சிந்திக்க வைக்கும் உரையாடல்களாக மலர்கின்றன. படமெங்கும் வாதப் பிரதிவாதங்களோ நீட்டி முழக்கும் அறிவிக்கைகளோ இல்லாமல் தெளிந்த நீரோடை போலத் தான் எடுத்துக் கொண்ட கதையின் அளவீடுகளுக்குள் இயன்ற உணர்வுகளை முயன்று பார்க்கிற நம்பிக்கைக்குரிய படைப்பாளியாக பாரஞ்சித் தன் கதை சொல்லலில் வெற்றியும் பெறுகிறார். பா.ரஞ்சித் தன் படத்தில் தோன்றச் செய்கிற மனிதர்கள் பார்வையாளனின் நம்பகத்துக்குள் இயங்குபவர்கள். அதீதமான சொற்களைச் சொல்லி செயல்களைச் செய்து புனைவின் பொய்யுரைகளுக்கு மேலொப்பமிட்டுச் செல்கிறவர்களில்லை. மாறாக ஒவ்வொருவரும் பலம் மிக்க பாத்திரங்களாகத் தனித் தன்மையும் தனித்துவக் குணங்களுமாகப் பரிணமிக்கின்றனர்.

மேரியும் கலையரசியும் காளியின் அம்மாவும் மட்டுமல்ல கடைசிக் காட்சியில் யாருக்கு வேணும் உன் காசு என்று மாரியின் முகத்தில் பணத்தை விட்டெறியும் முதிய பெண் வரைக்கும் பா.ரஞ்சித் சித்தரிக்கும் பெண் கதாபாத்திரங்கள் தனித்துத் தெரிபவர்கள். சுயமரியாதை கொண்டு மிளிர்பவர்கள் காத்திரமான அன்பை முன்வைத்து அதற்கு நிகரான அன்பை எதிர்பார்ப்பவர்கள் அது தவறும் போது மாபெரும் எதிர்ப்பைப் பதிவு செய்யத் தயங்காதவர்கள்.

வழக்கமான கதை என்று யூகித்து விடக் கூடியதும் அப்படியே ஆகிவிடக் கூடியதுமான சாத்தியங்களின் விளிம்புகளுக்குள் தொடங்குகிற கதையை அதன் அடுத்தடுத்த நகர்வுகளைச் சொன்னவிதத்தின் மூலமாகவும் மிக தைரியமான க்ளைமாக்ஸ் காட்சியின் மூலமாகவும் தான் எடுக்க நினைத்த சினிமாவை முயன்று பார்த்த வகையில் பா.ரஞ்சித் எழுதி இயக்கிய மெட்ராஸ் தமிழின் சிறப்பான படங்களில் ஒன்றாகிறது.

மெட்ராஸ் மக்களின் நிலவெளி
 

 

https://uyirmmai.com/literature/நூறு-கதை-நூறு-சினிமா-79-மெட்/

[கிருபன்]

நூறு கதை நூறு சினிமா: 80 மனோகரா (03 மார்ச் 1954)

August 31, 2019 - ஆத்மார்த்தி · இலக்கியம் சினிமா தொடர்கள்

 

ஒரு மறுமலர்ச்சியைத் துவக்குவதற்கு பெரும் செல்வந்தர்கள் மற்றும் செல்வாக்கானவர்களின் இடங்களுக்குச் செல்லக் கூடாது. யாருடைய மகிழ்ச்சியின் கோப்பைகள் காலியாக இருக்கின்றனவோ அந்த வறிய எளிய மனிதர்களைத் தேடிச் செல்ல வேண்டும்.

(லா வாலஸ் – பென் ஹர் திரைப்படத்தில்?)

கலைஞர் மு.கருணாநிதியின் திரை பங்களிப்பு ஒரே ஒரு படத்தின் மூலமாக விளங்கிக் கொள்ள கூடியது அல்ல. இந்தியாவின் மாபெரும் வசனகர்த்தா யார் என்று கேட்டால் தாராளமாக அவரது பெயரைச் சொல்லலாம் அவருக்கும் எம்ஜிஆருக்குமான நட்பு அளப்பரியது பின்நாட்களில் தமிழகத்தை ஆட்சி செய்யும் அரசியல் எதிரியாகவும் எம்.ஜி.ஆர். மாறினார். அவருக்குப் பின்னால் கருணாநிதிக்கும் ஜெயலலிதாவுக்கும் தமிழக அரசியலின் எதிர் எதிர் துருவங்கள் பகிர்ந்தளிக்கப்பட்டன. தன் வாழ்நாளில் பெரும்பகுதி கலைஞர் தன்னை ஒரு திரைப்பட ஆளுமையாகத் தொடர்ந்து முன்னிறுத்திக் கொண்ட ஒருவராகவே இருந்தார். கலைஞருக்கு எழுத்தின் மீதான பிடிமானம் அளவற்றது தன் பதின்ம வயதில் இருந்தே பேனாமுனை மூலமாக தான் நினைத்த எல்லாவற்றையும் ஆகவும் பிசகாமலும் அழகாகவும் எடுத்துரைப்பதில் அவர் வல்லவராகவே இருந்தார்.

தமிழ்த் திரையின் செல்திசையினை 1945 ஆம் ஆண்டு வாக்கில் அண்ணா, இளங்கோவன் போன்றவர்கள் மாற்றி அமைக்க முற்பட்டனர். புராண மாயஜாலப் படங்கள் மக்களைச் சலிக்கச் செய்திருந்த வேளையில் சமூக மற்றும் சரித்திரப் படங்களுக்கென்று பெரும் எதிர்பார்ப்பு கூடியபடி இருந்தது. அப்போதுதான் வசன எழுத்தின் மாபெரும் ஆளுமையாக கருணாநிதி முன்வந்தார். அவர் எழுதிய வசனங்கள் கல் மொழிகள் ஆகவே நிரந்தரித்தன. பிறருக்கு மத்தியில் மென்மேலும் புதியவர் ஆகவே தன்னைத் தக்கவைத்துக் கொண்டார். கருணாநிதி அடுக்கு மொழியும் சிலேடையும்தான் கொண்ட அரசியலைக் கிடைத்த இடத்தில் எல்லாம் புகுத்திவிடக்கூடிய சூசகம் மற்றும் மாறாத மொழிப்பற்றும் கருத்து வன்மையும் உறுதியும் கருணாநிதியின் அடையாளங்களாகத் திகழ்ந்தன.

உதாரணமாக, மனோகரா படத்தில் மனோகரனின் தந்தையான அரசரின் ரெண்டாவது தாரமான வசந்த சேனையின் வஞ்சக எண்ணம் படம் முழுக்க வெளிப்படும். ஒரு கட்டத்தில் அவள் எறியும் கத்தி அவளது மகன் மீதே பட்டு அவன் கீழே சாய்ந்து வீழ்வான். அவனைத் தூக்கித் தலையைத் தன் மடியில் வைத்துக்கொள்ளும் நாயகன் மனோகரனிடம் அண்ணா இனி இந்த நாட்டை நீதான் ஆள வேண்டும் என்று கூறியபடியே கண்ணை மூடுவான். அந்தக் காலத்தில் திமுகழகம் ஆட்சிக்குப் போட்டியிடும் அரசியல் இயக்கமாக மாறி இருக்கவில்லை. காங்கிரஸ் ஆட்சி நடந்து கொண்டிருந்தது. அப்போது அண்ணா ஆட்சிக்கு வந்தால்தான் நாடு நலமாகும் என்பதை ஒரு கதாபாத்திர வசனத்தின் வழியாக புகுத்திவிடும் வல்லமை கருணாநிதியிடம் இருந்தது.

சிவாஜி கணேசன் – கருணாநிதி,  அவர் எழுத இவர் பேச ஏற்கனவே பராசக்தி திசை எங்கும் பட்டொளி வீசி பறந்துகொண்டிருந்த புகழ் கொடியை ஏற்றி வைத்திருந்தது. வசந்தசேனையாக வில்லியாக டி.ஆர்.ராஜகுமாரி அவரது மகனாக வசந்தமாக காகா ராதாகிருஷ்ணனும் மனோகரனாக சிவாஜிகணேசனும் மனோகரனின் தாயாராக கண்ணாம்பா மந்திரியாக, ஜாவர் சீதாராமன் அரசராக சதாசிவராவ் ஆகியோர் உயிர்ப்புடனான நடிப்பை நல்கினர்.

சாதாரண பழி சூழ்ச்சி வஞ்சகம் இவற்றுக்கப்பால் உரிமையை மீட்கும் ஒரு ராஜகுமாரனின் கதைதான். ஆனால் அதை சொன்ன விதம் பக்கம் பக்கமாக எழுதி தரப்பட்ட வசனங்களைப் பேசியதன் மூலமாக அற்புதமான திரைமலரென மலர்ந்தது. மனோகரா திரைப்படம் இந்தப் படம் ஏற்கனவே 18 ஆண்டுகளுக்கு முன்னால், பட்டு பி.ஜி. வெங்கடேசன் என்பவர் நாயகனாக நடித்து படுதோல்வி அடைந்தது என்பது குறிப்பிடத்தக்கது. மறுபிறவி கண்ட மனோகரா தமிழ் திரையுலக வசனத்திற்கு மணிமண்டபம் கட்டினாற்போல் மாபெரும் வெற்றி அடைந்தது.

பொறுத்தது போதும் பொங்கி எழு என்று கண்ணாம்பா கூறுகிற காட்சியில் ரசிகர்கள் மெய்சிலிர்த்து மெய்மறந்து மெய் வளர்த்தார்கள். அழகுத் தமிழுக்கு ஏற்கனவே பெயர் போனவராகத்தான் கண்ணாம்பா விளங்கினார். இந்தப்படம் அவருக்கு ஒரு மகுட வைரம் தன் தனித்த குரலால் ஜாவர் சீதாராமன் விலகித் தெரிந்தார். காக்கா ராதாகிருஷ்ணன் என்று அவர் பெயர் சொன்னாலே நெடுங்காலம் அசட்டு வசந்தன் ஆகவே நினைவு கூறப்பட்டார். மனோகரா உண்மையில் ஒரு திரைப்படமல்ல… எழுத்தின் வழி காவியம். இலக்கியச்சாறு என்றும் குன்றாத தமிழ் அற்புதம்.

அரசர்: மனோகரா! உன்னை எதற்காக அழைத்திருக்கிறேன் தெரியுமா?

மனோகரன்: திருத்திக் கொள்ளுங்கள் அரசே! அழைத்து வரவில்லை என்னை. இழுத்துவரச் செய்திருக்கிறீர்கள்.

அரசர்: என் கட்டளையைத் தெரிந்து கொண்டிருப்பாய் நீ.

மனோகரன்: கட்டளையா இது? கரை காண முடியாத ஆசை! பொன்னும் மணியும் மின்னும் வைரமும் பூட்டி மகிழ்ந்து கண்ணே முத்தே என்றெல்லாம் குலவிக் கொஞ்சி, தந்தத்தால் ஆன கட்டிலிலே, சந்தனத் தொட்டிலிலே, `வீரனே! என் விழி நிறைந்தவனே!’ வீர வழி வந்தவனே என்று யாரைச் சீராட்டி பாராட்டினீர்களோ அவனை அந்த மனோகரனை சங்கிலியால் பிணைத்து, சபை நடுவே நிறுத்தி சந்தோஷம் கொண்டாட வேண்டும் என்ற தங்கள் தணியாத ஆசைக்குப் பெயர் கட்டளையா தந்தையே?

அரசர்: நீ நீதியின் முன்னே நிற்கும் குற்றவாளி! தந்தையின் முன் தனயனல்ல இப்போது!

மனோகரன்: குற்றவாளி! நான் யாருக்கு என்ன தீங்கிழைத்தேன்? என்னால் பாதிக்கப்பட்டவர்கள் யார்? அரசே! தந்தையின் முன் தனயனாக அல்ல, பிரஜைகளில் ஒருவனாக கேட்கிறேன். கொலை செய்தேனா? கொள்ளையடித்தேனா? நாட்டைக் கவிழ்க்கும் குள்ளநரி வேலை நான் செய்தேனா? குற்றம் என்ன செய்தேன் கொற்றவனே, குற்றம் என்ன செய்தேன்? கூறமாட்டீர்களா? நீங்கள் கூறவேண்டாம்.

இதோ அறங்கூறும் அமைச்சர்கள் இருக்கிறார்கள். மறவர் குடிப்பிறந்த மாவீரர்கள் இருக்கிறார்கள்! மக்களின் பிரதிநிதிகள் _இந்த நாட்டின் குரல்கள் இருக்கிறார்கள். அவர்கள் கூறட்டும்… என்ன குற்றம் செய்தேன்?

சபையோர்: குற்றத்தை மகாராஜா கூறத்தான் வேண்டும்.

அரசர்: இது உங்களுக்கு சம்பந்தம் இல்லாதது.

மனோகரன்: சம்பந்தம் இல்லாதது சபைக்கு வருவானேன்? குடும்பத்தகராறு கொலு மண்டபத்துக்கு வரும் விசித்திரத்தை சரித்திரம் இன்றுதான் முதன் முதலாகச் சந்திக்கிறது மகாராஜா!

அரசர்: போதும் நிறுத்து… வசந்த விழாவில் நீ செய்த தவறுக்காக வசந்த சேனையிடம் மன்னிப்புக் கேட்கவேண்டும்.

மனோகரன்: அதற்குத்தான் காரணம் கேட்கிறேன்!

அரசர்: எதிர்த்துப் பேசுபவர்களுக்கு ராஜசபையில் என்ன தண்டனை தெரியுமா?

மனோகரன்: முறைப்படி மணந்த ராணிக்கு சிறைத்தண்டனை அளித்துவிட்டு, மூலையில் கிடந்ததற்கு முடிசூட்டியவர்களுக்கு அளிக்கப்படும் தண்டனையை விடக் குறைவானதுதான்.

அரசர் மனோகரா நீ சாவுக்குத் துணிந்துவிட்டாய்

மனோகரன் ஆமாம் நீங்கள் வீரராக இருக்கும் போது பிறந்தவனல்லவா நான்.சாவு எனக்கு சாதாரணம்

அரசர்: ஆத்திரத்தைக் கிளப்பாதே! நிறைவேற்று. அரசன் உத்திரவு.

மனோகரன்: அரசன் உத்திரவென்ன? ஆண்டவனின் உத்திரவுக்கே காரணம் கேட்க ஆரம்பித்து விட்டார்கள். அரசே! சிறைச்சாலைக்குச் செல்ல வேண்டும் தாய் என்று கேள்விப்பட்ட பிறகும் அடங்கிக் கிடப்பவன் ஆமை!

அரசன்: தாய்க்கும், தந்தைக்கும் வேற்றுமை அறியா மூடனே! தந்தையின் ஆணை கேட்டு தாயாரின் தலையை வெட்டி எறிந்த பரசுராமனைப் பற்றி கேள்விப்பட்டிருக்கிறாயா நீ?

மனோகரன்: பரசுராமன் அவதாரம். மனோகரன் மனிதன்!”

கடைசிக் கேள்வி என் கட்டளைக்கு வணங்கப் போகிறாயா இல்லையா..?

மனோகரன் மன்னிப்புக் கேட்க வேண்டும் மனோகரன் அதுவும் அரை நொடியில் அரை நொடியென்ன.?அதற்குள்ளாகவே ஆனால் யாரிடம்
கேட்கவேண்டும் தெரியுமா..?

கோமளவல்லி கோமேதகச்சிலை கூவும் குயில் குதிக்கும் மான் என்றெல்லாம் உம்மால் புகழப்படும் இந்தக் கோணல் புத்திக்காரியின் கொள்ளிக் கண்களை கொடிய நாக்கை என் கூர்வாளுக்கு இரையாகத் தந்துவிட்டு அதை எதிர்த்தால் உம்மையும் உமக்குப் பக்கத்துணையாக வந்தால் அந்தப் பட்டாளத்தையும் பிணமாக்கிவிட்டு சூன்யக்காரிக்கு ஆலவட்டம் சுற்றியவர்களை சுடுகாட்டுக்கு அனுப்பிவிட்டேன் என்று சுழலும் வாளுடன் சூழும் புகழுடன் என் அன்னையிடம் ஓடி மன்னிப்புக் கேட்கவேண்டும். நிறைவேற்றட்டுமா அந்த உத்தரவை.. தயார் தானா தயார் தானா..?

இது ஒரு சின்ன உதாரணம். மொழியைக் கொண்டு என்னவெல்லாம் செய்யலாம் என்பதை நன்கு உணர்த்திய படம் மனோகரா.

பாடல்களும் தொழில்நுட்ப இசையும் ஒளிப்பதிவும் எல்லாம் கூடி வந்த ஒரு படமாகவே மனோகரா விளங்கியது. வசூலில் மாபெரும் சாதனை புரிந்தது. உண்மையில் சுதந்திரப் போராட்டத்திற்கு பின்னால் நாடு விடுதலை அடைந்தபிறகு காங்கிரஸ் பேரியக்கத்தை எதிர்த்து அரசியல் செய்வதற்கு தனிப்பெரும் கொள்கையென திராவிடத்தை முன்வைத்து பெருக்கெடுத்தோடும் பெருவெள்ளத்தைத் திசை திருப்பினாற்போல மக்களின் மனமாற்றித் திராவிட இயக்கம் தன்னை நிலைநிறுத்திக் கொண்டதற்கு காட்சி ஊடகமான சினிமா மற்றும் பத்திரிகை ஊடகம் இவ்விரண்டையும் சரிவரப் பயன்படுத்திக் கொண்டது முக்கியக் காரணமாயிற்று.

அயராத பயணங்களும் அசராத பேச்சுக்களும் மனதில் ஐயப்பாட்டையும் வினாக்களையும் ஏற்படுத்தி விடுகிற நேர்த்தியும் அவர்கள் மொழியிலிருந்து தங்களுக்குத் தேவையான கருத்துக்களைப் பதில்கள் ஆக்கி பெற்றுக் கொள்ளுகின்ற லாவகமும் கிடைத்த சந்தர்ப்பங்கள் எதையும் நழுவ விடாமல் அரசியல் செய்கிற அயராத உழைப்பும் கொண்ட கொள்கையில் உறுதியும் திராவிட இயக்கத்தின் வெற்றிக்கு அடிகோலிய இந்த இடத்தில் இயக்கத்தையும் மனிதர்களையும் பிரித்துப் பார்ப்பது கடினம் என்றாலும் கே.ஆர்.ராமசாமி, எஸ்.எஸ்.ராஜேந்திரன், எம்.ஆர்.ராதா, ராமச்சந்திரன் போன்றோர் நாடறிந்த முகமலர் நடிகர்களை நேசிக்க பெருங்கூட்டத்தைத் தயாராக்கி அவர்களது புகழைக் குன்றாவொளியென்று வளர்த்தெடுத்ததன் பின்னாலும் தங்கள் எழுதுகோல் இருக்குமாறு வெகுசிலர் பார்த்துக்கொண்டார்கள் அப்படியானவர்களில் அறிஞர் அண்ணாவும் கலைஞர் கருணாநிதியும் முதலிரண்டு பெயர்கள் என்பது மறுப்பதற்கில்லை

பம்மல் சம்மந்த முதலியாரின் கதையான மனோகரா படத்தை கருணாநிதி வசனம் எழுத எல்.வி.ப்ரசாத் இயக்கினார் எஸ்.வி.வெங்கட்ராமன்
மற்றும் டி.ஆர்.ராமநாதன் இருவரும் இசைத்தனர்.,

கருணாநிதி தன் வசனங்களை விதை மணிகளைப் போல் பயன்படுத்தினார். அதற்கான அறுவடையில் அவர் மிகவும் கவனமாக இருந்தார். சினிமா ஊடகத்தின் சக்தி என்ன என்பதை கடைசிவரை புரிந்து வைத்திருந்தவர் அவர் எந்த இடத்தில் யாரை தாண்டி என்ன தன்னால் நிகழ்த்த முடியும் என்பதை முழுவதுமாக அறிந்தவராக அவர் இருந்தார் மனோகரா படத்தில் கண்ணாம்பா வையும் சிவாஜி கணேசனையும் விட மற்ற எல்லோரையும் விட அது ஒரு கலைஞர் படம் கண் மூடித் திறக்கையில் பார்க்கும் திருமுகம் போல் மனோகரா என்றதும் எழக்கூடிய முதல் ஞாபகம் கருணாநிதி எனும் பெயர் தான் நடிகர் திலகம் என்று போற்றப்பட்ட சிவாஜிகணேசனுக்கு ஒரு பரிசை போல இதை நிகழ்த்தி தந்தவர் கலைஞர் ஐந்துக்கும் மேற்பட்ட தலைமுறையைச் சேர்ந்த நடிகர்களுக்கு வசனம் எழுதியவர் சண்டைக்கும் போருக்குமான வித்தியாசத்தை நன்கறிந்தவர் ஒரு முழுமையான போராளி போராளிக்கு போர் என்பது ஒரு ஆட்டமே அன்றி துளியும் அதில் அச்சமிராது. கருணாநிதி மொழின் மீது மழையாய்ப் பொழிந்தவர். இயற்றமிழின் மகாவுரு.

 

https://uyirmmai.com/literature/நூறு-கதை-நூறு-சினிமா-80-மனோக/

 

[கிருபன்]

நூறு கதை நூறு சினிமா: 81 – ஆண் பாவம் (27.12.1985)

September 5, 2019 - ஆத்மார்த்தி · இலக்கியம் சினிமா தொடர்கள்

அந்தத் துப்பாக்கியை அவர் மேல குறிபார்க்காதீங்க.அவர் பாவம் பயிற்சிக்குப் பணம் ஏதும் வாங்கிக்காதவர்.”

(தனது குழுவினரை கடற்கொள்ளையர்களிடமிருந்து பாதுகாப்பதற்காக) 

-ஸ்டீவ் ஜிஸ்ஸோ (முர்ரே) (The Life Aquatic with Steve Zissou (2004))

சினிமா எடுப்பது கடினம் என்றால் எந்த சினிமா ஜெயிக்கும் என கண்டறிவது ஆகச்சிரமம். திட்டமிட்டபடி எடுத்து முடித்து ரிலீஸ் ஆனபிறகு தெரிய வரும் பரீட்சை முடிவு மாதிரியான திக்திக் அனுபவம். இந்த லட்சணத்தில் காதல், கண்ணீர் தொடங்கி அரசியல், அறிவியல், புதினம் வரைக்குமான வித்யாசங்களை நம்பிப் படமெடுப்பதைவிட நகைச்சுவைப் படமெடுக்கிற காரியம் இருக்கிறதே அது இன்னும் கஷ்டம். ஒவ்வொரு காலத்திலும் சினிமா என்னவாக மாறுகிறது என்பதைப் பிற படங்கள் தீர்மானிப்பதைப் போலவே நகைச்சுவைப் படங்களும் தீர்மானித்துத் தருகின்றன. எல்லாக் காலத்திலும் நகைச்சுவைப் படங்களை விரும்புவதற்கென்று தனி ரசிகர் கூட்டம் தொடர்ந்து கொண்டிருக்கிறது. தனியே ஒலிக்கும் நாதங்களாகின்றன நகைச்சுவைப் படங்கள்.

ஆர்.பாண்டியராஜன் பாக்யராஜிடம் படம் பயின்றவர். அவருடைய இயக்கத்தில் வெளியான முதல் படம் கன்னிராசி. இரண்டாவது படமான ஆண்பாவத்தில் இரு நாயகர்களில் ஒருவராகத் தானே நடித்தார். கதை என்னவோ சாதாரணமாய்க் காதில் சொல்லிவிடக்கூடிய எளிய முடிச்சொன்றுதான். நான் பார்த்த பெண்ணை நீ பார்க்கவில்லை நீ பார்த்த பெண்ணை நான் பார்க்கவில்லை என்ற பழைய கருப்பு வெள்ளைப் பாடல் வரியைத் தூக்கு இஷ்டவண்ணங்களிலெல்லாம் முக்கி எடுத்து வரைந்த கோலம்தான் ஆண் பாவம். ஆனால் நன்றாகப் பலித்த கனவு எனச் சொல்லி ஆக வேண்டும்.

தான் பார்க்க வேண்டிய பெண்ணைப் பாராமல் வேறு பெண்ணைப் பார்த்து வருகிறான் பெரிய பாண்டி. கண்டவள் முகமே கனவும் நிஜமும் ஆகிறது. அவனும் அவளும் எப்படி இணைந்தார்கள் என்பது ஒரு இழை. அண்ணன் பாராமற்போன வாத்தியாரின் மகளைச் சின்ன பாண்டி எப்படிக் கரம் பிடித்தான் என்பது அதே இழையின் மறுமுனை. இவர்களுக்கு மத்தியிலான பாத்திரங்கள் அவர்களின் உபகதைகள் இவ்வளவுதான் ஆண்பாவம் கதை.

