மாவட்ட கண்காணிப்பாளர் தலைமையில் தனிப்படை

குறிப்பாக, இந்த சம்பவத்தில் பாதிக்கப்பட்ட சிறுமி பெற்றோரை இழந்து அவரது உறவினர் கட்டுப்பாட்டில் வளர்ந்து வருகிறார். இதனிடையே இந்த சம்பவத்திற்குப் பின்னர் வீடு திரும்பிய மாணவி நடந்த விஷயத்தை வீட்டில் தெரிவித்துள்ளார். இதையடுத்து, சிறுமியின் உறவினர்கள் அச்சிறுமியையும் உடன் இருந்த மாணவரையும் விழுப்புரம் முண்டியம்பாக்கத்தில் உள்ள அரசு மருத்துவக் கல்லூரி மற்றும் மருத்துவமனையில் அனுமதித்துள்ளனர். அங்கு பாதிக்கப்பட்ட இருவருக்கும் சிகிச்சை அளிக்கப்பட்டு வருகிறது.

இச்சம்பவம் தொடர்பாக விழுப்புரம் காவல் துறையினர் வழக்குப் பதிவு செய்து விசாரணை செய்து வருகின்றனர். மேலும், இந்த வழக்கில் குற்றச் சம்பவத்தில் ஈடுபட்ட குற்றவாளிகள் தலைமறைவாக உள்ளதால் அவர்களைப் பிடிக்க விழுப்புரம் மாவட்ட காவல் கண்காணிப்பாளர் ஸ்ரீ நாதா தலைமையில் தனிப்படை அமைக்கப்பட்டுள்ளது.

"கூட்டுப் பாலியல் வல்லுறவு இல்லை"

இது குறித்து விழுப்புரம் மாவட்ட காவல் கண்காணிப்பாளர் ஸ்ரீ நாதா கூறுகையில், "விழுப்புரம் மாவட்டம் விக்கிரவாண்டி அருகே இந்த சம்பவம் நடைபெற்றுள்ளது. இதில் சம்பந்தப்பட்ட மாணவி மற்றும் மாணவர் இருவருமே 17 வயது உடையவர்கள். இவர்கள் இருவருமே நேற்றிரவு தனியாக ஒரு பகுதிக்கு சென்றுள்ளனர்.

அப்போது, அப்பகுதியில் வந்த மூன்று பேர் இவர்கள் இருவரையும் தாக்கிவிட்டு, இவர்களிடம் இருந்து செல்பேசி மற்றும் வெள்ளி சங்கிலியைப் பறித்துள்ளனர். மேலும், இந்த மூன்று பேரில் ஒருவர் சிறுமியை பாலியல் வல்லுறவு செய்ய முயன்றுள்ளார். இதுதொடர்பாக வழக்குப் பதிவு செய்யப்பட்டு விசாரணை செய்து வருகிறோம். பாதிக்கப்பட்ட பெண் கொடுத்த புகாரின் அடிப்படையில் இந்த பெண் கூட்டுப் பாலியல் வல்லுறவுக்கு ஆளாகவில்லை" என்று தெரிவித்துள்ளார்.

https://www.bbc.com/tamil/articles/ce4yw5vr8rgo