சரளமாக ஆங்கிலம் பேசும் பிச்சை எடுக்கும் சிறுமி: வியந்த அனுபம் கெர்

பாலிவுட் நடிகர் அனுபம் கெர் பல ஆண்டுகளாக திரையுலகில் சுறுசுறுப்பாக இயங்கி கொண்டிருப்பவர். அவருடைய நடிப்புக்கு மக்கள் மத்தியில் பலத்த ரசிகர்கள் உள்ளனர். இவர் சமூக வலைதளங்களிலும் மிகவும் ஆக்டிவ்வாக இருப்பவர். இவர் தனது புகைப்படங்கள் மற்றும் வீடியோக்களை ரசிகர்களுடன் பகிர்ந்து வருவார். தற்போது அனுபம் கெர் ஒரு வீடியோவை பகிர்ந்துள்ளார். அந்த வீடியோவைப் பார்த்த ரசிகர்கள் அவரைப் பாராட்டி வருகின்றனர்.

படப்பிடிப்புக்காக இந்தி நடிகர் அனுபம் கெர் அண்டை நாடான நேபாளத்தில் உள்ளார்.

இந்த நிலையில் நடிகர் அனுபம் கெர், நேபாளம் காத்மாண்டில் பிச்சை எடுக்கும் சிறுமி ஒருவர் பேசும் தெளிவான ஆங்கில பேச்சைப் பார்த்து வியந்துள்ளார்.

நடிகர் அனுபம் கெர் அச்சிறுமியிடம், “ஏன் இங்கு பிச்சை எடுத்துக் கொண்டிருக்கிறாய்... எப்படி இவ்வளவு அழகாகவும் தெளிவாகவும் சரளமாக ஆங்கிலம் பேசுகிறாய்?” என்று கேட்கிறார்.

அதற்கு அந்த சிறுமி, “என் பெயர் ஆர்த்தி, உங்களைச் சந்திப்பதில் மிகவும் மகிழ்ச்சியடைகிறேன். நான் இந்தியாவின் ராஜஸ்தானைச் சேர்ந்தவள். பிச்சையெடுக்கும்போது ஆங்கிலம் பேச ஆரம்பித்தேன். கொஞ்சம் கொஞ்சமாக ஆங்கிலம் கற்றுக்கொண்டேன். ஏழை குடும்பத்தில் இருந்து வந்ததால், பிச்சை எடுக்கிறேன்” என்று கூறுகிறார்.

அதற்கு அவர், “ஏன் பிச்சை எடுத்துக் கொண்டிருக்கிறாய்? நீ நன்றாக ஆங்கிலம் பேசுகிறாய். இதற்காகவே வேலை கிடைக்குமே” என்று கூறுகிறார்.

“இந்தியர் என்பதால் இங்கு யாரும் வேலை கொடுப்பதில்லை. இந்தியாவுக்கு போ என்று கூறுகிறார்கள்” என்று சிறுமி கூறினார்.

“ஏன் இந்தியாவை விட்டு நேபாளம் வந்தாய்?” என்று கேட்டதற்கு, “இந்தியாவில் இதே நிலைதான் இருந்தது. இந்தியாவில் அந்தளவு சுற்றுலா பயணிகள் வருவதில்லை. இங்கு கொஞ்சம் பரவாயில்லை. ஆனால், இந்தியாவில் யாரும் உதவி செய்வதில்லை” என்று சிறுமி கூறினார்.

“பள்ளிக்குச் சென்று படிக்கிறாயா?” என்று கேட்டதற்கு, “பள்ளிக்குச் செல்ல மிகவும் விரும்புகிறேன். படித்தால் கண்டிப்பாக என் எதிர்காலம் மாறும். என் குடும்பத்தின் நிலை மாறும். படிப்பதற்கு உதவுமாறு அனைவரிடமும் கேட்பேன். ஆனால், யாரும் உதவுவது இல்லை” என்று கூறினார்.

இறுதியாக நடிகர் அனுபம் கெர், சிறுமி படிப்பதற்கான செலவைத்தான் ஏற்றுக்கொள்வதாகவும், ஜூன் மாதத்தில் இருந்து ஆர்த்தி பள்ளி செல்வாள் என்றும் உறுதியளித்தார்.

இந்த வீடியோவை தனது ட்விட்டர் பக்கத்தில் பதிவிட்டுள்ள அனுபம் கெர், “காத்மாண்டுவில் உள்ள ஒரு கோயிலுக்கு வெளியே ஆர்த்தியைப் பார்த்தேன்.அவர் ராஜஸ்தானைச் சேர்ந்தவர். அவர் என்னிடம் கொஞ்சம் பணம் மற்றும் என்னுடன் ஒரு புகைப்படம் எடுக்க வேண்டுமென்று கேட்டார். பின்னர் என்னிடம் சரளமாக ஆங்கிலத்தில் பேச ஆரம்பித்தார். அவரது கல்வி ஆர்வத்தைக் கண்டு வியந்தேன். அனுபம் கெர் பவுண்டேஷன் அவர் படிப்பதை உறுதி செய்யும்” எனப் பதிவிட்டுள்ளார்.

https://minnambalam.com/public/2021/11/09/10/anubam-kher-surprised-that-begging-girl-spoke-fluent-english-