இவ்வளவு தானா எனக் கேட்டுவிட முடியாத அளவுக்கு ஆர்.பாண்டியராஜன் படைத்துத் தந்த மனிதர்கள் அமைந்தது விசேடம்.

சர்க்கரைப் பட்டியின் செல்வந்தர் ராமசாமி. குளம் வெட்டி யாரும் குளிக்க வராமற் போய் பள்ளிக்கூடம் கட்டி எவரும் படிக்க வராமல் கோயில் புனரமைத்து யாரும் வணங்க வராமல் பிறகு தானாய்ச் சென்றடைந்து கண்டுகொண்ட புதிய ஞானத்தின் படி மிகத் தாமதமாக அந்த ஊரின் முதல் டெண்டு கொட்டாயை அமைக்கிறதாய் அங்கலாய்த்தபடியே அறிமுகமாவார். இரண்டே பசங்கள் பெரிய பாண்டியும் சின்ன பாண்டியுமாக வளைய வர துணைக்கிருப்பவள் ராமசாமியின் தாய்க்கிழவி. இந்தக் குடும்பத்தில் ராமசாமியின் மனைவி இல்லாமற்போனபிறகு நெடுங்காலம் கழித்து பெரிய பாண்டிக்கு திருமணம் செய்துவைப்பதன் மூலம் அவர்களது வீட்டில் விளக்கேற்றப் புதுக்கரம் வரும் என்பதால் அவனுக்கு திருமண ஏற்பாட்டில் இறங்குகிறார் ராமசாமி. உடனே பொறாமையில் பற்றி எரிகிறது சின்னப்பாண்டியின் அகம். எனக்கொரு பெண் பார்க்கக் கூடாதா எனக் கேட்பவனைத் தனக்குத் தோன்றுகிற வார்த்தைகளைக் கொண்டு திட்டிவிடுகிறார் ராமசாமி.

சர்க்கரைப் பட்டி ராமசாமிக்கு ஒரே ஒரு தம்பி. பொறாமையின் பிறப்பிடமே அவர்தான். அண்ணன் செல்வாக்காகத் திகழும் அந்த ஊரில் தனக்கென்ன குறைச்சல் என நாளும் புழுங்கும் மனிதர் கனகராஜ் என்னென்னவோ செய்து பார்க்கிறார். ஜோசியர் குறித்துத் தந்த நாளில் ஓட்டல் திறக்கிறார். அன்று ஊரே கடையடைப்பு என்றாகிறது. பிறகு யாரோ சொன்னதைக் கேட்டு ஓட்டலில் டி.வி ஒன்றை வைக்கிறார். அந்தக் காலத்தில் டி.வி எட்டாக்கனி எளிதில் கிட்டாக்கனியும் கூட. அப்படி இருக்கையில் விளக்கை அணைத்தால்தான் படம் நன்றாகத் தெரியும் என ஒரு கஸ்டமரின் வேண்டுகோளை ஏற்று அவ்வண்ணமே செய்கிறார். கடையே இருட்டில் காலியாகிறது. அடுத்து இனிமேல் விளைக்கை அணைக்க மாட்டேன் என்ற முன் கண்டிசனோடு மீண்டும் ஒரு டி.வி என மறுபடி கடையைத் திறக்கிறார். இந்த முறை கஸ்டம்ஸ் அதிகாரிகள் வந்து டி.வி எப்படி வாங்குனே எனக் கேட்கும் போது வாயை வைத்துக் கொண்டு சும்மா இராத கனகராஜ் பில்லோட வாங்குறதுக்கு நா என்ன கிறுக்கனா எல்லாம் கடத்தல் சரக்குத்தான். வேணும்னா சொல்லுங்க உங்களுக்கும் வாங்கித் தரேன் என்று எம்.எல்.எம் மார்கெட்டிங் செய்பவரைப் போல அப்பிராணியாய் பேச அடுத்த ஸீனில் லாக் அப்பில் இருக்கிறார். பத்துக்குள்ள ஒரு நம்பர் சொல்லுங்க சொல்கிறார். எதாவது ஒரு பூ பேரு சொல்லுங்க. சொல்கிறார் லாக் அப் சகாவான ஒருவர் சொல்கிறார் தினமும் யார் மூஞ்சில முழிப்பீங்க..? என் பையன் மூஞ்சிலதான் இது கனகராஜ். அதுனால தான் இவ்ளோ தூரம் வந்து இருக்கீங்க. இப்ப என்ன செய்றது.? கவலைப்படாதீங்க. அது தானா நடக்கும்.

கனகராஜின் பிரச்சினை புதுமையான முறையில் தீர்கிறது. பசி நாராயணன் ஒரே ஒரு காட்சியில் வந்தாலும் படத்தைத் திருப்பி வைத்து விட்டுப் போவார். உசிலை மணி மீசை முருகேஷ் எனப் பலருக்கும் தனி அடையாளமாக ஆனது ஆண்பாவம்.

விடலைப் பையன் என்பதை மேக் அப் மூலமாகவும் பல கொனஷ்டைகள் முதற்கொண்டும் பல படங்களில் காட்டித் தோற்றிருந்தாலும் இந்தப் படத்தில் விட்டேற்றி விடலையாகத் தானே தோன்றித் தமிழகத்தின் செல்லப் பிள்ளை நடிகராக முன்வந்தார் ஆர்.பாண்டியராஜன். அவருடைய முகமொழியும் குரலும் தன்னைப் பகடி செய்தாற் போலவே எல்லோரையும் தகர்த்துவிடுகிற பாங்கும் எல்லாமே ரசிப்பிற்குரியதாக இருந்தது. ஒரு நாயகனுக்குத் தேவை என்றிருந்த பட்டியலை முற்றிலுமாக மறுதலித்துவிட்டு உருவாகி வந்த முதல் நாயகன் அவர். அறுபதுக்கும் மேற்பட்ட படங்களில் நாயகனாக நடித்தவர் அஞ்சாதே போன்ற படங்களில் தனது குணச்சித்திர நடிப்பையும் அழகாக வெளிப்படுத்தினார்.

திரைக்கதை அமைப்பில் தமிழில் முக்கியமான படங்களில் ஒன்று ஆண்பாவம். நகைச்சுவைப் படம் என்றால் துவக்கம் முதல் கடைசிவரைக்கும் சிரிப்பு மட்டுமே என்பதல்ல அர்த்தம். இயல்பாகப் பெருகி வருவதில் நகைச்சுவைக்கு முன்னுரிமையும் வேறேங்கேயும் வாய்க்காத புதுமையைக் கொண்டிருப்பதில் உறுதியும் கொண்ட படங்களை அப்படி வகைப்படுத்த முடிகிறது. ஆண் பாவம் அந்தக் கால கட்டத்தின் எளிமையான கிராமப்புற மக்களின் வெள்ளந்திக் காதலை வெளிச்சொன்ன சிறந்த படங்களில் ஒன்று.

பாண்டியனுக்கும் சீதாவுக்குமான காதல் எபிசோட் அத்தனை பரிசுத்தமானது.

இசை இளையராஜா.

பாண்டியராஜன் ஆடிப்பாட காதல் கசக்குதய்யா என்ற பாடலைத் தானே பாடினார் ராஜா. என்னைப் பாடச்சொல்லாதே பாடல் உற்சாக ஊற்று என்றால் நான் ஊமையான சின்னக்குயிலு சோகசாகரம். குயிலே குயிலே பாடல் காலங்கடந்து ஒலிக்கும் காதல்பேழை.

இளையராஜாவின் ஆகச்சிறந்த பீஜீஎம்களில் ஒன்றென இன்றும் கொண்டாடப்பட்டு வருவது ஆண்பாவம் படத்திற்கு அவர் அள்ளித் தந்த இசைக்கொடைக் கோர்வைகள். ரேவதியின் அறிமுகம் தொடங்கி இறுதி வரை ரேவதி எபிசோட் முழுவதற்குமான தனி இசைக்கோர்வை. பாண்டியனுக்கும் சீதாவுக்குமான காதல் ஊடல் சேர்தல் நிகழ்வுகளுக்கான தனித்த இசையாரங்கள் பாண்டியராஜனுக்கு எனத் தனியாக அவர் தந்த வேற்று இசை என இந்தப் படத்தின் இசை குறித்து இன்னும் பல பக்கங்கள் பேசலாம். காதலை இசை வழி எடுத்துரைத்தார் ராஜா.

அசோக்குமாரின் நேர்த்தியான ஒளிப்பதிவு, தெளிந்த நீரோடையாக பரவசம் தந்தது. சீதாவும் ரேவதியும் இந்தப் படத்தின் இருவைரங்கள். தமிழ் சினிமாவில் எண்பதுகளில் தோன்றியவர்களில் தனக்குக் கிடைத்த பாத்திரத்தை எல்லாம் அடித்து நொறுக்கக்கூடிய மகா நடிகை ரேவதி. இந்தப் படத்திலிருந்து வெகுதூரம் சென்றாலும் பேச்சுத்திறன் அற்றுப் போய்த் தன் முகமொழியால் நடிக்கிற ரேவதியின் கண்கள் மறக்க முடியாத மின்னல் தெறல்களாகவே நீடித்தன.

தனித்துவமான மனித குணங்கள் காதல் பிடிவாதங்கள் வாழ்க்கை இணை மீதான பற்றுதல் வாலிபத்தைக் கொண்டாடுகிற விட்டேற்றி மனோபாவத்தின் இலக்கற்ற பறத்தல் கணங்கள் எனத் தமிழ் சினிமாவின் சிறந்த காதல் படமாகவும் நகைச்சுவைப் படமாகவும் இன்னிசைப்படமாகவும் ஆண்பாவம் வெவ்வேறு பட்டியல்களில் நிரந்தர இடம் பற்றியிருப்பது அதன் மேன்மையைப் புரிந்துகொள்ள உதவுகிறது.

ஆண்பாவம் திருவிழா மனநிலை
 

 

https://uyirmmai.com/literature/நூறு-கதை-நூறு-சினிமா-81-ஆண்-ப/

[கிருபன்]

நூறு கதை நூறு சினிமா:82 – தசாவதாரம் (13.06.2008)

September 12, 2019 - ஆத்மார்த்தி · இலக்கியம் சினிமா தொடர்கள்

 

ஒருவர் தனது விருப்பங்களைத் தான் நேசிக்கிறார்.விரும்பப் படுபவைகளை அல்ல.

– ஃப்ரெட்ரிக் நீட்ஷே

கே.எஸ்.ரவிக்குமார் தன் அதிரடி வணிக வெற்றிகளால் கவனம் ஈர்த்தார். ரஜினிகாந்துடன் முத்து, படையப்பா, லிங்கா. கமல்ஹாஸனுடன் அவ்வை சண்முகி, பஞ்சதந்திரம். அஜீத்தை வைத்து வரலாறு, வில்லன். விஜய் நாயகனாக மின்சாரக் கண்ணா என்று அவருடைய காம்பினேஷனுக்கென்று தனித்த மார்க்கெட் இல்லாமல் இல்லை. அப்படியான படங்களில் ரவிக்குமார் இயக்கிய தசாவதாரம் கமலும் அவரும் சேர்ந்து உருவாக்கிய அதுவரையிலான தமிழ்ப் படங்களில் மிகப் பிரமாண்டமான படமாக விரிந்தது.

நடிகனாக ஜெயிப்பவனுக்கு ஒன்றுக்கு மேற்பட்ட வேடங்களில் தன்னைக் காண்பது கூடுதல் பரவசம். தனக்கென்று தானே கோர்த்துச் சூடிக் கொள்கிற நன்மாலை. மூன்று நான்கு வேடங்களிலெல்லாமும் நடிப்பது சத்தியமாகக் கதையின் தேவை அல்ல. ரசிகனைப் பரவசப்படுத்துகிற சாக்கில் தன்னைத்தானே ஊக்கம் செய்து கொள்வதற்கான ஏற்பாடு. வேறு எந்த நிலத்திலும் இப்படி ஒரே மனிதன் ஒரே படத்தில் பல வேடங்களை ஏற்றல் என்பது கிடையாது. இங்கேயே கன்னட மலையாள மொழிகளில் அப்படி நடிப்பதைப் பெரிதாக ரசிக்க மாட்டார்கள். இந்தி தெலுங்கு தமிழில் அமோக விளைச்சலுண்டு.

ஒருமுறை இந்தியின் பிரபல நடிகர் வெளிநாட்டு சுற்றுப் பயணத்தின்போது அப்போதுதான் அவர் மூன்று வேடங்களில் நடித்து மிகவும் பரபரப்பாக ஒரு படம் பேசப்பட்டுக் கொண்டிருந்த நிலையில் அந்தப் பயணம். அயல்நாட்டில் அவர் சந்திக்க வாய்த்த அந்த ஊரின் திரையுலக மனிதரிடம் இன்னார் மூன்று வேடத்தில் நடித்த படம் சக்கை போடு போடுகிறது எனச் சொல்லி அறிமுகம் செய்தபோது அவர் சீரியஸாகவே ஏன் மற்ற இரண்டு வேடங்களுக்கு உகந்த நடிகர்கள் உங்கள் ஊரில் கிடைப்பதில்லையா? எனக் கேட்டாராம். நாம் கேட்டிருக்க வேண்டிய வினா அவ்வளவு தொலைவிலிருந்து ஒலித்திருக்கிறதல்லவா?

சிவாஜி கணேசன் நவராத்திரி படத்தில் ஒன்பது வேடங்கள் ஏற்றார். எம்.என்.நம்பியார் திகம்பர சாமியார் படத்தில் பதினோரு வேடங்களில் தோன்றினார். ரஜினி மூன்றுமுகம் கொண்டார். கமல் மைக்கேல் மதன காமராஜனில் நான்கு வேடம் பூண்டார். இவையெல்லாமும் மக்களால் பெரிதாக ரசிக்கப்பட்ட படங்களே. தசாவதாரம் சுனாமி தாக்கியதற்கு முன் பின்னாகப் பின்னப்பட்ட கதை. அதனையொட்டி ஒரு புள்ளியில் வந்து சேரும் மக்களில் விதவிதமான கதாபாத்திரங்களை கமல் ஏற்ற படம்.

பத்து வேடங்களில் மிகவும் உயரமான மனிதர் கலிஃபுல்லா, ஜப்பானைச் சேர்ந்த குங்ஃபூ வீரர், பாடகர் அவதார் சிங், அமெரிக்க அதிபர் புஷ் போல ஐந்து வேடங்கள் வந்து செல்பவை. முக்கியமான வேடங்கள் இன்னும் ஐந்து. பழங்காலத்தில் சைவ வைணவ சண்டையில் கொல்லப்படுகிற ரங்கராஜ நம்பி சிறிது நேரமே வந்தாலும் ஆவேசமான நடிப்பைத் தந்தார் அந்தக் கமல். அடுத்து மணல் கொள்ளையைத் தடுக்கும் பூவராகனாக அவரது நடிப்பு குறிப்பிடத்தகுந்ததாக இருந்தது. பாட்டியாக வந்த கமலும் ஃப்ளெட்சராக வந்த கமலும் கதையின் தேவைகளைப் பூர்த்தி செய்தார்கள். முக்கியமாகச் சொல்லப்படவேண்டிய கமல்களில் பல்ராம் நாயுடு என்ற ரா அதிகாரியாக அதிகம் ஸ்கோர் செய்தார் கமல்தான்.

நாயகனும் அவரே வில்லனும் அவரே என்ற அளவில் ஃப்ளெட்சர் என்கிற கமலிடம் அதிகம் மாட்டிக் கொள்ளும் கோவிந்தராஜன் என்ற நாமகரணத்திலான கமல்ஹாஸனின் அலைதல்தான் படமெங்கும் கதையாய்த் திரிந்த பிரியிழை.

சுனாமிக்கு முதல் கணத்திற்கு யாரையெல்லாம் திரட்டி அந்தப் புள்ளிக்கு கொண்டு வருவது என்கிற விஷயம்தான் கதையாக விரிவது. கமல் இத்தனை வேடங்களில் நடிப்பதற்குக் காட்டிய எத்தனமும் அவைகளில் காட்டிய வித்யாசமும் பிரமிக்கச் செய்தது. தன் பாணி வசனங்களால்தான் எந்தத் தரப்பு என்பதை எப்போதும்போலவே குழப்பத்தைவிட விளக்கிக் குழப்பித்தான் இந்தப் படத்திலும் தெரிந்தார் என்றாலும் அசினுடன் அவர் நிகழ்த்துகிற காதல் தடவிய மென்மையான உரையாடல்கள் ஈர்த்தன.

அமெரிக்காவிலிருந்து இந்தியா வந்து சேரும் சின்னதொரு மூக்குப்பொடி பெட்டி ஸைஸ் ‘வைல்’அது வெப்பமானால் உலகமே அழியும். அத்தனை வீரியமான வைரஸ் அதனுள் இருக்கிறது. அதைப் பத்திரமாக எடுத்து கடலில் எறிந்து ஊருலகத்தைக் காப்பாற்றுவதற்கு இடையில் சுனாமி வந்து விடுகிறது. அந்த வைல் ஃப்ளெட்சர் கையில் கிடைக்காமல் இருப்பதற்காக போராடி அதில் வெற்றி பெறுகிறார் கோவிந்தராஜ். இந்தப் படம் பல உபகதைகளின் இழைகள் ஒருங்கே சேர்ந்து முடிவது போன்ற ஏற்பாடு. எந்தக் கதாபாத்திரமும் குழப்பியடிக்காமல் அளவாய்ப் பேசியதும் கதையின் பெரும்போக்கைத் துண்டித்துவிடாமல் பார்த்துக் கொண்டதும் தளர்வறியாமல் செய்தன.

பல்ராம் நாயுடுவின் மொழிப்பற்று, பாட்டியின் விசால மனம், பூவராகனின் உலகம் மீதான வாஞ்சை, கோவிந்தராஜனின் தன் உயிர் போனாலும் ஆண்டாளையும் உலக மக்களையும் காத்துவிடவேண்டுமென்கிற பிரயாசை, கலிஃபுல்லாவின் நன்றி மறவாமை, அவ்தார் சிங்கின்தான் பாட வேண்டிய பாடல்களின் கருணை, ரங்கராஜ நம்பியின் பக்தி, தன் தங்கை கொலைக்குப் பழிவாங்குவதற்காக கண்டம் கடந்து வந்து திரும்புகிற ஜப்பானியனின் உறுதி, இத்தனை பாஸிடிவ் பாத்திரமாக்கலுக்கு நடுவே எப்படியாவது இந்த உலகைத் தன் கையால் அழித்துவிட வேண்டுமென்று பிரயாசையால் உயிரே போனாலும் பரவாயில்லை என்று அலையும் ஃப்ளெட்ச்சர் என அத்தனைக் கதாபாத்திரங்களுக்கும் தனித்தனிக் குணங்களைப் பின்னி இருந்தது ரசிக்க வைத்த இன்னொன்று.

நெப்போலியன், ஜெயப்ரதா, நாகேஷ், கே.ஆர்.விஜயா, பி.வாசு, ஆர்.சுந்தர்ராஜன், ஈரோடு சவுந்தர், ஆகாஷ், ரமேஷ் கண்ணா, ரேகா, சந்தானபாரதி, கபிலன், வையாபுரி, மல்லிகா ஷெராவத், எம்.எஸ்.பாஸ்கர், டான்ஸ் ரகுராம் எனப் பெரிய பட்டாளமே நடித்திருந்தனர். தணிகாசலத்தின் எடிடிங், ரவிவர்மனின் ஒளிப்பதிவு, ஹிமேஷ் ரேஷம்யாவின் பாடலிசை, தேவி ஸ்ரீபிரசாத்தின் பின்னணி இசை, வாலி, வைரமுத்து இருவரின் பாடல்கள் கமல்ஹாஸனின் கதை, திரைக்கதை, வசனம் ஆகியவற்றை இயக்கினார் கே.எஸ்.ரவிக்குமார்.

முகுந்தா முகுந்தா கிருஷ்ணா பாடல் இன்றளவும் ஒலித்துக் கொண்டிருக்கிறது.

தசாவதாரம் ஒப்புக்கொடுத்தல்
 

https://uyirmmai.com/literature/நூறு-கதை-நூறு-சினிமா82-தசாவ/

 

[கிருபன்]

நூறு கதை நூறு சினிமா:83 – அந்த நாள் (13.04.1954)

September 14, 2019 - ஆத்மார்த்தி · இலக்கியம் சினிமா தொடர்கள்

 

எப்போது முதல் துப்பாக்கிக் குண்டு உங்கள் தலையைத் துளைக்கிறதோ அப்போது அரசியல் மற்றும் எல்லாக் குப்பைகளும் சன்னலுக்கு வெளியே போய்விடுகின்றன.

-ஹூட்(எரிக் பானா) – ப்ளாக் ஹாக் டவுன் படத்தில்

படத்தின் முதல் சீனிலேயே ஒரு துப்பாக்கி வெடிப்பதும் ஒருவன் குண்டடிபட்டு வீழ்வதும் படம் பார்க்கிறவர்களது கவனத்தை மொத்தமாகக் கவரும்தானே அதுவும் குண்டடிபட்டுச் சாய்ந்தது தங்கள் அபிமானத்துக்குரிய நாயகன் சிவாஜி கணேசன் என்றால் எதிர்பார்ப்பு எகிறுமா எகிறாதா? படம் இப்படி ஆரம்பிக்கிறதென்றால் முழுப்படமும் இனி என்னவாக நிகழும் சிவாஜி எதுவும் கௌரவத் தோற்றமா அல்லது இது கனவு என அடுத்த ஸீனில் எழுந்து அமர்ந்து எல்லோரையும் ஏமாற்றப் போகிறாரா? பொதுவாக நாயகன் இறக்கிறாற்போலப் படத்தின் கடைசியில் காட்டுவதற்கே அத்தனை துணிச்சல் இல்லாத அந்தக் காலத்தில் இப்படி ஒரு படத்தை முதல் ஸீன் என்று ஆரம்பிக்க எவ்வளவு பெரிய தைரியம் வேண்டும்?

அந்த நாள் படம் அப்படித்தான் ஆரம்பித்தது. தன் வீட்டில் உலவுகிற சின்னையா அடுத்த வீட்டில் படாரென்று துப்பாக்கி வெடிக்கும் சப்தம் கேட்டு போலீசை அழைக்க ஓடுகிறார். எதிரில் வரும் ஆபீசரைப் பதற்றத்தோடு விஷயம் சொல்லி அடுத்த வீடு நோக்கி அழைத்து வருகிறார். உள்ளே வீழ்ந்து கிடப்பவனின் பெயர் ராஜன். அவனொரு ரேடியோ இஞ்சினியர். அவனைக் கொன்றது யார் என்று துப்புத்துலக்க இன்ஸ்பெக்டரோடு சி.ஐ.டி. சிவானந்தமும் உறுதுணையாக இருக்கிறார்.

ராஜனுக்கும் அவன் தம்பி பட்டாபிக்கும் சொத்துச்சண்டை உள்ளது. அதனால் அந்தக் கொலையைப் பட்டாபிதான் செய்திருப்பான் என்று அவன் மனைவி ஹேமா கூறுகிறாள். அவள் மீது ஆத்திரமடையும் பட்டாபி தன்னைவிட ஹேமாவுக்குத்தான் ராஜன் மீது ஆத்திரம் அதிகம் என்று திருப்புகிறான். முதலில் எதுவும் பேசாதவள் பிறகு அம்புஜம் எனும் நடனப்பெண்ணுடன் ராஜனுக்கு சினேகிதம் உண்டென்றும் அவர்களுக்கிடையே ஏற்பட்ட மனஸ்தாபத்தினால் அவள்தான் ராஜனைக் கொன்றிருப்பாள் என்று தன் கருத்தைப் பகிர்கிறாள். அம்புஜத்தைக் கண்டுபிடித்து அவளைக் கிடுக்கிப்பிடிபோட்டுக் கேட்கின்ற போலீஸாரிடம் அவள்தான் ராஜனைக் கொல்லவில்லை என்றும் பக்கத்து வீட்டில் வசிக்கும் சின்னையாதான் ராஜனைக் கொன்றிருக்க வேண்டுமெனவும் அதற்கான முகாந்திரத்தின் வழி விளக்குகிறாள்.

இப்படியாக ஒவ்வொருவரும் தாங்கள் இல்லை என்பதைச் சொல்வதோடு இன்னார்தான் கொன்றிருக்க வேண்டுமென்ற சந்தேக வலையை அடுத்தவர்மீது படர்த்திக்கொண்டே செல்ல ஒரு வட்டமடித்து ஆரம்பித்த இடத்துக்கு வந்து நிற்கிறது வழக்கு.

