அரசியல் தீர்வுக்கான நகல் யோசனை இந்தியத் தரப்புக்கு கையளிக்கப்படும் மன்மோகன்சிங்கிடம் மஹிந்தரே நேரில் வழங்குவார்

இலங்கை இனப்பிரச்சினைக்குத் தீர்வு காண்பதற்கு தமது அரசு வைத்திருக்கும் யோசனைத் திட்டத்தின் நகல் பிரதி ஒன்றை இலங்கை ஜனாதிபதி மஹிந்த ராஜபக்ஷவே நேரடியாக இந்தியப் பிரதமர் மன்மோகன் சிங்கிடம் நியூயோர்க்கில் வைத்துக் கையளிப்பார் என விடயமறிந்த வட்டாரங்களில் பேச்சடிபடுகின்றது.

இம்மாதம் கடைசி வாரத்தில் நியூயோர்க்கில் நடைபெறும் ஐ.நா. பொதுச் சபைக் கூட்டத்தில் பங்கு பற்றுவதற்காக இலங்கை,இந்திய நாடுகள் உட்பட பல நாடுகளின் தலைவர்கள் நியூயோர்க் செல்லுகின்றனர்.

எதிர்வரும் 24ஆம் திகதி ஐ.நா. பொதுச் சபையில் இலங்கை ஜனாதிபதி மஹிந்த ராஜபக்ஷ உரையாற்றுகின்றார்.

பொதுச் சபைக் கூட்டத்தில் பங்குபற்றும் தலைவர்கள் அக்கூட்டத்துக்குப் புறம்பாக,அங்கு வந்துள்ள ஏனைய தலைவர்களோடு தனித்தனிச் சந்திப்புகளிலும் கலந்தாலோசனைகளிலும் ஈடுபடவிருக்கின்றனர்.

ஜனாதிபதி மஹிந்த ராஜபக்ஷவும் இவ்வாறு பல தலைவர்களோடு தனியான சந்திப்புகளில் ஈடுபடவிருக்கின்றார்.

அந்த வகையில் இந்தியப் பிரதமர் மன்மோகன்சிங்குக்கும், இலங்கை ஜனாதிபதி மஹிந்த ராஜபக்ஷவுக்கும் இடையில் தனியான சந்திப்பு இடம்பெறவிருக்கின்றது.

அப்போதே இலங்கை இனப்பிரச்சினைக்குத் தீர்வு காண்பதற்கு தாம் மனதில் கொண்டுள்ள யோசனைத் திட்டத்தின் நகலை எழுத்தில் இந்தியப் பிரதமர் மன்மோகன்சிங்கிடம் இலங்கை ஜனாதிபதி ராஜபக்ஷ நேரில் ஒப்படைப்பார் என விடயமறிந்த வட்டாரங்கள் தெரிவித்தன.

"ஒற்றையாட்சிக்குள் அதிகளவான அதிகாரப் பரவலாக்கம்' என்ற அடிப்படையிலான தமது திட்டத்தின் விவரத்தை ஜனாதிபதி மஹிந்த ராஜபக்ஷஇந்தியப் பிரதமரிடம் கையளித்து விளக்குவார் என கொழும்பு அரசியல் வட்டாரங்கள் தகவல் வெளியிட்டன

-உதயன்

சர்வதேசத்திற்கு நாடகங்களை மிகச்சிறப்பான முறையில் அரங்கேற்றிக்கொண்டு இருக்கின்றார்கள். சிறீ லங்கா பயங்கரவாத அரசு நீண்ட கால நோக்கில் தனது கால அட்டவணைகளை எவ்வளவு நேர்த்தியாக தயாரித்து வைத்து உள்ளது என்பதற்கு இது ஒரு உதாரணம். இவ்வாறான செயற்பாடுகள் மூலம் சிறீ லங்காவிற்கு சர்வதேசத்திடம் நல்லபிள்ளை என்ற அங்கீகாரம் கிடைக்க வசதிப்படுகின்றது.

ஒற்றையாட்சி என்று ஒற்றையடிப் பாதையில் செல்லும் மகிந்த ராஜபக்ஷ திருந்துவது எப்போது? தனது தீர்வு திட்ட நகலை மகிந்த ராஜபக்ஷ பல்நாட்டு தலைவர்களிடம் விளம்பரம் செய்யப்போகின்றார் போல இருக்கின்றது.