ஸ்பெயின் நாட்டின் கால் பந்தாட்டத் தலைவர் லூயிஸ் ரூபியல்ஸ்(46) தான் பதவி விலகப் போவதில்லை என்று ஒரு பக்கம் அடம் பிடித்துக் கொண்டிருக்க மறு புறம் அவரது தாயார், தனது மகனுக்கு எதிரான ‘இரத்த வேட்டையை நிறுத்துங்கள், நடந்த சம்பவத்தின் உண்மையைச் சொல்ல ஜெனிபர் ஹெர்மோசோவை அழைத்து வாருங்கள்” என்ற கோரிக்கையை முன் வைத்து தேவாலயத்தில் உண்ணாவிரதத்தை ஆரம்பித்திருக்கிறார்.

மகளிருக்கான உலகக் கால் பந்து விளையாட்டுப் போட்டியில் (20.08.2023) ஸ்பெயின் அணி, இங்கிலாந்து அணியை 1:0 என்ற கோல் அடிப்படையில் வெற்றி பெற்றிருந்தது. அதனைத் தொடர்ந்து நடந்த பரிசளிப்பு நிகழ்ச்சியில் ஸ்பெயின் நாட்டின் கால் பந்தாட்டத் தலைவர் லூயிஸ் ரூபியல்ஸ், ஆட்ட வீராங்கனையான ஜெனிபர் ஹெர்மோசோவின் உதட்டில் முத்தமிட்டிருந்தார். இந்தச் சம்பவம் ஸ்பெயின் விளையாட்டுத்துறையில் மட்டுமன்றி FIFA உலகக் கால் பந்து அமைப்பிலும் பெரும் அதிர்ச்சியை ஏற்படுத்தியிருந்தது.

ஜெனிபர் ஹெர்மோசோவின் ஒப்புதலுடனேயே அவளது உதட்டில் தான் முத்தமிட்டதாக  லூயிஸ் ரூபியல்ஸ் தனது அறிக்கையில் வெளிப்படுத்தி இருந்தார். தனது இரு கன்னத்திலும் முத்தமிட்ட லூயிஸ் ரூபியல்ஸ் திடீரென தனது இரு கைகளாலும் தனது தலையைப் பிடித்து உதட்டில் முத்தமிட்டார் என ஜெனிபர் ஹெர்மோசோ ஊடகங்களுக்குக் கூறியிருந்தார். அவர் மேலும் கூறுகையில், தான் பாதிக்கப்பட்டதாகவும், ஒரு தாக்குதலுக்குப் பலியாவதாக உணர்ந்ததாகவும் , இது தகாத,தான் சம்மதிக்காத ஒரு ஆணவச் செயல் என்றும் குறிப்பிட்டிருந்தார். லூயிஸ் ரூபியல்ஸ் மீது இது சம்பந்தமாக நான்கு வழக்குகள் இப்பொழுது நீதி மன்றத்தில் பதியப் பட்டிருக்கின்றன.

கடந்த வெள்ளிக்கிழமையில் இருந்து 90 நாட்களுக்கு லூயிஸ் ரூபியல்ஸை பணியில் இருந்து இடை நிறுத்தி இருப்பதாக FIFA உலக கால் பந்து அமைப்பு அறிவித்திருக்கும் நிலையில், லூயிஸ் ரூபியல்ஸின் தாயார் தனது நகரான மோட்ரிலில் உள்ள தேவாலயத்தில்  லூயிஸ் ரூபியல்ஸுக்காக  நீதி கேட்டு உண்ணாவிரதத்தை இன்று ஆரம்பித்திருக்கிறார். 

ஸ்பெயின் அரசு வழக்கறிஞர் அலுவலகம், இன்று லூயிஸ் ரூபியல்ஸுக்கு எதிரான  விசாரணைகள் தொடங்கப்பட்டதாக அறிவித்தது.  இந்தத் தாக்குதல் "பாலியல் வன்கொடுமையாக" இருக்குமா என்பது குறித்து விசாரிக்கப்பட உள்ளது. ஜெனிபர் ஹெர்மோசோ தனது தரப்பு விடயங்களை 15 நாட்களுக்குள் தங்களுக்கு சமர்பிக்க வேண்டும் என அரசு வழக்கறிஞர் அலுவலகம் அவருக்கு இன்று மாலை அறிவித்திருக்கிறது. 