இன்னும் விசாரிக்க வேண்டியிருப்பது ஒரே ஒரு நபர்தான். அது தான் உஷா செத்துப்போன ராஜனின் மனைவி. அவளோ கணவனை இழந்த துக்கத்தில் ஆழ்ந்திருக்கிறாள். ஒரு முடிவுக்கு வரமுடியாத சி.ஐ.டி. சிவானந்தம் யதேச்சையாகத் தனக்குக் கிடைக்கும் துண்டுச்சீட்டை திரும்பத் திரும்பப் படித்து ஒரு முடிவுக்கு வருகிறார். ராஜனின் வீட்டுக்கு வழக்கில் விசாரிக்கப்பட்ட அனைவரையும் அழைத்து அணிவகுக்கச் செய்கிறார். ஒவ்வொருவர் கையிலும் ஒரு துப்பாக்கி அது வெடிக்குமே தவிர அதில் தோட்டா இராது. அப்படியான டம்மி துப்பாக்கியைத் தந்து சின்னையா, அம்புஜம், ஹேமா, பட்டாபி இவர்களோடு உஷா கையிலும் துப்பாக்கி தருகிறார். தன்னை ராஜன் என்று பாவனை செய்து சுடச் சொல்கிறார்.

உஷாவால் சரியாக சுடமுடியாமல் போகவே அழுதுகொண்டு உள்ளே சென்றுவிடுகிறாள். மற்றவர்களால் சரிவரத் துப்பாக்கியைக் கையாளத் தெரியவில்லை. ஆனாலும் பட்டாபியையும் ஹேமாவையும் கைது செய்யச் சொல்கிறார் சிவானந்தம். உள்ளே இருந்து திரும்பி வரும் உஷா தன் கணவனைத் தானே சுட்டுக் கொலை செய்ததாக ஒப்புக்கொள்கிறாள்.

கணவன், ஜப்பான் நாட்டுக்கு விலை போய் அவர்கள் நம் நாட்டைக் குண்டுகளெறிந்து துவம்சம் செய்ய உதவுகிற கெடுமதியன் என்பதை உணர்ந்து நாட்டைக் காக்கவே தன் கணவனென்றும் பாராமல் அவனை உஷா கொன்றழிக்கிறாள் என்பது தெரியவரும்போது அழகான த்ரில்லர் படமாக அந்த நாள் எல்லோருக்கும் உவப்பான ஒன்றாக மலர்ந்தது.

தமிழ்த் திரையுலகம் பாடல்களின் பிடியில் சிக்குண்டிருந்தபோது பாடல்கள் ஏதும் இல்லாமல் வெளியான முதல் படம் அந்த நாள். எஸ்.பாலச்சந்தர் ஜப்பானிய இயக்குனர் அகிராகுரோசோவா இயக்கிய ரஷோமானின் பாதிப்பில் அந்த நாளை உருவாக்கினார். தமிழின் மடைமாற்றுத் திரைப்படங்களில் ஒன்றாக எண்ணற்ற விஷயங்களுக்கான முன்னோடியாக அந்தநாள் திகழ்ந்தது. பராசக்தி படத்தில் தன் சிறந்த நடிப்பாற்றலை நிரூபித்தபடி அறிமுகமான சிவாஜி கணேசன் திரைவாழ்வில் அவர் நடித்தளித்த ஆகச்சிறந்த படங்களில் ஒன்று அந்த நாள்.

படத்தில் அவர்தான் நாயகன் அவரே வில்லன். தன் கெடுமதியை பார்ப்பவர் மனங்களில் சிந்தாமல் சிதறாமல் இடம்மாற்றிவிடும் வகையில் தன் அபாரமான நடிப்பாற்றலால் மிளிர்ந்தார் சிவாஜி. மேலும் அவர் இந்தப் படத்தில் குரலைப் பெரிதும் உயர்த்தாமல் பேசி நடித்ததும் முகமொழியால் பல முக்கியக் காட்சிகளை நகர்த்தியப் பாங்கும் பெரிதும் போற்றத்தக்கது. சிவாஜிகணேசனுக்கு தேசிய விருதை வழங்கியிருக்க வேண்டும் என்று மெச்சத்தக்க பல படங்களைத் தன் நடிப்பு வாழ்வில் தந்தவர்தான் அவர் என்றாலும் பராசக்திக்கு அடுத்து அப்படிப் புகழத்தக்க அடுத்த படமாக அந்த நாள் படத்தைச் சொல்லலாம்.

இசை, ஒளிப்பதிவு, எடிடிங்க் என எல்லாமே கச்சிதமாகத் துணை நின்றன. பண்டரிபாய், ஜாவர் சீதாராமன், டி.கே. பாலச்சந்திரன், பிடிசம்மந்தம், சட்டாம்பிள்ளை, வெங்கட்ராமன் ஆகியோர் நடித்திருந்தனர்.

ஏவி.எம்மின் அந்த நாள் எந்த நாளும்.
 

 

https://uyirmmai.com/literature/நூறு-கதை-நூறு-சினிமா83-அந்த/

 

[கிருபன்]

நூறு கதை நூறு சினிமா: 84 பாட்ஷா (15 ஜனவரி 1995)

September 16, 2019 - ஆத்மார்த்தி · இலக்கியம் சினிமா நூறு கதை நூறு படம் தொடர்கள்

 

உன் நண்பர்களை அருகில் வை. உனது எதிரிகளை இன்னும் நெருக்கத்தில் வை

– மிக்கேல் கார்லியோன் வேடத்தில் அல்பஸீனோ தி காட்ஃபாதர் 2 திரைப்படத்தில்

ரஜினி அபூர்வ ராகங்களில் கதவைத் திறந்து கொண்டு விலாசம் விசாரித்துச் சென்ற நடிகராகத் தோன்றிய போது அவர் தான் எம்ஜி.ஆருக்கு அடுத்த சூப்பர் நடிகர் என்று யாராவது நினைத்திருப்பார்களா தெரியாது. ஆனால் அது தான் நடந்தது. ரஜினி தனக்கு முன்னால் ஓடிக்கொண்டிருந்தவர்கள் பலரையும் முந்திச் சென்று முதலிடத்தைப் பற்றினார். ஆனால் அதை விடப் பெரிய காரணம் ஒன்று நிகழ்ந்தது. அது என்னவெனில் எல்லோருக்கும் ரஜினி என்ன செய்தாலும் பிடித்தது. தமிழைத் தன் கொஞ்சுமொழியால் ரஜினி அழகாக்கினார். அவரது நடை உடை தொப்பி தொடங்கி தொட்டுக்க தொகையல் சாப்பிட்டால் அது கூடப் பிரபலம் ஆயிற்று. நின்றால் நடந்தால் ஓடினால் ஆடினால் ஸ்டைல் ஸ்டைல் ஸ்டைல் தான்.

ஆனால் ஸ்டைல் என்பதைத் தாண்டி ரஜினி ஒரு சாமான்யனைப் பிரதிபலித்து அவனை நட்சத்திரமாக்கினாற் போன்ற தன் பிரத்யேக ஒளிர்தலைக் கொண்டிருந்தது மறுக்க முடியாதது. அவரைப் போன்ற பலருக்கு மத்தியிலிருந்து வந்தாலும் அவர் ஒருவர் தான் இருந்தார். தனித் தனியே உற்றுப் பார்த்தால் மறுதலிப்பதற்கான நூறு தன்மைகளை எடுத்துக் கோர்த்து ரஜினியாக்கினாற் போல் தன்னைக் கட்டமைத்துக் கொண்டவர் ரஜினி.

அவருடைய நடிப்பு வாழ்க்கையில் இருபது வருடங்கள் கழிந்தன. ஒருவழியாக ஒப்பாரும் மிக்காரும் இல்லாமல் போட்டிக்கெல்லாம் ஆளே இல்லை என்றாற் போலான பிறகு ரஜினி தன் பட எண்ணிக்கையை வருடத்திற்கு ஒன்று என்றோ இரண்டு வருடங்களுக்கு மூன்று என்றோ ஆக்கிக் கொண்டார். ஆர்.எம்.வீரப்பன் எம்ஜி.ஆரின் தளகர்த்தர். ரஜினியின் அன்புக்குரிய தயாரிப்பாளர். தொண்ணூறுகளின் ஆரம்பத்தில் இருந்தே அப்போதைய முதல்வர் ஜெயலலிதாவுக்கும் ரஜ்னிக்கும் இடையே சில பல கருத்து எதிர்வாதங்கள் இருந்து வந்தன. அதனால் ரஜினி ஜெயலலிதாவுக்கு மாற்றாக அரசியல் சக்தியாக வருவார் என்றும் வரமாட்டார் என்றும் கருதப்பட்ட நிலையில் அவரது படங்கள் முன்பை விட உன்னிப்பாகப் பார்க்கப் பட்டன.

ஹம் ஹிந்தியில் ஒரு பரவாயில்லாமல் வெற்றி பெற்ற பழிவாங்கும் படம். அதன் மைய இழை அமிதாப் மற்றும் அவரது தம்பியர் பிரிந்து எதிரிகளைப் பழிவாங்கி ஒன்றிணைந்து சேர்வதாக இன்னுமொரு இந்திப் படமாக வந்திருந்தது. அதனை உரிமை வாங்கித் தமிழில் மீவுரு செய்ய விழையும் போது அதற்கு பாட்ஷா என்று பேரிட்டார்கள்.வழக்கமான இரட்டைத் தன்மை இருவேடங்கள் என்று எடுப்பது ஒருவிதம் ஒருவனே இருவேறு பேர்களில் ஊர்களில் காலகட்டங்களில் முகவரிகளில் வாழ்க்கை நடத்தி வருவதும் அதற்கான பின்புலக் கதையும் இன்னொரு விதம் அப்படியான படங்களின் தலையெழுத்தையே மாற்றி எழுதியது பாட்ஷா.

மாணிக்கம் அன்பானவன். யாரையும் எதிர்க்காதவன். தான் உண்டு தன் வேலையுண்டு என்று வாழ்பவன்.தன் தந்தை படம் முன் அவன் மனமொழியில் பேசிக்கொள்வதைப் போல் ஒரு தங்கையை நல்ல மாப்பிள்ளைக்கு கட்டி வைத்து இன்னொருத்தியை அவள் கனவுப்படி டாக்டர் ஸீட் பெற்றுத் தந்து ஒரே தம்பியை சீருடைச்செருக்குடன் இன்ஸ்பெக்டராக்கி தன் மாற்றாந்தாய் மக்கள் எனப் பாராமல் தன் உயிரிழைகளாகவே அவர்கள் வாழ்க்கையில் ஸெட்டில் ஆவதைக் கண்டு இன்புறுகிறான். நடு நடுவே அவனுக்கும் பணக்காரப் பெண் ஒருத்திக்கும் அறிமுகம் கிடைக்கிறது. அவள் அவனது வெள்ளந்தி அன்பைக் கண்டு மயங்குகிறாள். நண்பன் குருமூர்த்தி ஒரு சிங் மற்றும் பரிவாரமே ஆட்டோ ஒட்டி கடை நடத்தி மாணிக்கத்தோடே இருக்கின்றனர். அப்படியான மாணிக்கம் தன் தம்பிக்கு பதிலாக அந்த ஏரியா தாதா இந்திரனிடம் அடி வாங்கும் போது அமைதியாக அதை ஏற்கிறான். தன் தங்கையை அதே இந்திரன் வம்பு செய்யப் பார்க்கையில் அவனை அடிக்கிற அடியில் மொத்தம் பத்துக்கும் மேற்பட்டவர்கள் உயிருக்குப் போராடுகிற அளவுக்கு துடிக்கின்றனர். கோபமாக வந்து நீ யார் பாம்பேல என்ன செய்திட்டிருந்தே எனக் கேட்கும் தம்பியிடம் என்ன சொல்வதெனத் தெரியாமல் விழி மூடி நீர்த் திவலை உதிரத் தன் பழைய கதைக்குள் செல்கிறான் மாணிக்கம்

மாணிக்கமும் அவன் அன்புக்குரிய நண்பன் அன்வர் பாட்ஷாவும் மும்பையில் ஒன்றாக வளர்ந்து ஒருங்கே வாழ்பவர்கள். மும்பையின் நிழல் உலக டான் ஆன மார்க் ஆண்டனியின் அட்டூழியங்களைத் தட்டிக் கேட்கும் அன்வரைத் தன் ஆட்களை அனுப்பிக் கொன்றுவிடுகிறான் ஆண்டனி.அவனது நம்பர் ஒன் விசுவாசி தான் ரங்கசாமி. அதாவது மாணிக்கத்தின் அப்பா.தன் நண்பன் அன்வரின் கொலைக்குப் பழி வாங்க அவனைக் கொன்ற அடியாட்களைத் தேடிச் சென்று கொல்கிறான் மாணிக்கம். அவனைக் காட்டிக் கொடுக்காமல் மக்கள் அவனைப் பாதுகாக்கின்றனர். மாணிக் பாட்ஷா ஆகிறான் மாணிக்கம். ஆண்டனியின் சாம்ராஜ்யத்துக்கு எதிராகத் தனது ராஜாங்கத்தை நிலை நாட்டி படிப்படியாக ஆண்டனியின் செல்வாக்கை அழித்து தானும் தன் அடையாளங்களை அழித்துக் கொண்டு பாட்ஷா குண்டுவெடித்து இறந்து விட்டதாக புனைவொன்றை நிஜமாக்கி விட்டு சென்னைக்குத் தப்புகிறான். அங்கே தான் மாணிக்கமாக ஆட்டோ ஓட்டுகிறான்.

சிறையிலிருந்து தப்பி வரும் ஆண்டனியை அழித்து எப்படித் தன் குடும்பத்தை அவனிடமிருந்து காப்பாற்றுகிறான் என்பது மீதிக்கதை.

பாட்ஷா ரசிகர்களை வெறியர்களாக மாற்றித் தந்த படம்.ரஜினியின் உச்சபட்ச படமாக அதுவரையிலான சாதனைகளை முறியடித்தது.பாலகுமாரனின் வசனங்கள் முன்பிலாப் புதுமையோடு ஒலித்தன. நான் ஒருதடவை சொன்னா நூறு தடவை சொன்னா மாதிரி என்று ரஜினி சொல்லும் போதெல்லாம் தன்னை நாலால் பெருக்கிக் கொண்டான் ரசிகன்.கூட்டுக்குள் நத்தை மாதிரி சுருண்டு கிடக்கும் மாணிக்கம் யார் சொல்லியும் மீண்டும் பாட்ஷா என்ற சொல்லையே உச்சரிக்காத மாணிக்கம் ஸீட் கேட்டு செல்லும் தன் தங்கையிடம் தகாத சொற்களைப் பேசும் கல்லூரி ஓனரிடம் தான் யாரென்பதை கோடிட்டு காட்டுவார். அந்தக் காட்சியில் என்ன பேசுகிறார்கள் எனத் தெரியாமல் வெளியே கண்ணாடிக்கு இந்தப் பக்கம் தங்கை பாத்திரத்தோடு நாமும் காத்திருப்போம் அப்போது உள்ளே மெல்ல எழுந்திருப்பார் கல்லூரி ஓனர் சேது விநாயகம். அவரிடம் தன் வரலாற்றுச் சுருக்கத்தை ரஜினி சொல்லி முடிக்கும் போது மாணிக்கத்தின் முன் கைகட்டி நிற்பார் சேது வினாயகம்.

ரசிக சமானத்தின் மீது நட்சத்திரத்தன்மையின் மாபெரிய போர் என்றே இந்தக் காட்சியை சொல்ல வேண்டும். அதாவது பாட்ஷா யார் என்று உரக்க சொல்லியிருந்தால் கூட அந்த இடத்தில் சாதாரணமாய்ப் போயிருக்கும். ரஜினி அங்கே குழுமும் பத்துப் பேரை அடித்து கல்லூரி ஓனரின் நெற்றியில் துப்பாக்கி அல்லது கத்தி இவற்றில் ஒன்றை வைத்து நெம்பி லேசாய்த் திறந்து ரத்தம் பார்த்தபடி எங்கேடா ஸீட்டு எனக் கேட்டு வாங்கினால் கூட அது வழக்கமான இன்னொன்றாக முடிந்திருக்கும். குழந்தையின் கெக்கலிப்புப் போன்ற மௌனத்தில் சேதுவுக்கு மட்டும் தான் யாரென்பதைச் சொல்லி விட்டு வெளில சொல்லிட மாட்டீங்களே என்று கையை சுழற்றி ஒருதடவை சொன்னா வசனத்தை உச்சரித்து விட்டுப் படாரென்று தன் கைகளைத் தட்டி வெளியே போன சேதுவின் அடியாட்களை உள்ளே அழைத்தபடி தன் கைகளைக் கட்டிக் கொள்வார் பாட்ஷா அதுவரையிலான அத்தனை நாயகத்துவத்தையும் தாண்டி இந்த இடத்தில் ஆசியக் கண்டத்தின் மகா மனிதராக தன் மனம் கவர்ந்த ரஜினி காந்தை நினைக்கவும் நம்பவும் ஆரம்பித்தான் சாமான்ய ரசிகன். இத்தனை தூரம் ஒரு பிம்பமதிப்பீட்டை அதிகரிக்கிற படங்கள் அரிதினும் அரிது.

அழகிய வில்லன் மார்க் ஆண்டனியாக ரகுவரன் இந்தியத் திரையின் உன்னதமான நடிக ஆளுமைகளில் முதன்மையான பேர் ரகுவரன். இந்தப்படத்தில் கூட பாட்ஷா என்ற ரஜினி என்ற மகா நடிகரின் மாபெரிய படத்தை ரகுவரன் என்கிற வில்லன் இல்லாமல் கற்பனை கூட செய்திட முடியாது. இன்னும் சொல்லப் போனால் ரஜினி மற்ற எல்லா ஃப்ரேம்களிலும் சிக்ஸ் ஃபோர் என அடித்து நொறுக்கிய படமான இந்த பாட்ஷாவில் கூட ரகுவரனுடன் தான் தோன்றுகிற காட்சிகளில் சற்றே டென்ஷனாகவே தோற்றமளிப்பார். அது ரஜினியின் பிரச்சினை அல்ல. ரகுவரன் அந்த அளவுக்குப் பிறரைக் கலங்கடிக்கிற நடிகன். தன்னிடம் வேலை பார்க்கும் விஜயகுமாரின் மகன் தான் ரஜினி என்பதால் அவரை சரிவரக் கணக்கில் எடுத்துக் கொள்ளாமலே போய்விட்டதை ஒரு காட்சியில் அழகாக வெளிப்படுத்துவார் ரகு.முதன் முதலாக ரஜினியை சந்திக்கும் போது நீ நம்ப ரங்கசாமி புள்ளை இல்லே என்பார். அதில் சிலபல தலைமுறைகளுக்குத் தேவையான ஆணவம் தொனிக்கும்.சூடாவார் ரஜினி

ஜனகராஜ் ரஜினியின் நண்பன் கதாபாத்திரத்துக்கென்றே ஸ்பெஷலாகப் படைக்கப்பட்டிருப்பவர் என்று தைரியமாக சொல்ல முடியும். இந்தப் படத்தில் அவருடைய வழக்கமான நகைச்சுவை நெடி சற்றுக் குறைவென்றாலும் பாட்ஷாவின் குழுமத்தில் அவருக்கடுத்த பவர்ஃபுல் மனிதராக குருமூர்த்தி என்ற பாத்திரத்தில் மின்னினார் ஜனகர்.

தேவா ரஜினி காம்பினேஷனில் இரண்டாவது படம் பாட்ஷா.ரஜினிக்கு பெயர் போடுவதற்கான இசையை ஜேம்ஸ் பாண்டிலிருந்து எடுத்தாண்டதைப் போலவே ஸ்டைலு ஸ்டைலுதான் பாடலுக்கும் லேசாய் பாண்ட் எட்டிப்பார்த்தார். தேவாவின் பாடல்கள் அனைத்துமே துல்லியத்திற்குப் பெயர் போனவை. வைரமுத்துவின் எந்த ஒரு வரியின் எந்த ஒரு வார்த்தையும் குழப்பாமல் மனனம் ஆனது. அந்த அளவுக்குப் பளிங்குத் தெளிவு தேவா வைரமுத்து கூட்டணி

ஹம்மை கம்முனு கிட என்றாற் போல் தமிழுக்குப் பெயர்த்ததில் எக்கச்சக்க கதாபுரட்டல்கள் உண்டென்றாலும் கூட சுரேஷ் கிருஷ்ணா ரசிகர்களில் ஒருவராக நின்றபடி படம் இயக்கத் தெரிந்தவர். அடைந்தால் மலையுச்சி வீழ்ந்தால் பாதாளபைரவி என்பது அவரது ஸ்பெஷல். பாட்ஷா பின்னியது.பின் நாட்களில் பாபா பின்னாமற் போனது. என்றபோதும் ரஜினியை அதிகம் விரும்பச் செய்த இயக்குனர்களில் அவருடைய பெயருக்கு நிச்சயம் இடமுண்டு.

இந்தப் படத்துக்கு அப்புறம் கிட்டத் தட்ட எல்லா நடிகர்களுமே தானும் ஒரே ஒரு முறையாவது பாட்ஷா மாதிரியான படத்தில் நடித்து விடவேண்டும் என்று நேர்ந்து கொண்டு இதுவரை இந்தியாவின் அனைத்து மொழிகளிலும் இந்தப் படத்தின் மூலவிதை அதாவது தான் யாரென்பதை மறைத்துக் கொண்டு மாணிக்கமாக வந்து பாட்ஷா என்பதைக் காண்பித்து ஹீரோயிஸ்டிக் ஆக நடிப்பதை மையமாக்கி ஆறாயிரத்து அறுநூற்று அறுபத்தி ஆறு படங்களாவது வந்திருக்கின்றன என்பதும் இன்னும் வரவிருக்கின்றன என்பதும் சொல்லொணாத் துன்பம்.

அப்படிப் பார்த்தால் தன் சொந்த பங்களாவிலேயே தான் தான் ஓனர் ஜே.பி என்பதை மறைத்துக் கொண்டு யாரோ ஒரு பாலுவாகத் தங்கிப் படத்தின் இறுதியில் அந்த உண்மையை வெளிச்சொன்ன வாத்தியாரின் அன்பேவா தான் பாட்ஷாவுக்கு முன் ஜென்மம்.

பாட்ஷா வன்மத்தின் வாள்

 

 

https://uyirmmai.com/literature/நூறு-கதை-நூறு-சினிமா-85-பாட்/

[கிருபன்]

நூறு கதை நூறு சினிமா: 85 – ருத்ரதாண்டவம் (1978)

September 18, 2019 - ஆத்மார்த்தி · இலக்கியம் சினிமா தொடர்கள்

 

சமூக வனத்தில் மனித இருத்தலில் அடையாள உணர்வின்றி உயிருடன் இருப்பதற்கான உணர்தல் இல்லை

-எரிக் எரிக்சன்

கடவுள் உன் கண்ணெதிரே வந்தால் நீ என்ன வரம் கேட்பாய் என்று சிறுவயதில் பள்ளியில் ஒரு பிரமாதமான வினாவைக் கேட்பார்கள். இப்படியான வினாக்கள் விடையை நோக்கியவை அல்ல வினவுதலின் இன்பம் முக்கியமானது. விகே.ராமசாமி பண்பட்ட நடிகர். சிறுவயதிலிருந்தே நடிப்புக்குத் தன்னை ஒப்புக் கொடுத்தவர் அவர் தயாரித்த ருத்ரதாண்டவம் தமிழின் அபூர்வமான அங்கத வகை சினிமாக்களில் இடம்பெறத்தக்க ஒன்று.

கே.விஜயன் இயக்கிய இதன் கதை, வசனங்களை ஏ.வீரப்பன் எழுதினார். நாகேஷ் பொன்னம்பலம் ஏழைப்பூசாரி. சிவன் கோயிலே கதியென்றிருப்பவர். ஒரே மகளுக்குத் தன் அண்ணன் மகனைத் திருமணம் செய்து வைத்துவிட வேண்டுமென்பதே திருமதிக்கு லட்சியம். அவர்கள் பெறாத பிள்ளை வாஞ்சி. கனகசபையும் தர்மகர்த்தாவும் பழைய கூட்டு புதிய பகை. இருவருமே வெவ்வேறு விதங்களில் சட்டவிரோதமாய்ப் பிழைப்பு நடத்துபவர்கள். அவர்கள் தந்த பணத்தில் கோயில் திருப்பணி நடக்கிறது. அந்தக் கோயில் சிற்பங்களைப் புனர்வண்ணம் பூசுவதற்காக வருபவன் ரவி. அவனுக்கும் பூசாரி மகளுக்கும் காதலாகிறது. தன் மகள் திருமணத்துக்கு எப்படியாவது உதவ வேண்டுமென்று சிவனை வேண்டுகிறார் பூசாரி. அவர் திருமதியோ தர்மகர்த்தா மகனோடு சேர்ந்து கோயில் நகைகளைக் கொள்ளை அடிக்க சாவியைக் கொடுத்து உதவுகிறாள். அவன் தந்த பத்தாயிரம் ரூபாயைக் கொண்டு கனகசபையின் உதவியாளன் வரதன் போக்கிரி. கிராம்பு கடத்தி வரும் லாரியை போலீசுக்கு பயந்து பாதி வழியில் நிறுத்திவிட்டுத் தப்பி வருகிறான்.

