ஜனாதிபதி தேர்தலில் மீண்டும் போட்டியிட அப்துல் கலாம் திட்டவட்டமாக மறுப்பு

[24 - Jஉனெ - 2007] [Fஒன்ட் ஸிழெ - ஆ - ஆ - ஆ]

இந்திய ஜனாதிபதித் தேர்தலில் இரண்டாவது முறையாகப் போட்டியிட ஜனாதிபதி அப்துல் கலாம் மறுத்துவிட்டார்.

வெள்ளிக்கிழமை பிற்பகல் தன்னைச் சந்தித்த தலைவர்களிடம் கலாம் இந்த முடிவை அறிவித்தார்.

அ.தி.மு.க. பொதுச் செயலர் ஜெயலலிதா, தெலுங்கு தேச தலைவர் சந்திரபாபு நாயுடு, சமாஜவாதி தலைவர் முலாயம் சிங் யாதவ், ம.தி.மு.க. பொதுச் செயலர் வைகோ உள்ளிட்ட தலைவர்கள் கலாமைச் சந்தித்தனர்.

இரு நாட்களுக்கு முன் தன்னைச் சந்தித்த கூட்டணித் தலைவர்களிடம் "வெற்றி வாய்ப்பு உறுதியாக இருந்தால் தேர்தலில் போட்டியிடுவது குறித்து பரிசீலிக்கத் தயார்" என்று தெரிவித்தார்.

போட்டி இருந்தால் களத்தில் நிற்கமாட்டேன். ஒருமனதாகத் தேர்ந்தெடுப்பதாக இருந்தால் மட்டுமே போட்டியிடுவேன் என்று குறிப்பிட்டிருந்தார். ஆனால், காங்கிரஸ் தலைமையிலான ஐக்கிய முற்போக்குக் கூட்டணி மற்றும் மார்க்சிஸ்ட் தலைமையிலான இடதுசாரிக் கட்சிகள் கலாமுக்கு ஆதரவளிக்க முடியாது என்று அறிவித்துவிட்டன.

கலாமுக்கு ஆதரவளிக்க பாரதீய ஜனதா தலைமையிலான தேசிய ஜனநாயகக் கூட்டணிக் கட்சிகள் முன்வந்தன. அவ்வாறு அவர் போட்டியிடாவிட்டால் தங்கள் கூட்டணியின் ஆதரவு பெற்ற சுயேச்சை வேட்பாளரான குடியரசுத் துணைத் தலைவர் பைரோன் சிங் ஷெகாவத்துக்கு ஆதரவளிக்குமாறு ஐக்கிய தேசிய முற்போக்கு கூட்டணிக்கு அவை நிபந்தனை விதித்தன.

இந்நிலையில் வெள்ளிக்கிழமை தன்னைச் சந்தித்த ஐக்கிய தேசிய முற்போக்குக் கூட்டணித் தலைவர்களிடம், தேர்தலில் போட்டியிட விரும்பவில்லை என்ற தனது முடிவை கலாம் திட்டவட்டமாகத் தெரிவித்தார்.

கலாமைச் சந்தித்த பிறகு வாஜ்பாய், அத்வானி உள்ளிட்ட தேசிய ஜனநாயகக் கூட்டணித் தலைவர்களையும் ஐக்கிய தேசிய முற்போக்குக் கூட்டணித் தலைவர்கள் சந்தித்தனர். கலாமின் முடிவைத் தெரிவித்தனர்.

பின்னர் செய்தியாளர்களிடம் ஜெயலலிதா கூறியதாவது:

`அனைத்துத் தரப்பு மக்களின் ஆதரவையும் அன்பையும் பெற்றவரான கலாம், உலக அரங்கில் இந்தியாவின் பெருமையை உயர்த்தியவர். அவரை மீண்டும் ஜனாதிபதியாகத் தேர்ந்தெடுக்க வேண்டும் என எங்கள் அணி விரும்பியது.

வெள்ளிக்கிழமை கலாமின் இறுதி முடிவைத் தெரிந்துகொள்ள அவரைச் சந்தித்தோம். கோடிக்கணக்கான மக்கள் தன் மீது வைத்துள்ள அன்புக்கு அவர் நன்றி தெரிவித்தார். அதேநேரத்தில் மத்திய அமைச்சர்கள் சிலர்மிகவும் தரக்குறைவான வகையில் அவரை விமர்சனம் செய்திருப்பது குறித்து மிகுந்த மனவேதனையடைந்திருக்கிறார்.

ஜனாதிபதி பதவி தேவையில்லாமல் அரசியல் சர்ச்சையில் இழுக்கப்படுவதை தான் விரும்பவில்லை என்றும், தேர்தலில் போட்டியிட விரும்பவில்லை என்றும் கலாம் தெரிவித்தார். இது இறுதியான, உறுதியான முடிவு என்றும் தெரிவித்தார் என்றார் ஜெயலலிதா. அதேநேரத்தில் அவருக்கு ஆதரவளிக்க முன்வந்த வாஜ்பாய், அத்வானி உள்ளிட்ட தேசிய ஜனநாயகக் கூட்டணித் தலைவர்கள் மிகுந்த மரியாதைக்குரியவர்கள். கலாம் போட்டியிடுவதாக இருந்தால் தான் போட்டியிலிருந்து விலக முன்வந்த ஷெகாவத்தின் பெருந்தன்மை பாராட்டத்தக்கது என்றார்.

ஐக்கிய முற்போக்குக் கூட்டணி மற்றும் தேசிய ஜனநாயகக் கூட்டணி ஆதரவு வேட்பாளர்களை ஆதரிப்பதில்லை என ஏற்கனவே எங்கள் அணி முடிவு செய்திருக்கிறது. அடுத்தகட்ட நடவடிக்கை குறித்து விரைவில் ஆலோசித்து முடிவெடுப்போம் என்றார் ஜெயலலிதா.

http://www.thinakkural.com/news/2007/6/24/...s_page29732.htm