இதுவரை நீங்கள் அன்னையர் தினம் கொண்டாடி வந்து இருக்கலாம். ஆனால் இந்த லாக்டவுன் சமயத்தில் கொண்டாடுவது என்பது கடினமான ஒன்று. இந்த கொரோனா காலகட்டத்தில் தனிமைப்படுத்தல், சமூக விலகல் போன்றவை மேற்கொண்டு வரும் சமயத்தில் உங்க அம்மாவுக்கு எப்படி வாழ்த்துக்களை கூறப் போகிறீர்கள். அந்த நாளில் அவரை எப்படி ஸ்பெஷலாக உணர வைக்கப் போகிறீர்கள். எங்கேயும் ஷாப்பிங் கடைகள், பொழுதுபோக்கு இடங்கள் திறக்காத போது அவர்களுக்கு பிடித்த பரிசுப் பொருட்களை எப்படி வாங்கி கொடுப்பது, அவர்களுடன் எப்படி நேரம் கழிப்பது, இது போன்ற பல சிக்கலான எண்ணங்கள் உங்க மனதில் எழலாம். ஆனால் இந்த லாக்டவுன் சமயத்திலும் உங்க அம்மாவை ரொம்ப ஸ்பெஷலாக சந்தோஷமா வைத்திருக்க நாங்கள் சில ஐடியாக்களை தருகிறோம். இந்த ஐடியாக்களை நீங்கள் வீட்டில் இருந்து செய்தே உங்க அன்னையை ஸ்பெஷல் ஆக உணர வைக்க முடியும். இதற்காக நீங்கள் எந்த விதத்திலும் வெளியே செல்ல வேண்டிய அவசியம் இல்லை. இந்த அன்னையர் தின ஐடியாக்கள் உங்க அம்மாவை சந்தோஷமாக வைப்பதோடு உங்களுக்கும் உங்க அன்னைக்கும் உள்ள உறவை அழகாக்கலாம்.

ஒரு குறும்படம் தயாரியுங்கள்

இந்த ஐடியா உங்க அன்னையின் மீது நீங்கள் வைத்துள்ள அன்பை வெளிப்படுத்துவதோடு உங்க படைப்பாற்றலை வெளிப்படுத்தவும் ஒரு நல்ல தருணமாக அமையும். உங்க அம்மாவின் வாழ்க்கையில் நடந்த மறக்க முடியாத சிறப்பான நிகழ்ச்சிகளை பயன்படுத்தி அதில் எடுக்கப்பட்ட வீடியோக்கள் மற்றும் புகைப்படங்களை கோர்வையாக்கி ஒரு குறும்படத்தை நீங்கள் பரிசாக கொடுக்கலாம். அந்த குறும்படத்தில் அவருக்கு பிடித்த இசையையோ அல்லது பாடல்களையோ சேர்த்துக் கூட கொடுக்கலாம். உங்க வீடியோக்களை மேலும் அழகாக்கி கொள்ள அதில் எடிட்டிங் வாசகங்கள், அழகான கவிதைகள் போன்றவற்றை கூட சேர்த்து கொடுங்கள். அதே நேரத்தில் உங்க அன்னைக்கு அன்னையர் தின வாழ்த்துக்களையும் கூற மறந்து விடாதீர்கள். கடித பாணியில் கூட நீங்கள் வீடியோவை எடுக்கலாம். தொலைபேசி வழியில் சொல்ல முடியாத விஷயங்களை கோர்வையாக்கி ஒரு கடிதமாக உங்க வீடியோக்களை நீங்கள் கொடுக்கலாம்.

உங்க அம்மாவிற்கு ஏதாவது கற்றுக் கொடுங்கள்

பொதுவாக குழந்தைகளுக்குத் தான் அம்மா எல்லாவற்றையும் கற்றுக் கொடுப்பார். ஆனால் கொஞ்சம் யோசித்துக் பாருங்கள். உங்க அம்மாவிற்கும் சில விஷயங்களை கற்றுக் கொள்ள ஆசையாக இருந்திருக்கும். அது ஆங்கிலத்தில் பேசுவதாக இருக்கலாம் அல்லது ஸ்கூட்டி, காரை ஓட்டுவதாக இருக்கலாம், கணினியை கற்றுக் கொள்ள ஆசையாக இருந்திருக்கலாம், இன்ஸ்டாகிராம், பேஸ்புக் பயன்பாட்டை அறிந்து கொள்ள ஆசைப்படலாம், ஆன்லைனில் கரண்ட் மில், தொலைபேசி மில் கட்டுவது இது போன்று அவர்கள் ஆசைப்படும் விஷயங்களை அறிந்து அதற்கேற்ப உங்க அம்மாவிற்கு கற்றுக் கொடுங்கள்.. இந்த விஷயங்களை அவர் செய்த பிறகு அவர் முகத்தில் தோன்றும் பெருமிதம் விலைமதிப்பற்றது.