“நீ என் வீட்டுக்குள்ளே நுழைஞ்சதை யாராச்சும் பார்த்தாங்களா”

“நா என்னிக்குங்க நேர் வழியில வந்திருக்கேன். பின் வழி குழாய்ல பூந்து இப்டி தானே வந்திருக்கேன்.”

திடீரென்று அழுகிறான் தன் எட்டு முழ வேட்டியை லாரி ஸ்டேரிங் பின்னால் வைத்திருப்பதாக சொல்லி கலங்குபவனை அதட்டுகிறார் கனகசபை

“அய்யய்யோ அதுல சலவைக்குறி இருக்குமேடா”

“நா என்னிக்குங்க சலவைக்கு போட்டேன்”

“ஹப்பா உனக்கு பதினாறு முழம் வேட்டியே வாங்கித் தரேன். கடசீ வரைக்கும் லாரியும் கிராம்பும் நம்மளது இல்லைன்னு சாதிச்சுடு”
என்று சொல்லி விட்டு திரையைப் பார்த்து

“எந்த நேரமும் குப்பு குப்புன்னு வேர்க்க விடுறீங்களே தவிர காயவே விடமாட்டேன்றீங்களேடா” என்பார் தேங்காய். சுருளியும் அவரும் சேர்ந்து நெடுங்காலம் ஓடியிருக்க வேண்டிய இணைப்புரவிகள் பாவம் சொற்பகாலமே வாழ்ந்தார் சுருளி.

சிவனிடம் வந்து வரதன் கனகசபை தர்மகர்த்தா என எல்லா சுயநலவாதிகளும் வேண்டிக் கொள்கின்றனர். எல்லா வேண்டுதல்களுமே சுயநலப் பாடல்களாகவே இருப்பதை வியக்கிறார் பூசாரி.

தன் மகளுக்கு வரதட்சணையாக பத்தாயிரம் ரூபாய் தேவை என ஊரில் இருக்கிற செல்வந்தர்கள் ஒவ்வொருவராய்க் கேட்கிறார். எல்லோருமே மறுத்தும் இகழ்ந்தும் விரட்டி விடுகின்றனர். பூசாரி பொன்னம்பலம் மனம் துவளுகிறார். மரத்தை வச்சவன் தண்ணி ஊத்துவான்னு சொன்னாங்களே இப்படி ஒரு மரத்தையும் வச்சிட்டு தண்ணி ஊத்தாம இருக்கியே இது நியாயமா ஆண்டவனே என சிவன் முன்னால் கலங்குகிறார் பூசாரி. இதுவரைக்கும் வெளில இருக்கிறவன்தான் விவரமில்லாம கேட்டுக்கிட்டிருந்தான்னா இப்ப உள்ள இருக்கிற நீயே எப்ப என் மூணு கண்ணும் அவிஞ்சா போச்சு அப்டின்னு கேட்டியோ இனியும் நான் பதில் சொல்லாம இருந்தா சரியா இருக்காது என்றபடியே அவர் முன் தோன்றுகிறார் சிவன் யாரு பரமசிவனா பேசுறது என்று வியக்கும் பூசாரியிடம் பின்ன பாபநாசம் சிவனா பேசுறது என்று எதிரடிக்கும் சிவன் தோன்றிய பிறகுதான் படம் வேறு தளத்தில் பயணமாகத் தொடங்குகிறது.

“எனக்கும் பொருளாதாரத்துக்கும் என்னய்யா சம்மந்தம்” எனக் கேட்கும் சிவன், அப்ளாஸ்களை அள்ளுவாரா மாட்டாரா..?

“உன் பொண்ணு கல்யாணாத்துக்கு யாராவது அறிஞ்சவன் தெரிஞ்சவங்கிட்டே போயி காசு கேக்குறதை விட்டுட்டு எங்கிட்ட வந்து அளுதா நா என்ன கோயிலுக்கு பின்னால பேங்க்கா வச்சு நடத்திட்டு வர்றேன் என் உண்டியல்ல கூட நீங்கதானேய்யா பணத்தை போடுறீங்க அதுவும் கள்ளப்பணம் நா எடுத்து பார்க்கவா போறேன்ற தைரியம்” என்று கோபமாகிறார்.

“உன் பிரச்சினை பத்தாதுன்னு அன்னிக்கு அந்த கனகசபை வந்து உடம்பு கெட்டுப் போச்சுன்றான். அதுக்கும் காரணம் என் திருவிளையாடல்னு நீ சொல்றே… ஏன்யா அவன் உடம்பு கெட்டுப்போனதுக்கு அவன் திருவிளையாடல் காரணமா இல்லை என் திருவிளையாடல் காரணமா..?”

இந்த ரேஞ்சில் சிவனும் பூசாரியும் ஃப்ரெண்டாகின்றனர். பூசாரிக்கும் சிவனுக்கும் இடையே நிகழும் உரையாடல்களின் வழியாக யதார்த்தம் அழகாக வெளிப்படுகிறது.

கனகசபை தோற்றுவிடுகிறார். மாரப்பன் ஜெயித்து விடுகிறார்.

இந்த ஒரு காட்சியைப் பார்க்கலாம்

தோல்வி விரக்தியில் இருக்கும் கனகசபையைத் தேடி வருகிறான் வரதன்.

வரதன்: நான் தாங்க வரதன் உங்க தொண்டன் ரசிகன்

கனகசபை: நீயாடா வரதா கலங்கியபடி நான் தோத்துப்போனதைப் பார்த்து ரசிக்க வந்திருக்கியா

வரதன்: நீங்க தோத்துட்டீங்க. ஆனா உங்க கொள்கை ஜெயிச்சிடுச்சே.

கனகசபை: கொள்கை ஜெயிச்சிடுச்சா தன் கையிலிருக்கும் நாளிதழைத் தூர எறிந்தவாறே அதெப்படி?

வரதன்:என்னுடைய கொள்கையே நாட்டுல இருக்கிற பிச்சைக்காரங்களை ஒழிக்கிறதுதான். என்னுடைய கொள்கையைப் பின்பற்றும் ஒவ்வொருத்தரும் கடேசி மூச்சு இருக்கும்வரை பிச்சைக்காரர்களை ஒழித்தே தீருவோம் அப்டின்னு சபதம் எடுக்க சொல்லி அன்னிக்கு எலக்சன் மீட்டிங்குல மைக்க தட்டி சத்தியம் பண்ணிங்களே மறந்திட்டீங்களா..?

கனகசபை: அதை தட்டினா தாண்டா திருப்பித் தட்டாது தேர்தல் காலத்துல ஓட்டு வாங்குறதுக்காக சிலதை கொள்கைன்னு சொல்லவேண்டியது தான்.
தோத்த உடனே விட்டுற வேண்டியது தான்.இப்ப என்னான்ற நீ.?

வரதன்: இந்தா பாருங்க. உங்க கொள்கையை அவ்ளோ சாதாரணமா நெனக்காதீங்க.பிச்சைக்காரங்களை ஒழிக்கிறது நல்லதுன்னு எனக்கும் பட்டது.

கனகசபை: டேய் நொந்துபோயிருக்கிற நேரத்துல பட்டுது தொட்டுதுன்னு சொல்லாதே வெவரமா சொல்லுடா

வரதன்:முழுசா கேளுங்க முந்தா நாள் ரெண்டாவது ஆட்டம் சினிமா பாத்திட்டு வந்திட்டிருந்தேன்.நம்ம குண்டுப் பிள்ளை சத்திரத்துல ரெண்டு பிச்சைக்காரங்க படுத்து தூங்கிட்டிருந்தாங்க.அவங்களைப் பார்த்த உடனே உங்க ஞாபகம் தான் வந்துது. இதைச் சொன்னதும் உடனே குனிந்து தன்னையே உற்றுப் பார்த்துக் கொள்வார் தேங்காய். ஏண்டா

வரதன்: உங்க கொள்கை ஞாபகத்துக்கு வந்தது.இடுப்பில இருந்த கத்தியை எடுத்தேன். சதக் சதக் ஏத்தி இறக்கிட்டேன். கடைசி மூச்சு இருக்கும் வரை அப்டின்னு நீங்க சொன்னது ஞாபகத்துக்கு வந்தது. ஓடிப்போய் அவங்க மூக்குல கைய வச்சிப் பார்த்தேன். கடைசி மூச்சி இல்லே வந்திட்டேன்

அடப்பாவி என்று வெகுண்டு எழும் தேங்காய் தன்னை மெல்ல ஆஸ்வாசப்படுத்திக் கொண்டு வாசற்கதவை எல்லாம் மூடி விட்டு மறுபடி வந்து உள் ரூமைப்பார்த்து சாந்தமாக வீரைய்யா என வேலைக்காரனை அழைத்து வீரய்யா நாங்க முக்கியமான விஷயம் பேசப்போறோம்.நீ இங்க வரவே கூடாது என்று அமைதியாக சொல்லிவிட்டு பயம் அடங்காதவராய் போடா உள்ளே என்று கத்துவார் தேங்காய்.சிரிப்பில் வயிறு கிழியாவிட்டால் அது வயிறல்ல ரப்பர்.
மீண்டும் வரதனை நெருங்கி வந்து நீயாடா அந்தக் கொலையைப் பண்ணே என்பார் நம்ப மாட்டாமல்

வரதன்: ஆமாங்க இப்பிடி தெனம் ரெண்ரெண்டு பிச்சைக்காரங்களையா ஒழிச்சிட்டிருந்தம்னா கூடிய சீக்கிரத்துலயே நாட்ல உள்ள பிச்சைக்காரங்களையெல்லாம் ஒழிச்சிரமாட்டமா..?அப்டின்னு ஒரு நம்பிக்கை ஒரு தேசப்பற்று என்பார் அசால்டாக. அதைக் கேட்டு சீப்போ என்று குமுறும் தேங்காயிடம்

வரதன்: என்னாங்க பேப்பரைப் பார்த்தா சத்திரத்தில் ரெட்டைக்கொலை மர்ம ஆசாமியைப் போலீஸ் தேடுகிறது அப்டின்னு போட்டிருக்குதுங்க..எனும் சுருளி இப்போது மட்டும் தன் முகத்தைக் கோணிக்கொண்டு அழுகிறாற் போலாகி நாய் வேற தேடுதாம் என்றபடியே உடனே சகஜமாகி தலைமறைவா திரிஞ்சுகிட்டிருக்கேங்க..ஏங்க போலீஸ்காரங்க வந்து கேட்டா என்னங்க சொல்ல? நீங்க தான் பிச்சைக்காரங்களை ஒழிக்க சொன்னீங்க நான் ஒழிச்சேன்னு சொல்லிடலாம்களா? இதைக் கேட்டு வரதனையும் அடிக்க முடியாமல் தன் தலைமுடியை கிட்டத் தட்ட பிய்த்துக் கொண்டவாறே சட்டையைக் கசக்கிக் கொண்டு ” பிச்சைக்காரங்களை கத்தியால குத்தியாடா ஒழிக்க சொன்னேன். பிச்சையெடுக்கிற நெலமையை தாண்டா ஒழிக்க சொன்னேன்.ரெண்டு பேரைத் தீர்த்துக் கட்டிட்டு சர்வசாதாரணமா வந்து நிக்கிறியேடா பாவி” என்றதும்

கோபமாகும் வரதன் இப்பிடி மாறி மாறி பேசுனீங்கன்னா எனக்கு பிடிக்காது ஆமாம்.முந்தி என்னாய்யா சொன்னே தன் தலையில் துண்டைக் கட்டிக்கொண்டவாறே குடிசையெல்லாம் ஒழிக்கணும்னு சொன்னே ஒரு குடிசை விடாம தீய வச்சிக் கொளுத்துனேன்.இப்ப பிச்சைக்காரங்களை ஒளிக்கணும்னு சொன்னே இப்பத் தான் ஆரம்பிச்சிருக்கிறேன் வேலையைக் குடுக்கிறது செய்யவிடமாட்டேங்குறது என்னய்யா அர்த்தம் என்று வேகம் செய்வார்.

கனகசபை: டே நான் தோத்ததும் இல்லாம என்னைய தலைமறைவா இருக்க சொல்றியா?இப்பத்தான் நான் ஏன் தோத்தேன்னே புரியுது.எல்லாமே புரியாத தொண்டனுங்க. என்றபடியே பத்தாயிரம் ரூபாயைத் தந்து டெல்லிக்கு போயிடு என்று அனுப்பி வைப்பார் வரதனை.

தேங்காய் ஸ்ரீனிவாசன் சுருளிராஜன் இருவருமே தானாய் மலர்ந்த சுயமலர்கள்.ஒருவரை ஒருவர் விழுங்கி விடக் கூடிய திறமைச்சர்ப்பங்கள். இந்தப் படம் இருவருடைய உக்கிரமான நடிப்பாற்றலுக்கு ஒரு உதாரணம். நெடுங்காலம் இருந்திருந்தால் எத்தனையோ நல்ல நல்ல வேடங்களை செய்தளித்து உலகை இன்னும் பூவனமாக்கித் தந்திருக்க வேண்டிய அரிய ஆளுமைகள். பாதியில் அணைந்த தீபங்கள். சுருளி நாற்பத்தி இரண்டே வயதில் காலமானவர் என்பது வெறும் தகவல் அல்ல. திரைக்குப் பேரிழப்பு

வீகேராமசாமிக்கும் சுருளிக்கும் இடையே நடைபெறக் கூடிய முரண்சண்டைகள் இன்னும் ரசிக்கவைத்தன. இந்தப் படத்தின் நிச நாயகன் என்று தாராளமாக சுருளிராஜனை சொல்லலாம். மீவுரு செய்யமுடியாத அற்புத நடிகர் அவர்.

சிவன் தன் வருகையை நிறைக்கும் வரை அவர்களுக்கெல்லாம் என்ன நடக்கிறது என்பது தான் ருத்ரதாண்டவத்தின் கதை.விஜய்குமார் ராதாரவி எம்.ஆர்.ஆர் வாசு நாகேஷ் எனப் பலரும் நடித்திருந்தாலும் இந்தப் படம் நாகேஷூக்கும் வீ.கே.ராமசாமிக்குமான காம்பினேஷன்கள் வீ.கே. ஆர் சுருளி இணையும் காட்சிகள் மற்றும் தேங்காய் அண்ட் சுருளியின் அதகளம் என மூன்று லேயர்களாக முக்கியத்துவம் பெறுகிறது. வசனபூர்வ அங்கதம் சிரிப்பதற்கு மாத்திரம் அல்ல சிந்திப்பதற்குமானது. இந்தப் படம் தன்னளவில் புவியில் மனிதனின் பொறுப்பும் துறப்புமாக பல முக்கிய விசயங்களை அலசியவகையில் முக்கியமான படமாகிறது.எம்.எஸ்.விஸ்வநாதனின் நல்லிசை இசை படத்திற்குத் துணையாய் நின்று ஒலித்தது.

ருத்ரதாண்டவம் ஆனந்த ஊற்று
 

https://uyirmmai.com/literature/நூறு-கதை-நூறு-சினிமா-85-ருத்/

[கிருபன்]

நூறு கதை நூறு சினிமா:86 – துப்பாக்கி (13.11.2012)

September 20, 2019 - ஆத்மார்த்தி · இலக்கியம் சினிமா தொடர்கள்

 

நான் என்னவெல்லாம் கற்றுக்கொண்டேனோ அவற்றை திரைப்படங்களிலிருந்து தான் கற்றுக்கொண்டேன்.

-ஆட்ரே ஹெபர்ன்

ஏ.ஆர்.முருகதாஸ் தீனா, ரமணா மற்றும் கஜினி ஆகிய படங்களை வரிசையாக ஹிட் தந்தவர். அவர் எழுதி இயக்கிய துப்பாக்கி படம் ஆரம்பக் காட்சி முதல் படத்தின் முடிவுவரை விறுவிறுப்புக் குறையாமல் சென்று நிறையும் படம். விஜய் எல்லோர்க்கும் இனியவராக முன்வருவதற்கு மிகவும் உறுதுணையாக இருந்த படமென்றும் சொல்லலாம்.

கதை என்ன?

ஜெகதீஷ் ஒரு ராணுவ வீரன். அதைத் தவிர தீவிரவாத எதிர்ப்புச் சங்கிலி ஒன்றின் ஊரறியா ரகசியக் கண்ணியும் அவன். விடுமுறைக்காக மும்பையிலிருக்கும் குடும்பத்தைக் காண வருபவன் திருமணத்துக்குப் பெண் பார்க்கும் படலம் பார்த்த பெண்ணை வேண்டாமென மறுப்பது அதன்பின் அவளையே விரும்புவது என ஒரு இழை அவனது காதலுக்கானது. அடுத்த இழைதான் முக்கியமே அது தற்செயலாக பஸ் ஒன்றில் பிக்பாக்கெட் திருடனைத் தேடித் துழாவுகையில் சம்மந்தமின்றி ஒருவன் தப்பி ஓடுகிறான். பர்ஸ் கிடைத்தப் பிறகு இவன் ஏன் ஓடுகிறான் என்று ஜெகதீஷ் துரத்துகிறான். சற்றைக்கெல்லாம் அந்தப் பஸ்ஸில் அந்த மனிதன் வைத்திருந்த பை வெடித்துப் பலரும் பலியாகின்றனர்.

அந்த மனிதன் போலீஸ் பிணையிலிருந்து மருத்துவமனையில் இரண்டொரு பேரைக் கொன்றுவிட்டுத் தப்புகிறான். அவனைக் காணவில்லை என்று சொல்லப்படுகிறது. அவனைப் பிடித்து வைத்திருக்கும் ஜெக்தீஷ் அவன் மூலமாக அவனுக்கு உதவிய மருத்துவமனை செக்யூரிடி அலுவலர் வீட்டுக்குச் சென்று தனக்கு உண்மை தெரிந்துவிட்டது என்று கூறி அவர் தன்னைத்தானே சுட்டுக்கொள்ள நிர்ப்பந்திக்கிறான். வீடு திரும்புகிறவன் தன்னிடம் பிடிபட்டவனிடமிருந்து கிடைக்கும் வெறும் புள்ளிகளாலான வரைப்படத்தின் புதிரை அவிழ்க்க முயலுகிறான். இதற்கு இடையில் நிஷா எனும் அவன் பெண் பார்த்து மறுத்த நாயகிக்கும் அவனுக்கும் காதல் பூக்கிறது.

தாங்கள் யாருக்காக வேலை பார்க்கிறோம் என்றே தெரியாமல் பணத்துக்காகவும் மூளைச்சலவை செய்யப்பட்டதன் உந்துதலினாலும் என்ன கட்டளையானாலும் கீழ்ப்படிந்து அவற்றை நிறைவேற்றுவதற்குத் தங்கள் உயிரையே தரும் ஸ்லீப்பர் செல்ஸ் எனும் இதுவரை அருகே சென்று பார்த்திடாத மனிதர்களைத் துப்பாக்கி படம் நெருங்கிப் பார்க்க உதவியது.

மும்பை நகரின் பல இடங்களில் பெரும் சேதத்தை விளைவிக்கக்கூடிய வெடிகுண்டுகளைத் தனது ஸ்லீப்பர் செல்கள் மூலமாக கொண்டு சேர்த்து ஒரே தினம் பல இடங்களில் குண்டுவெடிப்புகளை நிகழ்த்தி இந்தியாவின் அமைதியைக் குலைப்பதற்காக சதி செய்து அதனை நிறைவேற்றுவதற்காக காத்திருக்கிறான் வில்லன். அவனுக்குக் கொஞ்சமும் தெரியாமல் அத்தனை பேரையும் தன் நண்பனான மிலிட்டரிக்காரன் திருமணத்துக்கு வந்திருக்கும் சகவீரர்களைக் கொண்டு தொடர்ந்து செல்ல வைக்கும் ஜெகதீஷ் அத்தனைப் பேரையும் ஒரே நேரத்தில் சுட்டு வீழ்த்துகிறான். செத்தவர்களில் ஒருவனிடமிருந்து கைப்பற்றும் ஸாடிலைட் ஃபோனில் அவனைத் தொடர்பு கொள்கிறான் வில்லன். நீ யார்னு எனக்குத் தெரியாது. நீ எங்கே இருக்கேன்னும் தெரியாது. ஆனா நான் உன்னைத் தேடி வருவேன். உன்னை என் கையால கொல்லுவேன் என்று தணிந்த குரலில் சொல்கிறான். அதற்கு ஜெகதீஷின் பதில் ‘நான் காத்திட்டிருக்கேன் வா’ என்பதாகிறது.

வில்லனின் கைக்கு ஆட்டம் போவது படத்தின் இரண்டாம் பகுதி. கொல்லப்பட்டவர்களில் ஒருவன் வில்லனின் உடன் பிறந்த தம்பி என்பது அவனுக்குக் கூடுதல் குருதிவெறியைத் தராமலா போகும். ஜெக்தீஷ் யார் என்ன என்பதை எல்லாம் தவிர்த்துவிட்டு என்ன உளவியலில் அவன் அத்தனைப் பேரைக் கொன்றான் என்பதை அழகாகக்த் துப்புத் துலக்கி திருமணமான நண்பனின் வீட்டைக் கண்டறிந்து வரிசையாக அந்த ஆபரேஷனில் ஈடுபட்டவர்கள் ஒவ்வொருவரையாகப் பார்த்துப் பார்த்து தன் கையால் கொல்ல ஆரம்பிக்கிறான் வில்லன். அவனுடைய பிடியில் ஜெக்தீஷின் தங்கைகளும் சிக்குகின்றனர். வில்லனைக் கொன்றழிப்பது மட்டும்தான் அவனுக்குக் கீழே இருக்கக்கூடிய எண்ணற்ற ஸ்லீப்பர் செல்களை முடக்க ஒரேவழி என்று அதனை நிறைவேற்றி நாடு காக்கிறான் ஜெக்தீஷ். நிறைகிறது துப்பாக்கி படம்.

துப்பாக்கி தமிழில் இரண்டாயிரத்துக்கு அப்புறம் எடுக்கப்பட்ட முழுமையான ஹீரோயிஸப் படம். அது நல்ல முறையில் பலிதமானது என்பதுதான் விஷயம். விஜய் தன்னை ஒரு மக்கள் அபிமான நாயகனாக நிலைநிறுத்திக்கொண்ட பிறகு எல்லாம் வல்ல நாயகனாக தோன்ற முயன்ற சிலபல படங்கள் அவருக்குக் கைகொடுக்கவில்லை. ஆனால் துப்பாக்கி அத்தனை காயங்கள் மீதும் குளிராய் வருடியது.

இந்தப் படத்தின் அனேக பாத்திரங்கள் நன்றாக வார்த்தெடுக்கப் பட்டிருந்தன. நடிகர்களின் உறுத்தாத நேர்த்திக் காட்சி அனுபவத்தை வசீகரம் செய்தது. மனோபாலா, சத்யன், ஜெய்ராம் மூவருக்கும் இந்தப் படம் முக்கியமானது என்று சொல்லத் தகும். ஜெய்ராம், விஜய், காஜல் ஆகியோரது எபிஸோட் படத்தின் மைய விறுவிறுப்பைத் துண்டாடாமல் அதே சமயம் இயல்பான நகைச்சுவைத் தூறலாக நனைத்தது. கதை நகர்ந்த விதமும் குன்றாத சுவாரசியப் பரவலும் துப்பாக்கியின் தோட்டாக்களாகவே திகழ்ந்தன.

காஜல் அகர்வால் நிஷாவாக துல்லியம் நிகழ்த்தி நல்லதொரு நடிப்பை வழங்கினார். ஹார்ஸ் ஜெயராஜின் இசையும் பின்னணி ஸ்கோரும் துப்பாக்கியின் பலங்கள் என்றால் சந்தோஷ் சிவனின் ஒளிப்பதிவு கண்வருடும் கலையானது. வசனங்களும் கதை நகர்ந்த நதியும் துப்பாக்கி படத்தை உயர்த்தி நிறுத்தின. காஜல் ஜெய்ராம் விஜய் மூவருக்குமிடையிலான நகைச்சுவை கதைக்குள் கதையாக உறுத்தாமல் அதே நேரம் ரசிக்கத்தக்க பகுதியாகவும் இருந்தது.

வித்யுத் ஜம்வால் இந்தப் படத்தின் எதிர்நாயகன். அலட்டாத எவ்விதமான மிகை கொனஷ்டைகளும் இல்லாத சன்னமான குரலும் தெளிவான கண்களுமாக வெகு நாட்களுக்கப்பால் முழுமையான தனித்துவமான வில்லனுக்குண்டான கூறுகளோடு தெரிந்தார். ஆர்ப்பாட்டமில்லாத அமைதி என்பதே வில்லத் தனமான குணாம்சம் தான் இல்லையா?

ஏ.ஆர்.முருகதாஸ் இயக்கிய துப்பாக்கி படம் வணிக எல்லைகளுக்குள் முழுவதுமாக இயங்கிய மற்றுமொரு படம்.