தனது சம்மத்துடன்தான் லூயிஸ் ரூபியல்ஸ் தனது உதட்டில் முத்தமிட்டார் என ஜெனிபர் ஹெர்மோசோ மட்டும் சொல்வாரானால், பாலியல் துஷ்பிரயோகம் இல்லை என லூயிஸ் ரூபியல்ஸ் வழக்குகளில் இருந்து விடுபடலாம். ஆனால் தொடர்ந்து ஸ்பெயின் நாட்டின் கால் பந்தாட்டத் தலைவர், பதவியில் இருக்க வாய்பபு உள்ளதா என்பது கேள்வி.

 

பதிவுக்கு நன்றி.

இந்த சம்பவத்தை பரந்தளவில் ஸ்பானிய கலாச்சார நடைமுறைகளோடு இணைத்துப் பார்க்க வேண்டும். ஸ்பெயின் பாரம்பரியம், பெண்களை ஆசிய கலாச்சாரங்கள் போல ஆண்களுக்குக் கீழே வைத்திருக்கா விட்டாலும், ஆண்களுக்கு பெண்களின் உடல் மீது தனியுரிமை இருக்கிறது என்பதை மறைமுகமாக வலியுறுத்திய ஒரு பாரம்பரியம். சில ஆண்டுகள் முன்பு, பலர் சேர்ந்து பாலியல் இம்சைக்குள்ளாக்கிய ஒரு பெண்ணை, அவர் தெளிவாக "வேண்டாமென்று மறுக்காமையால், அது பாலியல் குற்றமல்ல" என்று தீர்ப்பு வந்த நாடு ஸ்பெயின். இதன் பின்னர் தான் "No Means No!" என்ற கோசம் ஸ்பெயினில் வலுப்பெற்று, சட்டத்திலும் மாற்றம் வந்தது.

இந்த "ஆண்சிங்கம்", அனுமதியில்லாமல் உதட்டில் முத்தமிட்டதுமல்லாமல், "கேட்டு அவர் ஓமென்ற பின் முத்தமிட்டேன், அவர் என்னைக் கட்டித் தூக்கினார்!" என்றெல்லாம் சும்மா அலட்டிக் கொண்டிருக்காமல் ஒரு மன்னிப்பைக் கேட்டிருக்கலாம். அந்த வீராங்கனையும் பேசாமல் மன்னித்திருப்பார். 

 

 

மகளிர் உலக உதை பந்தாட்டத்தில் தந்த  முத்தமும் அதனால் வந்த விமர்சனங்களையும்   முதலில் லூயிஸ் ரூபியள்ஸ் மிகச் சாதாரணமாகவே எடுத்துக் கொண்டிருந்தார். இப்பொழுதுதான் அதன் தாக்கம் எவ்வளவு பெரியது என்பதை அவர் உணர ஆரம்பித்திருக்கிறார். ஆங்கில ஊடகவியலாளர் பியர்ஸ் மோர்கன் உடனான நேர்காணல் மூலமாக, தான் தனது பதவியை விட்டு விலகப்  போவதாக, லூயிஸ் ரூபியள்ஸ் அறிவித்திருக்கிறார். 

மேலும், அவர் மீது விழுந்திருக்கும் அழுத்தங்கள், அவரது தாயார் மேற்கொண்ட உண்ணாவிரதப் போராட்டம், அவரை பணியில் இருந்து இடைநிறுத்திய FIFAவின் செயற்பாடுகள், உலக அளவில் அவர் மேல் வந்திருந்த விமர்சனங்கள் எல்லாமே தன்னைத் தொடர்ந்து கால் பந்தாட்டம் தொடர்பான செயற்பாடுகளைச் செய்ய  விடாமல் இடையூறாக இருப்பதால் தான் தனது பதவியை விட்டு விலக இருப்பதாக அந்த நேர்காணலில் லூயிஸ் ரூபியள்ஸ் குறிப்பிட்டிருக்கிறார்.