வீட்டில் தயாரித்த சில பொருட்களைக் கொண்டு வாழ்த்துக்கள்

நம்முடைய அன்பை எப்பொழுதும் எழுத்துக்களால் வெளிக்காட்டுவதை விட சிறந்த வழி எதுவும் இல்லை. எனவே உங்க அம்மாவுக்கு ஒரு கவிதை அல்லது பாடல்களை எழுதி பரிசளிக்கலாம். உங்களுக்கு கவிதையே எழுத தெரியாது என்று வருத்தப்படாதீர்கள். உங்க அன்னைக்கு புரிகின்ற மொழியில் சொல்லும் அனைத்துமே கவிதைகளே. உங்க அழகான முயற்சியே அவருக்கு மகிழ்வை கொடுக்கும். உங்களுக்கு ஓவியம் வரையும் திறமை இருந்தால் அவருக்கு ஒரு அழகான ஓவியம் வரைந்து கொடுக்கலாம். ஏன் அழகான ஒரு கதையைக் கூட அவருக்காக எழுதிக் கொடுக்கலாம். உங்க அன்னை என்றைக்காவது பழைய பாடல் பாடி இருக்கலாம் அதை காட்சிப் படுத்தி ஒரு வீடியோவை நீங்கள் அனுப்பலாம். DIY வாழ்த்து அட்டைகள், புகைப்பட பிரேம்கள் போன்ற ஏராளமான வழிகள் யூடியூபில் இருக்கின்றன. உங்க அன்னை லேட்டஸ்ட் டெக்னாலஜியில் விருப்பம் உள்ளவராக இருந்தால் அவருக்கு ஒரு மீம்ஸ்யை கூட உருவாக்கி அவரை குஷிப்படுத்துங்கள். அவர் மிகவும் சந்தோஷம் அடையக் கூடும்.

நினைவுகளை உருவாக்குங்கள்

எல்லாருக்கும் நம்முடைய அன்றாட வாழ்க்கை வேகமாக நகர்கிறது ஒருவரைப் பற்றி முழுமையாக புரிந்து கொள்ள நேரம் இருப்பதில்லை. உங்க அன்னையின் வாழ்க்கை எப்படி போகிறது அவர்கள் சந்தோஷமாக இருக்கிறார்களா இதைப் பற்றி அவர்களிடம் உட்கார்ந்து பேசியது உண்டா. அன்னையர் தினம் ஒரு நாள் முழுவதும் அவருடன் நேரம் கழிக்க முயலுங்கள். ஒரு நபராக அவர் எப்படி இருக்கிறார் என்பதை கண்டறியுங்கள். இதற்கு அவரிடம் அமர்ந்து பேசுவது முக்கியம்.

உறவுகளை இணையுங்கள்

சண்டை, தவறான புரிதல் அல்லது பொதுவாக வாழ்க்கை காரணமாக விலகிச் சென்ற ஒரு நபரை பெரும்பாலான மக்கள் கொண்டிருக்கிறார்கள். ஆனால் நம்மகிட்ட உள்ள ஈகோ அவர்களிடம் பேச முடியாத அளவிற்கு தடையாக உள்ளது. அப்படி உங்க அன்னையின் வாழ்க்கையில் யாராவது பிரிந்து சென்ற நபர் இருந்தால் அந்த உறவை அவருக்காக சரி செய்ய முயலுங்கள். குறைந்த பட்சம் அந்த நபரை அவருடன் பேச வைக்க முயற்சி செய்யுங்கள். அது அவருடைய சகோதரியாகவோ அல்லது சகோதரனாகவோ இருக்கலாம். ஏன் பிரிந்து போன பால்ய நண்பனாகக் கூட இருக்கலாம். நீண்ட நாட்களாக பேசத் துடித்துக் கொண்டிருந்த உறவைக் கண்டதும் அவர் மெய்சிலிர்த்து போய்விடுவார்.

ஒரு ராணியைப் போல் கவனித்துக் கொள்ளுங்கள்

இதுவரை உங்க தாய் தான் உங்களுக்கு அனைத்து வேலைகளையும் செய்து இருப்பார். அன்னைய தினம் அன்று அவருக்கு உதவியாக இருங்கள். அவருக்கு தேவையான அனைத்து உதவிகளையும் நீங்கள் செய்யுங்கள். சமைப்பது, வீட்டு வேலை செய்வது போன்ற அனைத்து உதவிகளையும் செய்யுங்கள். இனி அதை ஒவ்வொரு நாளும் கூட நீங்கள் செய்ய முற்படலாம். ஒரு காகிதக் கிரீடம் தயார் செய்து அவரை அந்த வீட்டின் ராணியாக்குங்கள். அவர் கட்டளை இடும் விஷயங்களை எல்லாம் ஒரு சேவகனாக அவருக்கு நீங்கள் செய்து கொடுக்கலாம். வேடிக்கை காட்டுங்கள். அதே நேரம் காலையில் ஒரு கப் தேநீர் உடன் அவரை எழுப்ப மறந்து விடாதீர்கள்.