துப்பாக்கி சூப்பர் நாயக சாகசம்

 

 

https://uyirmmai.com/literature/நூறு-கதை-நூறு-சினிமா86-துப்/

 

[கிருபன்]

நூறு கதை நூறு சினிமா:87 – சந்திரமுகி

September 21, 2019 - ஆத்மார்த்தி · இலக்கியம் சினிமா தொடர்கள்

 

ஒரு திரைப்படத்திற்கான ரகசியமென்பது என்னவென்றால் அது ஒரு மாயை என்பதே

-ஜார்ஜ் லூகாஸ்

மணிச்சித்திரதாழு படம் மலையாளத்தில் பெரும் வெற்றி பெற்றது. இந்த வாக்கியத்தில் உள்ள பெரும் என்ற வார்த்தை அதனளவில் ஒரு நிலத்தில் ஒரு திரைப்படம் என்னமாதிரி பெரிய வரவேற்பைப் பெறுமோ அதனைக் குறிக்கலாம். ஆனால் அதன் மையக் கதையை வாங்கி பி.வாசுதான் உருவாக்கிய ஆப்தமித்ரா கன்னடமும் அதன் மறுவுருவான சந்திரமுகி தமிழ்ப் படமும் பெற்ற வெற்றிகளுக்கு முன்னால் முன் சொன்ன மலையாள மூலத்தின் வெற்றி ஒரு சொல்லளவுதான்.

ரஜினி எனும் சூப்பர் பிம்பம் பாபா படத்தின் பெருந்தோல்விக்கு அப்பால் இன்னொரு சூப்பர்ஹிட்டோடு திரும்பி வரவேண்டும் என்கிற முனைப்பில் பார்த்துப் பார்த்து உருவாக்கப் பட்ட படம் சந்திரமுகி. முந்தைய நிராகரிப்பால் மனம் சோர்ந்த சூப்பர்ஸ்டார் அதனை வெளிப்படுத்தி விடாமல் அதிரிபுதிரியான வெற்றி ஒன்றின் மூலமாகப் பதிலெழுத விழைந்தபோது பெரும் கூட்டமாக நட்சத்திரங்களோடு களம் இறங்காமல் அழுத்தமான கதை மற்றும் அதன் தேவைக்கேற்ப முகங்களும் மனங்களுமாக படம் செய்தது நன்மை பயத்தது.

பி.வாசு திரைக்கதை அமைப்பதில் நகைச்சுவைக் காட்சிகளைத் தனி ட்ராக்காகவும் கதையின் உப இழையாகவும் இரண்டுமாகச் செய்துவிடுவதில் சமர்த்தர். சந்தானபாரதியின் இணையிலிருந்து வெளியேறி வாசு தனியே இயக்கிப பல படங்கள் கதைக்காகவும் நகைச்சுவைக்காகவும் இன்றளவும் நினைவுகூரப் படுவது மெய். அந்த வகையில் சந்திரமுகி படத்தில் வடிவேலு அதுவரை தான் தாண்டியிருந்த எல்லா உயரங்களையும்தானே தகர்த்தார். வடிவேலு, ரஜினி, நாஸர் ஆகியோரிடையில் அமைந்த காமெடி நன்றாக பலிதமானது. திரை அரங்குகளில் குழுமிய யாரையும் வடிவேலு வசீகரித்தார். அவரை நீக்கிவிட்டு சந்திரமுகி பற்றிப் பேசவே முடியாது என்ற அளவில் வடிவேலுவின் பங்கேற்பு அமைந்திருந்தது.

ரஜினி எந்த சைகையும் சமிக்ஞையும் இல்லாமல் நடித்த படமாயிற்று சந்திரமுகி. அவர் அரசியல் நகாசுகள் எதுவும் இல்லாமல் தன் படத்தை உருவாக்கினார் பி.வாசு. கதைக்குக் கட்டுப்பட்டு நடித்ததே ரஜினியின் பங்கேற்பாக அமைந்தது. வடிவேலு தன் நிழலாலும் நடித்தார். தனக்குத் தானே பேசிக் கொள்வதாகட்டும் தான் மனதில் நினைப்பதை எல்லாம் அறிந்து தன்னிடமே சொல்லும் டாக்டர் சரவணன் முன்பாக மனதிலும் எதையும் நினைக்கமுடியாமல் தவிப்பதிலாகட்டும் எந்நேரமும் தயங்கி மயங்கித் திரிவதிலாகட்டும் அவருடைய அசைவுகளும் சப்தங்களும் அழுகையும் சிரிப்பும் மௌனமும் ஆவேசமும் என எல்லாமே நகைக்க வைத்தன. தமிழ் சினிமாவின் நகைச்சுவை நடிகர்களின் வரிசையில் வடிவேலு என்கிற மறக்க முடியாத பெயரின் தகர்க்க முடியாத படமாக சந்திரமுகியை எப்போதும் சொல்லலாம். தகும்.

கதையைப் பொறுத்தமட்டில் பலவிதமான பழையகால நம்பகங்களை உயர்த்திப் பிடிப்பதா? நிராகரிப்பதா? என்ற குழப்பத்தோடு சுற்றிவளைத்து அமைக்கப்பட்டிருந்தாலும் அறிவியலும் தொன்மமும் அடுத்தடுத்த கிண்ணங்களில் வார்த்தெடுத்து மொத்தக் கதைக்கு உடன்வரும் வகையில் பயனாக்கம் செய்யப்பட்டிருந்தது. பழைய ஜமீன் பங்களாவை விலைக்கு வாங்கி அங்கே குடியேறுகிற தன் நண்பனின் குடும்பம் அங்கே ஒரு மறைவறையில் இருப்பதாக நம்பப் படுகிற சந்திரமுகி என்கிற முன் காலத்து நாட்டிய நங்கையின் ஆவி நண்பன் செந்திலின் மனைவி கங்காவின் உடலில் புகுந்து அவள் மூலமாக அத்தனை பேரையும் படுத்தி எடுக்கிறது. உளவியல் நிபுணரான டாக்டர் சரவணன் எப்படி அந்தக் குடும்பத்தைப் பேய்வசத்திலிருந்து காப்பாற்றுகிறார் என்பதே கதை. சொல்ல வந்த கதைக்குள் பழையகாலக் கதை ஒன்று வசீகரமாகத் தோன்றியது.

வேட்டையன் மகாராஜா என்ற பேரில் பழைய வில்லத்தனத்தை நினைவுபடுத்தி ரஜினி ஸ்டைலாகத் தோன்றியதை எல்லோரும் ரசித்தார்கள். கடைசியில் பல சூழ்ச்சிகளை வென்று சுபம் என்றாகும் சந்திரமுகி படம் கதை சொன்ன விதத்துக்காகவும் காமெடிக்காகவும் இசை மற்றும் பாடல்கள் பாந்தமான ஒளிப்பதிவு என எல்லா ப்ளஸ் பாயிண்டுகளும் சேர்த்த அதன் விருந்தோம்பலுக்காகவும் எல்லாக் காலங்களுக்குமான நற்படமாக மாறியது.

நயன்தாரா, நாஸர், ஷீலா, ஸ்வர்ணா, மனோபாலா, விஜயகுமார், வினீத், கே.ஆர்.விஜயா போன்றவர்களோடு பிரபுவும் நடித்திருந்தார். ரஜினிக்கு சமமான கதாபாத்திரத்தில் ஜோதிகா தன் கண்களால் சந்திரமுகி என்கிற முன் காலப் பெண்ணாகத் தத்ரூபம் காட்டினார். மனப்பிறழ்வு என்பதைத் திரையில் பரிணமித்த நடிகவரிசையில் ஜோதிகா இந்தப் படத்துக்காக மெனக்கெட்டதன் பலன் என்றென்றும் அவரை இடம்பெறச் செய்யும் என்பதில் கருத்து மாற்றமில்லை.

வித்யாசாகரின் இசை எல்லாப் பாடல்களுமே மழை என்றானது. வருடக்கணக்கில் ஓடிய தமிழ்ப் படங்களின் வரிசையில் இந்தப் படம் இடம்பெற்றதற்கு இசை உட்பட எல்லாமே காரணங்களாயின. தான் மட்டுமே அறிந்த சபதத்தில் வென்றெழுந்தார் ரஜினி எனும் சூப்பர்ஸ்டார்.

சந்திரமுகி நிலாச்சோறு

 

https://uyirmmai.com/literature/நூறு-கதை-நூறு-சினிமா87-சந்த/

 

[கிருபன்]

நூறு கதை நூறு சினிமா: 88 – ஹானஸ்ட் ராஜ் (14 ஏப்ரல் 1994)

September 24, 2019 - ஆத்மார்த்தி · இலக்கியம் சினிமா தொடர்கள்

 

கலை சமூகத்தைப் பிரதிபலிக்கிறது. திரைப்படம் எப்போதும் கட்டளையிடுவதில்லை. சமூகத்திற்கு எது தேவை என்பதை நீங்கள் சித்தரிக்கிறீர்கள்.

-சோனம் கபூர்

அந்தந்த நிலத்துக்கென்று நம்பகங்கள் உண்டு. அவற்றைப் பெரும்பாலும் தகர்க்கிற துணிச்சல் திரைப்பட உருவாக்கங்களில் இருப்பதில்லை. படத்தின் பின்னால் இருக்கக்கூடிய வணிக நிர்ப்பந்தங்கள் அதன் சிறகுகளின்மீது கட்டப்படுகிற கற்களைப்போல் கனப்பவை. எல்லாருக்கும்தான் நினைத்த படங்களை எடுத்துவிடுவதற்கான வாய்ப்பு கிடைப்பதில்லை. அதைமீறி படம் வாய்த்தவர்களுக்கும் ஆயிரமாயிரம் தடைகள் இருந்தவண்ணமே ஒரு சினிமா நிகழும்.

காதலைப் போலவே நட்பும் அதீதமாக ஏற்றித்தரப்பட்ட புனிதங்களுடனே எப்போதும் படமாக்கப்பட்டு வருவது சினிமாவின் இயல்பு நட்பு என்பது ஒரு உணர்வு சாகசம். இயல்பு வாழ்க்கையில் நட்பு அதன் இல்லாச்சிறகுகள் உதிர்ந்து இருகால்களால் நடை போடுவது அதன் நிசம். சினிமாவில் நட்புக்குச் சிறகுகள் உண்டு. அதீதம் அதன் வானம்.

அடுத்துக் கெடுத்தல் உண்ட வீட்டுக்கு ரெண்டகம் உப்புத் துரோகம் ஆகியவை காலம் காலமாக உயிர் குடித்துச் செடி வளர்த்த பல கதைகள் இங்குண்டு. ஆனால் சொற்பமாகவே படங்களில் காட்சிப்படுத்தப்பட்டிருக்கின்றன. இது ஹானஸ்ட் ராஜின் கதை என்று சொல்வதைவிட வரதனின் கதை எனத் தொடங்குவதுதான் சிறப்பாக இருக்கும். அதுவே நிசமாகவும் அமையும்.

வரதன் தன் தந்தை வாங்கிய கடன்களை எப்படி அடைப்பதென்று தெரியாமல் திகைப்பவன். ஒரு வழியுமற்றவனுக்கு வாழ்வை முடித்துக் கொள்வது தானே வழியாக அமையும் அப்படித் தற்கொலையைத் தேடுகிற சமயத்தில் நானிருக்கிறேன் என்று அவனைக் காப்பாற்றுகிறான் அவனது நெடுங்கால நண்பன் ராஜ் எனும் பெயரிலான நேர்மையின் சின்னமாய் விளங்குகிற காரணத்தால் காக்கிச்சட்டைகளின் உலகத்தில் ஹானஸ்ட் ராஜ் என்று அழைக்கப்படுகிற நாயகன்.

ராஜின் அம்மாதான் பெறாத மகனாகவே வரதனைத் தேற்றுகிறாள். ராஜின் மனைவி புஷ்பாவுக்கு வரதன் உடன்பிறவாத அண்ணன். மெல்லத் தேறித் தன் பழைய பிரிண்டிங் ப்ரஸ் தொழிலில் மீண்டும் நுழையும் வரதன் இந்த முறை தோற்பதாயில்லை. அவனுக்குத் தெரியாமல் அவன் ப்ரஸ்ஸில் கள்ள நோட்டுக்களை அடிப்பதைத் தெரிந்து கொள்பவன் தானும் அதே தொழிலை செய்யத் தொடங்குகிறான். குறுகிய காலத்தில் தன் பழைய பின்புலத்திலிருந்து மீண்டு எழுகிறான். தற்போது அவனொரு பிரமுகன். ஐபிஎஸ் அதிகாரியாகத் திரும்பித் தன் குடும்பத்தோடு வருகிற ஹானஸ்ட் ராஜ் தன் நண்பன் செல்வந்தனாக மாறி இருப்பதை நினைத்து உண்மையிலேயே மகிழ்கிறான்.

சட்டவிரோதிக்கும் நேர்மைக்கும் முரண்படுவது இயல்புதானே தன் உயிரைக் காப்பாற்றியவன் என்றும் பாராமல் ராஜின் குடும்பத்தை அழிக்கிறான் வரதன். ராஜ் நெடுங்காலம் கோமாவில் தான் யாரென்றே தெரியாமல் இருக்கிறான். அவனுடைய ஒரே நம்பிக்கை அவனது சிறுமகன். இந்த நிலையில் அவனுக்கு டாக்டர் அபிநயா உதவுகிறார். மீண்டெழும் ராஜ் வரதை அழித்துத் தன் மகன் பப்லூவோடு சேர்வது கதையின் நிறைபகுதி.

இசை, எடிடிங், ஒளிப்பதிவு ஆகிய மூன்றும் ஒரு படத்திற்குள் என்னவெல்லாம் செய்யும் என்பதற்கு சிறப்பான உதாரணமாக இப்படத்தை சொல்லமுடியும். ரவி.கே.சந்திரனின் ஒளிப்பதிவு உள்ளும் புறமும் நிசத்தின் சாட்சியங்களாகவே பல காட்சிகளை வசீகரப்படுத்தின. தேவையற்ற ஒளியைக் குவித்தலைத் தன் படத்தின் ஒரு ஃப்ரேமில் கூட அனுமதிக்காத ரவி.கே.சந்திரனின் பிடிவாதம் இயல்பான இருளும் குன்றிய ஒளியுமாக ஒரு கவிதைபோலவே பல காட்சிகளை அமைத்திருந்தன. நெடியதொரு சண்டைக்காட்சிக்கு முன் பப்லூவும் விஜயகாந்தும் சேருகிற காட்சி ரவியின் கேமிராவுக்கு மட்டுமல்ல அனில் மல்நாடின் எடிட்டிங்குக்கும் சான்றுகளாயிற்று. மதுவின் வசனங்களும் கே.எஸ்.ரவியின் இயக்கமுமாக ஹானஸ்ட்ராஜ் எல்லோரையும் கவர்ந்தது. முக்கியமாக இப்படத்தின் கதைக்கலவை சொன்ன விதத்தாலும் காட்சியனுபவத்தை வித்யாசமாக்கித் தந்தது.

இளையராஜா இந்தப் படத்தின் பின்னணி இசையில் நட்பின் வலியை துரோகத்தின் வஞ்சகத்தை இயலாமையின் கேவலை பழியின் உக்கிரத்தை பாசத்தின் கண்மறை கணங்களை எல்லாம் மீட்டித் தந்தது. வானில் விடிவெள்ளி மின்னிடும் மின்னிடும் நேரம் என்ற ஒரு பாடல் அதற்குள் பலவிதமான இசை சங்கமித்தலை உணர்வுக்குழைதலை சம்பவக் கோர்வைகளை எல்லாம் பிரதிபலித்தது. இதனை வெவ்வேறு தொனியில் ஜானகியும் மனோவும் பாடிய வித்யாசமும் குறிப்பிடத்தக்கதாகிறது

தனக்கு வேறு வழியே இல்லை என்றாற் போலவே குற்ற உணர்வும் கெஞ்சுமொழியுமாக ஒரு இடமும் வேறு வழியே இல்லை நான் வாழ்ந்தாக என்னவேண்டுமானாலும் செய்வேன் என்றாற் போல் கொன்றழிக்கும் ஆவேசமாக அடுத்த இடமுமாக வரதன் என்ற முன்னாள் தோல்வியுற்றவனாகவும் இன்னாள் செல்வந்தனாகவும் நன்றிக்கடனை விடத் தன்னலம் மிக முக்கியம் என்ற அளவில் பொது நியாயங்களைத் திருத்தி எழுத முற்படுகிற தனக்குண்டான சாதகங்களைத் தீர்ப்பாக்கி விடுகிற உச்சபட்ச வஞ்சக மனிதனாக வரதனாக தேவன் இந்தப் படத்தில் அதுவரை யாரும் பார்த்திடாத பேருருவாய்த் தோற்றமளித்தார். ஆனஸ்ட்ராஜ் நிச்சயமாக ஒரு தேவன் படம்.

மேலோட்டமாகப் பார்த்தால் எளிதாகக் கடந்து விடக் கூடிய சாதாரணக் கதை. ஆனால் தேவன் மற்றும் விஜயகாந்த் எனும் இருவரின் கதாபாத்திரமாக்கல் அவற்றிற்கிடையேயான சமரசம் செய்துகொள்ள முடியாத முரண் அதன் பின்னதான கதாநியாயம் இவற்றால் ஹானஸ்ட் ராஜ் படம் தமிழின் குறிப்பிடத்தக்க படங்களில் ஒன்றாகிறது.
 

https://uyirmmai.com/literature/நூறு-கதை-நூறு-சினிமா-88-ஹானஸ/

[கிருபன்]

நூறுகதை நூறு சினிமா:89 – சூதுகவ்வும் (01.05.2013)

September 25, 2019 - ஆத்மார்த்தி · இலக்கியம் சினிமா தொடர்கள்

 

எப்போதும் கைவிட்டுவிடாதே எப்போதும் சரணடைந்துவிடாதே

-கமாண்டர் க்வின்ஸி டகார்ட் காலக்ஸி க்வெஸ்ட்

கதையை வித்யாசப்படுத்துவதற்காக எதையுமே செய்யத் தேவையில்லை. அது நடக்கிற காலம் நிகழ்கிற களம் அடுத்தடுத்த நகர்தல்கள் இவற்றை வழமைக்குச் சம்மந்தமில்லாமல் மாற்றி யோசித்தால் மட்டுமே போதுமானது. இவ்வளவு ஏன்? கதையை வித்யாசப்படுத்துவதற்குக் கதாபாத்திரங்களின் குணாதிசயங்களை மட்டும் மாற்றி யோசித்தால் போதும். கதை தானாய்ப் புரண்டு அழக்கூடிய குழந்தை மாதிரி.

நலன் குமரசாமி எழுதி இயக்கிய சூதுகவ்வும் கலைத்துப் போட்ட சீட்டுக்களைக் கொண்டு புதிய ஆட்டமொன்றைத் துவங்குவதைத் தவிர புதிய திசை புது நியாயம் ஏதுமில்லை என்பதாகத் தன்னைத் தொடங்கிக் கொள்கிறது கதை.

எப்படியாவது யாரையாவது கடத்தி எதையாவது சம்பாதிப்பதை நோக்கமாகக் கொண்ட நாயகன் ஒரு பெண்ணைக் கடத்த முயலுகையில் கார் ஸ்டார்ட் ஆகத் தாமதமாகவே அவள் தர்ம மொத்து மொத்துகிறாள். தப்பித்தோம் பிழைத்தோம் என்று ஒடுகிறான். அவனது கண்களுக்கு மட்டும் புலப்படும் இல்யூஷன் ஷாலினி தன்னிடம் மணி கேட்பவனிடம் சில்றை இல்லைப்பா என்று விரட்டுகிறான். நானென்ன பிச்சையா கேட்டேன் மணி என்னான்னு தானே கேட்டேன் என்று அந்த ஸ்ப்ரிங் சிகையாளர் வாழ்வு வெறுத்து நாயகனைத் துரத்துகிறார்.

க்விக் மணி அதாவது வருந்தாமல் விரைவாகப் பணம் சேர்க்க வேண்டும் என்பது மனித மூளையின் விசித்திரக் கனவுகளில் ஒன்று எல்லாருக்குமே தனக்கு எதாவதொரு அதிர்ஷ்டம் வராதா என்று ஏங்கப் பிடிக்கிறது. அடுத்தவர் கைப்பொருளைக் கவர்ந்து களவு செய்வதுவரை எல்லோரும் அப்படியான கனவை உதிராமல் பற்றிக்கொண்டு பின்தொடர்ந்து செல்லும் சிலர் அதை குற்றப்பூர்வமாக சாத்தியம் செய்திட விழைகிறார்கள்.

அங்கதம் என்றைக்குமே அபூர்வம் தான். இந்தப் படத்தின் வசனம் ஆகப் பெரிய பலம். இதை இட்லின்னு சொன்னா சட்னி கூட ஒத்துக்காதுடா என்பதில் ஆரம்பித்து வசனம் மூலமாகவும் காட்சிமொழியாலும் சின்னஞ்சிறு அசைவுகளாலும் ஸ்பூஃப் என்பதற்கான இலக்கணத்தை விஞ்சாமல் பல தெறிப்புக்களோடு சூதுகவ்வும் மலர்ந்தது.

என்கவுண்டர் ஸ்பெசலிஸ்ட் தன் பின்புறத்தில் ஸ்டைலாக துப்பாக்கியை செருகும்போது அது வெடித்துவிடுகிறது என்பதை ஒரு படத்தின் களைமேக்ஸ் ட்விஸ்ட் ஆக யோசிக்க முடியும் என்பதுதான் இக்கதையின் விசித்திரத்துக்கு ஒரு சான்று.

படத்தின் ஆரம்பத்தில் சொந்த ஊரான திருச்சியில் நடிகை நயன்தாராவுக்கு கோயில் கட்டியதாக செய்தித் தாட்களில் பேருடன் செய்தி வருகிற பாபி சிம்மா, இனி ஊரில் இருக்கமுடியாது எனும் நிலையில் வீட்டார் நிர்ப்பந்திக்க சென்னைக்குத் தன் நண்பன் அருள்செல்வனது அறையைப் பகிர்ந்துகொள்ள வந்து சேர்கிறார். அந்த செய்தியோடு அடுத்தடுத்த பக்கங்களில் ரவுடி டாக்டர் விடுதலை என்று வருகிறதையும் வாய் திறந்து பேசாத சைக்கோ போலீஸ் அதிகாரி பிரம்மா மாற்றலாவதையும் வாசிக்க முடிகிறது. நண்பன் வந்து சேர்ந்த நேரம் அருள்செல்வனுக்கும் வேலை போகிறது ஏற்கனவே அவருடன் அறையைப் பகிர்ந்திருக்கும் ட்ரைவரான இன்னொரு நண்பர் ஒரு வாரம் முன்பு தான் வேலை இழந்திருக்கிறார். இவர்கள் மூவரும் தனக்கென்று தனிக் கொள்கையோடு ஆள் கடத்தி சம்பாதிப்பதற்கான முயற்சியில் இருக்கும் விஜய் சேதுபதியுடன் கூட்டு சேர்ந்து கொள்வது படத்தின் முதல் விள்ளல்.

ரெண்டாவது விள்ளல் சுவாரசியம் அதிகம் எனலாம். அருமை நாயகம் என்ற பேரில் இந்தியாவின் கடைசி நேர்மையான அரசியல்வாதி என்று கருதப்படுகிற அமைச்சர் ஞானோதயத்தின் ஒரே மகன். அப்பா அமைச்சர் என்பதன் பலனாக ஒரு பன்ரொட்டி கூட வாய்க்கப் பெறாதவன் தொழில் தொடங்க காசு கேட்கும்போது நீ வேலைக்கு போயி சம்பாதி. அப்பறம் அந்தக் காசுல தொழில் பண்ணு என்று விரட்டும் தந்தை. அவரொரு புகழ்விரும்பி தன்னிடம் லஞ்சம் கொடுக்க வரும் தொழிலதிபர் ஒருவரை லஞ்ச ஒழிப்பு போலீசாரிடம் கைக்களவாகப் பிடித்துத் தருகிறார். அந்தத் தொழிலதிபரின் தம்பி எப்படியாவது அமைச்சரைப் பழிவாங்க வேண்டுமென்று சில்லறைக் கடத்தல் சேதுபதியிடம் வந்து அமைச்சர் மகனைக் கடத்தி ரெண்டு கோடி பணம் டிமாண்ட் செய்து அமைச்சரிடமிருந்து நீங்களே பெற்றுக்கொள்ளுங்கள் என்று ஆஃபர் வைக்கிறார். இது நல்லாருக்கே என்று தன் புது டீம் சகிதம் இந்த முயற்சியில் இறங்கி சொதப்புகிறார்கள்.

