தேசிய அரசு: ஐ.தே.க. மறுப்பு

சிறிலங்காவில் மகிந்தவுடன் இணைந்து தேசிய அரசு அமைப்பதற்கான சாத்தியமில்லை என்று பிரதான எதிர்க்கட்சியான ஐக்கிய தேசியக் கட்சி தெரிவித்துள்ளது.

இது தொடர்பில் ஐ.தே.க.வின் பொதுச்செயலாளர் திச அத்தநாயக்க கூறியுள்ளதாவது:

தற்போதைய அரசாங்கத்தின் ஜனநாயகமற்ற செயற்பாடுகளினாலும் மனித உரிமை மீறல்களாலும் மக்களின் நம்பிக்கையை இழந்துவிட்டது. மகிந்தவுடன் இணைந்து தேசிய அரசு அமைப்பது என்பது கனவுதான். நாட்டைப் பாதித்து வரும்

இனப்பிரச்சனைக்குத் தீர்வு கான ஐக்கிய தேசியக் கட்சியுடன் செய்து கொண்ட ஒப்பந்தத்தை முற்றாக நாசமாக்கியவர் மகிந்த ராஜபக்ச என்றார் அவர்.

ஐக்கிய தேசியக் கட்சியின் மேலும் 9 நாடாளுமன்ற உறுப்பினர்கள், மகிந்தவின் அமைச்சரவையில் இணைய உள்ளதாகவும் ரணில் தலைமை மீது நம்பிக்கை இழந்துவிட்டோம் என்று அவர்கள் அறிவிக்கக் கூடும் என்ற நிலையில் இந்த அறிக்கையை ஐ.தே.க. வெளியிட்டுள்ளது.

ஐக்கிய தேசியக் கட்சியின் அதிருப்தி நாடாளுமன்ற உறுப்பினரான ஹேமகுமார நாணயக்கர கூறுகையில், 9 அதிருப்தி நாடாளுமன்ற உறுப்பினர்கள் மகிந்தவை ஆதரிக்க உள்ளனர். எதுவித நிபந்தனையுமின்றி மகிந்த அரசாங்கத்தை ஆதரிக்க உள்ளனர் என்றார். இருப்பினும் 9 பேரின் பெயரை அவர் வெளியிடவில்லை.

-Puthinam-

ராஜபக்ஸவின் சகோதரர்களை கொண்ட அரசியலில் ஐ.தே.க. ஒருபோதுமே கூட்டணி வைத்துக் கொள்ளப்போவதில்லை.

வெறுப்புக்கு உள்ளாகியுள்ள அரசாங்கத்துடன் இணைந்து தேசிய அரசாங்கம் அமைப்பதென்ற பேச்சுக்கே இடமில்லையென ஐ.தே.க. திட்டவட்டமாக தெரிவித்துள்ளது. இது தொடர்பாக அக்கட்சியின் பொதுச் செயலாளர் திஸ்ஸ அத்தநாயக்க கூறுகையில்,

மக்களின் வெறுப்புக்கு உள்ளாகியுள்ள இவ்வரசாங்கத்துடன் ஒருபோதுமே ஐ.தே.க. இணைந்து தேசிய அரசு அமைக்காது.

தேசிய நெருக்கடி உள்ளிட்ட பல பிரச்சினைகளுக்கு தீர்வுகாண நாம் அரசாங்கத்துடன் செய்துகொள்ளப்பட்ட ஒப்பந்தம் கிழித்தெறியப்பட்ட நிலையில் நாம் அரசாங்கத்துடன் இணைந்து தேசிய அரசமைப்பது என்ற பேச்சுக்கே இடமில்லை.

ஐ.தே.க. எப்போதும் சாத்தியமான விடயங்கள் பற்றியே சிந்திக்கும். மக்களை துன்பத்தில் தவிக்கவிட்டு, மூழ்கிக் கொண்டிருக்கும் இவ்வரசாங்கத்தை காப்பாற்றுவதை விடுத்து நாட்டையும் நாட்டு மக்களையும் காப்பது பற்றியே நாம் சிந்திக்கின்றோம்.

ராஜபக்ஸ சகோதரர்கள் நாட்டை தாரைவார்த்து விட்டனர். அரசாங்கத்துடன் இணைந்ததன் மூலம் பலருடைய வாய்களுக்கும் கைகளுக்கும் அவர்கள் விலங்கிட்டுவிட்டனர்.

இந்நிலையில் எமது கட்சியைச் சேர்ந்த எவரும் அரசாங்கத்துடன் இணையமாட்டார்கள். தினம் தினம் எமது கட்சி செல்வாக்கு அதிகரித்து வருகையில் தேசிய அரசு என்ற பேச்சினை அரசாங்கம் ஆரம்பித்துள்ளது. இதை நாம் அடியோடு நிராகரிக்கிறோம் என்றார்.

இதுபற்றி எதிர்க் கட்சிப் பிரதம கொரடாவும் பாராளுமன்ற உறுப்பினருமான ஜோசப் மைக்கல் பெரேரா கூறுகையில்,

ஜனாதிபதி மகிந்த ராஜபக்ஸ, சமல் ராஜபக்ஸ, கோதாபய ராஜபக்ஸ, பஷில் ராஜபக்ஸ ஆகிய சகோதரர்களை கொண்ட அரசியல் ஐ.தே.க. ஒருபோதுமே கூட்டணி வைத்துக் கொள்ளப் போவதில்லை.

போலி வாக்குறுதிகளை வழங்கி ஆட்சிக்கு வந்த இவ்வரசில் ராஜபக்ஸ சகோதரர்கள் மாத்திரமே நாட்டை நிர்வகிப்பதுடன் கொள்கை வகுப்பாளர்களாகவும் செயற்படுகின்றனர்.

எமது கட்சி பாராளுமன்ற உறுப்பினர்கள் கட்சி தாவுவதை தடுப்பதற்காக தேசிய அரசு அமைக்க நாம் எவ்வகையிலும் முயலவில்லை. அவ்வாறான திட்டங்கள் எதுவுமே ஐ.தே.க.விடம் இல்லை. அதற்கான தேவையும் கிடையாது என்றார்.

-Sankathi-