கல்வி மறுசீரமைப்பு ஆணைக்குழுவில் சிறுபான்மை சமூகம் சார்பாக எவரும் நியமிக்கப்படவில்லை

புதிய அரசாங்கம் மேற்கொள்ளும் நல்ல நடவடிக்கைகளுக்கு ஆதரவும் ஒத்துழைப்பும் வழங்க தயார் ஆனால் எமது சிறுபான்மை மக்களுக்கு பாதிப்பு ஏற்படும் நடவடிக்கைகளுக்கு நான் எனது எதிர்ப்பினை தெரிவிப்பதில் பின் நிற்க மாட்டேன் என மலையக மக்கள் முன்னணியின் தலைவரும் தமிழ் முற்போக்கு கூட்டணியின் பிரதி தலைவரும் முன்னாள் அமைச்சரும் தற்போதைய நுவரெலியா மாவட்ட பாராளுமன்ற உறுப்பினருமான வேலுசாமி இராதாகிருஷ்ணன் தெரிவித்துள்ளார்.

நுவரெலியா பரிசுத்த திரித்துவ மத்திய கல்லூரியின் ஆரம்ப பிரிவு பாடசாலையில் சுமார் 15 இலட்சம் ரூபா செலவில் அமைக்கப்பட்ட சிறுவர் பூங்கா ஒன்றை திறந்து வைத்து அங்கு உரையாற்றிய பொழுதே மேற்கண்டவாறு கூறினார்.

இப்பாடசாலையின் அதிபர் என். நவரட்னம் தலைமையில் நடைபெற்ற இவ் வைவைபவத்தில் மலையக ஆசிரியர் முன்னணியின் பொதுச் செயலாளர் ரவிந்திரன் மற்றும் நுவரெலியா பரிசுத்த திரித்துவ கல்லூரி அதிபர் ரவிச்சந்திரன் உட்பட பெற்றோர்களும் மாணவ மாணவிகளும் கலந்துக்கொண்டனர்.

அங்கு இராதாகிருஷ்ணன் தொடர்ந்து உரையாற்றுகையில்

புதிய அரசாங்கம் பல புதிய நடவடிக்கைககளை எடுத்து வருகின்றது. அதனை நான் வரவேற்கின்றேன். ஆனாலும் அண்மையில் கல்வி அபிவிருத்தி தொடர்பாக கல்வி மறுசீரமைப்பு ஆணைக்குழு ஒன்றை அரசாங்கம் நியமித்தது.

அந்த ஆணைக்குழுவில் உறுப்பினர்களாக சிறுப்பான்மை மக்கள் சார்பாக எவரும் நியமிக்கப்படவில்லை.

இது எங்களுக்கு வேதனையாக இருக்கின்றது.. கல்வி அபிவிருத்தி என்பது ஒரு சமூக பிரச்சனையாகும். அனைத்து சமூகமும் கல்வியில் அபிவிருத்தியடைந்தால்தான் அந்த சமூகம் முன்னேற்றம் அடையும்.

அந்த கல்வியை அபிவிருத்தி செய்யும் மறுசீரமைப்பு ஆணைக்குழுவில் சிறுபான்மை இனத்தை சேர்ந்தவர்களை உறுப்பினர்களாக இணைத்துக் கொள்ளாதது சிறுபான்மையினரை ஓரங்கட்டும் செயலாகும். எதிர்வரும் காலங்களில் சிறுபான்மை மக்களை புறக்கணிக்காமல் சமவுரிமை வழங்கி அவர்களின் அபிவிருத்தியிலும் சம பங்கு வழங்க வேண்டும்.

ஒரு பாடசசாலையின் வளர்ச்சி பாடசாலை பிள்ளைகளின் தொகையை மாத்திரம் வைத்து அபிவிருத்தியடைந்த பாடசாலையாக கருத முடியாது. பாடசாலையின் நடவடிக்கைகளில் மாணவ மாணவிகளின் திறமைகளை வைத்தே அபிவிருத்தியடைந்த பாடசாலையாக கருத முடியும்.

பாடசாலைகளில் கல்வியில் மாத்திரமல்லாமல் விளையாட்டு, கலை கலாச்சாரத்திலும் சிறந்து விளங்க வேண்டும்.

இந்த பரிசுத்த திரித்துவ மத்திய கல்லூரிக்கு ஒரு வரலாறு இருக்கின்றது.

நானும் இந்த கல்லூரியின் பழைய மாணவன்தான். இந்த கல்லூரியில் கல்வி கற்றவர்கள் பலர் அரசியல்வாதிகளாகவும் வைத்தியர்களாகவும் பொறியியலாளர்களாகவும் சட்டத்தரணிகளாகவும் சிறந்த வர்த்தகர்களாகவும் சிறந்த கலைக்கலாச்சார விளையாட்டு வீரர்களாகவும் இருக்கின்றார்கள்.

பாடசாலையில் அரசியல் தலையீடு இருக்க கூடாது. ஆனாலும் பாடசாலையின் அபிவிருத்திக்கு அரசியல் ஆதரவு தேவை.

அரசியல் ரீதியாகவும் எனது தனிப்பட்ட பழைய மாணவன் என்ற ரீதியாகவும் இந்த கல்லூரியின் வளர்ச்சிக்கு என்னால் முடிந்த உதவிகளை செய்வேன் என்றார்.
 

-மலையக நிருபர் தியாகு-

http://tamil.adaderana.lk/news.php?nid=124832