மூன்றாம் விள்ளல் ஆரம்பம். தன்னைத் தானே கடத்த ஆள் செட்டப் செய்து திட்டத்தைச் செயல்படுத்தும் போது குறுக்கே வந்து கெடுத்துவிட்ட விஜய் சேதுபதி அண்ட் டீமை மன்னித்து மறுபடி அதே ப்ளானை தன் கூட்டாளிகளாக செயல்படுத்த செய்கிறான் வெற்றிகரமாக இரண்டு கோடி பணம் கை வந்து சேர்கிறது. மந்திரி ஞானோதயத்தின் நேர்மை பலிக்காமல் போகிறது. கட்சி நிதியிலிருந்து 2 கோடி பணத்தைத் தந்து மகனை ஒழுங்கா மீட்டுட்டு வீடு போய் சேரு என்று முதல்வர் வலியுறுத்துகிறார். அப்படியே செய்தால் பணத்தை பகிர்வதில் மக்களுக்குள் சண்டை வர மந்திரி மகன் மீண்டும் தன் வீட்டுக்கு மொத்தப் பணத்தோடு சென்று சேர்கிறான். சிறு வண்டி விபத்தில் மற்ற சகாக்கள் அடிபட்டு விழிப்பதோடு இடைவேளை.

தன் மானம் அழிந்துவிட்டதாக புலம்பும் மந்திரி ஞானோதயம் மைத்துனர் மணிகண்டன் எனும் ஐஜியை அதட்டி திண்டுக்கல்லில் இருந்து இன்ஸ்பெக்டர் பிரம்மாவை சென்னைக்கு வரவழைத்து தன் மகனைக் கடத்தியவர்களை 48 மணி நேரத்தில் பிடித்தாக வேண்டும் என்று உத்தரவிடுகிறார். இன்ஸ்பெக்டர் பிரம்மாவிடமிருந்து எப்படி அந்தக் குழு தப்புகிறது என்பது ப்ரீ க்ளைமேக்ஸ்.

இனி நீ கட்சிக்கு தேவையில்லை என்று அடுத்து வரவிருக்கும் எலக்சனில் ஞானோதயத்துக்குப் பதிலாக அருமை நாயகத்துக்கு ஸீட் தரப்பட்டு அவரும் ஜெயித்து எம்.எல்.ஏ. ஆகி மந்திரியுமாகிறார். கடத்தல் சகாக்களில் சேது தவிர்த்த இருவரும் அவரது அந்தரங்க காரியதரிசிகளாகி லஞ்சங்களை மேலாண் செய்வதோடு படம் நிறைகிறது.ஓய்வு பெற்ற மந்திரி ஞானோதயம் தன் செல்லா நேர்மையோடு முறைத்துப் பார்க்கிறார். இல்யூஷன் நாயகி நிசமாகவே எதிர்ப்பட அவளைக் கடத்துகிறார் நோய்மை சேதுபதி.

நலன் குமரசாமி படமெங்கும் சிறுதூவல்களாக வைத்திருந்த உலர் அங்கதம். இந்தப் படத்தை முக்கியமான அனுபவ சாத்தியமாக்கிற்று. எல்லாமே வெவ்வேறாக என வழக்கத்திலிருப்பதையே எடுத்து வழக்கத்திற்கு மாற்றாக்கி அடுக்கிக்கொண்டே சென்றிருப்பது திரைக்கதை அமைப்பின் பலம். நடிகர்களும் சம்பவங்களும் கடைசிவரை வண்ணமயமான காண் இன்பமாக இப்படத்தை மாற்றியது சுவை.

உனக்கு நடிக்கத் தெரியுமா இது தாஸ்
ம்ஹூம் மண்டை ஆட்டி தெரியாதென்பது பாபி சிம்மா
ஸ்கூல்ல காலேஜ்ல எதுனா நாடகம் நடிச்சிருக்கியா மறுபடி தாஸ்
இதற்கும் தலையை ஆட்டி மறுக்கும் பாபி
நடிப்பு சொல்லிக் குடுத்து நடிக்க வச்சா நடிச்சிருவியா இது தாஸ்
இதற்கும் முடியாது என்றாற் போலவே தலையை ஆட்டும் பாபி
இந்த இடத்தில் ஹப்பா என்று தன் இரு கண்களை மூடித் திறந்து நிம்மதியாகி
உன்னைதாண்டா எட்டு மாசமா தேடிட்டிருந்தேன் நீ தாண்டா என் படத்தோட ஹீரோ என்பார் தாஸ்.
அவரே பட நிறைவில் பாபியின் கன்னத்தில் பளார் பளார் என்று அறைந்து ஏன் ஏன் ஏண்டா இந்த மூஞ்சிக்கு ரொமான்ஸ் வரமாட்டேங்குது என்பார்.

சந்தோஷ் நாராயணன் மெனக்கெட்டது வீண் போகவில்லை. இந்தப் படத்தின் தீம் ம்யூசிக்கும் முக்கியமான கட்டங்களில் பின்னணி இசையும் காசு பணம் துட்டு மணி மணி பாடலும் இன்றளவும் மனனத்திலிருந்து நீங்காமல் ஒலித்தவண்ணம் இருப்பது இசையின் மேன்மைக்குச் சாட்சி.

அருள்தாஸ், பாபி சிம்மா, யோகிபாபு, அருள் செல்வன், வெங்கட், முனீஷ்காந்த், எம்.எஸ்.பாஸ்கர், ராதாரவி, சஞ்சிதாஷெட்டி, கருணாகரன் என நடிகர்களும் தினேஷ் கிருஷ்ணன் ஒளிப்பதிவும் ஜான்பால் லியோவின் எடிட்டிங்க் என எல்லாமே நன்றாக அமைந்திருந்தது எனலாம்.

அபூர்வமான அங்கத படங்களில் முக்கியமான ஒன்று.

 

https://uyirmmai.com/literature/நூறுகதை-நூறு-சினிமா89-சூது/

 

[கிருபன்]

நூறு கதை நூறு சினிமா:90- ஒரு கைதியின் டைரி (14.01.1985)

September 27, 2019 - ஆத்மார்த்தி · இலக்கியம் சினிமா தொடர்கள்

நியோ: அது உண்மையானதல்ல என்று நினைத்தேன்

மார்பியஸ் உங்கள் மனம் அதை உண்மையானதாக்குகிறது

நியோ: நீங்கள் மேட்ரிக்ஸில் கொல்லப்பட்டால், நீங்கள் இங்கே இறக்கிறீர்களா?

மார்பியஸ் மனம் இல்லாமல் உடல் வாழ முடியாது – The Matrix 1999 திரைப்படத்திலிருந்து

நியாயத் தகப்பன் அநீதி புதல்வன் என்பதொரு வகை சீரீஸ் பழிவாங்கும் தகப்பன் துரத்தித் தோற்கும் புதல்வன் என்பதாக மாற்றி யோசித்துத் தன் முதிய பிம்பத்திடம் இளைய வெர்ஷன் தோல்வியடையும் இரண்டு படங்கள் கமல்ஹாசன் நடித்து ட்ரெண்ட் செட்டர்களாக மாறின.ஒன்று ஒரு கைதியின் டைரி.இன்னொன்று பின் நாட்களில் வந்த இந்தியன்.

கைதியின் டைரி படம் அதன் திரைக்கதை அமைப்பிற்காக கவனம் பெறுகிறது. மேலோட்டமாகப் பார்த்தால் எளிய திருப்பங்களற்ற பழிவாங்கும் கதை. ஆனால் திரையில் பின்னிய விதம் அபாரமானது.

டேவிட் ஒரு எளிய மனிதன். அழகான அவன் மனைவி ரோஸி மற்றும் ஒரே மகனோடு வாழ்ந்து வருபவன். வஞ்சகர்கள் மூவரால் அவனது மனைவி பாலியல் வல்லுறவுக்கு ஆளாக்கப்படுகிறாள். டேவிட்டுக்கு கடிதம் எழுதிவிட்டு தற்கொலை செய்கிறாள். அதிகாரபலமும் பணபலமும் கைகோர்த்ததில் டேவிட் தன் மனைவியைக் கொன்றதாக புனையப்பட்ட வழக்கில் சிறை செல்கிறான். 22 வருடங்கள் கழித்து ரிலீஸ் ஆகிறான். 14 வருட தண்டனையை அடிக்கடி சிறையில் இருந்து தப்ப முயன்றதினால் அதிகரித்துக் கொண்டவன் என்பது கூடுதல் தண்டனைக்கான காரணமாகிறது.

தன் உற்ற நண்பன் வேலப்பனிடம் ஒரே மகன் ஜேம்ஸை ஒப்படைத்து அவனை மூர்க்கமான ரவுடியாக வளர்க்கச் சொல்லிச் செல்கிற டேவிட் 22 வருடங்களுக்குப் பின்னால் வெளியே வந்து பார்க்கும் போது ஷங்கர் என்ற பேரில் ஒரு நியாயமான இன்ஸ்பெக்டராகத் தன் மகனை வளர்த்தெடுத்த வேலப்பனை சந்தித்து உண்மை அறிந்து என் மனைவி சாவுக்கு நானே பழிவாங்கிக்கொள்கிறேன் எனப் புறப்படுகிறான். அவனை ஆறுதல் படுத்த வேலப்பனிடம் வார்த்தைகளில்லை.

ஐஜீ மகளும் ஷங்கரும் காதலர்கள். பழைய எதிரிகளை இன்னும் பலம் பொருந்திய மனிதர்களாக சந்திக்க நேர்ந்ததை உணரும் டேவிட் எப்படித் தன் பழியைத் தீர்த்துக் கொள்கிறான் என்பதும் அவனை யாரென்றே அறியாமல் எப்படியாவது டேவிடின் கொலைகளை தடுத்துவிடப் பெரும் பிரயத்தனம் எடுத்துத் தோற்கிற ஷங்கர் கடைசியில் வேலப்பனிடமிருந்து தனக்குக் கிடைக்கிற ஜேம்ஸின் டைரியைப் படித்துத் தன் தகப்பனின் கதையை முழு உண்மையை அறிகிறான்.

யாருமே எதிர்பாராத நூதனமான முறையில் மூன்றாவது கொலை அரங்கேறுகிறது தந்தை என்றும் பாராமல் டேவிடைத் தன் துப்பாக்கியால் சுட்டு வீழ்த்துகிறான் ஷங்கர் அலையஸ் ஜேம்ஸ்.

தமிழை விட இந்தியில் அதிரி புதிரி ஹிட் அடித்தது இந்தப் படம். இதன் கதை வசனத்தை எழுதியவர் கே.பாக்யராஜ். பல இடங்களில் வசனம் மிளிர்ந்தது என்றால் பொருந்தும். ஜனகராஜூம் ஷங்கர் கமலும் பேசுகிற இடமும் ரேவதிக்கும் ஜேம்ஸ் கமலுக்கும் இடையில் நடைபெறுகிற உணர்வு பொங்கும் உரையாடல்களும் படத்தை நகர்த்தியதில் பெரும்பங்கு வகித்தன.

இதனை இயக்கியவர் ஆர்.பாரதிராஜா. இசை இளையராஜா. பாடல்கள் வைரமுத்து பொன் மானே கோபம் ஏனோ என்ற பாடல் உன்னிமேனன் மற்றும் உமா ரமணன் குரல்களில் மனம் வருடியது. ஏபிசி நீ வாசி எனும் அழியாப் புகழ் கொண்ட பாடல் இன்றளவும் ஓங்கி ஒலிப்பது.

காட்சிமொழியால் எந்த ஒரு வழக்கமான வணிக சினிமா நிர்ப்பந்திக்கிற சாதாரண காட்சியையும் தனக்கே உண்டான தனித்த ரசனையால் வித்யாசப்படுத்துவது பாரதிராஜா பாணி என்றே சொல்ல முடியும். இந்தப் படத்தில் பல இடங்களில் கதை சொல்லப்பட்ட விதத்துக்காக ரசிக்க முடியும் . முக்கியமாக தன் தாயை அழித்து தந்தையை ஜெயிலுக்கு அனுப்பியவனைத் தன் கையால் கொல்லப் போவதாக அத்தனை காலம் நளினமும் உறுதியும் கொண்டு வாழ்ந்து வருகிற ஷங்கர் உணர்ச்சிவசப்பட்டு ஐஜியிடம் குமுறுகிற காட்சியில் ஐஜி அவருக்கு பதில் சொல்லி அந்தக் காட்சிக்கு அப்பால் மீண்டும் தன் கடமை உணர்ந்து பணிக்குத் திரும்புவார் இன்ஸ்பெக்டர் ஷங்கர். இதை பாரதிராஜா வழங்கிய விதத்தால் இன்றல்ல இன்னும் நெடுங்காலத்துக்கு முக்கியத்துவம் குன்றாமல் ஒளிர்ந்து மிளிர்வது கண்கூடு.

இளம் வயதில் ஒன்று இரண்டல்ல பல படங்களில் வயதான முதிய மனிதன் வேடத்தை ஏற்று அவற்றில் வித்யாசங்களை காண்பிக்கத் தவறாமல் அதே சமயத்தில் நேர்த்தியும் குன்றாமல் மிகைநடிப்பும் நல்காமல் பண்பட்ட தனது நடிப்பை வெளிப்படுத்திய சொற்பமான தென் திசை நடிகர்களில் கமல்ஹாசனுக்கு முக்கிய இடமுண்டு. அதனை நல்ல முறையில் உறுதி செய்த படம் இது.

ஒரு கைதியின் டைரி பழி தீர்க்கும் படம்.
 

https://www.virakesari.lk/article/129144

 

[கிருபன்]

நூறு கதை நூறு சினிமா:91 – திருவிளையாடல் (31.07.1965)

October 1, 2019 - ஆத்மார்த்தி · இலக்கியம் சினிமா தொடர்கள்

 

நீங்கள் எப்போது மக்களை வண்ணத்தில் படம் பிடிக்கிறீர்களோ அவர்களது ஆடைகளைத் தான் படமாக்குவதாக அர்த்தம்.
ஆனால் எப்போது நீங்கள் அவர்களை கறுப்பு வெள்ளையில் படமெடுக்கிறீர்களோ உங்களால் அவர்களது ஆன்மாக்களைப் படமெடுக்க முடியும்

-டெட் க்ராண்ட்

முதலில் படமென்றாலே புராண இதிகாசப் படங்களாய்த் தான் வந்தன. அதிலும் எடுத்த கதையையே சுற்றிச் சுற்றி எடுத்து வெட்டி ஒட்டி வேறாக்கி எத்தைத் தின்றால் பித்தம் தெளியும் எனத் தமிழ்த் திரை மட்டுமல்ல இந்தியத் திரைப்பட உலகமே ஒருவழியாக சமூகப் படங்களின் பக்கம் மையம் கொண்ட பிறகு தான் ரசமான படங்கள் வரலாயின. ஆனாலும் பக்திப் படங்களுக்கான உலகளாவிய சந்தை இங்கே குறிப்பிட வேண்டியதாகிறது. ஆடிவெள்ளி துர்கா எங்கவீட்டுவேலன் பாளையத்து அம்மன் போன்றவை தொண்ணூறுகளுக்கு மத்தியிலும் கரம் கூப்பி வெற்றி கண்ட கடவுள் பக்திப் படங்கள். புராணக் கதைகள் பக்திப் படங்கள் மூட நம்பிக்கைப் படங்கள் சூன்யம் போன்றவற்றை தூக்கிப் பிடிக்கும் படங்கள் என ஒவ்வொன்றும் வெவ்வேறு வகைமையைச் சேர்ந்த படங்கள் தான். இன்று நாமிருக்கக் கூடிய காலம் பேய்ப்படங்களுக்கும் ஆக்சன் படங்களுக்குமானது என்று பொதுவில் வகைமைப் படுத்த வேண்டியதாக உருமாறி இருக்கிறது.முன்பிருந்தது வேறு சினிமா

தமிழ் திரைப்படம் தெலுங்கு திரைப்படங்களுக்கும் இடையிலான பொதுவான ஒரு வித்யாசம் நாம் அவ்வப்போது கைவிட்ட வகைமைகளையும் விடாமல் அவர்கள் இன்றளவும் பிடித்துக் கொண்டிருப்பது தான் இதுவே அவ்விடத்து பாயிண்ட் ஆஃப் வியூவில் இருந்து பார்த்தால் கிட்டத்தட்ட ஒரே மாதிரியான படங்களை தமிழில் முயல்வதாகவும் நாங்கள் அப்படி இல்லையாக்கும் எங்கள் படங்களெல்லாம் வெரைட்டியோ வெரைட்டி என்று சொல்கிறாற் போல் இருக்கும் இக்கரைக்கு அக்கரை உண்மை.

ஒரு காலம் இருந்தது பாடல்களில் பிடியிலிருந்து சமூகப் படங்களுக்கு மக்களின் ரசனை மாறினாலும் கூட மாய மந்திர தந்திர நம்பிக்கைகளை விதந்தோதிய படங்கள் பெருமளவு நின்று போனாலும் கூட புராண இதிகாச சமயம் சார்ந்த படங்கள் வரவேற்கப் படுவது தொடர்ந்தபடி இருந்தது 80களில் ஏன் 90களில் கூட அப்படியான சாமி படங்கள் வருகை நிகழ்ந்தன ஆனால் எல்லாமே பொற்காலம் என்று சொல்லிவிட முடியாது அல்லவா.கிட்டத் தட்ட சமூகப் படங்களின் பிடிக்கு ஒட்டுமொத்தமாய்த் தமிழ் சினிமா சென்றுவிட்டது என்று அறிவிக்காதது மட்டும் தான் பாக்கி என்ற சூழலில் தான் வந்து நின்று வென்று மாபெரும் ஆட்டமொன்றை நிகழ்த்திற்று திருவிளையாடல்.

ஏபி நாகராஜன் திருலோகச்சந்தர் போன்றவர்கள் உருவாக்கிய பல படங்கள் இன்றளவும் மக்களின் அபிமானம் குன்றாமல் தொடர்வது நிதர்சனம்

சிவாஜி கணேசன் பரமசிவனாகவும் சாவித்திரி பார்வதியாகவும் கேபி சுந்தராம்பாள் நாகையா பாலையா டி.ஆர்.மகாலிங்கம் தேவிகா மனோரமா ஓஏ.கே தேவர் நாகேஷ் முத்துராமன் உட்படப் பலரும் நடித்த திருவிளையாடல் இன்றளவும் போற்றுதலுக்குரிய தமிழ் புராண படங்களில் ஒன்றாக விளங்கி வருகிறது வெளிநாடுகளில் கூட புதிய திரையரங்கங்கள் திறப்புவிழா காண்கையில் உரையாடலை ஒட்டிவிட்டு புதுப்படம் ரிலீஸ் செய்வது இன்றும் கடைப்பிடிக்கப்பட்டு வருகிறது ஒரு சம்பிரதாயம் அந்த அளவு சினிமாவுக்கு உள்ளும் புறமும் திருவிளையாடல் படத்தின் செல்வாக்கு அதிகம்.பதின்மூன்றாவது தேசிய விருதுகளில் தமிழுக்கான படமாகவும் 1965ஆமாண்டுக்கான சிறந்த தமிழ்ப்படமாகவும் தேர்ந்தெடுக்கப் பட்டது. இருபத்தைந்து வார காலம் ஓடி வெள்ளிவிழாக் கண்டது.இன்றளவும் ரசிக்கப் பட்டுக் கொண்டிருக்கும் பெருமை உடையது

பாடல்களின் பேழை தவறவிட முடியாத இசை செல்வந்தம் என்றால் தகும்

பழம் நீயப்பா ஞானப் பழம் நீயப்பா தமிழ் ஞானப் பழம் நீயப்பா எனும் பாடல் சுந்தராம்பாள் பாடியது. பாலமுரளி கிருஷ்ணா பாடிய ஒரு நாள் போதுமா நான் பாட இன்றொரு நாள் போதுமா எனும் பாடல் கேட்பவரைக் கரைந்து போகச் செய்யும் வல்லமை மிக்கது.இசைத்தமிழ் நீ செய்த அரும் சாதனை என்ற பாடலை டி.ஆர்.மகாலிங்கம் தன் தனித்துவக் குரலால் ஒளிரச்செய்தார்.பார்த்தால் பசுமரம் எனும் பாடலையும் பாட்டும் நானே பாவமும் நானே என்ற பாடலையும் டி.எம்.சவுந்தரராஜன் பாடினார். பாடல்களும் பின்னணி இசையும் இப்படத்தின் பெருவெற்றிக்குப் பாதிக் காரணமென்றாலும் பொருத்தமாய்த் தானிருக்கும்.அப்படி ஒலித்துக் காற்றைப் பலகாலம் ஆண்ட பாடல்கள் இவை.

நெற்றிக் கண் திறப்பினும் குற்றம் குற்றமே என்று தன்னையே தடுத்துப் பேசி உண்மை வழுவாத நக்கீரரை சுட்டெரித்துப் பிறகு மீண்டும் எழுப்பி தருமிக்குப் பொன் கிடைக்கச் செய்து பாண்டியனை ஆசீர்வதித்தது முதற்கதை.தட்சணின் மகள் தாட்சாயணியை மணம் முடித்த சிவனார் தன் பேச்சை மீறித் தந்தை நடத்திய யாகத்துக்குச் சென்று தகப்பனால் அவமானப் பட்டுச் சிவலோகம் திரும்பும் தாட்சாயணியை முதலில் கண்டித்து பிறகு தாண்டவமாடிப் பின் மீண்டும் இணைவது அடுத்த கதை.கயல்கண்ணியாக அவதரிக்கும் பார்வதியைத் தேடிச் சென்று மணமுடிப்பது மூன்றாவது கதை பாணபத்திரர் எனும் நற்பாடகரை வம்பிழுக்கும் ஹேமநாத பாகவதரைத் தன் பாடலொன்றால் விரட்டி அடித்து பக்தருக்கு அருள்வது அடுத்த கதை இவற்றின் மூலம் தன் தந்தையின் மகத்துவத்தை தமிழ்க்கடவுள் முருகன் அறிந்துகொள்வது தான் கதைகளினூடான மையச்சரடு.

திருவிளையாடல் பாடல் கேஸட் மட்டுமல்ல. வசன கேஸட்டாகவும் சக்கை போடு போட்ட படம். இது யூட்யூப் காலம்.முந்தைய ரேடியோ காலத்தில் இதனைக் கேளாதவர்க்கு காதுகள் இராது என்று கூறத்தக்க அளவுக்கு படம் படுபிரபலம்.மேலும் நாகேஷ் காமெடியில் முதல் பத்து இடங்களில் இன்றும் நின்று ஆடும் திருவிளையாடல் படம். தருமி என்று தனக்குத் தானே பேசிக்கொள்கிற கதாபாத்திரத்தில் புலவனாகவே கண்வழி மனங்களைக் களவெடுத்து வென்றார். அவருடைய பேருருவுக்கு அப்பால் தான் அந்தச் சிவசிவாஜியே என்று சொல்லியாக வேண்டும். அந்த அளவுக்கு நாகேஷின் டயலாக் டெலிவரி முகத்தோற்றம் முகமொழி உடல்வாகு வழங்கிய விதம் என சொல்லிக்கொண்டே செல்லலாம்.

பதினோரு பாட்டு அவற்றின் மொத்த ஓட்டகாலம் முக்கால் மணி நேரம்.படம் மொத்தம் ரெண்டு மணி நேரம் முப்பத்தி ஐந்து நிமிடம் ஓடியது.ஆனால் ஆப்ரேட்டர் தொடங்கி சைக்கிள் டோக்கன் தருபவர் வரை யாருக்கும் எத்தனை முறை பார்த்தாலும் அலுக்காத படம் எனத் தைரியமாகச் சொல்லக் கூடிய வெகு சில அற்புதங்களில் ஒன்று திருவிளையாடல்.

