பணம் தேவையானவர்கள் என்னிடம் கேட்டுப் பெற்று கொள்ளுக - ரஞ்சன் எம்.பி.

 

ஐக்கிய மக்கள் சக்தியின் கம்பஹா மாவட்ட நாடாளுமன்ற உறுப்பினரும் சிங்களத் திரைப்பட நடிகருமான ரஞ்சன் ராமநாயக்க தன்னிடமுள்ள 40 இலட்சம் ரூபாய் பணத்தைப் பொருளாதார ரீதியில் நலிவுற்ற மக்களுக்கு வழங்கவுள்ளார் என்று தெரிவித்துள்ளார்.

நாடாளுமன்ற அமர்வுகளுக்காகத் தனக்குக் கிடைத்த 40 இலட்சம் ரூபா பணத்தையே அவர் இவ்வாறாக மக்களுக்கு வழங்குகின்றார் என்று கூறியுள்ளார்.

இது தொடர்பாக அவரது யூடியூப் பக்கத்தில் காணொளி ஒன்றை வெளியிட்டுள்ள ரஞ்சன், மேசை ஒன்றின் மீது 5000 ரூபா பணத்தாள்களைப் பரப்பி வைத்து, பணம் தேவையானவர்களைத் தனது செயலாளரைத் தொடர்புகொள்ளுமாறு கேட்டுக்கொண்டுள்ளார்.

கடந்த நான்கு வருடங்களாக நாடாளுமன்றத்தில் தனக்கான கொடுப்பனவுகளைப் பெற்றுக்கொள்ளாத நிலையில், தற்போது மொத்தம் 40 இலட்சம் ரூபாவாக அந்தத் தொகை தனக்கு அனுப்பி வைக்கப்பட்டுள்ளது எனவும் அவர் குறிப்பிட்டுள்ளார்.

"இந்த 40 இலட்சம் ரூபாயில் தனக்குச் சிறிய செலவுகள் உள்ளன. அவை தவிர மிகுதி அனைத்தையும் மனிதாபிமான முறையில் பொருளாதார ரீதியில் நலிவுற்ற மக்களுக்குப் பகிர்ந்தளிக்கவுள்ளேன்" என்றும் அவர் தெரிவித்துள்ளார்.

நாடாளுமன்ற உறுப்பினர்களான தனது நண்பர்களுக்குச் சொந்தமாகக் கப்பல்கள், ஹெலிகொப்டர்கள் உள்ள போதும், தன்னிடம் வாடகைக்குப் பெறப்பட்ட வான் ஒன்றே இருக்கின்றது எனவும், வரி செலுத்தாமல் வாகனம் கொள்வனவு செய்வதற்கு நாடாளுமன்ற உறுப்பினர்களுக்கு அரசு வழங்கிய அனுமதிப் பத்திரம் மூலம் கிடைத்த பணத்தைக் கலைஞர்களுக்காக வழங்கினார் எனவும் கூறியுள்ளார்.

இது தொடர்பில் அவர் மேலும் தெரிவித்ததாவது:-

"அடுத்த முறை எனக்குக் கிடைக்கவுள்ள வாகன கொள்முதல் அனுமதிப் பத்திரம் மூலம் கிடைக்கும் பணத்தையும் மக்களுக்காகச் செலவு செய்யவுள்ளேன்.

இப்போது எனக்குப் போதுமான பணம் உள்ளது. இன்னும் பணம் சேரும். எனக்கு யூடியூப் தளம் உள்ளது. அதன் மூலம் மாதம் 3 – 4 இலட்சம் ரூபாய் கிடைக்கும். அதையும் மக்களுக்கே வழங்கப்போகின்றேன்.

அம்மா, அப்பா, மனைவி, பிள்ளைகள் என்று எனக்கு யாரும் இல்லை. நான் தனியாக இருக்கின்றேன். அதனாலேயே இந்தக் காரியத்தைச் செய்கின்றேன்" - என்றார்.

பணம் தேவையானவர்களைத் தனது செயலாளரைத் தொடர்புகொள்ளுமாறும், செயலாளரின் பெயர் மற்றும் தொலைபேசி இலக்கத்தையும் ரஞ்சன் ராமநாயக்க தனது காணொளியில் குறிப்பிட்டுள்ளார்

http://aruvi.com/article/tam/2021/01/04/21135/