மீள் குடியேற்றம் என்று தோட்டக்காணிகளில் பெரும்பான்மையினத்தவரை குடியேற்ற முயற்சி

[15 - May - 2007]

அதிகளவு சிறந்த உற்பத்தியைத் தருகின்ற 1200 ஏக்கர் தேயிலைக் காணிகளை சுவீகரித்து அவற்றில் பெரும்பான்மை இனத்தவர்களைக் குடியமர்த்த நடவடிக்கை எடுக்கப்பட்டு வருவதாக வலப்பனை பிரதேச மலையக மக்கள் முன்னணி பொறுப்பாளர் எஸ்.கோவிந்தராஜ் தெரிவித்துள்ளார்.

உடபுசல்லாவ, அதியாரவத்தை, ஹோல்டிமார், டெல்மார், இராகலை, மாக்குருகலை, மகாஊவா, சூரியகாந்தி, றைபோரஸ்ட் ஆகிய ஒன்பது தோட்டங்களின் 1200 ஏக்கர் விஸ்தீரணம் கொண்ட தேயிலைக்காணிகளிலேயே இந்த நடவடிக்கை எடுக்கப்படவுள்ளது.

அண்மையில் இப்பிரதேசத்தில் ஏற்பட்ட இயற்கை அனர்த்தங்களால் பாதிக்கப்பட்டுள்ள பெரும்பான்மை இன மக்களை மீள் குடியேற்றம் என்ற போர்வையில் இக்காணிகளில் குடியமர்த்த சிலர் முயற்சி எடுத்து வருகின்றனர்.

இதனால் இத் தோட்டக்காணிகளில் வாழுகின்ற தொழிலாளர் குடும்பங்கள் பெரும் பாதிப்புகளை எதிர் நோக்கவேண்டிய நிலை ஏற்படும்.

அத்துடன், இந்த செயற்பாடுகளால் இனங்களுக்கு மத்தியில் பல பிரச்சினைகளும் ஏற்படும் எனவும் தொழிலாளர்கள் தமது தொழிலை இழக்க வேண்டிய நிலை ஏற்படும் எனவும் தெரிவித்துள்ளார்.

இதனால் இத் தோட்டப்பகுதி மக்களின் அரசியல் ரீதியான செயற்பாடுகள், போன்ற இன்னோரன்ன செயற்பாடுகள் என்பனவும் இல்லாமல் போய்விடும் எனவும் அவர் குறிப்பிட்டார்.

இப்பிரச்சினை தொடர்பாக அவர் ஜனாதிபதி, அமைச்சர் பெ.சந்திரசேகரன், நுவரெலியா மாவட்ட அரசாங்க அதிபர், காணிசீர் திருத்த ஆணையாளர் ஆகியோருக்கும் கடித மூலம் முறையிட்டுள்ளார்.

பெரும்பான்மை இன அரசியல் வாதிகள் சிலரே இதற்கு திட்ட மிட்டுள்ளதாகவும் எஸ்.கோவிந்தராஜ் தெரிவித்துள்ளார்.

தினக்குரல்

வட கிழக்கு இன ஆக்கிரமிப்பு போதாதென்று மலைநாட்டிலும் தொடங்கி விட்டார்கள்.

1200 ஏக்கர் தேயிலைத் தோட்டத்தைவிட இன ஒடுக்கம் தான் முக்கியம் போலும்.