இந்தியா - இங்கிலாந்து கிரிக்கெட் டெஸ்ட்: ஓவல் டெஸ்டில் 50 ஆண்டுகளுக்குப் பிறகு இந்தியா வெற்றி

6 செப்டெம்பர் 2021

பட மூலாதாரம்,GETTY IMAGES

பரபரப்பான கடைசி நாள் ஆட்டத்தில் இங்கிலாந்தின் விக்கெட்டுகளை அடுத்தடுத்து வீழ்த்தி நான்காவது டெஸ்ட் போட்டியை வென்றிருக்கிறது விராட் கோலி தலைமையிலான இந்திய அணி.

157 ரன்கள் வித்தியாசத்தில் இந்திய அணி வெற்றி பெற்றிருக்கிறது.

பெருமை மிக்க ஓவல் மைதானத்தில் 1971-ஆம் ஆண்டுக்குப் பிறகு இந்தியா பெற்றிருக்கும் முதல் டெஸ்ட்வெற்றி இது. 50 ஆண்டுக் காத்திருப்பு இப்போது முடிவுக்கு வந்திருக்கிறது.

1971-ஆம் ஆண்டு அஜித் வடேகர் தலைமையிலான இந்திய அணிதான் கடைசியாக ஓவல் மைதானத்தில் டெஸ்ட் வெற்றியைப் பதிவு செய்திருந்தது.

ஹெட்டிங்லி மைதானத்தில் பெற்ற இன்னிங்ஸ் தோல்வி அழுத்தத்தில்தான் இந்திய அணி ஓவல் மைதானத்தில் களமிறங்கியது. இங்கும் முதல் இன்னிங்ஸ் மிக மோசமானதாகவே முடிவுக்கு வந்தது. 190 ரன்களுக்கு அனைத்து விக்கெட்டுகளையும் இழந்தது. இதனால் முதல் இன்னிங்ஸில் இங்கிலாந்து அணிக்கு 99 ரன்கள் முன்னிலை கிடைத்தது.

ஆனால் இரண்டாவது இன்னிங்ஸில் ரோஹித் சர்மாவின் அற்புதமான சதத்தால் இந்தியா மீண்டும் முன்னிலைக்கு வந்தது. தோல்விக்கு பதிலடி கொடுக்க முடியும் என்ற நம்பிக்கை பிறந்தது இந்தச் சதத்தின் மூலம்தான்.

• தாலிபன் கொலை மிரட்டலுக்கு அஞ்சி தலைமறைவான வீராங்கனைகள்
• டோக்யோ பாராலிம்பிக் முடிந்தது: 19 பதக்கங்களுடன் இந்தியாவுக்கு 24ஆம் இடம்

ரோஹித் சர்மா 127 ரன்கள் அடிக்க அவருக்கு ஆதரவாக புஜாரா 61 ரன்களும் விராட் கோலி 44 ரன்களும் எடுத்ததால் தொடக்கத்திலேயே வலுவாக முன்னேறியது இந்தியா. ரிஷப் பந்த், ஷ்ரத்துல் தாக்குர் என அடுத்த வரிசை வீரர்களும் அரைச் சதங்களை அடித்ததால் இங்கிலாந்து அணிக்கு 368 ரன்கள் என்ற இமாலய இலக்கு நிர்ணயிக்கப்பட்டது.

கபில்தேவ் சாதனையை முறியடித்த பும்ரா

கடைசி நாளில் இங்கிலாந்து 291 ரன்கள் தேவைப்பட்டன. ஒரேயொரு நாளில் இத்தனை ரன்களை அடிப்பதோ அல்லது அனைத்து விக்கெட்டுகளையும் வீழ்த்துவோ இரு அணிகளுக்குமே நிச்சயமாக வாழ்வா, சாவா என்ற போராட்டம்தான்.

பட மூலாதாரம்,GETTY IMAGES

ஆனால் இந்தியப் பந்து வீச்சாளர்களான ஜஸ்பிரீத் பும்ரா, உமேஷ் யாதவ் ஆகியோரின் துல்லியமான தாக்குதல்களால் இங்கிலாந்து அணி நிலை குலைந்துவிட்டது. டிரா செய்துவிட முடியும் என்ற நம்பிக்கையுடன் இருந்த கடைசி மூன்று விக்கெட்டுகளையும் உமேஷ் யாதவ் தகர்த்தார்.

பும்ரா, ரவீந்திர ஜடேஜா, ஷ்ரத்துல் தாக்குர் ஆகியோர் தலா இரண்டு விக்கெட்டுகளை வீழ்த்தினார்கள். இந்தப் போட்டியில் தனது நூறாவது விக்கெட்டை பும்ரா வீழ்த்தினார்.

குறைந்த போட்டிகளில் 100 விக்கெட்டுகளை வீழ்த்திய இந்திய வீரர் என்ற பெருமை பும்ராவுக்குக் கிடைத்திருக்கிறது. இதற்கு அவருக்கு 24 போட்டிகள் தேவைப்பட்டிருக்கின்றன. இதற்கு முன்னதாக 25 போட்டிகளில் கபில்தேவ் 100விக்கெட்டுகளை வீழ்த்தியதே சாதனையாக இருந்தது.

ஓவல் வெற்றியின் மூலம் ஐந்து போட்டிகள் கொண்ட தொடரில் 2-1 என்று முன்னிலை பெற்றிருக்கிறது இந்திய அணி. கடைசி போட்டி மான்செஸ்டர் நகரில் வரும் 10-ஆம் தேதி நடக்கிறது.

