தமிழ் தேசிய மக்கள் முன்னணியின் ஏற்பாட்டில் அம்பாறையில்  இருந்து முள்ளிவாய்க்கால் வரை தமிழின படுகொலைக்கு நீதி கோரி, படுகொலையினை சித்தரிக்கும் படுகொலை உருவப்படங்கள் தாங்கிய வாகன ஊர்திப் பவனி புதன்கிழமை (17) இரவு முள்ளிவாக்கால் நினைவு முற்றத்தை அடைந்தது.

மே 18 முள்ளிவாய்க்கால் தமிழ் இனப்படுகொலையின் 14 வது ஆண்டு நினைவேந்தல் நிகழ்வையொட்டி தமிழின படுகொலைக்கு நீதி கோரி தமிழ் தேசிய மக்கள் முன்னணியின் ஏற்பாட்டில் இனப்படுகொலையை சித்தரிக்கும் வகையில் வாகன ஊர்தி பவனி ஒன்று அம்பாறை வீரமுனை கோவிலில் 1990 ம் ஆண்டு தமிழர்கள் 175 பேர் படுகொலை செய்யப்பட்ட நினைவு தூபில் சுடர் ஏற்றி படுகொலை செய்யப்பட்டவர்களுக்கு ஆத்ம சாந்திவேண்டி 2 நிமிட மௌன அஞ்சலி செலுத்தி ஊர்தி பவனியை கடந்த 11.05.2023 அன்று ஆரம்பித்திருந்தனர்.

இந்த ஊர்திபவனி அங்கிருந்து மட்டக்களப்பு  திருகோணமலை ஊடாக முல்லைத்தீவை வந்தடைந்து  வவுனியா மன்னார் யாழ்ப்பாணம் கிளிநொச்சி ஆகிய மாவட்டங்களுக்கு சென்று தமிழ் இனப்படுகொலைகள் இடம்பெற்ற இடங்களில் அஞ்சலி செலுத்தி  புதன்கிழமை (17) இரவு முள்ளிவாக்கால் நினைவு முற்றத்தை வந்தடைந்துள்ளது.