சங்கானையில் சுகாதாரமற்ற முறையில் இயங்கும் 15 உணவகங்கள் கண்டுபிடிப்பு

சங்கானையில் சுகாதாரமற்ற முறையில் இயங்கும் 15 உணவகங்கள் கண்டுபிடிப்பு

சங்கானை பிரதேச சபைக்குட்பட்ட பகுதியில் 15 உணவகங்கள் சுகாதாரமற்ற முறையில் இயங்குவதாக உணவுக்கட்டுப்பாட்டு அதிகாரிகள் தெரிவித்துள்ளனர்.

வட.மாகாண ஆளுநர் கலாநிதி சுரேன் ராகவனின் அறிவுறுத்தலுக்கு அமைய, உணவுக்கட்டுப்பாட்டு அதிகாரிகள் மற்றும் ஆளுநர் செயலணி இணைந்து உணவங்கள் மற்றும் மருந்தகங்கள் மீது திடீர் கண்காணிப்பு விஜயத்தை நேற்று (திங்கட்கிழமை) மேற்கொண்டிருந்தனர்.

உணவகங்களின் தரம் மற்றும் சட்டத்திற்கமைவாக இயங்குகின்றனவா என்று மேற்கொள்ளப்பட்ட இந்த சோதனை நடவடிக்கையின் போது, 15 உணவகங்கள் சுகாதாரமற்ற முறையில் இயங்குகின்றமை கண்டுபிடிக்கப்பட்டுள்ளதுடன் 9 உணவகங்களுக்கு எதிராக சட்ட நடவடிக்கை எடுக்கப்படவுள்ளதுடன் 1 உணவகத்தில் காணப்பட்ட தகுதியற்ற ரொட்டிகள் மற்றும் மரக்கறிவகைகள் அழிக்கப்பட்டன.

மேலும் சுகாதார சீர்கேடுகளுடன் தரமற்று காணப்பட்ட ஏனைய உணவகங்களுக்கு கால அவகாசம் வழங்கப்பட்டதுடன் அவ்வாறு தவறும் பட்சத்தில் சட்ட நடவடிக்கை எடுக்கப்படும் என்றும் அறிவுறுத்தப்பட்டுள்ளது.

அதேபோன்று 4 மருந்தகங்கள் மீது மேற்கொள்ளப்பட்ட சோதனை நடவடிக்கையின்போது, 2 மருந்தகங்களில் தகுதியற்ற மருந்து வழங்குனர்கள் சேவையில் இருந்தமை கண்டுபிடிக்கப்பட்டுள்ளமையினால் சட்ட நடவடிக்கை மேற்கொள்ளப்படவுள்ளது.

வட.மாகாணத்தின் அனைத்து பிரதேசங்களிலும் இந்த சோதனை நடவடிக்கைகள் தொடரும் என்றும் தகுதியற்ற உணவகங்கள் காணப்படின் மக்கள் இதுதொடர்பில் ஆளுநர் அலுவலகத்தின் 021-2219375 என்ற தொலைபேசி இலக்கத்திற்கு தகவல் வழங்க முடியுமெனவும் அதிகாரிகள் தெரிவித்துள்ளனர்.

http://athavannews.com/சங்காணையில்-சகாதாரமற்ற-ம/