ஓவல் மைதானத்தில் இந்திய அணி பெற்ற வெற்றியின் மூலம் இங்கிலாந்து அணி தொடரை கைப்பற்ற முடியாத நிலை ஏற்பட்டிருக்கிறது. அடுத்த போட்டியை வென்றாலோ, டிரா செய்தாலோ இந்திய அணி தொடரை வென்று சாதனை படைக்க முடியும்.

https://www.bbc.com/tamil/sport-58467975

இங்கிலாந்தை 157 ஓட்டங்களினால் தோற்கடித்த இந்தியா தொடரில் முன்னிலை

இங்கிலாந்துக்கு எதிராக லண்டன், ஓவல் மைதானத்தில் நடைபெற்ற நான்காவது டெஸ்ட் போட்டியில் இந்திய அணி 157 ஓட்டங்களினால் வெற்றி பெற்றுள்ளது.

இதன் மூலம் 5 போட்டிகள் கொண்ட டெஸ்ட் தொடரில் இந்தியா 2:1 என்ற கணக்கில் முன்னிலை பெற்றுள்ளது.

இந்தியா-இங்கிலாந்து அணிகள் இடையிலான 4 ஆவது டெஸ்ட் கிரிக்கெட் போட்டி லண்டன் ஓவல் மைதானத்தில் கடந்த 2 ஆம் திகதி தொடங்கியது. 

இதில் முதல் இன்னிங்ஸில் முறையே இந்தியா 191 ஓட்டங்களையும், இங்கிலாந்து 290 ஓட்டங்களையும் எடுத்தன. 

99 ஓட்டங்கள் பின்தங்கிய நிலையில் 2 ஆவது இன்னிங்ஸை தொடங்கிய இந்திய அணி அனைத்து விக்கெட்டுகளையும் இழந்து 466 ஓட்டங்களை குவித்து. 

தொடக்க ஆட்டக்காரர் ரோகித் சர்மா 127 ஓட்டங்களையும், புஜாரா 61 ஓட்டங்களையும் ரிஷாப் பந்த் 50 ஓட்டங்களையும், ஷர்துல் தாக்குர் 60 ஒட்டங்களையும் அணிசார்பில் அதிகபடியாக பெற்றனர்.

இதன் மூலம் இங்கிலாந்து அணிக்கு 368 ஓட்டங்கள் வெற்றி இலக்காக நிர்ணயிக்கப்பட்டது. 

இலக்கை நோக்கி 2 ஆவது இன்னிங்ஸுக்காக ஆடிய இங்கிலாந்து அணி 4 ஆவது நாள் ஆட்டம் முடிவில் 32 ஓவர்களில் விக்கெட் இழப்பின்றி 77 ஓட்டங்களை எடுத்தது. 

தொடக்க ஆட்டக்காரர்கள் ரோரி பேர்ன்ஸ் 31 ஓட்டத்துடனும், ஹசீப் ஹமீத் 43 ஓட்டத்துடனும் ஆட்டம் இழக்காமல் இருந்தனர்.

நேற்று 5 ஆவதும் மற்றும் இறுதியுமான நாள் ஆட்டம் நடந்தது. 

மேலும் 291 எடுத்தால் வெற்றி என்ற நிலையில் இங்கிலாந்து அணியின் தொடக்க ஆட்டக்காரர்கள் ரோரி பேர்ன்ஸ், ஹசீப் ஹமீத் ஆகியோர் தொடர்ந்து ஆடினார்கள். 

அணியின் ஓட்ட எண்ணிக்கை 100 ஓட்டங்களை எட்டியபோது, தொடக்க ஜோடி பிரிந்தது. 

11 ஆவது அரைசதம் அடித்த ரோரி பேர்ன்ஸ் 50 ஓட்டங்களுடனேயே ஆட்டமிழந்து வெளியேற, அடுத்து களமிறங்கிய டேவிட் மலான் 5 ஓட்டங்கள் எடுத்த நிலையில் ரன் அவுட் ஆனார்.

பின்னர் 61.3 ஆவது ஓவரில் ரவீந்திர ஜடேஜாவின் பந்து வீச்சில் ஹசீப் ஹமீத்தும் 63 ஓட்டங்களை பெற்ற நிலையில் ஆட்டமிழக்க இங்கிலாந்து அணியின் விக்கெட்டுகள் அடுத்தடுத்து சரிந்தது.

இறுதியாக இங்கிலாந்து 92.2 ஓவர்களுக்கு அனைத்து விக்கெட்டுகளையும் இழந்து 210 ஓட்டங்களை மாத்திரம் பெற்றனர்.

பந்து வீச்சில் இந்திய அணி சார்பில் உமேஷ் யாதவ் 3 விக்கெட்டுகளையும், பும்ரா, ஜடேஜா மற்றும் ஷர்துல் தாக்குர் ஆகியோர் தலா 2 விக்கெட்டுகளை கைப்பற்றினர்.

இந்த வெற்றியின் மூலம் இந்திய அணி ஐந்து போட்டிகள் கொண்ட டெஸ்ட் தொடரை 2:1 என்ற கணக்கில் கைப்பற்றியது.

இரு அணிகளுக்கு இடையிலான ஐந்தாவதும், இறுதியுமான டெஸ்ட் போட்டி எதிர்வரும் 10 ஆம் திகதி மான்செஸ்டரில் ஆரம்பமாகும்.
 

https://www.virakesari.lk/article/112805