தமிழ் மக்களை வெளியேற்ற அரசு மீண்டும் முயற்சித்தால் வீதியில் இறங்குவோம்

வீரகேசரி நாளேடு

கொழும்பில் உள்ள தமிழ் மக்களை வெளியேற்றுவதற்கு மீண்டும் அரசாங்கம் நடவடிக்கை எடுத்தால் ஐக்கிய தேசியக்கட்சி பாரிய எதிர்ப்பு நடவடிக்கையை மேற்கொள்ளும். அவ்வாறான முயற்சியை தோற்கடிக்க ஐ.தே.க. தன்னாலான அனைத்து செயற்பாடுகளையும் மேற்கொள்ளும். தமிழ் மக்களின் உரிமைகளைப் பாதுகாப்பதற்காக வீதியில் இறங்கி போராடவும் எமது கட்சி தயாராக இருக்கின்றது. அரசியலமைப்பை மீறுவதற்கு அரசாங்கத்திற்கு எந்தவிதமான உரிமையும் இல்லை என்று கட்சியின் பொதுச்செயலாளர் திஸ்ஸ அத்தநாயக்க தெரிவித்தார். நாட்டின் தற்போதைய அரசியல் நிலைமை தொடர்பாக கேசரிக்கு கருத்துத் தெரிவிக்கையில் அவர் மேற்கண்டவாறு தெரிவித்தார். இவ்விடயம் தொடர்பாக அவர் மேலும் கூறியதாவது:

அரசியலமைப்பின் பிரகாரமே இந்த நாடு நிருவகிக்கப்படவேண்டும். அதனை மீறுவதற்கு அதிகாரத்தில் உள்ள அரசாங்கத்திற்கு எந்தவிமான அதிகாரமும் கிடையாது. அந்த வகையில் இந்த நாட்டின் மக்கள் எப்பகுதியிலும் வாழும் உரிமையை அரசியலமைப்பு உறுதிப்படுத்துகின்றது. இதனை அனைவரும் நினைவில் வைத்துக்கொள்ள வேண்டும். அரசியலமைப்பை மீறியே அரசாங்கம் அண்மையில் தமிழ் மக்களை கொழும்பில் இருந்து வெளியேற்றும் மிலேச்சத்தனமான செயற்பாட்டை மேற்கொண்டது.

தற்போதைய நிலைமையில் தமிழர்களை வெளியேற்றும் நடவடிக்கைக்கு முற்றுப்புள்ளி வைக்கப்பட்டுள்ளது. இருப்பினும் அரசாங்க அமைச்சர்களின் கூற்றுக்களைப் பார்க்கும் போது தமிழர்கள் மீண்டும் கொழும்பில் இருந்து வெளியேற்றப்படுவார்களா? என்ற அச்சம் ஏற்பட்டுள்ளது. அமைச்சர்களின் அண்மைய கூற்றுக்கள் முன்னுக்குப்பின் முரண்பட்டவையாக உள்ளன். ஆனால் எந்த அடிப்படையிலும் தமிழ்மக்களை கொழும்பில் இருந்து வெளியேற்றுவதற்கு இடமளிக்கமாட்டோம்.

ஒரு காலத்தில் விடுதலைப்புலிகள் சிங்களவர்களையும் முஸ்லிம்களையும் வடக்கில் இருந்து வெளியேற்றினார்கள் என்ற காரணத்திற்காக கொழும்பில் இருந்து தமிழ் மக்களை வெளியேற்ற முயற்சிப்பது நியாயமற்றது. விடுதலைப்புலிகளைப் போன்று அரசாங்கத்தால் செயற்படமுடியாது. காரணம் அரசாங்கம் மக்களால் தெரிவு செய்யப்பட்ட ஜனநாயக அமைப்பாகும்.

இன மற்றும் மத அடிப்படையில் எவரையும் எந்தப்பகுதியில் இருந்தும் வெளியேற்ற முடியாது. யுத்தம் ஒன்று நாட்டில் நிலவுகின்றது என்பதை ஏற்றுக்கொள்கின்றோம். ஆனால் தமிழ் மக்களை வெளியேற்றுவதன் மூலம் யுத்தத்திற்கோ இனப்பிரச்சினைக்கோ தீர்வு காண முடியாது.

அடடா, தமிழ் மக்கள் மீது எத்தனை பிரியம். எத்தனை பாசம்.

வீதியிலை இறங்குவோம் எண்ட தலைப்பை பாத்த உடனை.... ஏதோ முதல் பஸ்சை பிடித்து கௌரவமாய் ஊர் போய் சேரப்போகினமாக்கும் எண்டு நினைச்சன்...