தோட்டத் தொழிலாளர்களின் சம்பளத்தை 2 ஆயிரம் ரூபாவாக அதிகரிக்க வேண்டும் - இராதாகிருஷ்ணன் சபையில் கோரிக்கை

By T YUWARAJ

31 AUG, 2022 | 10:11 PM

(எம்.ஆர்.எம்.வசீம், இராஜதுரைஹஷான்)

தோட்டத் தொழிலாளர்களின் பிரதான உணவு கோதுமை மா என்பதால் அதன் விலை 300 ரூபாவை விட அதிகரித்துள்ளதால் தோட்டத் தொழிலாளர்களின் சம்பளத்தை 2000 ரூபாவாக அதிகரிக்க வேண்டும். அத்துடன்  பெருந்தோட்டங்களை மறுசீரமைப்பை செய்து அந்த மக்களின் வாழ்க்கையை உயர்த்த நடவடிக்கைகளை முன்னெடுக்க வேண்டும் என எதிர்க்கட்சி உறுப்பினர் வீ.இராதாகிருஷ்ணன் தெரிவித்தார்.

பாராளுமன்றத்தில் இன்று இடம்பெற்ற இடைக்கால வரவு செலவுத் திட்டம் மீதான முதலாவது நாள் விவாதத்தில் கலந்துகொண்டு உரையாற்றுகையிலேயே இவ்வாறு தெரிவித்தார்.

அவர் அங்கு தொடர்ந்து தெரிவிக்கையில்,

ஜனாதிபதி ரணில் விக்கிரமசிங்கவினால் முன்வைக்கப்பட்டுள்ள வரவு செலவுத் திட்டத்தில் ஏற்றுக்கொள்ளக் கூடிய சில விடயங்கள் இருந்தாலும், அதனை நடைமுறைப்படுத்துவதில் காணப்படும் சிக்கல்கள் தொடர்பில் அவருக்கு கூற வேண்டியுள்ளது. அவர் மொட்டுக்கட்சியின் சூழ்நிலைக் கைதியாகவே செயற்பட்டு வருகின்றார். 

இந்த நாட்டில் பொருளாதார வீழ்ச்சியால் அரசியலில் குழப்பம் உருவாகி அரசியல் ஸ்தீரமற்ற நிலைமையும் ஏற்பட்டுள்ளது. பெரும்பாலான மக்களுக்கு மூன்று வேளை உணவு இல்லை  ன  யுனிசெப் கூறியுள்ளது. 10 ஆயிரத்திற்கும் மேற்பட்ட இளைஞர் யுவதிகள் தொழிலற்றவர்களாகவும் உள்ளனர். தொழில்துறையில் ஏற்பட்டுள்ள வீழ்ச்சியே இதற்கு காரணமாக அமைந்துள்ளது. விவசாயத் துறை, கைத் தொழிற்துறை, உற்பத்தித் துறை, சுற்றுலாத்துறை, ஏற்றுமதி துறை என்பன வீழ்ச்சியடைந்துள்ளன.

அத்துடன் கோதுமை மா விலை அதிகரிப்பு காரணமாக பாண்விலை அதிகரித்து பேக்கரிகள் 60 விதமானவை மூடப்பட்டுள்ளன. ஒரு உணவுப் பார்சலின் விலை 500 ரூபாவாக அதிகரித்துள்ளது. தோட்டத் தொழிலாளர்களின் பிரதான உணவு கோதுமை மா என்பதால் அதன் விலை 300 ரூபாவை விட அதிகரித்துள்ள நிலையில் தோட்டத் தொழிலாளர்களின் சம்பளத்தை 2000 ரூபாயாகவாவது அதிகரிக்க வேண்டும். வாகன விற்பனையாளர்கள் பெரும் நெருக்கடியை எதிர்கொண்டுள்ளனர். ஆடைத் தொழில் வீழ்ச்சியுற்றுள்ள நிலையில் சுற்றுலாத் துறையும் வீழ்ச்சி கண்டுள்ளது. நாட்டில் அமைதியற்ற நிலை காணப்படுவதால் உல்லாசப் பிரயாணிகள் இங்கு வருவதற்கு அச்சம் கொள்கின்றனர்.

அத்துடன் பல்வேறு நிறுவனங்களை மறுசீரமைப்பது தொடர்பில் ஜனாதிபதி கூறியுள்ளார். இதில் பெருந்தோட்டங்களையும் மறுசீரமைப்பை செய்து அந்த மக்களின் வாழ்க்கையை உயர்த்த நடவடிக்கைகளை முன்னெடுக்குமாறும் கேட்டுக்கொள்கின்றேன்.

இதேவேளை எங்களின் வெளிநாட்டுக் கொள்கைகளில் மாற்றங்களை மேற்கொள்ள வேண்டும். இந்தியா - இலங்கைக்கு இடையிலான உறவு சீனா - இலங்கை இடையிலான உறவுகள் சீர்குலைந்துள்ளன. எங்களுக்கு அதிகளவு உதவும் இந்தியாவுடனான பகைமை காரணத்தினால் எதிர்காலத்தில் நாங்கள் எதிர்பார்க்கும் விடயங்கள் முற்றுமுழுதாக இல்லாமல் போகும் சூழ்நிலை காணப்படுகின்றது என்றார். https://www.virakesari.lk/article/134783

முதல் 1000 ரூபா சம்பள உயர்வு தரலாம் என்றதே கொடுக்கப்படவில்லை. இப்ப 2000 மாம்.