திருவிளையாடல் மொழியும் இசையும் பெருகும் கடல்.
 

https://uyirmmai.com/literature/நூறு-கதை-நூறு-சினிமா91-திரு/

[கிருபன்]

நூறு கதை நூறு சினிமா: 92 – மலைக்கள்ளன் (22 ஜூலை 1954)

October 4, 2019 - ஆத்மார்த்தி · இலக்கியம் சினிமா தொடர்கள்

ஆட்டுக்குட்டிகள் சிங்கங்களாக மாறும் வரை எழுந்திரு மீண்டுமீண்டும் எழுந்திரு

-ராபின் ஹூட்

நாமக்கல் கவிஞர் என்றழைக்கப்படுகிற இராமலிங்கம் எழுதிய நாவல்தான் மலைக்கள்ளன். எழுதிய கதை சினிமாவாகும் வரை சாதாரணமாகத்தான் இருந்தது. நம் நாட்டில் எடுக்கப்பட்ட ராபின் ஹூட் அல்லது மார்க் ஆஃப் ஜோரோ டைப் படம் என்று இதனைச் சொல்லலாம். மலைக்கள்ளன் சிவாஜி கணேசனின் வாழ்வில் மறக்க முடியாத படம். சிவாஜி படமில்லையே என முகம் சுருக்குவோருக்கு அதனால்தான் மறக்க முடியாத படமென்றானது என்பது விசேஷ தகவல் எம்.ஜி.ஆரை இதில் நடிக்க வைக்கும் எண்ணம் துளியும் இல்லாமல் சிவாஜிதான் இதன் நாயகனாக நடிக்க வேண்டுமென்று ஒற்றைக்கால் தவம்கூட இருந்து பார்த்தார் பட்சிராஜா ஸ்டூடியோ அதிபரும் இதன் தயாரிப்பாளர் மற்றும் இயக்குனருமான ஸ்ரீராமுலு. ஆனால் அவர் கால் வலித்தது தான் மிச்சம். சிவாஜி இந்தப் படத்தினுள் வரவியலாமற் போனது வரலாறு. இன்னொரு மாபெரும் வரலாறு அதுவரைக்கும் ஏழெட்டு வருடங்களாக ஒரு மாபெரும் ஹிட் படத்துக்காகக் காத்திருந்த எம்ஜி.ராமச்சந்திரனுக்கு மலைக்கள்ளன் கொடுத்த மணிமழை சொல்வழி விரியப் புரிந்துவிடாத மாபெரும் ஒன்று. படிகளில் ஏறிக்கொண்டிருந்த நடிகரைப் பறவை போலாக்கி உச்சிக்கு அழைத்துச் சென்று அங்கே நிறுத்தி வைத்தது இந்தப் படம்.

ஏட்டு 411 ஆக நடித்த டி.எஸ்.துரைராஜ் ந்டன இணை சாயி சுப்புலட்சுமி வில்லனாக நடித்தவர் ஸ்ரீராம் காத்தவராயனாக நடித்த ஈ.ஆர் சகாதேவன் சுரபி பாலசரஸ்வதி சந்தியா ஆகியோரும் நடித்திருந்தனர்.சப் இன்ஸ்பெக்டராக நடித்தவர் எம்ஜி.சக்கரபாணி

எஸ்.எம்.சுப்பையா இசையில் பானுமதி தன் சொந்தக் குரலில் சில பாடல்களைப் பாடியது வசீகரித்தது. சவுந்தரராஜன் பாடிய எத்தனைக் காலம் தான் ஏமாற்றுவார் இந்த நாட்டிலே எனும் பாடல் இன்றளவும் விரும்பி ஒலிக்கப் படுகிற காற்றாளும் கானமாக விளங்குவது. இசையமைப்பாளராக மட்டுமன்றி இந்தப் படத்தில் ஒரு டாக்டர் வேஷத்தில் தோன்றவும் செய்தார் சுப்பையா.

விஜயபுரியின் குற்ற இருளுக்கு யார் காரணம்? காத்தவராயன் அறியப்பட்ட கேடி. அவன் பின்னால் இருப்பது குட்டிப்பட்டி ஜமீன் தார் மற்றும் இளம் செல்வந்தன் வீரராஜன் ஆகியோர் இவர்களுக்கே சவாலாக விளங்கும் இன்னொருவன் தான் மலைக்கள்ளன். அவனது சாகசங்கள் தனித்து ஒளிர்பவை. அவன் எப்படி இருப்பான் என்று யாருமே பார்த்ததில்லை.

நேர்மையான செல்வந்தர் சொக்கேசர். அவருடைய தங்கை காமாட்சி சிறுவயதிலேயே கணவனை இழந்தவள் அவளுடைய ஒரே மகன் குமரவீரன் சின்னப் பையனாக இருக்கும் போது தொலைந்து போகிறான். சொக்கேசருடைய மனைவியும் சீக்கிரமே விண்ணகம் சென்றுவிடவே அண்ணன் சொக்கேசனுடைய ஒரே மகளான பூங்கோதையை பரிவுடன் வளர்த்தபடி அவர்களோடு இருக்கிறாள் காமாட்சி சொக்கேசனுடைய உறவுக்காரனான வீரராஜனுக்கு பூங்கோதை மீது லயிப்பு அவளுக்கோ அவன் தீயவன் என்பதால் வெறுப்பு.

அந்த ஊரைச் சேர்ந்த இன்னொரு பணக்கார வணிகன் அப்துல் ரஹீம். அவனும் அடிக்கடி காணாமல் போகிறான். கேட்பவர்களுக்கு அவன் தன் வாணிப சங்கதிகளுக்காக பயணத்திலிருப்பதாகக் கூறுவான். காவல் துறை என்ன செய்கிறது என எல்லோருடைய கூச்சலுக்கு அப்பால் அந்த ஊருக்கு மாற்றலாகி வருகிறார் சப் இன்ஸ்பெக்டர் ஆறுமுகம்.அவருடைய உதவிக்கு அமர்த்தப்படுகிற கான்ஸ்டபிள் கருப்பையாவோ பயந்தாங்கொள்ளி மற்றும் கை நீட்டுபவரும் கூட. எதை விசாரிக்கப் பார்த்தாலும் தன் அனுமான தீர்மானங்களைக் கொண்டு தடையாகவே கருப்பையா உடன் வருகிறார். இப்படியான கதைப் போக்கில் ஒரு தினம் செல்வந்தர் சொக்கேசன் ஊரில் இல்லாத சமயம் அவரது ஒரே மகள் பூங்கோதை மர்ம நபர்களால் கடத்தப்படுகிறாள். துப்புகளைப் பின்னொற்றிச் செல்கையில் பூங்கோதை மலைக்கள்ளனின் பாதுகாவலில் இருப்பதாகத் தெரியவருகிறது

மலைக்கள்ளனின் வசம் இருக்கும் பூங்கோதைக்கு அவளைக் கடத்தத் திட்டமிட்டு அதைக் காத்தவராயன் மூலம் செயல்படுத்தவும் செய்தது வீர ராஜன் தான் என்பது தெரிகிறது.அவர்களது திட்டத்தை முறியடித்துத் தான் மலைக்கள்ளன் அவளைத் தன் வசமாக்கியது புரிகிறது. மெல்ல மெல்ல மலைக்கள்ளனின் நல்ல குணமும் மக்கள் மீது அவன் கொண்டிருக்கும் அப்பழுக்கற்ற அபிமானமும் எல்லாம் புரியவரும் பூங்கோதை மெல்ல மெல்ல ஸ்டாக் ஹோம் சிண்ட் ரோமுக்கும் திரைக்காதலுக்கும் உள்ள பிணைப்பின் பிரகாரம் கெட்டவன் என்று தள்ளிய அதே மலைக்கள்ளனை நல்லவன் எனப் போற்றத் தொடங்குகிறாள்

கதாகாலத்தின் கடைசிச் சதுக்கத்தில் மலைக்கள்ளன்தான் அப்துல் ரஹீம் என்ற பெயரில் வாழ்கிற தன் அத்தை மகன் குமரவீரன் என்பது பூங்கோதைக்குத் தெரியவந்து இருவரும் வாழ்வில் இணைகிறார்கள்.
சுபம்

 

https://uyirmmai.com/literature/நூறு-கதை-நூறு-சினிமா-92-மலைக/

 

[கிருபன்]

நூறு கதை நூறு சினிமா: 93 மீண்டும் ஒரு காதல் கதை (15.02.1985)

October 10, 2019 - ஆத்மார்த்தி · இலக்கியம் தொடர்கள்

 

நிறைய அதிர்ச்சி மற்றும் சப்தத்துடன் தொடங்கி நம்ப முடியாத வழமையாக பூர்த்தியடைகிற ஹாலிவுட் திரைப்படங்களுக்கு மாற்றாக கணிக்க முடியாத பல அடுக்குகளைக் கொண்ட விரிவடையும் கதைகளை நான் விரும்புகிறேன்.

-பீட்டர் பால்க்

ப்ரதாப் போத்தன் நடிகர் மற்றும் இயக்குனர். மலையாளத்தைத் தாய்மொழியாகக் கொண்டவரான பிரதாப்பின் அண்ணன் ஹரிபோத்தன் மலையாளத்தில் முக்கியமான இயக்குனர். தமிழ், மலையாளம், தெலுங்கு மொழிகளிலும் நூறு படங்களுக்கு மேல் நடித்தவரான பிரதாப் போத்தன் ஒரு யாத்ரா மொழி, ஜீவா, வெற்றிவிழா, மகுடம், ஆத்மா, சீவலப்பேரி பாண்டி உட்படப் 12 படங்களை இயக்கினார். அவர் இயக்கிய முதல் படமான மீண்டும் ஒரு காதல் கதை அவருக்கு தேசிய விருதைப் பெற்றுத்தந்தது. ராதிகா தயாரித்த இந்தப் படத்தில் சாருஹாசன், ஒய்.ஜி.மகேந்திரா, ரோனி படேல் இவர்களுடன் ப்ரதாப், ராதிகா இணைந்து நடித்தனர். பி.லெனின் எடிடிங்கில் இப்படத்திற்கு பிசி.ஸ்ரீராம் ஒளிப்பதிவு செய்தார். இளையராஜா இதற்கு இசைத்தார். ‘அதிகாலை நேரமே புதிதான ராகமே’ என்ற பாடல் இன்றும் வென்றொலிக்கும் சூப்பர்ஹிட் பாடல்.

பணக்காரர் பத்ரிநாத்தின் மகள் சரசு, மனவளர்ச்சி சமன் இல்லாத குழந்தைகளுக்கான சிறப்பு பள்ளியில் பெற்றோர்களால் சேர்க்கப்படுகிறாள் அங்கே ஜூஜூ தாத்தா என்கிற காப்பாளரும் ரோனி படேல் பாதிரியாரும் சாருஹாசன் அந்தப் பள்ளியை நிர்வகிக்கிறார்கள். உறவு என்று சொல்லிக்கொள்ள யாரும் இல்லாத இன்னொரு மனநிலை சமமற்ற கணபதி என்கிற கப்பி சரசுவுக்கு உற்ற தோழனாக மாறுகிறான்

தங்கள் வீட்டு திருமணத்துக்கு விடுப்பில் சரசுவை அழைத்துச்செல்ல தந்தை பத்ரிநாத் சரசுவின் தாயாரோடு பள்ளிக்கு வருகிறார்கள். கப்பி தன்னோடு வந்தால்தான் தானும் வருவேன் என்று பிடிவாதம் பிடிக்கிறாள் சரசு. வேறு வழியில்லாமல் பாதிரியாரிடம் வேண்டிக்கொண்டு காபியும் அழைத்துச் செல்கிறார்கள். தனக்கும் கப்பிக்கும் கல்யாணம் செய்து வைக்குமாறு சரசு அப்பாவிடம் கேட்கிறாள். எதிர்பாராத திருப்பமாக கப்பியும் சரசுவும் திருமணம் முடிந்து தங்களோடு பாதுகாப்புக்கு ஜூஜு தாத்தாவுடன் மலை கிராமமான கோர குண்டாவிற்கு அனுப்பி வைக்கப்படுகிறார்கள்.  அது ஒரு விசித்திரமான கிராமம் கப்பயும் சரசுவும் உடலால் இணைய சரசு கர்ப்பமாகிறாள்.

ஒரு தினம் கிராமத் தலைவன் போதையில் சரசுவை துன்புறுத்த முயல கப்பி கல்லால் அடித்து அவனைக் கொன்று விடுகிறான். தண்டனை விதிக்கப்பட்டு ஆயுள் சிறைவாசத்தை தொடங்குகிறான் கப்பி. சரசுவுக்கு வலி எடுத்து பிரசவ வேதனையில் மருத்துவமனையில் துடிக்கிறாள். சிறப்பு அனுமதி அனுமதியுடன் வெளிவந்து சரசுவை மருத்துவமனையில் சந்திக்கிறான். அழகான குழந்தையை பெற்றெடுக்கிறாள் சரசு.
பிரசவத்தில் சரசு மரணமடைகிறாள். மரணம் என்பதை என்னவெனப் புரிந்துகொள்ள முடியாத கப்பி, சரசு தன்னிடம் நடிப்பதாக எண்ணுகிறான். மீண்டும் சிறையில் அடைக்கப்படும் கப்பி, அதற்குப் பிறகு யாருடனும் பேசாமல் எதற்காகவும் சிரிக்காமல் சில காலம் கழித்து சிறையிலேயே இறந்து போகிறான்.

இந்தப் படத்தின் பாதிப்பை பின்னர் வந்த ஆவாரம்பூ தொடங்கி, சேது வரைக்கும் பல படங்களில் உணரலாம். கத்தி மீது நடப்பது போன்ற கதையை சோமசுந்தரேஷ்வருடன் சேர்ந்து ப்ரதாப் திரைக்கதை அமைத்தார். ப்ரதாப் இயக்கத்தில் வித்யாசமான படமாக மீண்டும் ஒரு காதல் கதை சொல்லத்தக்கது. உலகமும் உருண்டை லட்டுவும் உருண்டை உலகத்தை கடவுள் படைத்தார் லட்டுவை அம்மா படைத்தார் என்றெல்லாம் சாருஹாசன் பசங்களுக்குப் பாடமெடுக்கும் காட்சி நகைப்பைத் தந்தது. ராதிகா இந்தப் படத்தில் மிகச்சிறப்பான நடிப்பை வழங்கினார். குறைவான கதாபாத்திரங்களை மட்டுமே கொண்ட அதே சமயத்தில் காத்திரமான கதையையும் பார்ப்பவர்களின் ஆழ்மனதில் அனுபவச்செறிவைக் கொண்டு சேர்க்கிற திரைமொழியையும் கொண்டிருந்த வகையில் சிறப்பான படமாக மிளிர்கிறது.

மீண்டும் ஒரு காதல் கதை அபூர்வமான பாடல்

 

https://uyirmmai.com/literature/நூறு-கதை-நூறு-சினிமா-93-மீண்/

 

[கிருபன்]

நூறு கதை நூறு சினிமா: 94 அடுத்த வீட்டுப் பெண் (11.02.1960)

October 11, 2019 - ஆத்மார்த்தி · இலக்கியம் சினிமா தொடர்கள்

 

“கடவுள் ஒரு நகைச்சுவை நடிகர், சிரிப்பதற்கு அஞ்சுகிற பார்வையாளர்களின் மத்தியில் பரிமளிப்பவர்”

-வால்டேர்

எந்தப் படம் ஜெயிக்கும் என யாரால் யோசிக்க முடியும்? ஆரம்பிக்கும்போது எல்லாமே பணமாய் அள்ளிக்கொட்ட வேண்டும் என்கிற ஆசையில்தான் ஒவ்வொருவரும் படமெடுக்க வருவது. எப்படி சீட்டாட்டத்தில் யார் ஜெயிப்பார்கள் எனச் சொல்ல முடியாதோ, சினிமா ஆட்டத்திலும் அப்படித்தான்.

வெற்றிகரமான நடிகையாக வலம் வந்த அஞ்சலிதேவி, தன் கணவர் ஆதிநாராயணராவ் தயாரிப்பு மற்றும் இசையமைப்பில் அஞ்சலி பிக்சர்ஸ் சார்பாகத் தயாரித்த படம் ‘அடுத்த வீட்டுப் பெண்’.இப்படித்தான் பேசி ஆரம்பித்திருப்பார்கள்போல. ‘என்னங்க, ஜாலியா ஒரு படம் எடுப்போமா?’ தமிழின் உலர் நகைச்சுவைத் திரைப்படங்களின் வரிசையில் முதன்மையான இடத்தை இந்தப் படத்துக்கு வழங்கலாம். டி.ஆர்.ராமச்சந்திரன் குழந்தை பேறில்லாத காரணத்தினால் அறுபது வயதில் இரண்டாம் திருமணத்துக்குப் பெண் பார்க்கும் தன் செல்வந்த மாமாவிடம் முரண்பட்டுக் கோபித்துக் கொண்டு, அத்தை இருக்கும் வீட்டுக்குச் செல்லும்போது, அடுத்த வீட்டுப் பெண் அஞ்சலி தேவியைப் பார்த்து, அவர் மேல் காதலாகி, அதற்காகத் தன் லீடர் தங்கவேலுவிடம் காதல் ஐடியாக்களைக் கேட்டு, அவற்றில் நாலு பழுத்து, ரெண்டு பலனின்றி, எப்படியாவது அஞ்சலிதேவியின் நன்மதிப்பைப் பெற்றுவிடமாட்டோமா எனக் காதலுக்குச் சரிப்பட்டு வரவே வராத தன் முகத்தை வைத்துக்கொண்டு ஒரு வழியாக அவரது காதலை வென்றெடுப்பதுடன் சுபமாகிறது படம்.

அருண் சவுத்ரி எழுதிய பஷேர் பாரி என்ற பெங்காலிப் படம் அடுத்த வீட்டுப் பெண்ணாகத் தமிழிற்பெயர்ந்தது. இதே படம் தெலுங்கில் பக்க இண்ட்டி அம்மாயி என்ற பெயரில் 1953 ஆமாண்டும் பிறகு 1981 ஆமாண்டும் வெவ்வேறு குழுவால் இரண்டு முறை திரையாக்கம் கண்ட படம் இந்தியிலும் இதே படம் இருக்கிறது. சகல திசைகளிலும் வெற்றிபெற இதன் எளிய கதையும் அழகான மலர் போன்ற நகைச்சுவையும்தான் காரணம் அடுத்த ஒன்று இசை.

படத்தின் நாயகன் தங்கவேலுவா டி.ஆர்.ராமச்சந்திரனா என்று கேட்குமளவுக்கு படத்தின் பெரும்பலமானார் தங்கவேலு, ஏ.கருணாநிதி, சட்டாம்பிள்ளை, வெங்கட்ராமன், ஃப்ரெண்ட் ராமசாமி ஆகியோர் தங்கவேலுவின் சகாக்கள். வயோதிகப் பணக்காரர், பாட்டு வாத்தியார், தங்கவேலுவுக்கும் சரோஜாவுக்கும் காதல், சரோஜாவின் அப்பா, மற்றும் அஞ்சலிதேவியின் அப்பா எனப் படத்தின் சகல கதாபாத்திரங்களும் கலகலப்பை ஊட்டுகிறாற்போல் பாந்தமான கதை. ‘எது எது எப்பெப்ப எப்டியெப்டி நடக்குமோ அது அது அப்பப்ப அப்டியப்டிதான் நடக்கும்’ என்று சதா முழங்குவார் அஞ்சலிதேவியின் அப்பா. எப்போதாவது தப்புவிடுவாரா எனப் பார்த்து ஏமாறுவது ஜாலியான புதிர். அதற்கு முந்தைய காலத்தின் மௌனப் படமாக்கலின் செல்வாக்கு இந்தப் படத்தில் குட்டிக் குட்டிக் காட்சிகள் வசனமின்றியும் மௌனகால இசையுடனும் கவர்ந்தன. ஆதிநாராயண ராவ் அதிகம் சோபிக்காத, வெளித்தெரியாத மகா மேதை. இந்தப் பாடல் வெளிவந்த காலத்தில் இத்தனை இசை வெரைட்டியோடு இன்னொரு படம் இல்லவே இல்லை என்று சொல்லும் அளவுக்கு ஆதிநாராயண ராவின் இசை தேன் ததும்பும் பாடல்கள் பதினைந்துக்கும் மேற்பட்ட பாட்டுக்கள் காலம் தாண்டி இன்றளவும் ஜெயித்தொலிப்பதற்கான முக்கிய காரணம் ஆதிநாராயண ராவின் இசைபற்றிய அறிதலும், ரசனை குறித்த புரிதலும் இணையும் புள்ளிதான் எனச் சொல்லத் தோன்றுகிறது.

கற்றார் நிறைந்த சங்கமிது பாடல் ஏ.எல்.ராகவன் பாடியது. இதன் துள்ளியோடும் நீர்த்தன்மை குறிப்பிடத்தக்கது.
வாடாத புஷ்பமே வனிதா மணியே என்றாரம்பிக்கிற பாடல் பீபி ஸ்ரீனிவாஸ் அளித்தது.
கண்ணாலே பேசிப் பேசிக் கொல்லாதே பாடல் இப்படத்தின் கையெழுத்துப் பாடல்
கண்களும் கவிபாடுதே பாடல் கொண்டாட்டத்தின் ஊடுபாவு
மாலையில் மலர்ச்சோலையில் மனங்களை மயக்கித் தரும் மதுமழை

பாடல்களுக்கு அதன் வகைமைகளைப் படைத்துத் தந்த விதத்தில் அடுத்த காலங்களில் திரைப்பாடல் எனும் பண்டம் என்னவாகவெல்லாம் உருமாற்றம் கொள்ளும் என்பதை மிகத் தெளிவான அறிதலுடன் படைத்தார் ஆதி. நதிக்குத் தெரியும்தானே நாளை தான் வளைந்து நெளியப்போகும் பாதை. இசையென்பது அவருக்கு நதி. தஞ்சை ராமையாதாஸின் எளிய வசனங்களும் இனிய பாடல்களும் வேதாந்தம் ராகவைய்யாவின் திட்டமிட்ட இயக்கமும், மொத்தப் படத்தின் கனத்தையும் தாங்கிப் பிடித்தன. நாகேஸ்வரின் ஒளிப்பதிவும் என்.எஸ்.பிரகாசத்தின் எடிட்டிங்கும் கூறத்தக்கவை.

அஞ்சலி பாட்டு வாத்தியாரை ஏமாற்ற, பாட்டு வாத்தியார் அதை நிஜமென்று நம்ப, தன் காதலனைப்போல் பாட்டு வாத்தியாரைப் பார்க்குக்கு அழைத்துச் செல்வார் அஞ்சலி, அதாவது டி.ஆர்.ராமச்சந்திரனை வெறுப்பேற்றுவதற்காக வாத்திக்கு பிரமோஷன். அஞ்சலியைச் சந்தோஷப்படுத்துவதாக நினைத்து டி.ஆர்.ஆரை ஏழெட்டு நிஜ குண்டர்களோடு சேர்ந்து அடித்து நொறுக்கிவிடுவார் வாத்தி. காயத்தோடு காய்ச்சலும் வந்து படுக்கையில் நொந்து கிடக்கும் மன்னாரு என்கிற டி.ஆர்.ராமச்சந்திரனை மெல்ல மெல்ல கசிந்துருகிக் காதலும் ஆவார் அஞ்சலி.

இந்தப் படத்தை அடுத்து வந்த அறுபது ஆண்டுகள், அதாவது இன்றுவரை மீவுருச் செய்யாத தமிழ்ப்படமே இல்லை என்கிற அளவில் தன் அத்தனை கனிகளையும் உதிர்த்துத் தந்த ஒரு முதிய மரம்போல் இருந்து கொண்டிருக்கிறது இந்தப் படம். ஒரு கல்ட் க்ளாஸிக்காக கலாச்சார அகல் விளக்காகவே அணையா தீபமென இன்றளவும் பாடல்களாலும், நடிப்பாலும், வசனத்தாலும், காட்சிகளாலும் ஓங்கி ஒளிரும் காதலின் எளிய காவியம் அடுத்த வீட்டுப் பெண்.

சிரித்தால் இனிக்கும்
 

 

https://uyirmmai.com/literature/நூறு-கதை-நூறு-சினிமா-94-அடுத/

 

[கிருபன்]

நூறு கதை நூறு சினிமா: 95 பரியேறும் பெருமாள் (28.09.2018)

October 12, 2019 - ஆத்மார்த்தி · இலக்கியம் சினிமா தொடர்கள்

 

ஒரு நாட்டின் கலாச்சாரம் என்பது அதன் மக்களின் இதயங்களிலும் ஆன்மாக்களிலும் வாழ்கிறது

-மகாத்மா காந்தி

அவரவருக்கு அவரவர் நியாயங்கள் அவற்றில் எது நீதியின் கண்களுக்குச் சரி என்பதை வழக்காடி அறியத்தான் நீதி மன்றங்கள். நிகழ்ந்த குற்றங்களை நீதிமன்றம் விசாரிக்கும்போது அங்கே விடுதலை மற்றும் தண்டனை ஒருபுறமாகவும் இழப்பீடு மற்றும் நியாயம் அடுத்தபுறமாகவும் எதிர்நோக்கப்படும். கடுமையான சட்ட நடைமுறைகள் நடப்பில் இருக்கிற இந்தியா போன்ற நாட்டில் புரையோடி இருக்கக்கூடிய தீமைகளில் சாதி மீதான மனித வெறிக்குத்தான் தலையாய இடம். சாதியைக் கெட்டியாகப் பற்றிக்கொண்டு மனிதன் சக மனிதன்மீது நிகழ்த்துகிற வன்முறைகளுக்கு எதிரான தொடர்ந்த போராட்டத்தை எல்லாக் காலத்திலும் கலை முன்னெடுத்திருக்கிறது. கலை ஒருபோதும் எந்த நிறுவனத்தையும் ஆதரிப்பதே இல்லை. சாதி எனும் ஈரமும் இரக்கமுமற்ற பழைய பிடிவாதம் ஒன்றை வழிவழியாக மேலெழுதிக் கொண்டு வருவதற்கு எதிராக எல்லாக் கலைவடிவங்களையும் உயர்த்திப் பிடிப்பது அதி அவசியமாகிறது. திரைப்படம் ஒரு கருத்தை முன்வைக்கும்போது அதன் வீரியம் அபரிமிதமாகிறது.

