எறும்புகளின் ஒற்றுமை நமக்கு வருமா?ஆச்சரியமடைந்தனர் ஆராய்ச்சியாளர்கள்

[SUNDHAL]

வாஷிங்டன்: எறும்புகள் ஒன்றன்பின் ஒன்றாக வரிசையாக செல்வதை மட்டுமே பார்த்தருக்கிறோம். ஆனால், அவை போகும் பாதையில் பள்ளம் இருந்தால் அவை எப்படி சமாளிக்கின்றன என்பது குறித்த சுவாரஸ்யமான தகவல்களை பிரிட்டிஷ் ஆராய்ச்சியாளர்கள் கண்டுபிடித்துள்ளனர். பிரிட்டனைச் சேர்ந்த பிரிஸ்டோல் பல்கலைக்கழக ஆராய்ச்சியாளர்கள் ஸ்காட் பாவெல் மற்றும் நைஜெல் பிராங்க்ஸ் ஆகியோர் எறும்புகளின் வாழ்க்கை முறை பற்றிய ஆராய்ச்சியில் ஈடுபட்டனர். அப்போது, அவர்கள் எறும்புகள் பற்றிய பல சுவாரஸ்யமான தகவல்களை கண்டறிந்தனர். மத்திய மற்றும் தென் அமெரிக்க காடுகளில் உள்ள ஒரு வகை எறும்புகளைப் பற்றி அவர்கள் ஆராய்ந்தனர். ஒரு குடும்பத்தில் ஏறக்குறைய இரண்டு லட்சம் எறும்புகள் இருக்கும். இவை ஒன்றன் பின் ஒன்றாக ஊர்ந்து செல்வது பார்ப்பதற்கு மிக அழகாக இருக்கும். இவை போகும் வழியில், சாலையில் சிறிய ஓட்டை இருந்தால், ஓட்டையின் அளவிற்கேற்ப ஒரு எறும்பு படுத்துக் கொண்டு ஓட்டையை அடைத்து விடுகிறது. அதன் மூலம் மற்ற அனைத்து எறும்புகளும் சுலபமாகவும், வேகமாகவும் பயணிக்க முடிகிறது. பெரிய பள்ளமாக இருந்தால் அந்த பள்ளத்திற்கு ஏற்ற எண்ணிக்கையில் எறும்புகள் படுத்துக் கொண்டு பள்ளத்தை அடைக்கின்றன. அனைத்து எறும்புகளும் சென்றபிறகு, படுத்திருக்கும் எறும்புகள் அவற்றை பின்தொடர்ந்து செல்கின்றன. சிறியதும், பெரியதுமான பல ஓட்டைகள் கொண்ட ஒரு பலகையை ஆராய்ச்சியாளர்கள் தரையில் வைத்தனர். அந்த பலகை மேல் எறும்புகள் போனபோது, ஓட்டைகளின் அளவிற்கு ஏற்றபடி எறும்புகள் அந்தந்த ஓட்டைகளை அடைத்தது ஆராய்ச்சயாளர்களை ஆச்சரியப்பட வைத்தது.

Thanks to Dinamalar....