ஐக்கிய நாடுகள் சபையின் விசேட பிரதிநிதியொருவர் பிரதம நீதியரசர் ஜயந்த ஜயசூரியவை சந்தித்தமை தொடர்பில் பாராளுமன்றத்திலும் வௌியிலும் விசேட கவனம் செலுத்தப்பட்டுள்ளது.

இலங்கைக்கு விஜயம் செய்துள்ள அமைதியாக ஒன்றுகூடும் சுதந்திரத்திற்கான உரிமைகள் தொடர்பிலான ஐக்கிய நாடுகளின் விசேட பிரதிநிதி Clément Nyaletsossi Voule நாட்டின் பிரதம நீதியரசர் மற்றும் மேல் நீதிமன்ற நீதிபதிகள் சிலரை சந்திப்பதற்கு மேற்கொண்ட முயற்சி தொடர்பில் பாராளுமன்றத்தில் நேற்று (24) வாதப் பிரதிவாதம் ஏற்பட்டது.

நீதிபதிகளை சந்திப்பது தொடர்பான விடயங்களைக் குறிப்பிட்டு வௌிவிவகார அமைச்சிற்கு அனுப்பப்பட்ட கடிதமொன்றை சபையில் சமர்ப்பித்து எதிர்க்கட்சியினர் நேற்று கேள்வி எழுப்பியிருந்தனர்.

இதனையடுத்து, சபாநாயகரின் தலையீட்டில் மேல் நீதிமன்ற நீதிபதிகளுடனான சந்திப்பு தவிர்க்கப்பட்டது. எனினும், விசேட பிரதிநிதி பிரதம நீதியரசரை சந்தித்துள்ளார்.

பிரதம நீதியரசருடனான இந்த சந்திப்பு தொடர்பில் நீதி அமைச்சர் தலதா அத்துக்கோரள பின்வருமாறு கருத்துத் தெரிவித்தார்,

சர்வதேச அமைப்பு மற்றும் நபர்களுடன் நடவடிக்கைகளை முன்னெடுக்கையில், வெளிவிவகார அமைச்சூடாகவே அந்த விடயங்கள் இடம்பெறும். அவ்வாறு வருவோர் சந்தித்த பல்வேறு சந்தர்ப்பங்கள் உள்ளன. நீதிமன்றத்திற்கு எவ்வாறு அழுத்தம் பிரயோகிக்கப்படும்? நீதிமன்ற தீர்ப்புகளும் தீர்மானங்களும் இங்கேயே எடுக்கப்படுகின்றன. எவரேனும் வருகின்றபோது, ஏதேனும் விடயங்கள் குறித்து அங்குமிங்குமிருந்து அறிந்துகொள்வதை விட, கிணற்றுக்கருகிலிருந்து பேசுவதைவிட சரியான ஒருவரிடம் வினவினால் விடயங்களைக் கூறுவார். விடயங்களைக் கூறுகின்றோமே தவிர, அவர்கள் கூறுபவற்றை நாம் முன்னெடுக்க வேண்டியதில்லை. அவர்கள் அவ்வாறு கூறுவதும் இல்லை.

நீதி அமைச்சர் இவ்வாறு கூறினாலும், பிரதம நீதியரசர் ஐ.நா-வின் பிரதிநிதியை சந்தித்தமைக்கு பல்வேறு தரப்பினரும் எதிர்ப்பு வௌியிட்டு வருகின்றனர்.

https://www.newsfirst.lk/tamil/2019/07/25/பிரதம-நீதியரசர்-ஐ-நா-வின்/

நீதிமன்றில் விசாரிக்கப்பட்டுவரும் 3 வழக்குகள் தொடர்பில் ஐ.நா விசேட  தூதுவரிடம் கலந்துரையாடல்

நீதிமன்றில் விசாரிக்கப்பட்டுவரும் 3வழக்குகள் தொடர்பில் ஐக்கிய நாடுகள் விசேட தூதுவர் ஒருவருடன் கலந்துரையாடல் ஒன்று நேற்று மாலை 3மணிக்கு இருந்த வேளையில், சபையில் திடீரென எதிர்க்கட்சி உறுப்பினர்கள் அதுதொடர்பில் சபாநாயகரிடம் கேள்விகேட்டு சர்ச்சையை ஏற்படுத்தினர். அதனால் எதிர்க்கட்சி உறுப்பினர்களின் கோரிக்கைக்கு செவிசாய்த்த சபாநாயகர் கருஜசூரிய இடம்பெற இருந்த சந்திப்பை இடைநிறுத்துவதாகவும் சபைக்கு அறிவித்தார்.

பாராளுமன்ற இன்று சபாநாயகர் கருஜயசூரிய தலைமையில் கூடியது. பிரதான நடவடிக்கைகள் இடம்பெற்ற பின்னர், எதிர்க்கட்சி உறுப்பினர் தினேஷ் குணவர்த்தன விசேட கூற்றொன்றை முன்வைத்து தெரிவிக்கையில், 

நீதிமன்ற நடவடிக்கைகளில் தலையிடுவது நீதியரசர்களை பலவந்தப்படுத்துவது அரசியலமைப்புக்கு முரணாகும். ஆனால் வெளிவிவகார அமைச்சின் மேலதிக பதில் செயலாளர் அஹமத் ஏ. ஜாவாதின் கையெழுத்தில் அனுப்பப்பட்டுள்ள கடிதத்தில், எமது நீதிமன்றங்களில் தற்போது இடம்பெற்றுவரும் வழக்குகள் சிலவற்றின் தற்போதைய நிலை தொடர்பில் ஐக்கிய நாடுகள் விசேட தூதுவருக்கு விளக்கம் தெரிவிக்க வருமாறு தெரிவித்து கடிதத்தின் பிரதிகள் பிரதமரம நீதியரசர், நீதி அமைச்சர் மற்றும் கொழும்பு மேல் நீதிமன்ற நீதியரசர் ஆகியோருக்கு அனுப்பப்பட்டிருக்கின்றது.

இவ்வாறு நீதிமன்ற வழக்குகள் தொடர்பில் வெளிநாட்டு பிரஜைகளுடன் கருத்து பரிமாற்றிக்கொள்ள நீதிபதிகளுக்கு அழைப்பு விடுப்பதானது எமது நீதிமன்ற சுயாதீனத்தன்மைக்கு பாரிய அச்சுறுத்தலாகும். அதனால் இதனை தடுத்து நிறுத்த நடவடிக்கை எடுக்கவேண்டும் என இதன்போது தெரிவித்தார்.

https://www.virakesari.lk/article/61047