மாரி செல்வராஜ் எழுதி இயக்கிய பரியேறும் பெருமாள் வெறுமனே கதை சொல்லி நகர்ந்து செல்கிற திரைப்படங்களின் வரிசையிலிருந்து விலகி தீர்விலிருந்து தொடங்குகிறது. இது பொய்போல நிசத்தைப் பேசிச் செல்லுகிற சினிமா அல்ல. சினிமாத் தனம் என்று சினிமாவைக் கொண்டே கட்டமைக்கப்பட்ட அத்தனை அதீதங்களையும் அறுத்தெறிந்துவிட்டுத் தன் உயிரிலிருந்து குருதி தொட்டுத்தான் சொல்ல வந்த கதையை எழுதி இயக்கி பரியேறும் பெருமாள்படத்தை உருவாக்கி இருக்கிறார் மாரி செல்வராஜ்.

சக மனிதன்மீது காட்ட வேண்டியது அன்பு மட்டுமே அன்றி வன்மம் அல்ல என்பதை அழுத்தம் திருத்தமாகப் பேசுகிறது பரியேறும் பெருமாள். இந்தப் படமெங்கும் ததும்பிக் கிடக்கிற குறியீடுகள் பார்வையாளனை யோசிக்க வைக்கின்றன. அதீதமான பிம்பசார்தல் ஏதுமின்றி இயல்பு வாழ்வில் எது சாத்தியமோ அதுவே இங்கே பேசுபொருள். உரையாட முற்படுவதே ஒரு கலைப் படைப்பின் ஆதார வெற்றியாக முடியும். அந்த அளவில்தான் வெளியான காலத்தோடு உறைந்து தனித்துவிடாமல் தொடர் உரையாடல் ஒன்றை சாத்தியப்படுத்துகிற வகையில் மாரி செல்வராஜின் பரியேறும் பெருமாள் தமிழின் முக்கியமான படங்களில் ஒன்றாக எக்காலத்திலும் நீடிக்கும்.

தன் நெடிய தலைமுறையின் வஞ்சிக்கப்பட்ட இருளிலிருந்து கல்வி எனும் விளக்கை ஏந்தியவாறு சட்டம் படிக்க கல்லூரிக்கு வருகிற பரியன் எனும் பாத்திரத்துக்குக் கச்சிதமான தேர்வு கதிர். வலியை நடிப்பில் கொணர்வதன் கடினம் நடிப்பென்பதைத் தன் வேலையாக அல்லாமல் தியானம்போலத் தன்னை அகழ்ந்தெடுத்திருக்கிறார் கதிர். எதிர்வரும் காலங்களில் தமிழின் ஆக முக்கியமான நடிகர்களில் ஒருவராக கதிரை யூகிக்க முடிகிறது. வெறும் யூகமல்ல நிச்சயம் பலிக்கும்.

ஆனந்தி கதாபாத்திரம் கதைக்கேற்ப வடிவமைக்கப்பட்டாற் போலிருந்தாலும் துல்லியம் தவறாமல் இயல்பின் விளிம்பு தவறாமல் பயணமாகிறது. இப்படத்தின் முக்கியக்கூறு ஆனந்தியின் தந்தையாக வருகிற மாரிமுத்துவின் மன ஊசலாட்டங்கள். மஞ்சள் கோட்டில் நின்றுகொண்டு சாலை கடக்க முடியாமல் அல்லாடுகிறாற்போல நடுக்கமும் இறுக்கமுமாக அவரது நடிப்பு அத்தனை அசலாக இருக்கிறது. உலகின் எல்லா வெறுப்பையும் சேர்த்து வழங்கப்படவேண்டியவராக கராத்தே வெங்கடேசன். நண்பனாக வருகிற யோகிபாபு என யாரையும் சொல்லாமல் இருக்கவே முடியாது. இப்படத்தைப் பொறுத்தவரைக்கும் நடிகர்களல்ல கதாபாத்திரங்களே மனதில் நிற்கிறார்கள். பரியனின் தந்தை தோன்றுகிற கதைப்பகுதி மனதை மண்கொத்தி கொண்டு கொத்தி எடுக்கிறது. இது வாதம் பேசுகிற படமல்ல. இங்கே தேவை புரிதல். காலகாலத்துக்குமான புரிதல் மனமாற்றமே பண்பாடு என்பதன் வகுத்தெடுக்கப்பட்ட அர்த்தமாக அமையும். புதியன புரிதலும் பழையன விடுதலும் மட்டுமே நாளை எனும் நாளை ஒளியேற்றி விளக்கி வைக்கும்.

ஸ்ரீதரின் ஒளிப்பதிவு மிளிர்கிறது என்றால் சந்தோஷ் நாராயணனின் இசை வெகு உன்னதத் தரத்தில் உடனோடும் நதியாகிறது. இந்தப் படத்தைத் தயாரித்திருப்பவர் இயக்குனர் பா.ரஞ்சித். திரைப்பட ஊடகத்தின் நிசமான வலிமை என்ன என்பதை கச்சிதமாக அவதானித்துத் தன் படம் என்ன பேசவேண்டும் என்பதை மிக ஆணித்தரமாக உறுதி வழுவாமல் பேசிய வகையில் போற்றுதலுக்கு உரிய படமாக தன் முதற்படத்தை எடுத்திருக்கக்கூடிய மாரி செல்வராஜ் இன்னும் தமிழ்த் திரையுலகின் கரைகளை விவரித்துத்தரக்கூடிய படைப்புக்களை உருவாக்குவார் என்பது நிச்சயம்.

பரியேறும் பெருமாள்: உன்னதமான திரைப்படம்

 

 

https://uyirmmai.com/literature/நூறு-கதை-நூறு-சினிமா-95-பரிய/

[கிருபன்]

நூறு கதை நூறு சினிமா: 96 – முகம் (01.10.1999)

October 14, 2019 - ஆத்மார்த்தி · இலக்கியம் சினிமா தொடர்கள்

 

“வாழ்க்கையின் முரண் இதுதான்.முகமூடி அணிந்தவர்கள் பெரும்பாலும் திறந்த முகத்தினர்களை விடவும் அதிக உண்மைகளைப் பேசுவார்கள்.”

-மேரி லு, தி ரோஸ் சொசைட்டி

இம்மாதிரியான படங்கள் எல்லாம், யாருக்காக எடுக்கிறார்கள் என்று ஆரம்பத்தில் ஆச்சரியப்பட்டிருக்கிறேன். மலையாளப் படங்களைப் பற்றிய பெருமிதச் சொல்லாடல்களைக் கேட்கையிலெல்லாம் இப்படிப் படங்கள் தமிழில் ஏன் இல்லை என யோசித்திருக்கிறேன். அந்தவகையில் ஞானராஜசேகரன் இயக்கி நாசர் நடித்த முகம் திரைப்படம் வாழ்வின் மறக்க முடியாத ஒன்று மனிதனுக்கு முகமே வித்தியாசம் பிற உயிரினங்கள் எல்லாவற்றுக்கும் ஜெராக்ஸ் எடுத்த இயற்கை மனிதனுக்கு மாத்திரம் இத்தனை வித்தியாசங்கள் உண்டு பண்ணியது, முகம் என்பது மனிதனுக்குள் வித்தியாசமா அல்லது அந்த வித்தியாசம்தான் அவனுக்குள் ஒற்றுமையா என்பதை பலமுறை யோசித்து வியந்திருக்கிறேன். இந்த திரைப்படம் பார்ப்பதற்கு குரூரமான முகத்தை உடைய சாமானியன் ஒருவனுக்கு அழகிய ஒருமுகம் தற்செயலாக கிடைக்கிறது. இந்த மிகையதார்த்த புள்ளியிலிருந்து முகம் திரைப்படத்தின் நகர் திசை பார்ப்பவர்களை வியப்பில் ஆழ்த்துகிறது. சென்ற நூற்றாண்டின் தமிழ் திரைப்படங்களில் தனிமனித அல்லாட்டங்களையும் கூட்டம் என்ற பெயரில் அடையாளங்கள் அற்றுப்போகிற திரள் மனநிலையின் வெப்பத்தையும் அழகாக கையாண்டது முகம்.

ஒன்று இழந்து வேறொன்று அடைவது மனதின் ஆதார ஊசலாட்டங்களுக்கு தொடக்கப் புள்ளியாக அமைந்தது வாழ்தலின் கதாநியதி. நாசர் ஏற்று நடித்த கதாபாத்திரங்களில் ஆகச்சிறந்த வரிசையில் முகம் இடம் பெறும். முகமூடி பிம்பம் கண்ணாடி ஒப்பனை அகமுகம் ஆழ்மனதின் குரல் சுய இரக்கம் திரும்புதலின் இச்சை என்று பலவற்றையும் காட்சிப்படுத்த விளைந்த முதல் விழைவு என்ற வகையில் முகம் முக்கியமான படம்.

முகம் என்பது ஒரு மாபெரும் இயக்கம். ஒரு முகத்தை யாராலும் வினாக்களோடு அணுகவே முடியாது, அல்லது விடை பெற முடியாது. அதையும் மீறி அப்படித்தான் அணுகுவேன் என்று கிளம்புகிறவர்கள் என் முகம் ஏன் இப்படி இருக்கிறது என்கிற கேள்வியை யாரிடம் கேட்பது எனத் தெரியாமல் பதில் கிடைத்திடாமல் குண்டூசியின் தலை போல் ஆரம்பிக்கும் அதே அந்த வினா தன்னுள் வெடித்துப் பெருகக்கூடிய எரிமலைக் குழம்பென ஆகி எதுவுமற்றுப் போகிறார்கள். ஒரே முகமல்ல மனிதனுக்கு வாழக் கிடைப்பது. ஆனால் அவன் அதனை ஒரே முகம் என்று எப்போதும் நம்ப விரும்புகிறான். முற்றிலுமாக உயிர் துறத்தல் மனிதனின் வாழ்வில் மரணம் என்பது ஒருபுறம். உண்மையில் ஒரு மனித வாழ்வென்பது பல முகமரணங்களைத் தனதே கொண்டது. முகம் முகமாய் அழிந்து கொண்டே வந்து மாபெரும் zip ஒன்றை முழுவதுமாகத் திறந்துவிட்ட பிற்பாடு நகர்வதற்கு இடமேதுமின்றித் திகைக்கிற runner போல் முதுமை அதன் முகம் வாழ்வின் வாசலில் தொக்கிக் கொண்டிருக்கிறது.

மனித வாழ்வின் மீது அவன் முகம் பார்க்கிற கண்ணாடியின் அதிகாரம் அபரிமிதமானது. முகம் என்பதே செல்வாக்கைத் தீர்மானித்துத் தருவதாகிறது. தன் சுயத்தைக் குழந்தைபோல் ஏந்திக் கொள்ளுகிற மனிதன் முகத்தை சுயமென்று நம்பத் தொடங்குகையில் அவன் வாழ்வு பிறழ்கிறது. மனம் என்பது தன்னை ஒரு முகமிலியாகக் காட்டிக் கொள்ள விரும்புகிறது. உண்மையில் அவரவை மன முக இடை வித்தியாசம் அவரவர் பிம்பமாக உருக் கொள்ளுகிறது.

முகத்தைக் குறித்த வழிபாட்டு முறையாகவே தன் பிம்ப மயக்கம் உருவெடுக்கிறது. தன் பிம்பத்துக்குத் தன்னை ஆனந்தப் பலியாகவே ஒப்புக்கொடுப்பதை மனிதன் மிகவும் விரும்புகிறான். தன் கழுத்திலிருந்து முகத்தைக் கழற்றி, தனது பிம்பத்துக்குக் கிரீடமாக்குவதை அடிமையின் சாகசத்தோடு செய்வது அவன் சுபாவமாகிறது. முகமற்றவர்களின் கால்பந்தாகிறது முகம். இரண்டாவது முகம் என்பது அவரவர் ரகசியம். தன் நிழலை வேட்டையாடத் துணிந்தவர்கள் நிஜத்தைத் துருப்புச் சீட்டாகப் பயன்படுத்துகிறார்கள். சகமனம் என்பது வெறுப்பை உமிழும் சகமுகக் கலயமாகவோ, அன்பைப் பதுக்கிவைக்கும் சகமுகக் கொள்கலனாகவோ இரண்டில் ஒரு பாதையில் அல்லது இரு பாதைகளிலும் கிளைத்துச் செல்லுகிறது. ஒரு கட்டத்தில் முகமொன்றை வெறுப்பதற்காக எதாவது செய்ய விழைகிறது மனமெனும் கசங்கிய பிரதி. தன் முகத்துக்குப் பிரதிமுகம் ஒன்றோ அல்லது உபமுகம் சிலவோ இருப்பதை ஆட்சேபங்களுடன் அனுமதித்துக் கொள்ளுகிறான் மனிதன். முகமூடி தன் வேட்டையிலிருந்து தப்புதலுக்கு உதவும் என்பது அவனது பலவீனம். முகம் மீதான அத்தனை வன்மமும் கோலம் அழிதல் எனும் மனித வாழ்வின் அற்பத்தை எள்ளுகிற அவரவர் அசரீரத்தின் குரல் போலிக் கெக்கலிப்பு மாத்திரமே. அரூபியாகவோ அசரீரியாகவோ தொடர்ந்துவிட யாரும் சம்மதிப்பதில்லை. உயிர் திரவமாகவும் வாழ்வு அதன் வண்ணமாகவும் உடல் முகம் தேங்குகிற கலயமாகவும் ஆவது முரண்.

1999ஆம் ஆண்டு ஞான. ராஜசேகரன் இயக்கத்தில் கலைப்புலி எஸ்.தாணு தயாரிப்பில் உருவான ‘முகம்’ தமிழின் கதைத் திறனை, நடிக வளனை, ஒளிச் செறிவை, இசைத் தோய்வை, மற்றும் வாழ்வைப் பேசிய முக்கியமான படம். நகரவீதிகளில் மாலைப் பொழுதொன்றில் ததும்பும் முகங்களை விழுங்கி உதிர்த்த வண்ணம் முகங்கள் முகங்கள் மேலும் முகங்கள் என்று கேமிராவைக் கொண்டு நடனமே நிகழ்த்திக் காட்டினார் பி.சி.ஸ்ரீராம். டைட்டில்ஸ் முடியும்போது ஒரு குறும்படம் முடிந்தாற்போல் சிறு நிறைவு ஒன்றை உருவாக்கி, அதைப் படம் மீதான எதிர்பார்ப்பாக, தன்பெருக்கிக் கண்ணாடியால் வெப்பத்தைக் குறுக்கிக் காகிதத்தில் பாய்ச்சித் தீயை உழவுச் செய்தாற்போல் வித்தகம் புரிந்தார் ஞான ராஜசேகரன்.

படம் நிறையும்போது விடையில்லை எனத் தெரிந்தும் வினவியே ஆகவேண்டிய கேள்வியை ரசிகனின் மனத்தில் தைத்துவிடுகிறது முகம் திரைப்படம். நாசர், ஷோபனா, ரோஜா மணிவண்ணன் விவேக் தலைவாசல் விஜய் உட்படப் பலரும் உயிர் கொடுக்க, இந்தப் படத்துக்கு இளையராஜாவும் ஸ்ரீராமும் நிஜபலங்கள். இதன் title music தொடங்கி படம் முழுவதற்கும் தன் இசையால் படர்க்கை இயக்கமொன்றை நிகழ்த்தி இருப்பார் இசைஞானி. மிகச் செறிவான இசைக்கோர்வைகள் தனியே பீஜீஎம் மட்டுமே வனாந்திர அலைதலை மனதினுள் நிகழ்த்தித் தரும்.லெனின் விஜயன் எடிடிங்கும் ஞானராஜசேகரனின் இயக்கமும் முகம் படத்தை நேர்த்தித் தந்தன.

தமிழின் திரைத்தரத்தை உரசச் சரியான உரைகல் முகம்.

 

https://uyirmmai.com/literature/நூறு-கதை-நூறு-சினிமா-96-முகம/

 

[கிருபன்]

நூறு கதை நூறு சினிமா: 97 – சம்சாரம் அது மின்சாரம் (16.07.1986)

October 16, 2019 - ஆத்மார்த்தி · இலக்கியம் சினிமா தொடர்கள்

 

நாம் வாழ்ந்து கொண்டிருப்பது நாடகத்தனமான உலகத்தில் அல்ல. அது பொருள்சார் உலகம். மேலும் உண்மையென்பது உணர்ச்சியூட்டலில் அல்ல பொருள்சார் விஷயங்களின் உண்மையான அளவீடுகளில் உறைந்திருக்கிறது

– ரிச்சர்ட் ஃப்ளநாகன்

எழுத்தாளர் விசுவின் ஆரம்பப் படங்களிலிருந்து முற்றிலும் மாறிப் பயணித்தவை அவர் இயக்கிய படங்கள். பட்டினப் பிரவேசம் படத்தின் கதை வசனத்தை கண்ணுற்றவர்கள் அவருடைய நாடக பாணிப் படங்களை நம்பமுடியாத வியத்தலோடுதான் அணுகுவர். சதுரங்கம், அவன் அவள் அது, நெற்றிக்கண், புதுக்கவிதை, கீழ்வானம் சிவக்கும் என அவர் எழுத்திற்குப் பெருத்த வரவேற்பு இருந்தது. பின்னாட்களிலும் அவர் நல்லவனுக்கு நல்லவன் மிஸ்டர்பாரத் என ரஜனி படங்களுக்கு வசனம் எழுதியதும் கூறத்தக்கதே.

குடும்பம் ஒரு கதம்பம் படம் விசுவின் அடுத்த கால நகர்வைத் தீர்மானித்துத்தந்தது. அதன் வெற்றி விசுவின் மீதான வெளிச்சத்தைக் கூடுதலாக்கியது. பாலச்சந்தரின் ஆரம்ப காலக் கதைத் தேர்வுகளின் சுத்திகரிக்கப் பட்ட வடிவங்களைத் தன் கையிலெடுத்து வென்றவர் விசு. எண்பதுகளில் தொடங்கி தொண்ணூறுகளின் இறுதிவரைக்கும் மத்யம சமூகத்தின் வாழ்க்கை குறித்த யதார்த்தத்திற்கு உள்ளேயும் வெளியேயும் ஊசலாடிய கதைகளைப் படமாக ஆக்கினார். அவற்றிற்கென தனித்த ரசிகர்கள் உருவானார்கள். விசு பாணி என்றே ஒரு விதமான பட நகர்வு முறை கருதப்பட்டு அழைக்கப்படுகிற அளவுக்கு நெடிய வசனங்கள் பேசித் திருப்புகிற உரையாடல்கள் தொடர்ந்து ஒலிக்கப்படுகிற கேள்விகள் என்று தன் படவுலகத்தை நாடக பாணியை அடிப்படையாகக் கொண்டுதானே தயாரித்துக் கொண்டவர் விசு. அவரது வசனங்கள் கதையின் போக்கை அதன் மீதான யூகத்தை மற்றும் துல்லியத்தை கொஞ்சமும் பிசிறின்றிப் பார்க்கிற அத்தனை பேருக்கும் தெளிவாகப் புரியவைத்துவிட வேண்டும் என்பதற்காகவே எழுதப்பட்டன.

விசு தன் கதைகளைக் குடும்பத்தின் மீதான பழைய மற்றும் புதிய விலக்கங்களுடனேயே அமைத்தார். அவை வெற்றி பெற்றன. அதிலிருந்து விலகி அவர் எடுக்க விழைந்த சிதம்பர ரகசியம், புதிய சகாப்தம், புயல் கடந்த பூமி போன்ற படங்கள் பெரும் தோல்வியைப் பெற்று மீண்டும் மீண்டும் அவரை ஒரே திசையில் திருப்பின. நடிகராகவும் தனக்கு வழங்கப்படுகிற வேடங்களை ஏற்றுப் பரிமளிப்பதில் கச்சிதம் காட்டியவர் விசு. அவருடைய வசனங்கள் குறிப்பிட்ட காலம் தமிழ் சினிமாவின் வெற்றிகரமான முதலிடத்தில் அவரை நிறுத்தியிருந்தன என்றால் அது மிகையாகாது.

கூட்டுக்குடும்பம் எனும் வாழ்வு வடிவத்தைப் போற்றியபடி அதன்மீதான விசாரணையை நிகழ்த்திய வகையில் சம்சாரம் அது மின்சாரம் திரைப்படம் மாபெரும் வெற்றியைக் குவித்தது. தேசிய விருதுகளில் சிறந்த தமிழ்ப் படத்திற்கென தங்கப் பதக்கத்தை வென்றெடுத்த முதற்படமாக சம்சாரம் அது மின்சாரம் அமைந்தது தற்செயலும் தகுதியும் சந்தித்த வேளை நிகழ்ந்த அற்புதம். ஏவி.எம் நிறுவனம் தயாரித்த சம்சாரம் அது மின்சாரம் திரைப்படம் இன்றளவும் தொலைக்காட்சிகளில் அவ்வப்போது ஒளிபரப்பப்பட்டு வருவது அதற்கும் தமிழ் நிலத்துக்கும் இடையிலான மாறாத பந்தமொன்றை விளக்கித் தருகிற சாட்சியம்

அம்மையப்பனுக்கு இந்தியன் ஆயில் நிறுவனத்தில் வேலைபார்க்கும் சிதம்பரம் ஒரு தொழிற்சாலையில் பணியாற்றும் சிவா இன்னும் பன்னிரெண்டாம் வகுப்பைத் தாண்டாத பாரதி என மூன்று மகன்கள் சரோஜினி ஒரே மகள். கோதாவரி அம்மையப்பனின் இல்லத்தரசி. மூத்தவன் சிதம்பரத்தின் மனைவி உமா சிவாவின் மனைவி வசந்தா என எல்லோரும் கூட்டுக் குடும்பமாக வாழ்கின்றனர். சுயநலவாதியான சிதம்பரம் எப்போது படிப்பை முடிப்பான் எனத் தெரியாத பாரதி. மாற்று மதத்தில் காதல் திருமணம் செய்து அதில் முரண்படுகிற சரோஜினி எனக் குடும்பத்தின் எல்லா விழுதுகளின் படர்தலிலும் பிரச்சினை மொட்டுவிட எப்படித் தீர்க்கிறார் என்பதுதான் கதை. சொல்ல வந்த கதையை சொன்ன விதத்தில் ரசித்தார்கள் என்பதைவிட போற்றினார்கள் எனச் சொல்ல வேண்டும்.

சம்சாரம் அது மின்சாரம் படத்தில் சந்திரசேகர், ரகுவரன், மனோரமா, இளவரசி, டெல்லி கணேஷ், கமலாகாமேஷ், லட்சுமி, கிஷ்மு, திலீப் மாதுரி என வேடமேற்றவர்கள் அனைவருமே கனகச்சிதமாக நடித்திருந்தனர். சங்கர் கணேஷின் இசையில் எல்லாப் பாடல்களுமே அந்தக் காலத்தின் பெருவிருப்பப் பாடல்களாகத் திகழ்ந்தன.

கத்தி மீது நடந்தாற்போல் சாதாரணக் கதைக்கு எதை முடிவாக அறிவித்தாலும் திருப்தியின்றிப் போவதற்கும் சாதாரணமான மற்றொன்றாகவே மாறுவதற்கும் நிறையவே வாய்ப்புகள் உண்டு. இந்தப் படம் கொண்டாடப்பட்டதற்கு முதன்மையான காரணம் இதன் க்ளைமாக்ஸ். திரைப்படம் தீர்வு சொல்லி அதனை நிச வாழ்க்கைக்கு மாற்றிக் கடைப்பிடிப்பதெல்லாம் அரிதினும் அரிய நிகழாநிகழ்வு. ஆனால் இந்தப் படம் முன் வைத்த தீர்வு அடுத்த சமீப காலத்தில் மக்களின் மனோநிலையை முன் கூட்டி யூகித்த கச்சிதமாகவே திகழ்ந்தது. தொண்ணூறுகளில் உடைந்து சிதறிய கூட்டுக் குடும்பம் எனும் அமைப்பு இரண்டாயிரத்துக்கு அப்புறம் அபூர்வங்களின் வரிசையில் சேர்க்கப்பட்டது. அந்த வகையில் சம்சாரம் அது மின்சாரம் எதையும் நியாயப் படுத்தாமல் அதே நேரம் போலிப் ப்ரார்த்தனைகளைக் கைவிட்டு உதறி இதுதான் நிகழச் சரியாக இருக்கும் என்பதை துல்லியமாகவும் உறுதிபடவும் பேசிய விதத்தில் தமிழின் முக்கியமான படங்களில் ஒன்றாகிறது

சம்சாரம் அது மின்சாரம் வாழ்க்கை நாடகம்
 

 

https://uyirmmai.com/literature/நூறு-கதை-நூறு-சினிமா-97-சம்ச/