கடத்தப்பட்டோர் குடும்பங்களை யாழ். கொழும்பில் மனித உரிமைகளுக்கான ஐ.நா. தூதுவர் சந்திப்பார் மனோ கணேசன் எம்.பி. அறிவிப்பு

கடத்தப்பட்டோர் குடும்பங்களை யாழ். கொழும்பில் மனித உரிமைகளுக்கான ஐ.நா. தூதுவர் சந்திப்பார் மனோ கணேசன் எம்.பி. அறிவிப்பு

மனித உரிமைகளுக்கான ஐ.நாவின் தூதுவர் லுயிஸ்ஆர்பர் அம்மையார் அடுத்த மாதம் இலங்கை வருகின்றார்.இலங்கையில் கடத்தப்பட்டுக் காணாமற் போனோரின் குடும்பத்தவர்களை அவர் யாழ்ப்பாணத்திலும், கொழும்பிலும் சந்திப்பார்.

அதேசமயம் தமது உயிருக்கு அஞ்சி மனித உரிமைகள் ஆணைக்குழுவின் யாழ். அலுவலகத்தில் தஞ்சமடைந்து, தற்சமயம் பாதுகாப்புக்காக யாழ். சிறைச்சாலையில் வைக்கப்பட்டிருப்போரையும் அவர் நேரில் சந்தித்துப் பேசுவார்.

மேலக மக்கள் முன்னணியின் தலைவரும் கொழும்பு மாவட்ட நாடாளுமன்ற உறுப்பினரும், மக்கள் கண்காணிப்புக் குழுவின் அமைப்பாளரும், ஆட்கடத்தல்கள், காணாமற் போகச் செய்தல், படுகொலைகள் போன்ற மோசமான மனித உரிமை மீறல்களுக்கு எதிராகக் குரல் எழுப்பி வருபவருமான மனோ கணேசன் இத்தகவல்களை வெளியிட்டார்.

லுயிஸ் ஆர்பர் அம்மையாரின் இலங்கை விஜயத்தை ஒட்டிய ஏற்பாடுகளைக் கவனிக்கும் தரப்புகளுடன் கலந்துரையாடிய பின்னரே இத்தகவல்களை அவர் வெளியிட்டிருக்கின்றார்.

இது தொடர்பாக அவர் மேலும் தெரிவித்தவை வருமாறு:

எதிர்வரும் ஒக்டோபர் மாதம் இலங்கை வரும் மனித உரிமைகளுக்கான ஐ.நா. தூதுவர் லுயிஸ் ஆர்பர் அம்மையார் இங்கு கடத்தப்பட்டு காணாமல் போனோரது குடும்பங்களை நேரடியாகச் சந்திக்க உள்ளார்.

மக்கள் கண்காணிப்புக்குழு இவ்வருடம் ஏப்ரல் 9 ஆம் திகதியும், ஓகஸ்ட் முதலாம் திகதியும் நடத்திய காணாமல் போனோர் தொடர்பான மாநாட்டில் கலந்துகொண்டோரும், ஏனைய பாதிக்கப்பட்டவர்களும் இந்நிகழ்வுகளில் கலந்துகொள்ளவேண்டும்.

கொழும்பில் ஒக்டோபர் 11 ஆம் திகதியும், யாழ்ப்பாணத்தில் ஒக்டோபர் 12 ஆம் திகதியும் இச்சந்திப்புகள் இடம்பெறும்.

இது பற்றிய நேரமும், இடமும் எம்மால் அடுத்த வாரத்தில் அறிவிக்கப்படும்.

தமது உறவுகளை இழந்து வாடும் அப்பாவி மக்களின் போராட்டத்தை நாம் முன்னெடுத்து வருவதன் பிரதிபலனாக இச்சந்திப்புகள் ஏற்பாடு செய்யப்படுகின்றன.

மனித உரிமைகள் தொடர்பில் அகில உலகின் அதியுயர் பிரமுகரான மனித உரிமைகளுக்கான ஐ. நா. தூதுவரை நேரடியாகச் சந்திப்பதற்கு, பாதிக்கப்பட்ட மக்களுக்கு வாய்ப்பு வழங்கப்படவேண்டும் என நான் சம்பந்தப்பட்டோரைச் சந்தித்துக் கோரியுள்ளேன்.

அம்மையாரின் விஜயத்தின்

பின்னர் விசேட மாநாடு

ஆர்பர் அம்மையாரின் இலங்கை விஜயத்தைத் தொடர்ந்து, இலங்கையில் இதுவரை காணாமல் போனவர்கள் விவகாரம் உள்ளிட்ட மனித உரிமை மீறல்கள் தொடர்பில் விசேட மாநாடு ஜெனிவாவில் கூட்டப்பட உள்ளது.

காணாமல் போனோர் சம்பந்தமாக பல்வேறு குழுக்களையும், நிறுவனங்களையும் அமைத்து அரசு நாடகமாடுகிறது. மனித உரிமைகள் அமைச்சு, அதற்கான ஆலோசனைக்குழு, மனித உரிமைகள் ஆணைக்குழு, மஹாநாம திலகரட்ண ஆணைக்குழு, விசேட ஜனாதிபதி ஆணைக்குழு, சர்வதேச விற்பன்னர்கள் குழு, கடைசியாக அமைக்கப்பட்ட அமைச்சர்களின் குழு ஆகிய அனைத்தும் இவ்விடயத்தில் அரசின் மீது தொடுக்கப்பட்டுள்ள குற்றச்சாட்டுகளை மறைப்பதற்காக உருவாக்கப்பட்டவை என்பது இன்று திட்டவட்டமாக நிருபணமாகியுள்ளன.

இந்தக் குழுக்களை நம்புவதற்கு நாம் தயாராக இல்லை.

சர்வதேச சுதந்திர மனித உரிமைக் கண்காணிப்புக்குழு இலங்கையில் அமைக்கப்படவேண்டும் என்ற எமது கோரிக்கை வலுவடைந்து வருகின்றது. இதற்கு சர்வதேச அமைப்புகள் ஆதரவு தெரிவித்து வருகின்றன.

சட்டவிரோதமான முறையில் பல்வேறு தடுப்பு முகாம்களில் தடுத்து வைக்கப்பட்டுள்ள அப்பாவிகள் மேற்படி அமைப்பை உருவாக்குவதன்மூலமே விடுவிக்கப்பட முடியும்.

எனவே அரசின் பொய்ப்பிரசாரங்கள் ஐ.நா. தூதரின் விஜயத்தின்போது முறியடிக்கப்படுவதற்கு பாதிக்கப்பட்டுள்ள நமது மக்கள் எமக்கு முழுமையான ஒத்துழைப்பைத் தருவதற்குத் தயாராக வேண்டும். என்றார்.

-உதயன்