அரசாங்கம் கவிழ்க்கப்பட்டால் பொதுத் தேர்தல் ஒன்றை நடத்துவது என மகிந்த தீர்மானம்

திங்கள் 02-07-2007 11:14 மணி தமிழீழம் [மகான்]

அரசாங்கம் கவிழ்க்கப்பட்டால் பொதுத் தேர்தல் ஒன்றை நடத்துவது என மகிந்த தீர்மானம்

ஸ்ரீலங்கா அரசாங்கத்திற்கு எதிரான நம்பிக்கையில்லா தீர்மானம் ஒன்று கொண்டு வரப்பட்டு அரசாங்கம் கவிழ்க்கப்படுமானால் பொதுத் தேர்தல் ஒன்றை நடத்துவது என மகிந்த ராஜபக்ச தீர்மானித்துள்ளதாக தகவல்கள் வெளியாகியுள்ளன.

முன்னாள் அமைச்சர்கள் மங்கள சமரவீர மற்றும் ஸ்ரீபதி சூரியாராட்சி ஆகியோரின் தற்போதைய அரசியல் நடவடிக்கைகள் அரசாங்கத்தை கவிழ்க்கும் நோக்கிலேயே முன்னெடுக்கப்பட்டு வருவதாக தெரியவந்துள்ளது.

ஐக்கிய தேசிய கட்சி, ஜே.வி.பி மற்றும் தமிழ் தேசிய கூட்டமைப்பு ஆகியவற்றை ஒருங்கிணைத்து அரசாங்கத்திற்கு எதிரான நம்பிக்கையில்லா தீர்மானத்தை பாராளுமன்றில் கொண்டு வருவதற்கு மங்கள சமரவீர நடவடிக்கை எடுத்துள்ளார்.

மங்கள சமரவீரவிற்கு ஆதரவாக அரசாங்க தரப்பின் முக்கிய உறுப்பினர்களும் செயல்படுவதாகவும் நம்பிக்கையில்லா பிரேரணயின் போது அரசாங்கத்தில் இணைந்து கொண்டுள்ள முஸ்லீம் காங்கிரஸ் மற்றும் இலங்கை தொழிலாளர் காங்கிரஸ் போன்ற சிறுபான்மை கட்சிகளும் அரசாங்கத்திற்கு எதிராக வாக்களிக்கும் நிலை ஏற்பட்டுள்ளதாகவும் தெரியவந்துள்ளது.

இவ்வாறான நிலையில் நம்பிக்கையில்லா தீர்மானம் கொண்டு வரப்பட்டால் மீண்டும் பொதுத் தேர்தலை நடத்துவதற்கு ஏற்பாடுகளை மேற்கொள்ளுமாறு தனக்கு நெருக்கமான சுதந்திர கட்சி உறுப்பினர்களுக்கு மகிந்த ராஜபக்ச பணிப்புரை விடுத்துள்ளதாக தெரியவந்துள்ளது.

pathivu