பழைய நினைவுகளை புதுப்பியுங்கள்

உங்க அம்மாவின் பழைய கால நினைவுகளை புதுப்பிப்பது ஒரு சிறந்த வழி. அவர் பால்ய வயதில் குடும்பத்துடனான புகைப்படங்கள், கிழிந்து போன புகைப்படங்கள், குழந்தை பருவ புகைப்படங்களை எல்லாம் சேகரித்து கலர்புல் வண்ணத்துடன் லேட்டஸ்ட் டெக்னாலஜி உதவியுடன் அதை புதுப்பித்து கொடுக்கலாம். இது அவருக்கு ஒரு அழகான பழைய நினைவை தரும். நீங்கள் இருவரும் நீண்ட காலமாக நினைவில் வைத்திருக்கும் விஷயங்களைச் செய்யுங்கள். எந்த விஷயமும் மிகச் சிறியது அல்லது அற்பமானது அல்ல. உங்களுக்கு இது வேடிக்கையாக இருந்தால் கூட இது உங்க அம்மாவை சிரிக்க வைக்கும்.

ஒரு திரைப்பட விருந்து

உங்க அம்மாவுக்கு ஏதேனும் திரைப்படம் பார்க்க விருப்பம் இருந்தால் அதை அவருடன் இணைந்து பார்க்கலாம். உங்க அன்னையை சிரிக்க வைக்கும் திரைப்படங்களைக் கூட நீங்கள் தேர்ந்தெடுத்து அவருக்கு கொடுக்கலாம். வெளியில் சென்று திரைப்படத்தை பார்ப்பதை விட வீட்டிலேயே தேவையான ஸ்நாக்ஸ் செய்து லைட்டிங் எவக்ட் உடன் ஒரு திரைப்பட விருந்தை உங்க அம்மாவிற்கு ஏற்பாடு செய்து கொடுக்கலாம்.

உங்க அம்மா ஒரு பரபரப்பான நபர்

இதுவரை உங்க தாய் வீட்டிற்காக அனைத்து வேலைகளையும் ஓடி ஓடி செய்து இருப்பார். எப்பயும் அவருக்கு உட்கார்ந்து ரிலாக்ஸ் செய்யக் கூட நேரம் இல்லாமல் ஓடிக் கொண்டே இருந்திருப்பார். அவர் முகத்தில் பரபரப்பை தவிர வேறு எதையும் நீங்கள் கண்டு இருக்க மாட்டீர்கள். எனவே இந்த அன்னையர் தின அன்றைக்கு அவருக்கு ஓய்வு கொடுக்கலாம். அவருக்கு உடம்பு வலி என்றால் மசாஜ் செய்து விடலாம். வீட்டிலேயே ஸ்பா போன்ற நேரத்தை ஒதுக்கலாம். கண்டிப்பாக உங்க அன்னைக்கு அது ஒரு நல்ல ரிலாக்ஸ்யை கொடுக்கும். DIY பேஸ் மாஸ்க், பாத மசாஜ், நகப்பராமரிப்பு, அலங்கரிப்பு போன்றவற்றை நீங்கள் செய்து கொடுக்கலாம். அப்படியே ஒரு இதமான பின்னணி இசையுடன் ஒரு ஸ்பா இரவை அவருக்கு பரிசளியுங்கள்.

அவளிடம் இருந்து எதாவது கற்றுக் கொள்ளுங்கள்

நீண்ட காலமாக நம் அம்மாவிற்கு ஒன்றும் தெரியாது என்றே பேசி இருந்திருப்போம். ஆனால் உங்க அம்மாவிற்கு பல்வேறு தலைப்புகளில் அறிவு பெருகி இருக்கலாம். உங்கள் தாய்க்கு உணவு சமைப்பதைத் தவிர எண்ணற்ற திறமைகள் உள்ளன. பட்ஜெட், நேர மேலாண்மை, கல்லூரி / பள்ளி, தையல், குரோச்சிங், பல்வேறு மொழிகள் போன்றவற்றில் அவர் சிறப்பாக இருக்கலாம். இது போன்ற திறமைகளை அவரிடம் இருந்து நீங்கள் கற்றுக் கொள்ளலாம்.

அன்னையர் தினம் என்பது ஒரு நாள் கொண்டாட்டம் அல்ல

இந்த அன்னையர் தினம் என்பது ஒரு நாள் கொண்டாட்டமாக மட்டும் இருக்கக் கூடாது. உங்க தாயின் வலி, பரபரப்பு இவற்றை எல்லாம் எப்பொழுதும் போக்கக் கூடியதாக இருக்க வேண்டும். இந்த தனிமைப்படுத்துதல் அதற்கான ஒரு வழியை கொடுத்துள்ளது. அவர் செய்த தியாகத்துக்காக நீங்கள் கைத்தட்ட வேண்டாம். அவரது வாழ்க்கையை சிறப்பாக மாற்ற தீவிரமாக பணியாற்றுங்கள்.

இந்த நேரத்தை வீணடிக்க வேண்டாம். இனி இந்த அன்னையர் தினத்தில் இருந்து ஒரு அம்மாவை ஒரு சக மனிதராக பாருங்கள். இந்த அன்னையர் தின நாளில் அன்பும் பாசமும் அதிகரிக்கட்டும். உறவு அழகாகட்டும். எல்லாருக்கும் இனிய அன்னையர் தின வாழ்த்துக்கள்.