பாகிஸ்தானின் மிகவும் பருமனான மனிதர் மருத்துவமனை குழப்ப நிலையால் உயிரிழப்பு!

பாகிஸ்தானின் மிகவும் பருமனான மனிதர் மருத்துவமனை குழப்ப நிலையால் உயிரிழப்பு!

பாகிஸ்தானில் 330 கிலோ உடல் எடையை குறைப்பதற்காக சத்திரசிகிச்சை செய்துகொண்ட ஒருவர் மருத்துவமனையில் இடம்பெற்ற குழப்ப நிலை காரணமாக கவனிப்பாரின்றி இன்று (திங்கட்கிழமை) உயிரிழந்தார்.

லாகூரில் இருந்து சுமார் 400 கிலோமீட்டர் தொலைவில் உள்ள சாதிக்காபாத் பகுதியை சேர்ந்த நூருல் ஹசன் சிறு வயதில் இருந்தே உடல் பருமன் அதிகரிப்பு நோயால் பாதிக்கப்பட்டிருந்தார்.

இவரது எடை நாளுக்குநாள் அதிகரித்துக் கொண்டே சென்ற நிலையில், 55-வது வயதில் சுமார் 330 கிலோ எடையுள்ள மனிதராக மாறிப் போனார். அவருக்கு எடை குறைப்புக்கான சந்திர சிகிச்சையை மேற்கொள்ள குடும்பத்தார் முயற்சித்து வந்தனர்.

இந்த தருணத்தில், பாகிஸ்தானின் மிகவும் பருமனான நபர் என அந்த நாட்டு ஊடகங்களால் குறிப்பிடப்பட்ட நூருல் ஹசன் பற்றிய தகவல் அறிந்து அவருக்கு உதவி செய்ய பாகிஸ்தான் ராணுவ தளபதி காமர் ஜாவெத் பாஜ்வா முன்வந்தார்.

வீட்டின் சுவரை எல்லாம் இடித்து வெளியே கொண்டு வரப்பட்ட நூருல் ஹசன், லாகூர் நகரில் உள்ள சிறப்பு மருத்துவமனைக்கு செல்ல வசதியாக ராணுவ உலங்கு வானூர்தி ஒன்றையும் ராணுவ தளபதி அனுப்பி வைத்திருந்தார்.

லாகூரில் உள்ள ஷலாமார் மருத்துவமனையில் கடந்த மாதம் 28 ஆம் திகதி அனுமதிக்கப்பட்ட நூருல் ஹசனுக்கு ‘லிப்போசக்‌ஷன்’ எனப்படும் எடை குறைப்புக்கான சந்திர சிகிச்சை செய்யப்பட்டது. சந்திர சிகிச்சைக்கு பின்னர் மருத்துவமனையில் உள்ள தீவிர சிகிச்சை பிரிவில் அவரை அனுமதித்து மருத்துவர்கள் கண்காணித்து வந்தனர்.

இந்தநிலையில், அதே தீவிர சிகிச்சை பிரிவில் சேர்க்கப்பட்டிருந்த ஒரு பெண் இன்று சிகிச்சை பலனின்றி உயிரிழந்தார். இறந்தவரின் உறவினர்கள் பலர் அந்த அறைக்குள் கும்பலாக வந்து கூச்சலிட்டு, அழுது ரகளை செய்ததால் அங்கு சற்றுநேரம் கலவரமான சூழல் ஏற்பட்டது.

அப்போது அங்கு கண்காணிப்புக்காக வைக்கப்பட்டிருந்த நூருல் ஹசனின் உடல்நிலை திடீரென்று மோசமடைந்தது. மூச்சுத்திணறலால் அவர் பாதிக்கப்பட்டிருந்த நிலையில் அங்கு ஏற்பட்ட குழப்பநிலை காரணமாக அவரை கவனிக்க மருத்துவர்களோ, தாதியர்களோ அருகில் இல்லை என தெரிவிக்கப்பட்டுள்ளது.

இதனால், நூருல் ஹசன் மற்றும் அங்கே சிகிச்சை பெற்றுவந்த இன்னொரு பெண் என இருவர் இன்று பரிதாபமாக உயிரிழந்ததாக பாகிஸ்தான் ஊடகங்கள் செய்தி வெளியிட்டுள்ளன.

இந்த சம்பவம் தொடர்பாக கருத்து தெரிவித்த மருத்துவமனை நிர்வாகம் மூச்சுத்திணறலால் அவதிப்பட்டு கொண்டிருந்த நூருல் ஹசனுக்கு முதலுதவி செய்து அவரது உயிரை காப்பாற்ற மருத்துவர்கள் மற்றும் தாதியர்கள் முயன்றதாகவும், அதற்குள் நிலைமை கைமீறி போய் விட்டதாகவும் குறிப்பிட்டுள்ளனர்.

எனினும், இன்று நடந்த களேபரத்தின் போது என்ன நடந்தது? என்பதை தீவிர சிகிச்சை பிரிவில் உள்ள கண்காணிப்பு கமரா பதிவுகளை ஆய்வு செய்த பின்னர்தான் உண்மை நிலவரம் தெரியவரும் என மனித உரிமை ஆர்வலர்கள் கருதுகின்றனர்.

http://athavannews.com/பாகிஸ்தானின்-மிகவும்-பரு/